ساڈے کماں توں دُوجیاں نُوں نظر آنا چاہی دا اے کہ اَسی اِک لچک‌دار انسان آں۔ اپنے آپ کولوں پچھو:‏ ”‏کیہہ دُوجے ویکھ سکدے نیں کہ مَیں اِک لچک‌دار انسان آں تے میرے چ بوہت برداشت اے؟ یاں کیہہ مَیں سخت آں تے اپنی گل تے اَڑیا رہنا واں؟ یاں کیہہ مَیں دُوجیاں دی گل سُننا واں تے جتھوں تک ممکن ہوئے مننا وی آں؟“‏ جِنّاں زیادہ اَسی لچک‌دار ہوواں گے اوہناں ای زیادہ اَسی یہوواہ تے یسوع دی مثال تے عمل کر رہے ہوواں گے۔ سانوں اوہدوں وی لچک‌دار ہونا چاہی دا اے جدوں ساڈے حالات بدل جاندے نیں۔ حالات بدلن دی وجہ توں شاید سانوں ایہو جہیاں مشکلاں دا سامنا کرنا پووے جنہاں بارے اَسی سوچیا وی نہ ہووے۔ ہو سکدا اے کہ سانوں صحت دا کوئی وڈا مسئلہ ہو جائے۔ یاں شاید اچانک سیاسی حالات بدل جان یاں مہنگائی ودھ جائے جدی وجہ توں ساڈی زندگی مشکل ہو جائے۔ ‎(‏واعظ 9:‏11)‎‏ سانوں اوس ویلے وی مشکل دا سامنا کرنا پے سکدا اے جدوں کلیسیا چ ساڈی ذمے‌داری بدل جاندی اے۔ بھانویں ساڈے تے کوئی وی مشکل آئے اَسی ایہناں چار گلاں تے عمل کر کے اپنے آپ نُوں نویں حالاتاں مطابق ڈھال سکنے آں:‏ ‎(‏1)‎‏ حقیقت نُوں قبول کرو، ‎(‏2)‎‏ مستقبل بارے سوچو، ‎(‏3)‎‏ اپنی زندگی چ ہون والیاں چنگیاں گلاں تے دھیان دَوو تے ‎(‏4)‎‏ دُوجیاں دے کم آؤ۔ م23.‏07 ص.‏ 21، 22 پ.‏ 7، 8

دانی‌ایل نبی اوس ویلے نوجوان ای سی جدوں بابلی اوہنوں قیدی بنا کے اوہدے گھر توں بڑی دُور ملک بابل لے گئے۔ پر بابلی افسر دانی‌ایل توں بڑے خوش سن۔ اوہناں نے دانی‌ایل دے بس رنگ روپ تے دھیان دِتا سی۔ اوہناں نے ویکھیا کہ اوہ نہ صرف ایہو جیہا جوان اے جدے چ کوئی نُقص نئیں اے سگوں اوہ سوہنا وی اے۔ نالے اوہ اِک بڑے اُچے گھرانے توں اے۔ ‎(‏1-‏سموئیل 16:‏7)‎‏ ایس وجہ توں بابلیاں نے اوہنوں تربیت دِتی تاکہ اوہ بادشاہ دے محل چ خدمت کر سکے۔ ‎(‏دانی‌ایل 1:‏3، 4، 6)‎‏ یہوواہ دانی‌ایل نُوں ایس لئی پیار کردا سی کیونکہ اوہ اِک بوہت اچھا انسان سی، بھانویں کہ حالے اوہدی عمر اینی زیادہ نئیں سی۔ اصل چ جدوں یہوواہ نے کہیا کہ دانی‌ایل، نوح تے ایوب وانگوں اے تے اوس ویلے دانی‌ایل صرف 20 سال دا سی۔ یہوواہ دی نظر چ دانی‌ایل، نوح تے ایوب وانگوں راست باز سی جنہاں نے یہوواہ دے حضور نیک نامی حاصل کرن لئی کئی سالاں تک اوہدے لئی اپنی وفاداری ثابت کیتی سی۔ ‎(‏پیدائش 5:‏32؛ 6:‏9، 10؛ ایوب 42:‏16، 17؛ حِزقی‌ایل 14:‏14)‎‏ یہوواہ دانی‌ایل دی پوری زندگی اوہنوں پیار کردا رہیا۔—‏دانی‌ایل 10:‏11، 19۔ م23.‏08 ص.‏ 2 پ.‏ 1، 2

اِک گھر نُوں خریدن بارے سوچدے ویلے تُسی اوس گھر بارے ہر گل جاننا چاہوو گے۔ اَسی بائبل دا مطالعیا کردے ویلے وی اِنج ای کر سکنے آں۔ جے تُسی بائبل نُوں بس چھیتی چھیتی پڑھو گے تے تُسی بس ایہدیاں بنیادی گلاں نُوں ای سمجھ سکو گے۔ ‎(‏عبرانیوں 5:‏12‏)‎‏ پر جیویں اِک گھر بارے چنگی طرحاں جانن لئی تُسی اوہدے اندر جا کے اوہنوں ویکھدے او، اوسے طرحاں خدا دے کلام دِیاں گلاں نُوں چنگی طرحاں سمجھن لئی اوہدی گہرائی چ جاؤ۔ بائبل دا مطالعیا کرن دا اِک ودھیا طریقہ ایہہ وے کہ تُسی ویکھو کہ ایہدے چ لکھیاں سچائیاں آپس چ کیویں جُڑیاں ہوئیاں نیں۔ ایہدے علاوہ ویکھو کہ تُسی کیہڑیاں سچائیاں تے ایمان رکھدے او تے کیوں رکھدے او۔ خدا دے کلام چ لکھیاں گلاں نُوں چنگی طرحاں سمجھن لئی ضروری اے کہ اَسی ایہدی گہرائی چ جائیے۔ پولُس رسول نے اپنے مسیحی بھین بھراواں نُوں ہلاشیری دِتی کہ اوہ خدا دے کلام دا مطالعیا اینی چنگی طرحاں کرن کہ اوہ ایہدے چ دَسی گئی سچائی دی چوڑائی، لمبائی، اُنچائی تے گہرائی نُوں پوری طرحاں سمجھ سکن۔ اِنج ایمان چ اوہناں دِیاں جڑاں ڈُونگیاں تے مضبوط ہو جانیاں سن۔ ‎(‏اِفسیوں 3:‏14-‏19‏)‎‏ سانوں وی خدا دے کلام دا مطالعیا اِنج ای کرن دی لوڑ اے۔ م23.‏10 ص.‏ 18 پ.‏ 1-‏3