وفادار فرشتیاں دی مثال تے عمل کرو

1، 2.‏ (‏الف)‏فرشتے کیس لحاظ نال ساڈے توں فرق نیں؟ (‏ب)‏ساڈے چ تے فرشتیاں چ کیہڑیاں گلاں مِلدیاں جلدیاں نیں؟‏

یہوواہ دے بندیاں دے طور تے اَسی اوہدے خاندان دا حصہ واں۔ اَسی سارے مِل کے اوہدی عبادت کرنے آں تے اِک دُوجے لئی پیار وکھانے آں۔ ایس خاندان چ نہ صرف پوری دُنیا چ رہن والے ساڈے بھین بھرا سگوں لکھاں فرشتے وی شامل نیں۔ (‏دانی‌ایل 7:‏9، 10)‏ جدوں اَسی فرشتیاں بارے سوچنے آں تے شاید اَسی ایس گل تے غور کرئیے کہ اوہ ساڈے توں کِنّے فرق نیں۔ مثال لئی، فرشتیاں نُوں انساناں توں بوہت پہلے بنایا گیا سی۔ (‏ایوب 38:‏4، 7)‏ اوہ ساڈے نالوں کِتے زیادہ طاقت‌ور نیں۔ اوہ عیب‌دار انساناں نالوں کِتے زیادہ پاک تے نیک نیں۔—‏لُوقا 9:‏26‏۔‏

² سچ اے کہ یہوواہ دے فرشتے کئی لحاظ نال ساڈے توں فرق نیں۔ پر اوہناں وچ تے ساڈے وچ بوہت ساریاں گلاں مِلدیاں جلدیاں وی نیں۔ مثال لئی، فرشتیاں وانگوں اَسی یہوواہ دِیاں خوبیاں ظاہر کر سکنے آں۔ اوہناں وانگوں سانوں وی آپ اپنے فیصلے کرن دی آزادی مِلی اے۔ اوہناں وانگوں ساڈے وی اپنے اپنے ناں تے شخصیت اے تے اَسی وی یہوواہ دی خدمت چ فرق فرق ذمے‌داریاں نبھا رہے آں۔ ایہدے علاوہ فرشتیاں وانگوں ساڈے اندر وی ایہہ خواہش ہوندی اے کہ اَسی اپنے خالق دی عبادت کرئیے۔—‏1-‏پطرس 1:‏12‏۔‏

3.‏ یہوواہ دے وفادار فرشتیاں توں اَسی کیہہ سکھ سکنے آں؟‏

³ فرشتیاں چ تے ساڈے چ بوہت ساریاں گلاں مِلدیاں جلدیاں نیں۔ ایس لئی اوہناں دی مثال تے غور کرن نال ساڈا حوصلہ ودھدا اے تے اَسی اوہناں کولوں بڑیاں اہم گلاں سکھنے آں۔ ایس مضمون چ اَسی ویکھاں گے کہ اَسی فرشتیاں وانگوں خاکسار کیویں بن سکنے آں، دُوجیاں لئی پیار کیویں وکھا سکنے آں، ہر حال چ یہوواہ دے وفادار کیویں رہ سکنے آں تے کلیسیا نُوں پاک صاف کیویں رکھ سکنے آں۔‏

فرشتے خاکسار نیں

4.‏ (‏الف)‏فرشتے خاکساری کیویں ظاہر کردے نیں؟ (‏ب)‏فرشتے خاکسار کیوں نیں؟ (‏زبور 89:‏7)‏

⁴ یہوواہ دے وفادار فرشتے بوہت خاکسار نیں۔ بھانویں کہ اوہناں کول بوہت سارا تجربہ، طاقت تے حکمت اے پر فیر وی اوہ یہوواہ دِیاں ہدیتاں تے عمل کردے نیں۔ (‏زبور 103:‏20)‏ اوہ اپنیاں ذمے‌داریاں نُوں نبھاندے ویلے شیخی نئیں ماردے تے نہ ای اپنی طاقت استمال کردے ہوئیاں دُوجیاں دا دھیان اپنے وَل دَواندے نیں۔ بھانویں اوہناں دے ناں دا ذکر ہوئے یاں نہ ہوئے، فیر وی اوہ خوشی خوشی ہر اوہ کم کردے نیں جیہڑا یہوواہ اوہناں نُوں دیندا اے۔‏a (‏پیدائش 32:‏24، 29؛ 2-‏سلاطین 19:‏35)‏ اوہ اوس وڈیائی نُوں بالکل وی قبول نئیں کردے جدا حق‌دار صرف یہوواہ اے۔ فرشتے اینے خاکسار کیوں نیں؟ کیونکہ اوہ یہوواہ نُوں پیار کردے نیں تے اوہدا گُوڑھا احترام کردے نیں۔‏‏—‏زبور 89:‏7 نُوں پڑھو۔‏

