AN̈KEJAYOʼOYI 39
Juʼuts iaʼm Jehová jeʼm nɨʼɨpiñ
Tsaam importante jeʼm nɨʼɨpiñ. Siiga dyaʼ tanɨʼpiñɨytyaʼm dyaʼ wɨap tañitytyaʼm. Iga Dios tawatnetaʼm, numaaj jeʼ tanɨʼmaʼyba juutypɨk wɨɨ iga tampɨguiñ. ¿Tyi tanɨʼmaʼyba? ¿Wɨapsɨ tan̈kɨʼɨs o tanakkaʼmtaʼm jeʼm nɨʼɨpiñ? ¿Tyi wɨap miyooxpaʼt iga in̈wɨpɨguiñ iñjɨɨxi jesɨk tɨgɨykuʼmpa jeʼm nɨʼɨpiñ?
1. ¿Juʼuts iaʼm Jehová jeʼm nɨʼɨpiñ?
Wiñɨk, Jehová iñɨʼmay jeʼm iyooxakɨʼɨwiñyaj: «Jeʼm nɨʼɨpiñ iniitywɨʼɨp jeʼm maayiʼ, jeʼam jeʼm iityi» (Levítico 17:14). Para Jehová, jeʼm nɨʼɨpiñ ikwiñkejpa jeʼm ityi. Y jeʼm ityi jeʼ tuum wɨbɨk xaaja tachiʼiñewɨʼɨp Dios, jeʼyukmɨ jeʼm nɨʼɨpiñ tsaam sagrado.
2. ¿Taaʼmchityaʼmpa Dios iga tampɨktaʼmiñ jeʼm nɨʼɨpiñ?
Wiñtyityim, Jehová iñɨʼmay jeʼm iyooxakɨʼɨwiñyaj iga odoy ikɨʼɨsyajiñ nɨʼɨpiñ (maayɨʼ Génesis 9:4 y Levítico 17:10). Okmɨ Jehová eybɨktyim nɨm yɨʼp an̈kiʼmayoʼoyi. Jeʼm kumun nayooxaoyyajpaʼap—jeʼm apóstolyaj y ancianojyaj—ichiʼiyaj yɨʼp an̈kiʼmayoʼoyi jeʼm cristianojyaj: «Odoy pɨktson̈taʼamɨ […] nɨʼɨpiñ» (maayɨʼ Hechos 15:28, 29, TNM).
¿Tyi nɨmtoʼoba iga odoy tampɨktson̈iñ nɨʼɨpiñ? Siiga jeʼm doctor miñɨʼmaʼyba iga odoy iñuguiñ alcohol, wɨapsɨ iga mich in̈kupɨkpa. Pero ¿in̈kɨʼɨspa wiʼkkuyan̈jom o minijuʼptaap? Dyaʼ in̈watpa yɨʼɨmpɨk. Jeempɨktyim naspa kun jeʼm an̈kiʼmayoʼoyi iga odoy tampɨktson̈taʼmiñ nɨʼɨpiñ. Tan̈kupɨktaʼmpa Dios jesɨk dyaʼ tan̈kɨʼɨstaʼmpa nɨʼɨpiñ, dyaʼ tanukpa, dyaʼ tan̈kɨʼɨspa animatyaj iga dyaʼ tobayyajtaap iñɨʼɨpiñ ni jeʼm wiʼkkuy iga kukomayñeyajta nɨʼɨpiñ.
Jeʼm doctores ikkaʼmayyajpa nɨʼɨpiñ jempɨk mɨmneyaj iga pɨxiñ, jeʼyukmɨ wɨapsɨ iga ipɨkyajpa ityumpɨy o tuum jeʼm cuatro najaakaʼ iniitywɨʼɨp jeʼm nɨʼɨpiñ: glóbulos rojos, glóbulos blancos, plaquetas y plasma. Y Dios dyaʼ ikusuʼnɨʼyba. Pero itytyim tratamiento juuty pɨktaap maaj uxtyam, dyampɨk kaʼpsneʼeba juʼuts nɨʼɨpiñ (fracciones sanguíneas) y yɨʼp wɨap ipɨkta tuum jeʼm cuatro najaakaʼ iniitywɨʼɨp jeʼm nɨʼɨpiñ. Y wɨapsɨ iga jeʼtyim iñɨʼɨpiñ pɨgaytyaap. Okmɨ iga ikɨʼpin̈neum juʼptam tratamiento ity, iyaʼagam ipɨkpa ijɨɨxi (Gálatas 6:5).a
MAAJ TAN̈WƗKUYUJKAIÑ
Tan̈kɨʼpin̈iñ tyi wɨɨ iga tanjɨɨskupakneiñ jesɨk tan̈kupin̈ba juʼptam tratamiento tampɨktson̈ba.
