3.‏ اپنے کماں توں شکرگزاری وکھاؤ

فرض کرو کہ اِک بندہ تواڈی جان بچاندا اے۔ کیہہ تُسی اوہدے ایس احسان نُوں بُھل جاؤ گے؟ یاں فیر تُسی فرق فرق طریقیاں نال اوہدے لئی شکرگزاری ظاہر کرن دی کوشش کرو گے؟‏

ساڈی زندگی یہوواہ خدا دی دین اے۔ 1-‏یوحنا 4:‏8-‏10 نُوں پڑھو تے فیر ایہناں سوالاں تے گل بات کرو:‏

• یسوع مسیح دی قربانی ساڈے لئی اِک قیمتی تحفہ کیوں اے؟‏

• یہوواہ تے یسوع دے ایس قیمتی تحفے بارے تُسی کیہو جیہا محسوس کردے او؟‏

یہوواہ خدا تے یسوع نے ساڈے لئی جو کجھ کیتا اے اَسی اوہدے لئی شکرگزاری کیویں وکھا سکنے آں؟ 2-‏کُرنتھیوں 5:‏15 تے 1-‏یوحنا 4:‏11 تے 5:‏3 نُوں پڑھو۔‏ ہر ایت نُوں پڑھن دے بعد ایس سوال تے گل بات کرو:‏

• ایس ایت دے مطابق اَسی یہوواہ تے یسوع لئی شکرگزاری کیویں ظاہر کر سکنے آں؟‏

1.‏ سانوں اپنی زندگی یہوواہ دے ناں کیوں کرنی چاہی دی اے؟‏

سانوں یہوواہ نال محبت دی وجہ توں اپنی زندگی اوہدے ناں کرنی چاہی دی اے۔ (‏1-‏یوحنا 4:‏10،‏ 19‏)‏ بائبل چ دَسیا گیا اے کہ یہوواہ اپنے خدا نال اپنے سارے دل، اپنی ساری جان، اپنی ساری عقل تے اپنی ساری طاقت نال محبت کرو۔‏ (‏مرقس 12:‏30‏)‏ سو اَسی صرف ایہہ کہندے ای نئیں کہ اَسی یہوواہ نال محبت کرنے آں سگوں اِنج کر کے وی وکھانے آں۔ایس گل نُوں سمجھن لئی اِک مثال تے غور کرو۔ جے اِک مُنڈا تے اِک کُڑی آپس چ سچی محبت کردے نیں تے فیر اوہ شادی وی ضرور کرن گے۔ ایسے طرحاں جے اَسی یہوواہ نال سچی محبت کرنے آں تے فیر سانوں اپنی زندگی اوہدے ناں کر کے بپتسمہ لین چ کوئی عار نئیں ہوئے گی۔‏