Esekiel

21 Siohwa ketin pwurehng mahsanihong ie: 2 “Nein-aramas, sohpeilahng Serusalem, oh wiahda pakair ehu ong wasa sarawi kan, oh wia kokohp ong sapwen Israel. 3 Ndaiong sapwen Israel, ‘Iet me Siohwa ketin mahsanih: “I kin uhwong uhk, oh I pahn kihieisang nei kedlahso nan kidipeo+ oh kemehla me pwung oh me suwed kan sang rehmw. 4 Pwehki I pahn kemehla me pwung oh suwed kan sang rehmw, nei kedlahso pahn kohsang nan kidipeo pwehn kemehla aramas* koaros, sang palieir lel paliepeng. 5 Aramas koaros pahn anahne ese me ngehi, Siohwa, usadahr nei kedlahso sang nan kidipeo. E sohte pahn kapwurupwuriong nan kidipeo.”’+

6 “Oh kowe, nein-aramas, sengloal ni omw* wie rerrer, ei, sengloal kowahlap mwohrail.+ 7 Oh ma re ndaiong uhk, ‘Dahme ke sengloalki?’ ke pahn nda, ‘Pwehki pakair ehu.’ Pwe pakairo uhdahn pahn kohdo, oh mohngiong koaros pahn peikipeseng masepwehk oh peh koaros pahn mwoatoredi oh aramas koaros pahn pahtoula oh pihl pahn dingiding sang pwukien koaros.*+ ‘Kilang! Pakairo uhdahn pahn kohdo—e pahn pweida,’ Kaun Wasa Lapalahpie Siohwa me ketin mahmahsen.”

8 Siohwa ketin pwurehng mahsanihong ie: 9 “Nein-aramas, kohpada oh nda, ‘Iet me Siohwa ketin mahsanih: “Nda, ‘Kedlahs pwoat! Kedlahs pwoat+ adahdadahr, oh e kamelengilenglahr. 10 E adahdadahr pwehn kemehla me tohto; e kamelengilenglahr pwehn piripir duwehte lioal.’”’”

“Kitail sou pahn perenda?”

“‘Ia duwe, e* pahn soikala sokon en nei pwutako,+ duwehte me e kin wiahiong tuhke koaros?

11 “‘I kihla pwehn kamelengilengda oh pwehn doadoahngki. Kedlahs wet adahdadahr oh melengilenglahr, pwehn kohieng nan pehn sounkamwomwala men.+

12 “‘Nein-aramas, sengiseng oh mwahiei,+ pwe kedlahso kohdohn uhwong nei aramas akan; kedlahso kin uhwong kaunen Israel kan koaros.+ Irail pahn kamakamkihla kedlahso iangahki nei aramas akan. Eri poakih tepin dengemwen ni pahtou. 13 Pwe keseu ehu wiawiher,+ oh dahme pahn wiawi ma kedlahso soikala sokono? E* sohla pahn mie,’+ Kaun Wasa Lapalahpie Siohwa me ketin mahmahsen.

14 “Oh kowe, nein-aramas, wia kokohp oh lopw oh nda pak siluh ‘Kedlahs pwoat!’ Met iei kedlahs pwoat mehn kamaramas, iei kedlahs me kemehla aramas tohto, me kapilirailpene.+ 15 Mohngiongirail pahn peikipeseng masak+ oh me tohto pahn pwupwudi ni arail ewen kelen kahnimw kan; I pahn doadoahngki kedlahs pwehn kamaramas. Ei, kedlahso kin pir duwehte lioal oh e kamelengilengdahr ong kamaramas! 16 Palla ni palimaun, oh palimeing! Kohla wasa koaros me mesen noumw kedlahsen uhlahng ie! 17 I pil pahn lopw oh kameleileidi ei engieng.+ Ngehi, Siohwa me mahmahsen.”

