-
یہوواہ دے گواہواں دِیاں عبادتاں تے جا کے توانوں کیہہ فائدہ ہوئے گا؟خوشیاں بھری زندگی پاؤ—ہُن تے ہمیشاں تک—اِک دلچسپ بائبل کورس
-
-
سبق نمبر 10
یہوواہ دے گواہواں دِیاں عبادتاں تے جا کے توانوں کیہہ فائدہ ہوئے گا؟
کیہہ تُسی یہوواہ دے گواہواں دی کسے عبادت تے گئے او؟ جے نئیں تے شاید توانوں پہلی واری اوتھے جان چ تھوڑی جھجھک محسوس ہووے۔ تُسی شاید سوچو کہ ایہناں عبادتاں چ کیہہ ہوندا اے؟ ایہناں چ جانا ضروری کیوں اے؟ مینوں ایہناں چ جان نال کیہہ فائدہ ہوئے گا؟ ایس سبق چ تُسی سکھو گے کہ ایہناں عبادتاں چ جا کے نہ صرف توانوں ذاتی طور تے فائدہ ہوئے گا سگوں خدا نال تواڈا رشتہ وی گُوڑھا ہوئے گا۔
1. یہوواہ دے گواہ کٹھے ہو کے عبادت کیوں کردے نیں؟
ایہدی سب توں وڈی وجہ زبور لکھن والے اِک بندے نے دَسی۔ اوہنے کہیا کہ مَیں جماعتاں چ یہوواہ نُوں مبارک کہواں گا۔ (زبور 26:12) پرانے زمانے دے یہوواہ دے خادماں وانگوں اَج یہوواہ دے گواہ وی بڑی خوشی نال عبادت لئی کٹھے ہوندے نیں۔ اوہ پوری دُنیا چ ہر ہفتے مِل کے خدا دی عبادت کردے، اوہدی حمد لئی گیت گاندے تے اوہدے کولوں دُعا کردے نیں۔ نالے ہر سال اوہناں دِیاں کنونشناں وی ہوندیاں نیں۔
2. تُسی ساڈیاں عبادتاں تے آ کے کیہہ سکھو گے؟
ساڈیاں عبادتاں چ خدا دے کلام دِیاں گلاں نُوں سمجھایا جاندا اے۔ (نحمیاہ 8:8 نُوں پڑھو۔) ایہناں عبادتاں چ تُسی یہوواہ خدا تے اوہدیاں شاندار خوبیاں بارے سکھو گے۔ جدوں تُسی سکھو گے کہ اوہ توانوں کِنّاں پیار کردا اے تے تُسی وی اوہنوں پیار کرو گے تے اوہدے دوست بن جاؤ گے۔ تُسی ایہہ وی سکھو گے کہ تُسی اپنی زندگی نُوں خوشیاں نال کیویں بھر سکدے او۔—یسعیاہ 48:17، 18۔
3. ساڈیاں عبادتاں چ تُسی جیہڑے لوکاں نُوں ملو گے، اوہ تواڈی مدد کیویں کرن گے؟
یہوواہ خدا چاہندا اے کہ اَسی اِک دُوجے بارے سوچدے رہیے تاکہ محبت تے چنگے کم کرن لئی اِک دُوجے دا حوصلہ ودھائیے۔ تے اِک دُوجے نال جمع ہون چ ناغہ نہ کریئے۔ (عبرانیوں 10:24، 25) ساڈیاں عبادتاں چ تُسی ایہو جہے لوکاں نُوں ملو گے جیہڑے اِک دُوجے نال پیار کردے نیں تے جیویں تُسی یہوواہ بارے سکھنا چاہندے او، اوہ وی سکھنا چاہندے نیں۔ اوہ تواڈے نال پاک کلام وچوں حوصلہ ودھان والیاں گلاں کرن گے۔ (رومیوں 1:11، 12 نُوں پڑھو۔) تُسی اوتھے ایہو جہے نوجواناں، ویائےورے تے کنوارے لوکاں نُوں ملو گے جیہڑے مشکلاں دے باوجود خوش نیں۔ تُسی اوہناں کولوں مشکلاں دا مقابلہ کرنا سکھو گے۔ ایہناں ساریاں گلاں دی وجہ توں یہوواہ چاہندا اے کہ اَسی باقاعدگی نال کٹھے ہو کے عبادت کرئیے۔
ہور سوچوچار لئی
ایہہ جانو کہ یہوواہ دے گواہواں دِیاں عبادتاں چ کیہہ ہوندا اے تے سانوں ایہناں چ جان دی کوشش کیوں کرنی چاہی دی اے۔