5.‏ اِک فرشتے نے یوحنا رسول دی درستی کردے ویلے خاکساری کیویں وکھائی؟ (‏تصویر نُوں وی ویکھو۔)‏

⁵ ذرا اِک واقعے تے غور کرو جدے توں پتہ چلدا اے کہ فرشتے کِنّے خاکسار نیں۔ تقریباً 96 عیسوی چ اِک فرشتہ یوحنا رسول دے کول آیا۔ ایس فرشتے دا ناں بائبل چ نئیں دَسیا گیا۔ اوہنے یوحنا رسول نُوں اِک بڑی حیران کر دین والی رُویا وکھائی۔ (‏مُکاشفہ 1:‏1‏)‏ ایہہ ویکھ کے یوحنا رسول نے کیہہ کیتا؟ اوہ فرشتے لئی احترام ظاہر کرن واسطے اوہدے اَگے جُھک گیا۔ پر اوس فرشتے نے فوراً اوہنوں اِنج کرن توں روکیا تے کہیا:‏ اِنج نہ کر!‏ صرف خدا دی عبادت کر!‏ مَیں وی اُنج دا ای اِک غلام آں جیویں تُوں تے تیرے بھرا نیں۔ (‏مُکاشفہ 19:‏10‏)‏ اوہ فرشتہ واقعی بڑا خاکسار سی۔ اوہ اپنی وڈیائی یاں تعریف نئیں چاہندا سی۔ اوہنے یوحنا دی توجہ فوراً ایس گل تے دَوائی کہ اوہ صرف یہوواہ دی عبادت تے وڈیائی کرے۔ پر اِنج کردے ویلے فرشتے نے یوحنا رسول نُوں ایہہ نئیں جتایا کہ اوہ اوہدے نالوں بوہتا اہم اے۔ بھانویں کہ اوہ فرشتہ یوحنا نالوں کِتے زیادہ طاقت‌ور سی تے یوحنا دے مقابلے چ زیادہ عرصے توں یہوواہ دی خدمت کر رہیا سی پر فیر وی اوہنے خاکساری نال یوحنا رسول نُوں کہیا کہ اوہ وی اوہدے وانگوں خدا دا غلام اے۔ بھانویں کہ اوس فرشتے نُوں یوحنا رسول دی درستی کرنی پئی پر اوہنے یوحنا نُوں جیہڑا اوس ویلے بڑا وڈیرا ہو چُکیا سی، نہ تے جِھڑکیا تے نہ ای اوہدے نال سختی نال گل کیتی۔ ایہدی بجائے فرشتے نے بڑے پیار تے نرمی نال گل کیتی۔ اوہ فرشتہ ایس گل نُوں سمجھدا سی کہ یوحنا رُویا ویکھ کے بوہت حیران ہو گیا اے۔‏

6.‏ اَسی فرشتیاں وانگوں خاکساری کیویں ظاہر کر سکنے آں؟‏

⁶ اَسی فرشتیاں وانگوں خاکساری کیویں ظاہر کر سکنے آں؟‏ فرشتیاں وانگوں سانوں وی یہوواہ وَلّوں مِلن والیاں ذمے‌داریاں نُوں نبھاندے ویلے شیخی نئیں مارنی چاہی دی تے اپنیاں کامیابیاں لئی اپنی وڈیائی نئیں کرنی چاہی دی۔ (‏1-‏کُرنتھیوں 4:‏7‏)‏ ایہدے علاوہ جے اَسی دُوجیاں نالوں زیادہ عرصے توں یہوواہ دی خدمت کر رہے آں یاں ساڈے کول کجھ ایہو جہیاں ذمے‌داریاں نیں جیہڑیاں اوہناں کول نئیں نیں تے ایس وجہ توں سانوں اپنے آپ نُوں زیادہ اہم نئیں سمجھنا چاہی دا۔ سچ تے ایہہ وے کہ سانوں جِنّیاں زیادہ ذمے‌داریاں مِلدیاں نیں، سانوں اوناں زیادہ خاکسار ہونا چاہی دا اے۔ (‏لُوقا 9:‏48‏)‏ فرشتیاں وانگوں اَسی وی دُوجیاں دی خدمت کرنا چاہنے آں تے اپنی واہ واہ نئیں چاہندے۔‏

