تواڈا گھرانہ خوش کیویں رہ سکدا اے؟—‏پہلا حصہ

جدوں دو لوکاں دا ویاہ ہوندا اے تے اوہ ویاہ والے دن بڑے خوش ہوندے نیں تے سوچدے نیں کہ اَگے وی اوہناں دی زندگی چ خوشیاں ای خوشیاں آن گیاں۔ تے اِنج ہو وی سکدا اے کیونکہ جیہڑے ویائے‌ورے مسیحی کافی عرصے توں بائبل دے اصولاں مطابق چل رہے نیں اوہناں دا گھرانہ واقعی خوشیاں نال بھریا ہویا اے۔‏

1.‏ بائبل چ شوہراں نُوں کیہہ نصیحت کیتی گئی اے؟‏

یہوواہ خدا نے شوہر نُوں خاندان دا سربراہ بنایا اے۔ (‏اِفسیوں 5:‏23 نُوں پڑھو۔)‏ اوہ چاہندا اے کہ شوہر ایہو جہے فیصلے کرن جنہاں توں اوہناں دے خاندان نُوں فائدہ ہوئے۔ بائبل چ شوہراں نُوں نصیحت کیتی گئی اے کہ اوہ اپنی بیوی نال محبت کر دے رہن۔‏ (‏اِفسیوں 5:‏25‏)‏ ایس گل دا کیہہ مطلب اے؟ اپنی بیوی نال پیار کرن والا شوہر اپنے گھر چ وی تے دُوجیاں دے سامنے وی اپنی بیوی نال نرمی تے عزت نال پیش آندا اے۔ اوہ اوہدی حفاظت کردا اے، اوہدیاں ضرورتاں نُوں پورا کردا اے تے اوہنوں خوش رکھن دی پوری کوشش کردا اے۔ (‏1-‏تیمُتھیُس 5:‏8‏)‏ سب توں ودھ کے اوہ یہوواہ دے نیڑے رہن چ اپنی بیوی دی مدد کردا اے۔ (‏متی 4:‏4‏)‏ مثال لئی، اوہ اوہدے نال مِل کے بائبل پڑھدا اے تے دُعا کردا اے۔ جدوں اِک شوہر اپنی بیوی دا خیال رکھدا اے تے اوہنوں پیار کردا اے تے یہوواہ نال اوہدی دوستی قائم رہندی اے۔—‏1-‏پطرس 3:‏7 نُوں پڑھو۔‏

2.‏ بائبل چ بیویاں نُوں کیہہ نصیحت کیتی گئی اے؟‏

خدا دے کلام چ کہیا گیا اے کہ اِک بیوی اپنے شوہر دی دلوں عزت کرے۔‏ (‏اِفسیوں 5:‏33‏)‏ ایہدے لئی ضروری اے کہ اوہ اپنے شوہر دِیاں خوبیاں تے دھیان دَوے تے ایس گل دی قدر کرے کہ اوہ اوہدی تے بچیاں دی دیکھ‌بھال کرن لئی بڑی محنت کردا اے۔ اوہ اوہدے فیصلیاں دی حمایت کرکے تے اوہدے نال پیار نال گل کر کے اوہدے لئی عزت وکھا سکدی اے۔ نالے اوہنوں دُوجیاں سامنے اوہدے بارے چنگیاں گلاں کرنیاں چاہی دِیاں نیں۔ جے اوہدا شوہر یہوواہ دی عبادت نئیں کردا تے فیر وی اوہنوں ایہہ سارے کم کرنے چاہی دے نیں۔‏

3.‏ میاں بیوی اپنے بندھن نُوں مضبوط کیویں کر سکدے نیں؟‏

بائبل ویائے‌ورے جوڑیاں بارے کہندی اے کہ اوہ دونویں اِک بن جان گے۔‏ (‏متی 19:‏5‏)‏ ایہدا مطلب اے کہ میاں بیوی نُوں ہر ایہو جہی گل تے کم توں دُور رہنا چاہی دا اے جدی وجہ توں اوہ اِک دُوجے توں وَکھ ہو سکدے نیں۔ ایس لئی ضروری اے کہ اوہ اِک دُوجے نال وقت گزارن تے اِک دُوجے نُوں کُھل کے اپنے دل دی گل دَسن۔ اوہناں نُوں اپنی زندگی چ یہوواہ نُوں سب توں زیادہ اہمیت دینی چاہی دی اے۔ اوہناں نُوں یہوواہ دے علاوہ کسے وی چیز یاں انسان نُوں اپنے جیون ساتھی توں بوہتا اہم نئیں سمجھنا چاہی دا۔ اوہناں نُوں ایس گل توں وی خبردار رہنا چاہی دا اے کہ اوہ اپنے دل چ کسے وی ہور بندے یاں عورت لئی چاہت پیدا نہ ہون دین۔‏

ہور سوچ‌وچار لئی

4.‏ شوہرو، اپنی بیوی نال پیار کرو تے اوہدا چنگی طرحاں خیال رکھو

ویڈیو:‏ شوہرو،‏ اپنی اپنی بیوی نُوں اپنے وانگوں پیار کرو (‏53:‏9)‏

• اِک شوہر اپنی بیوی لئی پیار کیویں وکھا سکدا اے تے اوہدا خیال کیویں رکھ سکدا اے؟‏