4. یہوواہ دے گواہواں دِیاں عبادتاں
پہلی صدی چ مسیحی یہوواہ دی عبادت کرن لئی باقاعدگی نال جمع ہوندے سن۔ (رومیوں 16:3-5) کُلسّیوں 3:16 نُوں پڑھو تے فیر ایس سوال تے گل بات کرو:
پہلی صدی چ مسیحی یہوواہ دی عبادت کیویں کردے سن؟
اَج یہوواہ دے گواہ وی اوہدی عبادت کرن لئی باقاعدگی نال جمع ہوندے نیں۔ ایہہ ویکھن لئی کہ اوہناں دِیاں عبادتاں چ کیہہ ہوندا اے ایہہ ویڈیو چلاؤ۔ ایہدے بعد اوس تصویر نُوں ویکھو جدے چ عبادت ہو رہی اے تے فیر ایہناں سوالاں تے گل بات کرو:
ساڈیاں عبادتاں چ جو کجھ ہوندا اے تے جو کجھ کُلسّیوں 3:16 چ لکھیا اے، اوہدے چ کیہڑیاں گلاں مِلدیاں جلدیاں نیں؟
ویڈیو یاں تصویر چ توانوں ساڈیاں عبادتاں بارے ہور کیہڑی گل چنگی لگی اے؟
2-کُرنتھیوں 9:7 نُوں پڑھو تے فیر ایس سوال تے گل بات کرو:
یہوواہ دے گواہواں دِیاں عبادتاں تے چندہ کیوں نئیں لیا جاندا؟
جیس یہوواہ دے گواہ نال تُسی بائبل کورس کر رہے او، اوہدے نال مِل کے اوہناں گلاں تے غور کرو جیہڑیاں ایس ہفتے دی عبادت چ سکھائیاں جان گیاں۔
عبادت دا کیہڑا حصہ توانوں سب توں زیادہ فائدہمند یاں چنگا لگدا اے؟
کیہہ توانوں پتہ اے؟
تُسی ساڈی ویبسائٹ jw.org توں ویکھ سکدے او کہ پوری دُنیا چ ساڈیاں عبادتاں کدوں تے کتھے ہوندیاں نیں۔
1. ساڈیاں عبادتاں گیت تے دُعا نال شروع تے ختم ہوندیاں نیں۔ ایہناں چ تقریراں ہوندیاں نیں نالے منظر تے ویڈیوز وکھائیاں جاندیاں نیں۔
2. عبادت دے کجھ حصیاں چ سوال جواب ہوندے نیں۔ ایہناں چ عبادت تے آن والے لوک جواب دے سکدے نیں۔
3. ہر کوئی عبادت چ آ سکدا اے، بچے، جوان، بُڈھے، ویائےورے تے کنوارے وغیرہ۔
4. ساڈیاں عبادتاں چ شامل ہون لئی پیسے نئیں دینے پیندے تے ایہناں چ کوئی چندہ وی نئیں لیا جاندا۔
5. عبادتاں تے جان لئی کوشش کرنا ضروری اے
ایس سلسلے چ یسوع مسیح دے گھر والیاں دی مثال تے غور کرو۔ اوہ ناصرت دے علاقے چ رہندے سن۔ پر ہر سال اوہناں نُوں اِک سالانہ عید لئی یروشلیم جانا پیندا سی۔ ایہدے لئی اوہناں نُوں ٹیڑھے میڑھے پہاڑی رستیاں تے کوئی 100 کلومیٹر دا سفر کرنا پیندا سی جدے چ تقریباً تِن دن لگ جاندے سن۔ لُوقا 2:39-42 نُوں پڑھو تے فیر ایہناں سوالاں تے گل بات کرو:
کیہہ اوہناں لئی ایہہ سفر سوکھا ہوندا سی؟
توانوں عبادتاں چ جان لئی کوشش کیوں کرنی پے سکدی اے؟
کیہہ توانوں لگدا اے کہ ایس کوشش دا توانوں کوئی فائدہ ہوئے گا؟ جے ہاں تے کیوں؟
بائبل چ دَسیا گیا اے کہ عبادت لئی کٹھے ہونا بوہت ضروری اے۔ عبرانیوں 10:24، 25 نُوں پڑھو تے فیر ایس سوال تے گل بات کرو:
سانوں باقاعدگی نال عبادتاں چ کیوں جانا چاہی دا اے؟