7.‏ دُوجیاں دی درستی کردے ویلے یاں اوہناں نُوں کوئی گل سمجھاندے ویلے اَسی خاکساری کیویں وکھا سکنے آں؟‏

⁷ جدوں اَسی اپنے بچے دی یاں فیر کسے ہم‌ایمان دی درستی کرنے آں یاں اوہنوں کوئی گل سمجھانے آں تے سانوں خاکساری نال کم لینا چاہی دا اے۔ کدی کدار سانوں گل گھما پھرا کے کرن دی بجائے سدھے تے صاف لفظاں چ کرنی پیندی اے۔ اوہدوں وی سانوں اوس فرشتے دی مثال تے عمل کرنا چاہی دا اے جنہے بڑے پیار تے نرمی نال یوحنا رسول دی درستی کیتی سی۔ جدوں اَسی اِنج کراں گے تے اگلا بندہ بے‌حوصلہ نئیں ہوئے گا۔ جے اَسی اپنے آپ نُوں دُوجیاں نالوں اہم نئیں سمجھاں گے تے اَسی بائبل توں کسے دی درستی کردے ویلے اوہدے لئی پیار تے عزت وکھا سکاں گے۔—‏کُلسّیوں 4:‏6‏۔‏

فرشتے انساناں نال پیار کردے نیں

8.‏ (‏الف)‏لُوقا 15:‏10 توں ایہہ کیویں ثابت ہوندا اے کہ فرشتے انساناں نال پیار کردے نیں؟ (‏ب)‏فرشتے مُنادی کرن چ ساڈی مدد کیویں کردے نیں؟ (‏ دی تصویر نُوں وی ویکھو۔)‏

⁸ فرشتے ایہہ نئیں سوچدے کہ انسان ساڈے نالوں گھٹ اہم نیں۔ نہ ای اوہ ایہہ سوچدے نیں کہ بھانویں انساناں نال جو مرضی ہوئے، سانوں کوئی فرق نئیں پیندا۔ ایہدی بجائے فرشتے انساناں نال پیار کردے نیں۔ اوہ اوس ویلے بڑے خوش ہوندے نیں جدوں کوئی بندہ اپنے گُناہواں توں توبہ کر کے یہوواہ کول واپس آ جاندا اے یاں فیر جدوں کوئی یہوواہ بارے سکھ کے اپنی زندگی نُوں بدلدا اے تے اوہدی عبادت کرنا شروع کر دیندا اے۔ ‏(‏لُوقا 15:‏10 نُوں پڑھو۔)‏ فرشتے مُنادی کرن چ وی ساڈا ساتھ دیندے نیں۔ (‏مُکاشفہ 14:‏6‏)‏ بھانویں کہ اوہ آپ لوکاں کول جا کے بادشاہی دا پیغام نئیں سناندے پر اوہ کسے مبشر دی رہنمائی کر سکدے نیں تاکہ اوہ اوس بندے نُوں ملے جیہڑا یہوواہ بارے سکھنا چاہندا اے۔ سچ اے کہ اَسی پورے یقین نال نئیں کہہ سکدے کہ فلانے بندے نُوں مِلن لئی کسے فرشتے نے ساڈی رہنمائی کیتی اے۔ یہوواہ کسے ہور ذریعے توں وی ایہو جہے لوکاں نُوں مِلن چ ساڈی مدد کر سکدا اے جیویں کہ اپنی پاک روح دے ذریعے۔ (‏اعمال 16:‏6، 7‏)‏ پر اوہ اپنے فرشتیاں نُوں وی مُنادی دے دوران ساڈی مدد کرن لئی استمال کردا اے۔ ایس لئی جدوں اَسی دُوجیاں نُوں بادشاہی دا پیغام سنانے آں تے اَسی پکا یقین رکھ سکنے آں کہ فرشتے ایس کم چ ساڈے نال ہوندے نیں۔—‏ایس بکس نُوں وی ویکھو:‏ ‏”‏اوہناں نُوں اپنیاں دُعاواں دا جواب مِلیا۔‏‏“‏

