نکتہ نمبر 10

آواز چ اتارچڑھاؤ لیاؤ

متی 20:‏31

خلاصہ:‏ آواز اُچی نیویں کرن، ایہنوں جذباتاں مطابق ڈھالن تے تیز یاں ہولی بولن نال گلاں نُوں صاف صاف سمجھایا جا سکدا اے نالے سنن والیاں دے دل تک پونچیا جا سکدا اے۔‏

تُسی کیہہ کر سکدے او؟‏

آواز اُچی نیویں کرو۔‏ خاص گلاں تے زور پاؤن لئی تے سنن والیاں نُوں کجھ کرن دی ہلاشیری دین لئی تھوڑی اُچی آواز چ گل کرو۔ بائبل دِیاں ایہو جہیاں ایتاں وی کجھ اُچی آواز چ پڑھو جنہاں چ سزا دا پیغام لکھیا ہویا اے۔ ڈر یاں پریشانی ورگے جذبات ظاہر کرن لئی اپنی آواز نیویں کرو۔ تُسی سنن والیاں دے دل چ ہور جانن دا شوق پیدا کرن لئی وی نیویں آواز چ گل کر سکدے او۔‏

اپنی آواز وار وار اُچی نہ کرو کیونکہ اِنج سنن والیاں نُوں لگ سکدا اے کہ تُسی اوہناں نُوں جھڑک رہے او۔ بوہتا ای جذباتی ہون دی لوڑ نئیں کیونکہ اِنج لوکاں دا دھیان تواڈے پیغام توں ہٹ کے تواڈے تے لگ جائے گا۔‏
آواز جذباتاں مطابق ڈھالو۔‏ اپنی آواز نُوں فرق فرق جذباتاں جیویں کہ خوشی، جوش، غم، افسوس یاں پریشانی مطابق ڈھالو۔ نالے تُسی ایہہ دَسن لئی وی اپنی آواز تے بولن دا طریقہ تھوڑا بدل سکدے او کہ کوئی چیز کِنّی وڈی اے یاں کِنّی دُور اے۔‏
تیز یاں ہولی بولو۔‏ خوشی ظاہر کرن لئی تیز بولو۔ کوئی ضروری نکتہ دَسن لئی ہولی بولو۔‏

اِک دم تیز یاں ہولی نہ بولن لگ پوو کیونکہ اِنج سنن والے پریشان ہو سکدے نیں۔ ایناں تیز تیز نہ بولو کہ کسے نُوں تواڈی گل ای سمجھ نہ آئے۔‏