34 Ahpw ohl emen kesikihweite nah kesik ketieuwo oh lel nanmwarkien Israel nanpwungen peusepen eh likou meteo.* Nanmwarkio eri ndaiong nah soundak kurumao: “Wekidek oh waiehsang nan mahwenet,* pwehki I ohla laud.”+ 35 Mahweno wiewiawi erein rahno pwon, oh nanmwarkio anahne utuhtda nan kurumao, sohsohpeilahng mehn Siria kan. Ntahn eh ohlao kerediong nan kurumahn mahweno, e ahpw mehla nin soutiko.+