کیہہ تُسی سال دے سب توں اہم دن لئی تیار او؟‏

1.‏ یسوع مسیح دی موت دی یادگیری دا دن سال دا سب توں خاص دن کیوں ہوندا اے؟ (‏لُوقا 22:‏19، 20‏)‏

یہوواہ دے گواہواں لئی یسوع مسیح دی موت دی یادگیری دا دن سال دا سب توں خاص دن ہوندا اے۔ صرف ایہی اوہ دن اے جنہوں منان دا حکم یسوع نے دِتا سی۔ ‏(‏لُوقا 22:‏19، 20 نُوں پڑھو۔)‏ سانوں فرق فرق گلاں دی وجہ توں ایس دن دا اِنتظار ہوندا اے۔ آؤ ایہناں وچوں کجھ گلاں تے غور کریئے۔‏

2.‏ سانوں مسیح دی موت دی یادگیری دا اِنتظار کیوں ہوندا اے؟‏

² مسیح دی موت دی یادگیری دا دن سانوں ایہہ یاد دَواندا اے کہ فدیہ ساڈے لئی کِنّاں اہم اے تے ایہدی وجہ توں سانوں کِنّیاں برکتاں مِلن گیاں۔ ایس دن دی وجہ توں ساڈے ذہن چ ایہہ گل وی آندی اے کہ اَسی کیہڑے کیہڑے طریقیاں نال یسوع دی قربانی لئی قدر وکھا سکنے آں۔ (‏2-‏کُرنتھیوں 5:‏14، 15‏)‏ ایہدی وجہ توں سانوں اپنے بھین بھراواں دا حوصلہ ودھان دا وی موقع مِلدا اے۔ (‏رومیوں 1:‏12‏)‏ ہر سال بوہت سارے ایہو جہے بھین بھرا مسیح دی موت دی یادگیری تے آندے نیں جیہڑے یہوواہ توں دُور ہو گئے سن۔ جدوں اوہ ویکھدے نیں کہ بھین بھرا اوہناں نُوں کِنّے پیار نال ملے نیں تے اوہناں وچوں کجھ یہوواہ کول واپس آ جاندے نیں۔ تے جیہڑے نوِیں لوک ایہدے تے آندے نیں، اوہ اینے متاثر ہوندے نیں کہ اوہ بائبل کورس کرنا شروع کر دیندے نیں۔ ایہناں ساریاں گلاں دی وجہ توں مسیح دی موت دی یادگیری دا دن ساڈے لئی بڑا خاص ہوندا اے۔‏

3.‏ مسیح دی موت دی یادگیری کیویں پوری دُنیا چ ساڈے بھین بھراواں نُوں اِک مُٹھ کردی اے؟ (‏تصویر نُوں وی ویکھو۔)‏

³ ایس گل بارے وی سوچو کہ مسیح دی موت دی یادگیری کیویں پوری دُنیا چ ساڈے بھین بھراواں نُوں اِک مُٹھ کردی اے۔ سورج ڈُبن دے بعد پوری دُنیا چ ساڈے بھین بھرا عبادت لئی جمع ہوندے نیں۔ فیر اَسی سارے اِک تقریر سننے آں جدے چ فدیے دی اہمیت بارے گل کیتی جاندی اے۔ اَسی مل کے دو گیت گانے آں، ساڈے اَگوں روٹی تے مے گزاری جاندی اے تے پورے پروگرام چ چار دُعاواں شامل ہوندیاں نیں جنہاں دے آخر چ اَسی پورے دل نال ”‏آمین“‏ کہنے آں۔ 24 گھنٹے دے اندر اندر پوری دُنیا چ ساریاں کلیسیاواں اِکو ای طریقے نال مسیح دی موت دی یادگیری مناندیاں نیں۔ ذرا سوچو کہ یہوواہ تے یسوع نُوں ایہہ ویکھ کے کِنّی خوشی ہوندی ہوئے گی کہ اَسی کیویں اِک مُٹھ ہو کے اوہناں لئی شکرگزاری وکھا رہے آں۔‏