9.‏ اَسی فرشتیاں وانگوں دُوجیاں لئی محبت کیویں وکھا سکنے آں؟‏

⁹ اَسی فرشتیاں وانگوں دُوجیاں لئی محبت کیویں وکھا سکنے آں؟‏ جدوں اَسی ایہہ اعلان سننے آں کہ اِک بندہ کلیسیا چ بحال ہو گیا اے تے فرشتیاں وانگوں اَسی وی خوش ہو سکنے آں۔ اَسی اوس بھین یاں بھرا نُوں اپنی محبت دا احساس دَوا سکنے آں تے اوہنوں دَس سکنے آں کہ کلیسیا چ اوہدے واپس آن توں سانوں کِنّی خوشی اے۔ (‏لُوقا 15:‏4-‏7؛‏ 2-‏کُرنتھیوں 2:‏6-‏8‏)‏ فرشتے جی جان نال اوہ کم کردے نیں جیہڑا یہوواہ اوہناں نُوں دیندا اے۔ اوہناں وانگوں اَسی وی خوش‌خبری دا کم جی جان نال کر سکنے آں۔ (‏واعظ 11:‏6)‏ تے جیویں فرشتے مُنادی کرن چ ساڈا ساتھ دیندے نیں اونویں ای اَسی وی مُنادی کرن چ اپنے بھین بھراواں دا ساتھ دے سکنے آں۔ مثال لئی، اَسی کسے نویں مبشر یاں کسے وڈیرے تے بیمار بھین بھرا نال مِل کے مُنادی کر سکنے آں۔‏

10.‏ اَسی بھین سارہ توں کیہہ سکھنے آں؟‏

¹⁰ جدوں اَسی اپنے حالاتاں دی وجہ توں یہوواہ دی اونی خدمت نئیں کر پاندے جِنّی اَسی کرنا چاہنے آں تے اَسی کیہہ کر سکنے آں؟ اَسی فرشتیاں نال مِل کے کئی ہور طریقیاں نال مُنادی کر سکنے آں۔ ذرا بھین سارہb دی مثال تے غور کرو جیہڑی اِنڈیا چ رہندی اے۔ اوہ تقریباً 20 سالاں توں پہل‌کار دے طور تے خدمت کر رہی سی۔ پر فیر اوہ اینی بیمار ہو گئی کہ اوہ بسترے توں وی نئیں اُٹھ سکدی سی۔ اوہ بوہت مایوس ہو گئی سی۔ پر کلیسیا دے بھین بھراواں دی مدد تے باقاعدگی نال بائبل پڑھن نال اوہ فیر توں خوش رہن لگ پئی۔ اپنے حالاتاں دی وجہ توں ہُن اوہنوں فرق طریقیاں نال مُنادی کرنی سی۔ اوہ بہہ کے خط وی نئیں لکھ سکدی سی ایس لئی اوہ اوہناں لوکاں نال فون تے گل بات کرن لگ پئی جیہڑے اوہدی واپسی ملاقات سن۔ اوہناں لوکاں نے بھین نُوں کجھ ہور ایہو جہے لوکاں بارے دَسیا جیہڑے پاک کلام توں سکھنا چاہندے سن۔ بھین سارہ دی محنت دا کیہہ نتیجہ نکلیا؟ کجھ ای مہینیاں چ اوہ 70 لوکاں نُوں بائبل کورس کران لگ پئی۔ اوہدے لئی ایہناں سارے لوکاں نُوں بائبل کورس کرانا مشکل سی۔ ایس لئی اوہنے اپنی کلیسیا دے کجھ بھین بھراواں نُوں کہیا کہ اوہ اوہناں وچوں کجھ لوکاں نُوں بائبل کورس کران۔ اوہناں وچوں بوہت سارے لوک ہُن ساڈیاں عبادتاں تے آندے نیں۔ ذرا سوچو کہ فرشتیاں نُوں مُنادی چ بھین سارہ ورگے بھین بھراواں دا ساتھ دے کے کِنّی خوشی ہوندی ہوئے گی۔‏

