Nein Sohn Kesiluhwen Kisinlikou
1 Sang ohl maho,* ong Kaius, me I kin poakohng mehlel.
2 Kompoakepahi, I kin kapakapki ken pousehlahte pweida mwahu ni soahng koaros oh ahneki roson mwahu, duwehte omw kin pweida mwahu ahnsou wet. 3 Pwe I uhdahn perenda ni ahnsou me riatail ko kohdo oh koasoiahda omw kin lelepek ong me mehlelo, duwehte omw kin pousehlahte weweidki me mehlelo.+ 4 Sohte peren* me I ahneki me laudsang met: ei kin rong me nei seri kan kin pousehlahte weweidki me mehlelo.+
5 Kompoakepahi, ke kin kasalehda omw lelepek ni soahng kan me ke kin wiahiong riatail kan, mendahki omw sehse irail.+ 6 Re kadehdehiong mwomwohdiso duwen omw limpoak. Ni ar pahn mwesel, menlau sewese irail ni ahl me Koht ketin kupwurki.+ 7 Pwehki mwareo re kin kohieilahng soangsoangen wasa kan, oh re sohte kin ale mehkot+ sang rehn mehn liki kan.* 8 Eri kitail anahne kasamwo soangen aramas pwukat+ pwe kitail en wiahla iangarail tohndoadoahk en me mehlelo.+
9 I ntingkiwohng mwomwohdiso duwen mehkot, ahpw Diohtrepihs, me kin men keieu lapalap nanpwungarail,+ sohte kin wauneki dahme se kin nda.+ 10 Ihme kahrehda ma I pahn kohwei, I pahn kapwarehda dahme e kin wiewia, duwehte eh kin ndaseli soahng suwed kan duwen kiht.*+ E sohte itarkihte met, ahpw e pil kin kahng kasamwo riatail kan+ ni wahu; oh irail kan me men kasamwo irail, e kin song en ireiraildi oh kausirailsang nan mwomwohdiso.
11 Kompoakepahi, dehr kahlemengih dahme suwed, ahpw kahlemengih dahme mwahu.+ Mehmen me kin wia me mwahu kohsang rehn Koht.+ Mehmen me kin wia me suwed sohte kin kilang Koht.+ 12 Irail koaros kin koasoia soahng mwahu kan duwen Demihtrius oh me mehlelo pil kin kadehdehda duwen met. Ni mehlel, se pil kin kadehdehda duwen ih, oh ke ese me at kadehde me mehlel.
13 Mie soahng tohto me I pahn ntingkiwohng uhk, ahpw I sohte men doula ntingiheki pehn oh ingk. 14 Ahpw I koapworopworki me I pahn tuhwong uhk ni ahnsou keren, kita ahpw pahn koasoipene ni ata tuhpene.
Popohl en kin ieiang uhk.
Kompoakepatail kat kadarowohng uhk arail rahnmwahu. Kihong ei rahnmwahu ong emenemen kompoakepatail kan wasahn.