Esekiel

18 Oh Siohwa ketin pwurehng mahsanihong ie: 2 “Ia wehwehn lepin kahs me kumwail kin ndinda nan sapwen Israel, ‘Sahm kan kangalahr kreip karer kan, ahpw ngihn seri kan me rerada’?+

3 “Kaun Wasa Lapalahpie Siohwa ketin mahsanih, ‘Nin duwen ei ieias, kumwail sohla pahn kin nda lepin kahs wet nan Israel. 4 Kilang! Mour* koaros—ngehi me sapwellimanki. Duwehte ei sapwellimanki mour en pahpa men, I pil sapwellimanki mour en seri kan. Mehmen* me kin dipada, iei ih me pahn mehla.

5 “‘Ele ohl emen kin pwung oh kin wia dahme pwung oh pahrek. 6 E sohte kin tungoale mehn meirong ong dikedik kan pohn nahna kan;+ e sohte kin kilangdahng dikedik kasaut* kan en aramas en Israel kan; e sohte kin kasaminehla en mehn mpe pwoud+ de wendi rehn lih emen me wia eh soumwahu en lih;+ 7 e sohte kin wiakauwe emen,+ ahpw e kin kapwurehiong aramas me pweipwando dahme e kihong ih nin duwen kilelepen pweipwand;+ e sohte kin pirapa emen,+ ahpw e kin kihong kene mwenge rehn me duhpek+ oh pwainkihdi me kilisou likou;+ 8 e sohte kin kihda wihn en mwohni ong irail me e kamangaiong mwohni,+ e sohte kin wia kopwung sapahrek kan;+ e kin wia kopwung mehlel nanpwungen aramas emen oh emen tohrohr;+ 9 oh e kin usehlahte weweid nan ei koasoandi kan oh kapwaiada ei kosonned kan pwe en kin lelepek. Soangen ohl menet kin pwung oh uhdahn pahn momour,’+ Kaun Wasa Lapalahpie Siohwa me ketin mahmahsen.

10 “‘Ahpw ma e nainekihda pwutak emen me lipirap+ de sounkam aramas* men+ de me kin wia soahng pwukat 11 (mendahki pahpao sohte kin wia soahng pwukat)—e kin tungoale mehn meirong kan ong dikedik kan pohn nahna kan, e kin kasaminehla en mehn mpe pwoud, 12 e kin wiakauwe me lokolok oh me semwehmwe,+ e kin pirapa kepwe kan, e sohte kin kapwurehla kilelepen pweipwand, e kin kilangdahng dikedik kasaut kan,+ e kin wia wiewia kasaut kan,+ 13 e kin kihda wihn en mwohni ong irail kan me e kamangaiong mwohni+—eri pwutako sohte pahn momourte. Pwehki soahng kasaut pwukat koaros me e wiahda, e uhdahn pahn kamakamala. Pein ih me pahn pwukoahki eh mehla.*

14 “‘Ahpw ma pahpa men naineki pwutak emen me kilang dihp koaros me eh pahpao wiahda, oh mendahki e kilang mepwukat, e sohte wia soahng pwukat. 15 E sohte kin tungoale mehn meirong kan ong dikedik kan pohn nahna kan; e sohte kin kilangdahng dikedik kasaut en aramas en Israel kan; e sohte kin kasaminehla en mehn mpe pwoud; 16 e sohte kin wiakauwe emen; e sohte kin ale kilelepen pweipwand; e sohte kin pirap; e kin kihong kene mwenge rehn me duhpeklahr oh pwainkihdi me kilisou likou; 17 e sohte kin kaloke me semwehmwe; e sohte kin kihda wihn en mwohni ong irail me e kamangaiong mwohni; oh e kin kapwaiada ei kosonned kan oh weweid nan ei koasoandi kan. Soangen aramas menet sohte pahn mehla pwehki sapwung en eh pahpao. E uhdahn pahn momourte. 18 Ahpw pwehki eh pahpao kin widing, pirapa rie oh kin wia dahme sapwung nanpwungen eh aramas akan, e pahn mehkihla eh sapwung.