فرشتے ہر حال چ یہوواہ دے وفادار رہندے نیں

11.‏ فرشتیاں نے ہر حال چ یہوواہ دے وفادار رہن دی چنگی مثال کیویں قائم کیتی اے؟‏

¹¹ فرشتیاں نے ہر حال چ یہوواہ دے وفادار رہن دی بڑی چنگی مثال قائم کیتی اے۔ اوہ ہزاراں سالاں توں نااِنصافی تے بُرائی برداشت کر رہے نیں۔ اوہناں نے ویکھیا اے کہ اوہ فرشتے جیہڑے پہلاں اوہناں نال مِل کے یہوواہ دی عبادت کردے ہوندے سن، اوہناں نے شیطان نال مِل کے یہوواہ دے خلاف بغاوت کیتی اے۔ (‏پیدائش 3:‏1؛ 6:‏1، 2؛‏ یہوداہ 6‏)‏ ایہدے علاوہ بائبل چ ایہہ وی دَسیا گیا اے کہ اِک واری یہوواہ دے اِک وفادار فرشتے نُوں بُرے فرشتے وَلّوں مخالفت دا سامنا ہویا تے اوہنوں کئی دِناں تک اوہدے نال لڑنا پیا۔ (‏دانی‌ایل 10:‏13)‏ آدم تے حوا دے زمانے توں ای فرشتے ایہہ ویکھدے آ رہے نیں کہ بس تھوڑے جہے انساناں نے ای یہوواہ دی عبادت کرن دا فیصلہ کیتا اے۔ ایہہ ساریاں گلاں ویکھن دے باوجود یہوواہ دے ایہہ وفادار فرشتے خوشی تے جوش نال اوہدی خدمت کر رہے نیں۔ اوہ جان دے نیں کہ یہوواہ صحی وقت تے ساری نااِنصافی ختم کر دَوے گا۔‏

12.‏ کیہڑی چیز ہر حال چ یہوواہ دا وفادار رہن چ ساڈی مدد کر سکدی اے؟‏

¹² اَسی فرشتیاں وانگوں ہر حال چ یہوواہ دے وفادار کیویں رہ سکنے آں؟‏ فرشتیاں وانگوں شاید اَسی وی نااِنصافی ہوندیاں ویکھی اے تے مخالفت دا سامنا کیتا اے۔ پر اوہناں وانگوں سانوں وی ایس گل تے پکا یقین اے کہ یہوواہ صحی وقت تے ساری بُرائی نُوں ختم کر دَوے گا۔ ایسے لئی اَسی وی ”‏چنگے کم کرنے“‏ نئیں چھڈدے۔ (‏گلتیوں 6:‏9‏)‏ تے یہوواہ نے وی وعدہ کیتا اے کہ اوہ ساڈی مدد کرے گا تاکہ اَسی ہر حال چ اوہدے وفادار رہ سکئے۔ (‏1-‏کُرنتھیوں 10:‏13‏)‏ اَسی یہوواہ کولوں اوہدی پاک روح لئی دُعا کر سکنے آں تاکہ اَسی اپنے اندر صبر تے خوشی ورگیاں خوبیاں پیدا کر سکئے۔ (‏گلتیوں 5:‏22؛‏ کُلسّیوں 1:‏11‏)‏ پر جے توانوں مخالفت دا سامنا ہوندا اے تے تُسی کیہہ کر سکدے او؟ یہوواہ تے پورا بھروسا رکھو تے نہ ڈرو۔ یہوواہ ہمیشاں تواڈی مدد کرے گا تے توانوں طاقت دَوے گا۔—‏عبرانیوں 13:‏6‏۔‏

فرشتے کلیسیا نُوں پاک صاف رکھن چ مدد کردے نیں

13.‏ آخری زمانے چ فرشتے کیہڑی خاص ذمے‌داری نبھا رہے نیں؟ (‏متی 13:‏47-‏49‏)‏

¹³ آخری زمانے چ یہوواہ نے اپنے فرشتیاں نُوں اِک خاص ذمے‌داری دِتی اے۔ ‏(‏متی 13:‏47-‏49 نُوں پڑھو۔)‏ پوری دُنیا چ لکھاں لوک بادشاہی دے پیغام چ دلچسپی لیندے نیں۔ ایہناں وچوں کجھ لوک اپنے اندر تبدیلیاں لیا کے یہوواہ دے معیاراں مطابق زندگی گزار رہے نیں جد کہ کجھ اِنج نئیں کر رہے۔ یہوواہ نے اپنے فرشتیاں نُوں ایہہ کم دِتا اے کہ اوہ ”‏نیک لوکاں نُوں بھیڑے لوکاں توں وَکھ کرن۔“‏ ایہدا مطلب اے کہ فرشتیاں نُوں ایہہ ذمے‌داری مِلی اے کہ اوہ کلیسیا نُوں پاک صاف رکھن۔ پر ایہدا ایہہ مطلب نئیں اے کہ جے کوئی بندہ یہوواہ دی عبادت کرنا چھڈ دیندا اے تے اوہ اوہدے کول واپس نئیں جا سکدا تے نہ ای ایہدا مطلب ایہہ وے کہ کلیسیا چ کدی کوئی مسئلے نئیں کھڑے ہون گے۔ پر فیر وی اَسی ایس گل تے پورا یقین رکھ سکنے آں کہ فرشتے کلیسیا نُوں پاک صاف رکھن لئی سخت محنت کر رہے نیں۔‏