کجھ لوکاں دی رائے: ”عبادت چ جان دی کوئی لوڑ نئیں۔ گھر بیٹھ کے بائبل پڑھنا کافی اے۔“
بائبل دی کیہڑی ایت یاں مثال توں پتہ چلدا اے کہ یہوواہ چاہندا اے کہ اَسی عبادت لئی جمع ہوئیے؟
خلاصہ
عبادتاں تے جا کے تُسی یہوواہ خدا نُوں ہور چنگی طرحاں جان سکو گے، اوہدے نال اپنی دوستی مضبوط کر سکو گے تے دُوجیاں نال مِل کے اوہدی عبادت کر سکو گے۔
دہرائی
یہوواہ ایہہ کیوں چاہندا اے کہ اَسی دُوجیاں نال مِل کے اوہدی عبادت کرئیے؟
تُسی یہوواہ دے گواہواں دِیاں عبادتاں چ کیہہ سکھو گے؟
توانوں ایہناں عبادتاں توں ہور کیہڑے فائدے ہون گے؟
ہور جانن لئی
جے توانوں ساڈیاں عبادتاں تے جان توں جھجھک محسوس ہو رہی اے تے تُسی کیہہ کر سکدے او؟ ویکھو کہ عبادتاں تے جان توں گھبران والا اِک بندہ کیویں بڑے شوق نال عبادتاں تے جان لگ پیا۔
ایس ویڈیو چ ویکھو کہ اِک نوجوان نُوں یہوواہ دے گواہواں دِیاں عبادتاں کیوں چنگیاں لگیاں تے اوہنے کیہہ کیتا تاکہ اوہ باقاعدگی نال عبادتاں چ جاندا رہوے۔
ایس مضمون چ پڑھو کہ کجھ لوک عبادتاں چ جان بارے کیہہ محسوس کردے نیں۔
سانوں یہوواہ دے گواہواں دِیاں عبادتاں چ کیوں جانا چاہی دا اے؟ (ویبسائٹ تے مضمون)
ایس مضمون چ پڑھو کہ یہوواہ دے گواہواں دی اِک عبادت تے جان نال اِک ایہو جہے بندے دی زندگی کیویں بدل گئی جیہڑا مار کٹائی کردا سی۔
مَیں اپنی پستول کے بغیر کہیں نہیں جاتا تھا (مینارِنگہبانی دا مضمون)
-
-
خدا دی بادشاہی ہُن حکمرانی کر رہی اے۔خوشیاں بھری زندگی پاؤ—ہُن تے ہمیشاں تک—اِک دلچسپ بائبل کورس
-
-
5. 1914 توں دُنیا بالکل بدل گئی اے
ویڈیو چلاؤ۔
یسوع نے دَسیا سی کہ جدوں اوہ بادشاہ بنے گا تے دُنیا دے حالات کیہو جہے ہون گے۔ لُوقا 21:9-11 نُوں پڑھو تے فیر ایس سوال تے گل بات کرو:
کیہہ تُسی ایہناں نشانیاں وچوں کوئی ویکھی اے یاں کدی ایہناں چوں کسے بارے سُنیا اے؟
پولُس رسول نے دَسیا کہ آخری زمانے چ لوک کیہو جہے ہون گے۔ 2-تیمُتھیُس 3:1-5 نُوں پڑھو تے فیر ایس سوال تے گل بات کرو:
کیہہ تُسی اپنے آسےپاسے ایہو جہے لوک ویکھے نیں؟
6. خدا دی بادشاہی سانوں کیہہ کرن دی ہلاشیری دیندی اے؟
متی 24:3، 14 نُوں پڑھو تے فیر ایہناں سوالاں تے گل بات کرو:
کیس اہم کم توں ظاہر ہوندا اے کہ خدا دی بادشاہی ہُن حکمرانی کر رہی اے؟
تُسی ایس کم چ حصہ کیویں لے سکدے او؟
خدا دی بادشاہی ہُن حکمرانی کر رہی اے تے بوہت ای چھیتی ایہہ زمین تے وی اپنا کم شروع کر دے گی۔ عبرانیوں 10:24، 25 نُوں پڑھو تے فیر ایس سوال تے گل بات کرو:
کیونکہ ایس دُنیا دا خاتمہ نیڑے وے ایس لئی سانوں ساریاں نُوں کیہہ کرنا چاہی دا اے؟
جے تُسی کسے دی زندگی بچان لئی یاں اوہدی مدد کرن لئی کجھ کر سکدے او تے کیہہ تُسی کرو گے؟
-