19 “‘Ahpw kumwail pahn nda: “Dahme kahrehda pwutako sohte pwukoahki dipen eh pahpao?” Pwehki pwutako wia dahme pwung oh pahrek, kolokolete ei koasoandi kan koaros oh kapwaiada mepwukat, e uhdahn pahn momourte.+ 20 Mehmen* me kin dipada, iei ih me pahn mehla.+ Seri men sohte pahn pwukoahki dipen eh pahpa, oh pahpa men sohte pahn pwukoahki dipen nah seri. Aramas pwung men kelehpw me pahn ale ketingpen eh pwung, oh aramas suwed men kelehpw me pahn ale kalokepen eh suwed.+

21 “‘Eri ma aramas suwed men sohpeisang dihp koaros me e wiahda oh kapwaiada ei koasoandi kan oh wia dahme pwung oh pahrek, e uhdahn pahn momourte. E sohte pahn mehla.+ 22 I sohte pahn kaloke ih pwehki eh kauwehla kosonned kan.+ E pahn momourte pwehki eh wiewia dahme pwung.’+

23 “Kaun Wasa Lapalahpie Siohwa ketin mahsanih, ‘Ia duwe, I kin kupwurperenki mehlahn aramas suwed men?+ I sou kin kupwurki en sohpeisang eh wiewia kan oh momourte?’+

24 “‘Ahpw ni aramas pwung men eh pahn kesehla eh wiewia pwung kan oh wia dahme sapwung,* oh kin wia soahng kasaut koaros me suwed kan kin wia, ia duwe, e pahn momourte? Wiewia pwung kan koaros me e wiahda pahn manokonokla.+ Pwehki eh salelepek oh dihp me e wiahda, e pahn mehla.+

25 “‘Ahpw kumwail pahn nda: “Elen Siohwa sohte kin pwung pahrek.”+ Aramas en Israel kan, menlau rong! Ia duwe, elei kan me sohte kin pwung pahrek?+ Kaidehn amwail ahl akan me sohte kin pwung pahrek?+

26 “‘Ni ahnsou me aramas pwung men kesehla eh wiewia pwung kan oh wia dahme sapwung oh mehla pwehki met, e pahn mehla pwehki pein eh wiewia sapwungo.

27 “‘Oh ni ahnsou me aramas suwed men sohpeisang suwed me e wiahda oh tepida wia dahme pwung oh pahrek, e pahn doarehla pein eh mour.*+ 28 Ni eh esehda oh sohpeisang eh kauwehla kosonned koaros, e uhdahn pahn momourte. E sohte pahn mehla.

29 “‘Ahpw aramas en Israel kan pahn nda: “Elen Siohwa sohte kin pwung pahrek.” Kumwail aramas en Israel kan, ia duwe, mehlel me elei kan me sohte kin pwung pahrek?+ Kaidehn amwail ahl akan me sohte kin pwung pahrek?’

30 “Kaun Wasa Lapalahpie Siohwa ketin mahsanih, ‘Kahrehda, I pahn kadeik emenemen kumwail nin duwen eh wiewia kan,+ kumwail aramas en Israel kan. Kumwail tokedihsang douluhl amwail kauwehla kosonned kan koaros, pwe mepwukat en dehr wia mehn kadipekelekel ehu me pahn wahdo kalokolok pohmwail. 31 Kumwail kesehweisang amwail kauwehla kosonned koaros+ oh alehda* mohngiong kapw oh elen madamadau* kapw,+ pwe dahme kumwail pahn mehkihla,+ kumwail aramas en Israel kan?’

32 “Kaun Wasa Lapalahpie Siohwa ketin mahsanih, ‘I sohte kin kupwurperenki mehlahn emen.+ Eri kumwail tokedihsang amwail kin kauwehla kosonned kan oh momourte.’”+