4.‏ ایس مضمون چ اَسی کیس بارے گل کراں گے؟‏

⁴ ایس مضمون چ اَسی ایہناں سوالاں تے غور کراں گے:‏ اَسی مسیح دی موت دی یادگیری لئی اپنے دل نُوں کیویں تیار کرسکنے آں؟ اَسی دُوجیاں دی مدد کیویں کرسکنے آں تاکہ اوہ وی ایہدے تے آ کے فائدہ حاصل کرن؟ تے اَسی اوہناں بھین بھراواں دی مدد کیویں کرسکنے آں جیہڑے یہوواہ توں دُور ہو گئے نیں؟ ایہناں سوالاں تے غور کرن نال سانوں مدد ملے گی کہ اَسی ایس خاص موقعے لئی اپنے آپ نُوں تیار کر سکئے۔‏

اَسی مسیح دی موت دی یادگیری لئی اپنے دل نُوں کیویں تیار کرسکنے آں؟‏

5.‏ (‏الف)‏سانوں فدیے دی اہمیت تے سوچ وچار کیوں کرنا چاہی دا اے؟ (‏زبور 49:‏7، 8)‏ (‏ب)‏تُسی ایس ویڈیو توں کیہہ سکھیا اے:‏ ‏”‏یسوع مسیح نے اپنی جان کیوں قربان کیتی؟‏‏“‏

⁵ اپنے دل نُوں مسیح دی موت دی یادگیری لئی تیار کرن دا اِک سب توں ودھیا طریقہ ایہہ وے کہ اَسی ایس گل تے غور کریئے کہ مسیح دا فدیہ ساڈے لئی کِنّاں اہم اے۔ اَسی کدی وی آپ گُناہ تے موت توں نجات حاصل نئیں کرسکنے ساں۔ ‏(‏زبور 49:‏7، 8 نُوں پڑھو۔‏ ایس ویڈیو نُوں وی ویکھو:‏ ‏”‏یسوع مسیح نے اپنی جان کیوں قربان کیتی؟‏‏“‏‏)‏a ایس لئی یہوواہ نے ایہہ اِنتظام کیتا کہ اوہ اپنے پُتر نُوں زمین تے گھلے گا تاکہ اوہ ساڈے لئی اپنی جان دَوے۔ (‏رومیوں 6:‏23‏)‏ ایہہ یہوواہ تے یسوع دی بوہت وڈی قربانی سی۔ جِنّاں زیادہ اَسی ایس قربانی تے سوچ وچار کراں گے، اونی زیادہ فدیے لئی ساڈے دل چ قدر ودھے گی۔ ایس مضمون چ اَسی اوہناں وچوں کجھ چیزاں تے غور کراں گے جیہڑیاں فدیے دی خاطر یہوواہ تے یسوع نُوں قربان کرنیاں پئیاں۔ پر پہلے اَسی غور کراں گے کہ فدیے چ کیہہ کجھ شامل سی؟‏

6.‏ فدیے چ کیہہ شامل سی؟‏

⁶ فدیہ اوہ قیمت ہوندی اے جیہڑی کسے چیز نُوں واپس حاصل کرن لئی دِتی جاندی اے۔ جدوں یہوواہ نے پہلے انسان آدم نُوں بنایا تے اوہ بے‌عیب سی۔ پر فیر اوہنے گُناہ کر دِتا جدی وجہ توں اوہنے نہ صرف اپنے لئی سگوں اپنی اولاد لئی وی ہمیشاں تک زندہ رہن دا موقع گنوا دِتا۔ ایس زندگی نُوں فیر توں پان لئی یسوع نے اپنی جان قربان کیتی۔ اوہنے ساری زندگی کوئی گُناہ نئیں کیتا تے نہ ای اوہدے مونہوں دھوکھا دین والیاں گلاں نکلیاں۔ (‏1-‏پطرس 2:‏22‏)‏ جدوں اوہنے اپنی جان قربان کیتی تے اوہ بے‌عیب سی بالکل اُنج جیویں آدم گُناہ کرن توں پہلاں سی۔ ایس لئی اوہ اوس زندگی دے برابر دی قیمت ادا کر سکدا سی جیہڑی آدم نے گنوا دِتی سی۔—‏1-‏کُرنتھیوں 15:‏45؛‏ 1-‏تیمُتھیُس 2:‏6‏۔‏

