بابل دا بُرج

طوفان توں بعد نوح دے پُتراں دے کئی بچے ہوئے۔ اوہناں دی نسل کافی ودھ گئی ایس لئی لوک زمین دے فرق حصیاں چ جا کے رہن لگ پئے، جیویں یہوواہ نے اوہناں نُوں کہیا سی۔‏

پر کجھ خانداناں نے یہوواہ دی گل نئیں سُنی۔ اوہناں نے کہیا:‏ آؤ اَسی اِک شہر بنائیے تے اوتھے رہیے۔ نالے اَسی اِک بُرج بنانواں گے جیہڑا ایناں اُچا ہوئے گا کہ اوہ اسمان تک جائے گا۔ اِنج اَسی پوری دُنیا چ مشہور ہو جاواں گے۔‏

ایس گل توں یہوواہ بالکل خوش نئیں سی۔ ایس لئی اوہنے اوہناں نُوں روکن دا فیصلہ کیتا۔ اوہنے اِنج کرن لئی کیہہ کیتا؟ یہوواہ نے اچانک اوہناں دی بولی بدل دِتی۔ ہُن لوک اِک دُوجے دی گل نئیں سمجھ سکدے سن، ایس لئی اوہناں نے بُرج بنانا چھڈ دِتا۔ اوہ جیہڑا شہر بنا رہے سن اوہنوں بابل کہیا گیا،جدا مطلب اے ”‏اُلجھن۔“‏ ایس لئی لوک اوتھوں فرق فرق تھانواں تے چلے گئے تے ساری زمین تے پھیل گئے۔ پر اوہ نویاں تھانواں تے جا کے وی بُرے کم کردے رہے۔ کیہہ اوہناں وچوں حالے وی کوئی ایہو جیہا بندہ ہے سی جیہڑا یہوواہ نُوں پیار کردا سی؟ اَسی ایہدے بارے اگلے سبق چ سکھاں گے۔‏