Rongamwahu en Madiu
2 Mwurin Sises eh ketin ipwidi nan Pedleem+ en Sudia ni mwehin nanmwarki Erod,*+ kilang! sounkasawih usu kan ong dahme pahn wiawi ahnsou kohkohdo sang Palimese ahpw leledo Serusalem, 2 oh nda: “Ia nanmwarkien mehn Suhs akan+ me ahpwtehn ipwidi? Pwe se kilangada eh usuwo ni at mihmi Palimese, oh se kodohng poaridi mwowe.” 3 Ni ahnsou me Nanmwarki Erod oh mehn Serusalem koaros rongada met, re ahpw salohkihda kowahlap. 4 Ni eh kapokonepene kaunen samworo kan koaros oh sounkawehwehn Kosonnedo* kan koaros, e ahpw kalelapak rehrail wasa me Krais* ketin ipwidi ie. 5 Re ahpw ndaiong: “Nan Pedleem+ en Sudia, pwe ih duwen me soukohpo ntingihedier: 6 ‘A kowe, Pedleem me mi nan sapwen Suda, kaidehn kowe kahnimw me keieu tikitik nanpwungen kepina kan en Suda, pwe sang rehmw kaun emen pahn pwarada me pahn kahluwa nei aramas en Israel kan.’”+
7 Erod eri ekerpene ni rir sounkasawih usu ko pwe en esehda mwahu sang rehrail duwen ahnsou me usuwo pwarada. 8 Ni eh kadariraillahng Pedleem, e nda: “Kumwail kohla oh rapahki mwahu kisin serien, oh ni amwail pahn diarada, a kumwail kairehkin ie pwe I en pil kohla oh poaridi mwowe.” 9 Mwurin arail rongorong nanmwarkio, re ahpw mwesel oh kohkohla. A kilang! usu me re kilangada ni ahnsou me re mi Palimeseo+ tieng mwohrail lao e uhdi wasa me kisin serio mi ie. 10 Ni ar kilangada me usuwo uhdi, re ahpw perenkihda kowahlap. 11 Oh ni ar pedolong nan ihmwo, re kilangada kisin serio rehn ine Mery, oh re kelepwikihdi oh poaridi mwowe. Re pil kihda ar kepwe ko oh kisekisehki kohl oh warpwohmwahu pwetepwet* oh mir. 12 Ahpw, pwehki Koht ketin mahsanihong irail nan ouraman ehu+ ren dehr pwurala rehn Erod, re ahpw mwesellahng sapwarailo ni apwoat ahl tohrohr.
13 Mwurin arail mwesel, kilang! sapwellimen Siohwa* tohnleng men ahpw pwarohng Sosep nan ouraman ehu,+ oh nda: “Pwourda, ale kisin serien oh ine oh tangalahng Isip oh mihmi mwo lao I kairehkin uhk ken pwurodo, pwe Erod pahn rapahki kisin serien pwehn kemehla.” 14 Sosep eri pwourda oh wahda kisin serio oh inen serio nipwongohte oh kohkohla Isip. 15 E mihmi wasao lao Erod mehla. Met iei pweidahn dahme Siohwa* ketin mahsanih sang rehn sapwellime soukohpo me mahsanih: “I malipedohr nei pwutak+ sang Isip.”
16 Eri, ni Erod eh esehda me sounkasawih usu ko pitihedi, e ahpw lingeringerda kowahlap oh kadarala aramas kei pwe ren kemehla pwutak koaros nan Pedleem oh wehi kan me mi limwah, me sounpar riau kohdi, nin duwen ahnsou me sounkasawih usu ko+ padahkihong me usuwo pwarada. 17 E pweidahr dahme soukohp Seremaia nda: 18 “Ngihl ehu kohkohda sang nan Rama, ngilen sengiseng oh mwahiei laud. Resel+ wie sengisengki nah seri ko, oh e kahng nsenamwahula, pwehki re solahr mie.”+
19 Mwurin Erod eh mehla, kilang! sapwellimen Siohwa* tohnleng men ahpw pwarohng Sosep nan ouraman ehu+ nan Isip 20 oh nda: “Pwourda, ale kisin serien oh ine oh kohla nan sapwen Israel, pwe irail ko me songosong en kemehla kisin serien melahr.” 21 Ih eri pwourda oh ale kisin serio oh ineo oh pwurala nan sapwen Israel. 22 Ahpw ni eh rongada me Arkelaus me uhd wiliandi seme Erod kaunda Sudia, e perki kohla wasao. Patehng met, pwehki eh ale kaweid sang rehn Koht nan ouraman ehu,+ e kohla wehin Kalili.+ 23 Ih eri kohla oh kousoanla nan kahnimw ehu me adaneki Nasaret,+ pwe en kapwaiada dahme soukohp kan nda: “E pahn kin mwarenki mehn Nasaret.”*+