7.‏ جدوں یسوع زمین تے سی تے اوہنوں کیہڑیاں ازمیشاں دا سامنا کرنا پیا؟‏

⁷ جدوں یسوع زمین تے سی تے اوہ اپنے باپ دا وفادار رہیا، اوہدوں وی جدوں اِنج کرنا مشکل سی۔ یسوع اِک بے‌عیب انسان دے طور تے پیدا ہویا پر اوہدے ماں پیو عیب‌دار سن۔ پر فیر وی اوہ اوہناں دا فرمانبردار رہیا۔ (‏لُوقا 2:‏51‏)‏ نوجوانی چ اوہنوں ایس دباؤ دا سامنا کرنا پیندا ہوئے گا کہ اوہ یہوواہ تے اپنے ماں پیو دی نافرمانی کرے۔ زندگی چ اَگے چل کے اوہنوں شیطان وَلّوں کجھ ازمیشاں دا وی سامنا ہویا، ایتھوں تک کہ شیطان نے آپ اوہنوں یہوواہ دی نافرمانی کرن لئی کہیا۔ (‏متی 4:‏1-‏11‏)‏ شیطان دی پوری کوشش سی کہ یسوع گُناہ کرے تے فدیہ نہ دے سکے۔‏

8.‏ یسوع نُوں ہور کیہڑیاں ازمیشاں دا سامنا کرنا پیا؟‏

⁸ زمین تے اپنی خدمت دے دوران اوہنے ہور وی کجھ ازمیشاں دا سامنا کیتا۔ اوہدے دُشمناں نے اوہدے تے ظلم کیتا تے اوہنوں جانوں مارن دی کوشش کیتی۔ (‏لُوقا 4:‏28، 29؛‏ 13:‏31‏)‏ اوہنوں اپنے شاگرداں دِیاں خامیاں دی وجہ توں وی پریشانی دا سامنا کرنا پیندا سی۔ (‏مرقس 9:‏33، 34‏)‏ جدوں اوہدے تے مُقدمہ چلایا جا رہیا سی تے اوہدے دُشمناں نے اوہنوں ماریا کُٹیا، اوہدی بے‌عزتی کیتی تے فیر اوہنوں اِک مُجرم دے طور تے سُولی تے بڑی دردناک موت دِتی۔ (‏عبرانیوں 12:‏1-‏3‏)‏ زمین تے اپنی زندگی دے آخری ویلے چ اوہنوں یہوواہ دی مدد توں بغیر آپ ای ثابت‌قدم رہنا پیا۔‏b‏—‏متی 27:‏46‏۔‏

9.‏ اَسی یسوع دے فدیے بارے کیہو جیہا محسوس کرنے آں؟ (‏1-‏پطرس 1:‏8‏)‏

⁹ فدیہ دین لئی یسوع نُوں بوہت کجھ سہنا پیا۔ پر اوہنے خوشی نال ساڈے لئی ایہہ سب کجھ برداشت کیتا۔ جدوں اَسی ایس گل تے سوچ‌وچار کرنے آں تے ساڈا دل اوہدی محبت نال بھر جاندا اے۔‏‏—‏1-‏پطرس 1:‏8 نُوں پڑھو۔‏