14، 15.‏ اَسی کیویں ثابت کر سکنے آں کہ اَسی وی فرشتیاں وانگوں کلیسیا نُوں پاک صاف رکھنا چاہنے آں؟ (‏تصویراں نُوں وی ویکھو۔)‏

¹⁴ فرشتیاں وانگوں اَسی وی کلیسیا نُوں پاک صاف کیویں رکھ سکنے آں؟‏ یہوواہ نال اپنی دوستی مضبوط رکھن نال۔ ایہدے لئی ضروری اے کہ اَسی اپنے دل دی حفاظت کرئیے تے ایہو جہے لوکاں نال دوستی کرئیے جیہڑے یہوواہ نُوں پیار کردے نیں۔ ایہدے علاوہ سانوں ہر اوس کم توں دُور رہنا چاہی دا اے جدی وجہ توں یہوواہ نال ساڈی دوستی کمزور پے سکدی اے۔ ‏(‏زبور 101:‏3)‏ اَسی اپنے ہم‌ایماناں دی وی مدد کر سکنے آں کہ اوہ یہوواہ دے نیڑے رہن۔ مثال لئی، جے سانوں پتہ چلدا اے کہ ساڈے کسے ہم‌ایمان نے کوئی وڈا گُناہ کیتا اے تے سانوں کیہہ کرنا چاہی دا اے؟ اَسی اوہدے نال پیار کرنے آں ایس لئی اَسی اوہنوں کہہ سکنے آں کہ اوہ ایس بارے کلیسیا دے بزرگاں نال گل کرے۔ جے اوہ اِنج نئیں کردا تے اَسی آپ جا کے کلیسیا دے بزرگاں نال ایس بارے گل کراں گے۔ اَسی چاہنے آں کہ ساڈا جیہڑا ہم‌ایمان یہوواہ توں دُور جا رہیا اے، اوہنوں چھیتی توں چھیتی مدد ملے۔—‏یعقوب 5:‏14، 15‏۔‏

¹⁵ افسوس دی گل اے کہ کجھ لوکاں دے وڈے گُناہواں دی وجہ توں اوہناں نُوں کلیسیا چوں کڈھنا پیندا اے۔‏c (‏1-‏کُرنتھیوں 5:‏9-‏13‏)‏ جدوں اِنج ہوندا اے تے سانوں ایہو جہے لوکاں نال بہنا کھلونا چھڈ دینا چاہی دا اے۔ توبہ نہ کرن والے بندے نُوں کلیسیا چوں کڈھن نال کلیسیا پاک صاف رہندی اے۔ ایہدے علاوہ، ایہو جہے لوکاں نال کوئی تعلق نہ رکھ کے اَسی اوہناں لئی پیار وکھا رہے ہُنے آں۔ ایہدی وجہ توں اوہناں دے دل چ ایہہ خواہش پیدا ہو سکدی اے کہ اوہ یہوواہ وَل واپس آ جان۔ تے جدوں اوہ واپس آ جاندے نیں تے یہوواہ تے اوہدے فرشتیاں دے نال نال اَسی وی خوشی منانے آں۔—‏لُوقا 15:‏7‏۔‏

16.‏ تُسی کیہڑے طریقیاں نال فرشتیاں دی مثال تے عمل کرن دی کوشش کر سکدے او؟‏

¹⁶ ایہہ ساڈے لئی کِنّے مان دی گل اے کہ اَسی اپنے ایمان دِیاں اکھاں نال یہوواہ دے فرشتیاں نُوں ویکھ سکنے آں تے اوہناں نال مِل کے کم کر سکنے آں۔ آؤ یہوواہ دے وفادار فرشتیاں وانگوں اَسی وی خاکسار بنئے، دُوجیاں لئی محبت وکھائیے، ہر حال چ یہوواہ دے وفادار رہیے تے کلیسیا نُوں پاک صاف رکھن دی پوری کوشش کرئیے۔ جے اَسی اوہناں دی مثال تے عمل کراں گے تے اَسی ہمیشاں تک یہوواہ دے خاندان دا حصہ بنے رہواں گے۔‏