18 Oh Siohwa ketin pwurehng mahsanihong ie: 19 “A kowe, nein-aramas, kilelehdi ahl riapwoat me kedlahs en nanmwarkien Papilon pahn kohdo ie. Ahl riau pwukat koaros pahn tepida sang nan sahpw tehieu, oh kilel* ehu pahn anahne kokouda wasa me ahlo wetpeseng ie kolahng kahnimw riau ko. 20 Ke pahn kilelehdi ehu ahl ong kedlahso en kolahng uhwong Rappa+ en mehn Ammon kan, oh ahl teio en kolahng wasa kelpene kehlail kan en Serusalem+ nan Suda. 21 Pwe nanmwarkien Papilon pahn uhdi pwehn doadoahngki kosetipw ni wetpeseng en ahlo, wasa me ahl riauo wetpeseng ieo. E pahn itik arep ko. E pahn peki sawas sang eh dikedik kan;* e pahn kasawih ehn mahn emen. 22 Kosetipw me mi ni peh palimaun uhlahng Serusalem, pwehn wiahda mehn kauwehla kehl kan, pwehn ruwese kamakamala, pwehn wiahda ngilen wer en mahwen, pwehn kaunopada mehn kauwehla ewen kelen kahnimw kan, pwehn wiahda koasoakoasoak ehu, pwehn kauwada dihd en kapilpene.+ 23 Ahpw met pahn mwomwen wia kosetipw likamw ehu ong ni mesen irail ako* me kahukihla inou kan ong irail.*+ Ahpw nanmwarkio pahn tamataman diparail kan oh pahn koliraildi.+

24 “Kahrehda iet me Kaun Wasa Lapalahpie Siohwa ketin mahsanih: ‘Kumwail kahrehda dipamwail kan en sohte manokonokla ni amwail kasalehda amwail kauwehla kosonned kan oh kahrehiong dipamwail kan en sansalda sang ni amwail wiewia kan koaros. Pwehki amwail sohte manokonokla, kumwail pahn wisiksang ni idihd.’

25 “Ahpw kowe me ohla laud, kaun suwed en Israel,+ omw rahno leledohr, ahnsoun kaimwiseklahn omw kalokolok. 26 Iet me Kaun Wasa Lapalahpie Siohwa ketin mahsanih: ‘Kihsang lisoaropo, oh kihsang nihno.+ Met sohte pahn duweduwehte.+ Me karakarahk en kesepwilda+ oh me ile en kesepwilidi.+ 27 Ohla ehu, ohla ehu, ohla ehu me I pahn wiahda. Oh nihno sohte pahn kohieng emen lao me ahneki pwuhng nin duwen kosonned kohdo,+ oh I pahn kihong ih.’+

28 “Oh kowe, nein-aramas, kohpada oh nda, ‘Iet me Kaun Wasa Lapalahpie Siohwa ketin mahsaniheki duwen mehn Ammon kan oh duwen ar kapailok kan.’ Nda, ‘Kedlahs pwoat! Kedlahs pwoat onopadahngehr ong kamakamala ehu; e kamelengilengdahr pwehn kadallehla oh en piripir duwehte lioal. 29 Mendahki kaudiahl likamw kan oh kosetipw likamw duwen kowe, ke pahn koasoakoasoakda pohn me kamakamala kan,* me iei aramas suwed kan. Met iei arail ahnsoun kalokolok. 30 Kapwurehiong nan kidipe. I pahn kadeik uhk wasa me ke wiawihda ieo, nan sahpw me ke kohsang ieo. 31 I pahn wudekihdiong ei engieng pohmw. I pahn peukohng pohmw kisiniei en ei engieng, oh I pahn panguhkala rehn aramas lemei kan, me kin samanih kamwomwala.+ 32 Ke pahn wiahla mehn sou kisiniei;+ ntahmw pahn keredi nan sahpwo, oh ke pahn manokonokla douluhl, pwe ngehi, Siohwa me mahmahsen.’”