3. Pɨɨkɨ jɨɨxiyaj imaymaywatpaʼap Jehová
¿Juutypɨk wɨap impɨk jɨɨxiyaj iwɨixpaʼap Dios jesɨk tɨgɨykuʼmpa jeʼm nɨʼɨpiñ? Aʼmtaʼamɨ jeʼm VIDEO y okmɨ an̈mattaʼamɨ juʼtspɨy tawɨwadaʼyba siiga tan̈watpa juʼuts nɨmpa yɨʼɨm:
Wagaʼayɨ Dios joodon̈oʼoyi (Santiago 1:5).
Kuaʼmɨ jɨɨxian̈chioʼoyiyaj itywɨʼɨp Bibliajom y kupɨɨkɨ (Proverbios 13:16).
Juuty miity akwagoʼoyɨ juʼptam tratamiento ity iga wɨaiñ in̈kupin̈.
Kɨʼpin̈ɨ juʼptam tratamiento dyaʼ impɨktson̈ba.
Odoy mimoʼogɨʼyiñ jeʼm jɨɨxi impɨknewɨʼɨp (Hechos 24:16).b
Jɨɨskupakneɨʼ, dyaʼ i wɨap miñɨʼmay juʼp jɨɨxi wɨap impɨk—ni in̈wɨdyaaya, ni iñyoomoʼ, ni tuum anciano o jempɨk mikkuyujpa—mich jempɨk impɨkpa jeʼm iñjɨɨxi (Romanos 14:12).
Jaykamtsaakɨ jeʼm jɨɨxi impɨknewɨʼɨp.
4. Jeʼm Jehová itestigojyaj natsoyɨyyajtaptyim
Iga tan̈kupɨktaʼmpa jeʼm Dios ian̈kiʼmayoʼoyi, de jeʼm nɨʼɨpiñ, dyaʼ nɨmtoʼoba iga dyaʼ tanawɨtsoyɨytyaap. Aʼmtaʼamɨ jeʼm VIDEO.
Maytyaʼamɨ Tito 3:2 y an̈mattaʼamɨ tyi iñjɨɨstaʼmpa y kutson̈taʼamɨ:
¿Tyiʼiga jesɨk tanamuruyajpa jeʼm doctoryaj wɨɨ iga tan̈wadyiñ kun respeto?
Dyaʼ ampɨktson̈taʼmpa |
Cada i ipɨkpa ijɨɨxi |
|---|---|
A. Plasma sanguíneo. |
Fracciones iniitywɨʼɨp plasma |
B. Glóbulos blancos. |
Fracciones iniitywɨʼɨp glóbulos blancos |
C. Plaquetas. |
Fracciones iniitywɨʼɨp plaquetas |
D. Glóbulos rojos. |
Fracciones iniitywɨʼɨp glóbulos rojos |
5. Fracciones iniitywɨʼɨp jeʼm nɨʼɨpiñ
Jeʼm nɨʼɨpiñ iniity cuatro najaakaʼ: glóbulos rojos, glóbulos blancos, plaquetas y plasma. Y tumtum yɨʼpyaj jaakaʼ iniity uxtyam, dyampɨk kaʼpsneʼ juʼuts nɨʼɨpiñ.c Y weeñi yɨʼp maaj uxtyam iniity nɨʼɨpiñ, pɨkyajtaap iga tsoyɨytyaap kaʼkuyyaj o jesɨk algun i nakunɨʼpiñaytyaap.