10.‏ فدیے لئی یہوواہ نُوں کیہہ کجھ سہنا پیا؟‏

¹⁰ یسوع دا فدیہ دین لئی یہوواہ نُوں کیہہ کجھ سہنا پیا؟یہوواہ دا اپنے پُتر یسوع نال جِنّاں قریبی رشتہ اے، اُنج دا رشتہ کائنات چ کسے دا نئیں ہو سکدا۔ (‏اَمثال 8:‏30)‏ ذرا سوچو جدوں اوہنے اپنے پُتر نُوں زمین تے تکلیفاں سہندے ویکھیا ہوئے گا تے اوہنوں کیہو جیہا محسوس ہویا ہوئے گا۔ ایہدے چ کوئی شک نئیں کہ جدوں یہوواہ نے ویکھیا ہوئے گا کہ زمین تے اوہدے پُتر نال بُرا سلوک کیتا جا رہیا اے، لوک اوہدے تے ایمان نئیں لیا رہے تے اوہنوں ازمیشاں چوں لنگھنا پے رہیا اے تے اوہنوں بڑا دُکھ ہویا ہوئے گا۔‏

11.‏ اِک مثال دے کے دَسو کہ اپنے پُتر نُوں سُولی تے ویکھ کے یہوواہ نُوں کیہو جیہا محسوس ہویا ہوئے گا۔‏

¹¹ اولاد دے مرن دا دکھ کیہہ ہوندا اے، ایہہ اوہ ماں پیو چنگی طرحاں سمجھ سکدے نیں جنہاں دا کوئی بچہ فوت ہو چکیا اے۔ بھانویں کہ ساڈے کول مُردیاں دے جی اُٹھن دی امید اے پر فیر وی ایہدے توں اوہ تکلیف ختم نئیں ہو جاندی جیہڑی کسے اپنے دے فوت ہون دی وجہ توں ہوندی اے۔ ایس مثال توں اَسی 33 عیسوی چ ہون والے واقعیاں بارے یہوواہ دے جذبات نُوں سمجھ سکنے آں۔ اَسی اوس دُکھ نُوں سمجھ سکنے آں جیہڑا اوہنے اوس ویلے محسوس کیتا جدوں اوہدی اکھاں دے سامنے اوہدے پُتر نے تکلیف سہی تے سُولی تے اپنی جان دے دِتی۔‏c‏—‏متی 3:‏17‏۔‏

12.‏ اَسی مسیح دی موت دی یادگیری توں پہلے والے ہفتیاں چ کیہہ کر سکنے آں؟‏

¹² مسیح دی موت دی یادگیری توں پہلے والے ہفتیاں چ اپنے ذاتی مطالعے یاں خاندانی عبادت چ فدیے بارے گہرائی نال مطالعیا کرو۔ تُسی ایہدے لئی اُردو زبان چ کتاب ‏”‏یہوواہ کے گواہوں کے لئے مطالعے کے حوالے“‏ یاں فیر کسے ہور کتاب نُوں استمال کر سکدے او۔‏d ایہدے علاوہ ‏”‏ساڈی مسیحی زندگی تے خدمت—‏عبادت لئی قاعدہ“‏ چ مسیح دی یادگیری لئی بائبل چوں جیہڑی پڑھائی دِتی جاندی اے، اوہنوں نال نال کرن دی کوشش کرو۔ تے یادگیری والے دن صبح دی عبادت دے پروگرام نُوں ویکھنا نہ بھلو۔ جدوں اَسی ایس خاص موقعے لئی اپنے دل نُوں تیار کراں گے تے اَسی دُوجیاں دی وی زیادہ چنگی طرحاں مدد کر سکاں گے۔—‏عزرا 7:‏10۔‏

مسیح دی یادگیری توں فائدہ حاصل کرن چ دُوجیاں دی مدد کرو

13.‏ جے اَسی مسیح دی یادگیری توں فائدہ حاصل کرن چ دُوجیاں دی مدد کرنا چاہنے آں تے پہلا کم سانوں کیہہ کرنا چاہی دا اے؟‏

