کیہہ بائبل چ لکھیاں گلاں اِک دُوجے نال میل کھاندیاں نیں؟‏

پاک کلام دا جواب

جی بالکل۔ پوری بائبل چ لکھیاں گلاں اِک دُوجے نال میل کھاندیاں نیں۔ شاید ایہنوں پڑھدے ویلے کدی کدار سانوں لگے کہ ایہدی اِک کتاب چ لکھی کوئی گل کسے دُوجی کتاب چ لکھی گل توں فرق اے۔ بائبل چ لکھیاں گلاں نُوں صحی طرحاں سمجھن لئی کجھ اصول ساڈی مدد کر سکدے نیں۔ آؤ ایہناں تے غور کرئیے:‏

1. کسے ایت نُوں پڑھدے ویلے اوس توں پہلے دِیاں تے بعد دِیاں ایتاں تے غور کرو۔ کیونکہ جدوں کسے وی لکھاری دی گل نُوں پورے بیان توں ہٹ کے پڑھیا جاندا اے اوہدی گل دا کوئی فرق مطلب نکل سکدا اے۔‏

2. بائبل دی کسے کتاب نُوں لکھن والے دے نظریے نُوں سمجھن دی کوشش کرو۔ اِک واقعے نُوں اپنی اَکھیں ویکھن والے لوک جدوں اوہدے بارے دُوجیاں نُوں دَسدے نیں تے اوہ اِکو جہے لفظ استمال نئیں کردے تے اِکو جہی معلومات نئیں دیندے۔‏

3. کسے واقعے نُوں پڑھدے ویلے اوہدے تریخی پہلو تے اوس زمانے دِیاں رسماں رواجاں نُوں ذہن چ رکھو۔‏

4. کسے لفظ دے اصل تے علامتی معنیاں دے فرق نُوں سمجھن دی کوشش کرو۔‏

5. کدی کدار کسے کم بارے کہیا جاندا اے کہ اوہ کم فلاں بندے نے کیتا اے بھانویں کہ اوہنے اپنے ہتھیں ایہنوں نہ کیتا ہووے۔‏a

6. بائبل دے صحی ترجمے نُوں استمال کرو۔‏

7. بائبل چ لکھیاں گلاں نُوں جھوٹھے مذہبی عقیدیاں نال ملان دی کوشش نہ کرو۔‏

ہُن آؤ کجھ مثالاں دے ذریعے ایہناں اصولاں تے غور کرئیے۔ اِنج اَسی ویکھاں گے کہ بائبل چ لکھیاں گلاں آپس چ میل کھا ندیاں نیں۔‏

پہلا اصول:‏ کسے ایت نُوں پڑھدے ویلے اوس توں پہلے دِیاں تے بعد دِیاں ایتاں تے غور کرو

جے خدا نے ستویں دن کم ختم کیتا سی تے فیر اوہ ہُن تک کیس لحاظ نال کم کر رہیا اے؟‏ پیدائش 2:‏2-‏4 چ دَسیا گیا اے کہ خدا نے اپنے سارے کم نُوں جیہڑا اوہ کر رہیا سی ستویں دن ختم کیتا۔ جدوں اَسی ایس گل توں پہلے دِیاں تے بعد دِیاں ایتاں تے غور کرنے آں تے پتہ چلدا اے کہ ایتھے اصل چ اوہناں کماں وَل اشارہ کیتا گیا اے جیہڑے خدا نے کائنات نُوں بنان لئی کیتے سن۔ پر جدوں یسوع نے ایہہ کہیا کہ خدا ہُن تک کم کردا اے تے اوہ خدا دے دُوجے کماں بارے گل کر رہیا سی۔ (‏یوحنا 5:‏17‏)‏ سو یسوع پیدائش چ لکھی گل دی نفی نئیں کر رہیا سی۔ تخلیق دے علاوہ خدا دے دُوجے کماں چ بوہت کجھ شامل اے جیویں کہ اپنے بندیاں نُوں کلام لکھن دا الہام دینا، انساناں دی رہنمائی کرنا تے اوہناں دا خیال رکھنا وغیرہ۔—‏زبور 20:‏6؛ 105:‏5؛ 2۔پطرس1:‏21۔‏

