اپنے دل نُوں تیار کرو

جدوں اَسی بائبل دا مطالعیا کرنے آں تے اَسی چاہنے آں کہ یہوواہ دی سوچ ساڈے دل تے اثر کرے۔ ایس بارے عزرا نے بڑی چنگی مثال قائم کیتی۔ اوہنے اپنے دل نُوں تیار کیتا ہویا سی کہ اوہ یہوواہ دی شریعت توں رہنمائی حاصل کرے گا۔ (‏عزرا 7:‏10)‏ اَسی بائبل دا مطالعیا کرن لئی اپنے دل نُوں کیویں تیار کر سکنے آں؟‏

دُعا کرو:‏ بائبل دا مطالعیا شروع کرن توں پہلاں دُعا کرو۔ یہوواہ کولوں مدد منگو کہ اوہ اوہناں گلاں نُوں چنگی طرحاں سمجھن تے اوہناں تے عمل کرن چ تواڈی مدد کرے جیہڑیاں تُسی پڑھ رہے او۔—‏زبور 119:‏18، 34۔‏

خاکسار بنو:‏ خدا اوہناں لوکاں تے سچائی ظاہر نئیں کردا جیہڑے سوچدے نیں کہ ایہنوں سمجھن لئی اوہناں نُوں کسے دی مدد دی لوڑ نئیں اے۔ ایس لئی خاکسار بنو۔ (‏لُوقا 10:‏21‏)‏ ایہدے علاوہ دُوجیاں نُوں وکھان لئی بائبل توں تحقیق نہ کرو۔ نالے جدوں مطالعیا کردے ویلے توانوں محسوس ہوندا اے کہ توانوں اپنی سوچ نُوں بدلن دی لوڑ اے تے اِنج کرن لئی تیار رہوو۔‏

گیت سُنو:‏ موسیقی ساڈے جذبات تے دل تے گُوڑھا اثر پاندی اے۔ ایس لئی جے اَسی بائبل دا مطالعیا کرن توں پہلاں اپنی تنظیم دا کوئی گیت سُناں گے تے اَسی مطالعیا کرن لئی اپنے دل نُوں تیار کر سکاں گے۔‏