¹³ اَسی دُوجیاں دی مدد کیویں کر سکنے آں کہ اوہ وی مسیحی دی موت دی یادگیری توں فائدہ حاصل کرن؟ پہلا کم اَسی ایہہ کر سکنے آں کہ اَسی اوہناں نُوں ایہدے تے آن دی دعوت دَئیے۔ مُنادی چ دعوت‌نامے دین توں علاوہ ایہو جہے ہور لوکاں دی وی اِک لسٹ بناؤ جنہاں نُوں تُسی یادگیری تے آن دی دعوت دینا چاہندے او۔ ایہدے چ تُسی اپنے رشتے‌داراں، اپنے نال کم کرن والیاں، اپنے سکول چ پڑھن والیاں تے ہور جان پچھان والے لوکاں دا ناں لکھ سکدے او۔ جے ساڈے کول چھپے ہوئے دعوت‌نامے نئیں نیں تے اَسی دُوجیاں نُوں اپنے فون توں دعوت‌نامے دا لنک گھل سکنے آں۔ کیہہ پتہ کِنّے لوک ایس دعوت نُوں قبول کر کے مسیح دی یادگیری تے آن۔—‏واعظ 11:‏6۔‏

14.‏ جدوں اَسی کسے نُوں مسیح دی یادگیری تے آن دی دعوت دینے آں تے ایہدے کیہڑے چنگے نتیجے نکلدے نیں؟‏

¹⁴ جدوں اَسی کسے نُوں مسیح دی یادگیری تے آن دی دعوت دینے آں تے اوہنوں بڑا چنگا لگدا اے کہ اوہنوں خاص طور تے دعوت دِتی گئی اے۔ ذرا اِک بھین دے تجربے تے غور کرو۔ اوہدا شوہر اوہدا ہم‌ایمان نئیں اے۔ پر جدوں اِک واری اوہدے شوہر نے اوہنوں کہیا کہ اوہ وی اوہدے نال مسیح دی یادگیری تے جائے گا تے اوہ بڑی حیران ہوئی۔ پر کیوں؟ کیونکہ اوہ کئی سالاں توں اوہنوں مسیح دی یادگیری تے آن دی دعوت دے رہی سی پر اوہ کدی نئیں آیا۔ پر ایس واری اوہنے آن دا فیصلہ کیوں کیتا؟ اوہنے کہیا:‏ ”‏ایس واری اِک بزرگ نے خاص طور تے مینوں مسیح دی یادگیری تے آن دی دعوت دِتی اے۔“‏ اوس بھین دا شوہر نہ صرف اوس سال مسیح دی یادگیری تے آیا سگوں اوس توں بعد وی کئی سالاں تک آندا رہیا۔‏

15.‏ لوکاں نُوں مسیح دی یادگیری تے آن دی دعوت دیندے ویلے سانوں کیہڑی گل یاد رکھنی چاہی دی اے؟‏

¹⁵ ایہہ گل یاد رکھو کہ جیہڑے لوکاں نُوں اَسی مسیح دی یادگیری تے آن دی دعوت دینے آں، اوہناں دے ذہن چ کجھ سوال ہو سکدے نیں، خاص کر اوس ویلے جے اوہ پہلے کدی ساڈی کسے عبادت تے نئیں آئے۔ ایس لئی سانوں پہلاں توں ای سوچنا چاہی دا اے کہ اوہ کیہڑے سوال پچھ سکدے نیں تے فیر جواب دین لئی تیار رہنا چاہی دا اے۔ (‏کُلسّیوں 4:‏6‏)‏ مثال لئی، شاید کجھ لوک سوچن:‏ ”‏ایس عبادت تے کیہہ ہوئے گا؟“‏ ”‏ایہہ کِنّی دیر دی ہوئے گی؟“‏ ”‏اوتھے کیہڑے کپڑے پا کے جانا چاہی دا اے؟“‏ ”‏کیہہ اوتھے جان لئی کوئی فیس دینی پووے گی؟“‏ ”‏کیہہ اوتھے چندہ لیا جائے گا؟“‏ ایس لئی اَسی جدوں کسے نُوں مسیح دی یادگیری تے آن دی دعوت دینے آں تے اَسی اوہناں کولوں پچھ سکنے آں کہ ”‏کیہہ تواڈے ذہن چ ایس بارے کوئی سوال ہے وے؟“‏ تے جے اوہناں دا کوئی سوال ہوئے تے اَسی اوہدا جواب دے سکنے آں۔ اَسی اوہناں نُوں ایہہ ویڈیوز وی وکھا سکنے آں:‏ ‏”‏یسوع مسیح دی موت نُوں یاد رکھو‏“‏ تے ‏”‏ساڈیاں عبادت گاہواں وچ کیہہ ہوندا اے؟‏‏“‏ ایہناں ویڈیوز دے ذریعے اَسی اوہناں دی ایہہ جانن چ مدد کر سکنے آں کہ ساڈیاں عبادتاں کیہو جہیاں ہوندیاں نیں۔ اَسی اوہناں نُوں کتاب ‏”‏خوشیاں بھری زندگی پاؤ—‏ہُن تے ہمیشاں تک“‏ دے سبق نمبر 28 توں وی کئی خاص گلاں دَس سکنے آں۔‏