دُوجا تے تیجا اصول:‏ تریخی پہلو تے لکھن والے دا نظریہ

یسوع مسیح نے انھے آدمی نُوں کتھے شفا دِتی سی؟‏ لُوقا دی اِنجیل چ دَسیا گیا اے کہ جدوں یسوع نے انھے آدمی نُوں شفا دِتی تے اوہ یرِیحو دے نیڑے پونچ گیا سی جد کہ متی دی اِنجیل چ دَسیا گیا اے کہ جدوں یسوع نے دو انھے آدمیاں نُوں شفا دِتی تے اوس ویلے اوہ یریحو توں نکل رہیا سی۔ (‏لُوقا 18:‏35-‏43؛‏ متی 20:‏29-‏34‏)‏ ایہہ دونویں بیان فرق فرق نظریے نال لکھے گئے نیں پر اِک دُوجے دی حمایت کردے نیں۔ متی نے دو انھے بندیاں دا ذکر کیتا جد کہ لُوقا نے صرف اوس اِک بندے دا ذکر کیتا جدے نال یسوع نے گل بات کیتی سی۔ پر جتھوں تک جگہ دی گل اے اوہدے بارے عالماں دا خیال اے کہ یسوع دے زمانے چ یریحو ناں دے دو شہر سن۔ اِک پرانا یہودی شہر سی تے دُوجا ایہدے توں ڈیڑھ کلو میٹر دُور نواں رومی شہر سی۔ تے جدوں یسوع نے انھے آدمی نُوں شفا دِتی اوہدوں اوہ شاید ایہناں دونواں شہراں دے وچ کار سی۔‏

چوتھا اصول:‏ کسے لفظ دے اصل تے علامتی معنیاں دے فرق نُوں سمجھن دی کوشش کرو

کیہہ زمین نُوں تباہ کر دِتا جائے گا؟‏ واعظ 1:‏4 چ لکھیا اے کہ زمین ہمیشاں قائم رہندی اے۔ پر کجھ لوک کہندے نیں کہ ایہہ گل 2-‏پطرس 3:‏10 چ لکھی گل نال میل نئیں کھاندی جِتھے لکھیا اے کہ زمین تے اوہدے تے ہون والے کم سڑ جان گے یعنی ختم ہو جان گے۔ پاک کلام چ لفظ زمین اصل معنیاں چ وی استمال ہویا اے تے علامتی معنیاں چ وی یعنی اے ساڈے سیارے وَل وی اشارہ کردا اے تے زمین تے رہن والے لوکاں وَل وی۔ (‏پیدائش 1:‏1؛ 11:‏1)‏ 2-‏پطرس 3:‏10 چ لکھی گل ساڈے سیارے دے سڑن وَل اشارہ نئیں کردی سگوں ایہدا مطلب اے کہ زمین تے رہن والے بُرے لوک ختم ہو جان گے۔—‏2-‏پطرس 3:‏7‏۔‏

پنجواں اصول:‏ کدی کدار کسے کم بارے کہیا جاندا اے کہ اوہ کم فلاں بندے نے کیتا اے بھانویں کہ اوہنے اپنے ہتھیں ایہنوں نہ کیتا ہووے

کفرنحوم چ یسوع تک اِک فوجی افسر دی درخاست کیویں پونچی سی؟‏ متی 8:‏6،5 چ لکھیا اے کہ فوجی افسر آپ یسوع کول آیا سی جد کہ لُوقا 7:‏3 چ لکھیا اے کہ اوہنے یہودیاں دے کجھ وڈیرے بندیاں نُوں کہیا کہ اوہ اوہدا پیغام یسوع کول لے کے جان۔ ایہناں دونواں ایتاں توں پتہ چلدا اے کہ درخاست اصل چ فوجی افسر نے کیتی سی پر اوہنے ایہنوں یسوع تک پونچان لئی کجھ وڈیرے بندیاں نُوں اپنے نمائندیاں دے طور تے گھلیا۔‏

