4 Ni ahnsou me lih nanmwarkien Sipao kilangehr erpit en Solomon koaros,+ tehnpas me e kauwadahro,+ 5 mwenge kan me mi pohn eh tehpel,+ wasa me nah ladu kan kin mwohd ie, mwomwen nah sounpapah kan ar kin papah ni tehpel oh arail likou kan, nah sounkohwahn wain kan, oh eh meirong isihs me e kin wiewia ahnsou koaros ni tehnpesen Siohwa, e uhdahn pwuriamweikihla. 6 E ahpw ndaiong nanmwarkio: “Rohng me I rong nan ei wehi duwen omwi pweida* oh omwi erpit me mehlel. 7 Ahpw I sohte kin kamehlele rohngo lao I kohdo oh kilangki pein mesei. Oh kilang! I pil saikinte rongedi elep. Omwi erpit oh paiamwahu siklahsang mehlel dahme I rongehro.