16.‏ مسیح دی یادگیری تے آن والے لوک ہور کیہڑے سوال پچھ سکدے نیں؟‏

¹⁶ مسیح دی یادگیری تے جیہڑے نویں لوک آندے نیں، اوہناں دے کجھ ہور سوال وی ہو سکدے نیں۔ شاید اوہ سوچن کہ کسے نے وی روٹی تے مے چوں کیوں نئیں کھادا پیتا یاں صرف کجھ ای لوکاں نے کیوں کھادا پیتا اے۔ شاید اوہناں دے ذہن چ ایہہ سوال وی ہوئے کہ اَسی مسیح دی یادگیری نُوں کِنّی وار منانے آں۔ ہو سکدا اے کہ اوہ ایہہ وی جاننا چاہن کہ کیہہ یہوواہ دے گواہواں دِیاں ساریاں عبادتاں اِنج ای ہوندیاں نیں۔ بھانویں کہ ایہناں وچوں بوہت ساریاں گلاں دے جواب یادگیری دی تقریر چ دِتے جاندے نیں پر فیر وی ہوسکدا اے کہ سانوں نویں آن والے لوکاں نُوں ایہناں بارے ہور چنگی طرحاں دَسنا پووے۔ اَسی اوہناں دے کجھ سوالاں دے جواب ویب‌سائٹ تے دِتے گئے ایس مضمون چوں دے سکنے آں:‏ ”‏یہوواہ دے گواہ یسوع مسیح دی موت دی یادگیری دُوجیاں توں فرق طریقے نال کیوں مناندے نیں؟‏‏“‏ اَسی مسیح دی موت دی یادگیری توں پہلاں، ایہدے دوران تے ایہدے بعد لوکاں دی مدد کرن لئی اوہ سب کجھ کرنا چاہنے آں جو اَسی کر سکنے آں تاکہ جیہڑے لوک ہمیشاں دی زندگی دی راہ تے چلنا چاہندے نیں، اوہ ایس عبادت توں فائدہ حاصل کر سکن۔—‏اعمال 13:‏48‏۔‏

اوہناں لوکاں دی مدد کرو جیہڑے یہوواہ توں دُور ہو گئے نیں

17.‏ بزرگ اوہناں بھین بھراواں دی مدد کیویں کر سکدے نیں جیہڑے یہوواہ توں دُور ہو گئے نیں؟ (‏حِزقی‌ایل 34:‏12، 16)‏