چھیواں اصول:‏ بائبل دے صحی ترجمے نُوں استمال کرو

کیہہ اَسی سارے گُناہ‌گار آں؟‏ بائبل چ دَسیا گیا اے کہ سانوں ساریاں نُوں گُناہ ورثے چ ملیاِ اے۔ (‏رومیوں 5:‏12‏)‏ پر بائبل دے کجھ ترجمیاں چ ایس گل دی نفی کیتی گئی اے کیونکہ اوہناں چ لکھیا اے کہ اِک چنگا بندہ گُناہ نئیں کردا۔ 1-‏یوحنا 3:‏6 چ گُناہ لئی جیہڑا یونانی لفظ استمال ہویا اے اوہ اوس کم وَل اشارہ کردا اے جیہڑا وار وار کیتا جاندا اے۔ اِک گُناہ تے اوہ اے جیہڑا انساناں نُوں آدم توں ورثے چ ملیاِ اے تے جدے توں اَسی چاہ کے وی بچ نئیں سکدے جد کہ دُوجے گُناہ اوہ نیں جیہڑے اِک بندہ جان بوجھ کے کردا اے۔ ایس لئی کجھ ترجمیاں چ ایس گل نُوں چنگی طرحاں واضح کیتا گیا اے تے 1-‏یوحنا 3:‏6 دا ترجمہ کجھ اِنج کیتا گیا اے کہ جیہڑا خدا نال متحد رہندا اے اوہ عادتاً گُناہ نئیں کردا۔—‏ترجمہ نویں دُنیا۔‏

ستواں اصول:‏ بائبل چ لکھیاں گلاں نُوں جھوٹھے مذہبی عقیدیاں نال ملان دی کوشش نہ کروو

کیہہ یسوع، خدا دے برابر اے یاں اوہدے توں گھٹ اے؟‏ اِک واری یسوع مسیح نے کہیا کہ میں تے باپ اِک آں تے اِک ہور موقعے تے اوہنے کہیا کہ باپ میرے توں وڈا اے۔ کجھ لوکاں دا خیال اے کہ یسوع دِیاں ایہہ دونویں گلاں آپس چ میل نئیں کھاندیاں۔ (‏یوحنا 10:‏30؛‏ 14:‏28‏)‏ ایہناں گلاں نُوں صحی طرحاں سمجھن لئی ضروری اے کہ اَسی ویکھیے کہ بائبل اصل چ یہوواہ خدا تے یسوع مسیح بارے کیہہ دَسدی اے نہ کہ یسوع دِیاں ایہناں گلاں نُوں تثلیث دے جھوٹھے عقیدے نال ملان دی کوشش کریئے کیونکہ بائبل چ تثلیث دی تلیم نئیں دِتی گئی۔ بائبل چ دَسیا گیا اے کہ یہوواہ، یسوع دا باپ ای نئیں سگوں اوہدا خدا وی اے جدی یسوع عبادت کردا اے۔ (‏متی 4:‏10؛‏ مرقس 15:‏34؛‏ یوحنا 17:‏3؛‏ 20:‏17؛‏ 2-‏کُرنتھیوں 1:‏3‏)‏ ایس لئی پاک کلام دے مطابق یسوع مسیح خدا دے برابر نئیں اے۔‏

ایہہ سچ اے کہ یسوع نے کہیا سی کہ میں تے باپ اِک آں۔ پر ایس گل دِیاں اگلیاں تے پچھلیاں ایتاں تے غور کرن نال سانوں پتہ چلدا اے کہ یسوع اصل چ کہہ رہیا سی کہ اوہدا تے اوہدے باپ یہوواہ دا مقصد اِکو ای اے۔ بعد چ یسوع نے کہیا باپ میرے نال اِک مُٹھ اے تے میں باپ نال اِک مُٹھ آں۔ (‏یوحنا 10:‏38‏)‏ یسوع اپنے پیروکاراں نال وی اِک مُٹھ اے۔ اوہنے خدا نُوں دُعا چ اپنے پیروکاراں بارے ایہہ کہیا کہ میں اوہناں نُوں اوہ مقام دِتا اے جیہڑا تُوں مینوں دِتا اے تاکہ اوہ اِک ہون جیویں اَسی اِک آں۔ میں اوہناں نال اِک مُٹھ آں تے تُوں میرے نال اِک مُٹھ ایں۔—‏یوحنا 17:‏23،22‏۔‏