کلسیوں 3:‏12 نُوں پڑھو تے فیر ایس سوال تے گل بات کرو:‏

• اِک شوہر ایس ایت چ دَسیاں گئیاں خوبیاں کیویں وکھا سکدا اے؟‏

5.‏ بیویو، اپنے شوہر نال پیار کرو تے اوہدی عزت کرو

بائبل چ بیویاں نُوں نصیحت کیتی گئی اے کہ اوہ اپنے شوہر دی عزت کرن بھانویں اوہ یہوواہ دی عبادت کر دا ہووے یاں نئیں۔ 1-‏پطرس 3:‏1، 2 نُوں پڑھو تے فیر ایہناں سوالاں تے گل بات کرو:‏

• جے تواڈا شوہر یہوواہ دی عبادت نئیں کردا تے ضرور تواڈی خواہش ہوئے گی کہ اوہ تواڈے نال مِل کے یہوواہ دی عبادت کرے۔ تواڈے خیال چ اوہدی مدد کرن دا چنگا طریقہ کیہہ ہوئے گا، اوہنوں ہر ویلے بائبل دِیاں گلاں دَسنا یاں اوہدے نال پیار تے عزت نال پیش آنا؟ توانوں اِنج کیوں لگدا اے؟‏

میاں بیوی مِل کے چنگے فیصلے کر سکدے نیں۔ پر کدی کدار شاید بیوی دی رائے شوہر توں فرق ہووے۔ ایس لئی اوہ عزت تے نرم لہجے نال اوہنوں اپنی رائے بارے دَس سکدی اے۔ پر اوہنوں ایہہ گل یاد رکھنی چاہی دی اے کہ خاندان بارے فیصلے کرن دی ذمے‌داری یہوواہ نے شوہر نُوں دِتی اے۔ ایس لئی بیوی نُوں اپنے شوہر دے فیصلیاں دی حمایت کرن دی پوری کوشش کرنی چاہی دی اے۔ ایس طرحاں اوہ اپنے گھر چ امن تے صلح نُوں قائم رکھے گی۔ 1-‏پطرس 3:‏3-‏5 نُوں پڑھو تے فیر ایس سوال تے گل بات کرو:‏

• جدوں اِک بیوی اپنے شوہر لئی عزت وکھاندی اے تے یہوواہ نُوں کیہو جیہا محسوس ہوندا اے؟‏

6.‏ تُسی اپنی شادی‌شُدہ زندگی چ آن والیاں مشکلاں تے قابو پا سکدے او

ویڈیو:‏ اپنے شادی دے بندھن نُوں مضبوط کرو (‏44:‏5)‏

• ایس ویڈیو چ جیہڑا جوڑا وکھایا گیا اے اوہ اِک دُوجے توں کیویں دُور ہو رہیا سی؟‏

• اوس جوڑے نے اپنے رشتے نُوں مضبوط کرن لئی کیہہ کیتا؟‏

1-‏کُرنتھیوں 10:‏24 تے کُلسّیوں 3:‏13 نُوں پڑھو۔‏ ہر ایت نُوں پڑھن دے بعد ایس سوال تے گل بات کرو:‏

• ایس ایت چ جیہڑی نصیحت کیتی گئی اے اوہدے تے عمل کرن نال شادی دا بندھن کیویں مضبوط ہو سکدا اے؟‏

بائبل چ دَسیا گیا اے کہ سانوں اِک دُوجے دی عزت کرنی چاہی دی اے۔ ایہدا مطلب اے کہ اَسی اِک دُوجے نال نرمی تے پیار نال پیش آئیے۔ رومیوں 12:‏10 نُوں پڑھو تے فیر ایہناں سوالاں تے گل بات کرو:‏

• کیہہ میاں یاں بیوی نُوں ایہہ سوچنا چاہی دا اے کہ ”‏میرا جیون ساتھی میری عزت کرن چ پہل کرے؟“‏ جے ہاں تے کیوں؟ جے نئیں تے کیوں نئیں؟‏

خلاصہ

جے میاں بیوی اِک دُوجے نُوں پیار کرن گے، اِک دُوجے دی عزت کرن گے تے بائبل دے اصولاں تے عمل کرن گے تے فیر اوہ خوش رہن گے۔‏

دہرائی

• شوہر اپنے شادی دے بندھن نُوں مضبوط تے خوش‌گوار بنان لئی کیہہ کر سکدا اے؟‏

• بیوی اپنے شادی دے بندھن نُوں مضبوط تے خوش‌گوار بنان لئی کیہہ کر سکدی اے؟‏

• جے تُسی شادی‌شُدہ او تے بائبل دا کیہڑا اصول اپنے بندھن نُوں مضبوط بنان چ تواڈی مدد کر سکدا اے؟‏

ہور جانن لئی

ایس کتاب چ پڑھو کہ تُسی اپنی گھریلو زندگی نُوں خوش‌گوار بنان لئی کیہہ کر سکدے او۔‏

تواڈے گھر وچ خوشیاں آ سکدیاں نیں (‏کتاب)‏

ایس ویڈیو چ ویکھو کہ شادی‌شُدہ زندگی بارے بائبل دی صلاح تے عمل کرن نال کِنّیاں برکتاں مِلدیاں نیں۔‏

سچا پیار (‏26:‏4)‏

ایس مضمون چ پڑھو کہ شوہر دی تابع‌داری کرن دا اصل چ کیہہ مطلب اے۔‏

بیوی کے لئے شوہر کا اختیار ماننے کی اہمیت (‏مینارِنگہبانی،‏ 1 مئی 2010)‏

ایس ویڈیو چ ویکھو کہ اِک شادی شُدہ جوڑے نے اوہناں مسئلیاں نُوں کیویں حل کیتا جنہاں دی وجہ توں اوہناں دا رشتہ ٹُٹ گیا سی۔‏

خدا دی مدد نال اَسی اپنے رشتے نُوں بچا لیا ‏(‏14:‏5)‏