¹⁷ جدوں مسیح دی موت دی یادگیری نیڑے آ رہی ہوندی اے تے بزرگ اوہناں بھین بھراواں دی مدد کیویں کر سکدے نیں جیہڑے یہوواہ توں دُور ہو گئے نیں؟ بزرگو، اوہناں بھین بھراواں لئی فکر وکھاؤ۔ ‏(‏حِزقی‌ایل 34:‏12، 16 نُوں پڑھو۔)‏ مسیح دی موت دی یادگیری توں پہلاں تُسی اوہناں وچوں جِنّے زیادہ بھین بھراواں نال رابطہ کر سکدے او، کرو۔ اوہناں نُوں یقین دَواؤ کہ تُسی اوہناں نُوں پیار کردے او تے اوہناں نُوں دَسو کہ تُسی دلوں اوہناں دی مدد کرنا چاہندے او۔ اوہناں نُوں مسیح دی یادگیری تے آن دی دعوت دَوو تے جے اوہ ایہدے تے آندے نیں تے اوہناں نُوں پیار نال ملو۔ یادگیری توں بعد اوہناں نال رابطے چ رہوو تے ہر اوس طریقے نال اوہناں دی مدد کرن دی کوشش کرو جدے ذریعے اوہ یہوواہ کول واپس آ سکدے نیں۔—‏1-‏پطرس 2:‏25‏۔‏

18.‏ اَسی سارے اوہناں بھین بھراواں دی مدد کیویں کر سکنے آں جیہڑے یہوواہ توں دُور ہو گئے نیں؟ (‏رومیوں 12:‏10‏)‏

¹⁸ جدوں ایہو جہے بھین بھرا مسیح دی یادگیری تے آندے نیں جیہڑے یہوواہ توں دُور ہو گئے نیں تے اَسی سارے اوہناں دی مدد کرسکنے آں۔ پر کیویں؟ اَسی اوہناں لئی پیار، مہربانی تے عزت وکھا سکنے آں۔ ‏(‏رومیوں 12:‏10 نُوں پڑھو۔)‏ یاد رکھو کہ ایہناں بھین بھراواں نُوں عبادت تے آندے ویلے پتہ نئیں کِنّی جھجھک محسوس ہو رہی ہوندی اے۔ شاید اوہ سوچدے نیں کہ پتہ نئیں سارے سانوں کیویں مِلن گے۔‏e ایس لئی کوشش کرو کہ تُسی اوہناں کولوں کوئی ایہو جیہا سوال نہ پچھو جدے توں اوہناں نُوں شرمندگی ہوئے یاں کوئی ایہو جہی گل نہ کرو جدے توں اوہناں نُوں تکلیف پونچے۔ (‏1-‏تھسلُنیکیوں 5:‏11‏)‏ ایہہ بھین بھرا وی ساڈے ہم‌ایمان نیں تے جے اوہ فیر توں ساڈے نال مل کے یہوواہ دی عبادت کرن لگ پیندے نیں تے ساڈے لئی ایہہ کِنّی خوشی دی گل اے۔—‏زبور 119:‏176؛‏ اعمال 20:‏35‏۔‏

19.‏ سانوں یسوع مسیح دی موت دی یادگیری نُوں منان نال کیہڑے فائدے ہوندے نیں؟‏

¹⁹ اَسی ایس گل لئی بڑے شکرگزار آں کہ یسوع نے سانوں حکم دِتا اے کہ اَسی اوہدی موت دی یادگیری نُوں ہر سال منائیے۔ اَسی ایہہ وی جاننے آں کہ ایہنوں منانا کِنّاں اہم اے۔ جدوں اَسی ایہدے تے جانے آں تے ایہدے توں سانوں تے دُوجیاں نُوں بوہت فائدہ ہوندا اے۔ (‏یسعیاہ 48:‏17، 18)‏ ساڈے دل چ یہوواہ تے یسوع لئی محبت ودھدی اے تے اوہناں نے ساڈے لئی جو کجھ کیتا اے اَسی اوہدے لئی قدر وکھانے آں۔ ساڈا اپنے ہم‌ایماناں نال رشتہ مضبوط ہوندا اے تے اَسی دُوجے لوکاں دی وی ایہہ سمجھن چ مدد کر پانے آں کہ اوہناں نُوں فدیے دی وجہ توں کیہڑیاں برکتاں مل سکدیاں نیں۔ آؤ فیر اَسی مسیح دی موت دی یادگیری لئی اپنے آپ نُوں چنگی طرحاں تیار کرئیے جیہڑا کہ ایس سال دا سب توں خاص دن اے۔‏