Juʼutsam ikuyujkaneʼ jeʼm Bibliajom, tumtum cristiano iyaʼak ipɨkpa ijɨɨxi siiga ipɨktson̈ba tuum tratamiento iga tɨgɨykuʼmpa kun jeʼm fracciones. Wɨapsɨ iga weeñiyaj ipɨkyajpa ijɨɨxi iga dyaʼ ipɨktson̈yajpa tuum tratamiento iga iniitypa jempɨk dyam kaʼpsneʼ juʼuts nɨʼɨpiñ. Pero tun̈gakyaj wɨapsɨ iga ipɨktson̈yajpa.
Jesɨk impɨkpa iñjɨɨxi, nakwaʼktaajɨ:
¿Juutypɨk anan̈madaʼyba jeʼm doctor tyiʼiga ampɨktson̈ba o dyaʼ jeʼm fracciones iniitywɨʼɨp jeʼm nɨʼɨpiñ?
WEEÑI AKWAʼGOYYAJPA: «Siiga jeʼm nɨʼɨpiñ wɨap takpɨs, jesɨk ¿tyiʼiga odoy tanakkaʼmiñ?».
¿Tyi iñjɨɨspa mich?
JEMPƗK TAN̈KUYUJKAʼ
Jehová ixunba iga tantsoowaixtyaʼmiñ jeʼm nɨʼɨpiñ y odoy tammalpɨktaʼmiñ.
¿Iñjɨɨspanam?
¿Tyiʼiga Jehová tsaam ichoowaixpa jeʼm nɨʼɨpiñ?
¿Tyiʼiga jesɨk nɨm Dios iga odoy tampɨktson̈taʼmiñ nɨʼɨpiñ tɨgɨykuʼmpatyim iga odoy tanakkaʼmtaʼmiñ?
Jesɨk impɨkpa tratamiento iga tɨgɨykuʼmpa jeʼm nɨʼɨpiñ, ¿tyi miyooxpaʼtpa in̈wɨpɨk iñjɨɨxi?
JODON̈AAJƗNAM
Siiga en tuum tratamiento nasuntaap iga iññɨʼɨpiñtyim mipɨgaytyaiñ, ¿tyi wɨɨ iga iñjɨɨskupakneiñ?
«Weeñiyaj akwaʼgoyyajpa» (La Atalaya, 15 de octubre de 2000)
Wiñtyi iga impɨguiñ iñjɨɨxi siiga impɨktson̈ba jeʼm fracciones iniitywɨʼɨp nɨʼɨpiñ, ¿tyi wɨɨ iga in̈kɨʼpin̈iñ?
¿Tyi iyooxpaʼt tuum doctor iga ikupɨguiñ iga Jehová tsaam ichoowaixpa jeʼm nɨʼɨpiñ?
«An̈kutɨʼɨyɨy juʼuts iaʼm Dios jeʼm nɨʼɨpiñ» (¡Despertad!, 8 de diciembre de 2003)
Jodon̈aajɨ juutypɨk iyooxpaʼtyajpa jeʼm ityɨwɨtam jeʼm ancianojyaj iga iwaganayooxayajpa jeʼm Comités de Enlace con los Hospitales.
a Aʼmɨ jeʼm an̈kejayoʼoyi 35, «Juutypɨk tan̈wɨpɨkpa tanjɨɨxi».
b Aʼmɨ jeʼm punto 5, «Fracciones iniitywɨʼɨp jeʼm nɨʼɨpiñ» y jeʼm nota 3, «Tratamiento juuty tɨgɨykuʼmpa jeʼm nɨʼɨpiñ».
c Weeñi doctoryaj ijɨɨsyajpa iga jeʼm cuatro najaakaʼ iniitywɨʼɨp jeʼm nɨʼɨpiñ, jeʼam jeʼm fracciones. Jeʼyukmɨ wɨapsɨ iga nasuntaap iga mich in̈wɨan̈madaʼyiñ tyiʼiga dyaʼ inikkaʼmpa jeʼm nɨʼɨpiñ o tuum jeʼm cuatro najaakaʼ iniitywɨʼɨp: glóbulos rojos, glóbulos blancos, plaquetas o plasma.