Esekiel

40 Ni kerieisek limaun sounpar en at kalipilipala,+ ni tepin pahro, ni kaeisek en rahn en sounpwongo, ni kaeisek pahieun sounpar mwurin Serusalem* eh lohdi,+ ih rahno me limen Siohwa ketiket pohi, oh e ketikiniehla nan kahnimwo.+ 2 Sang ni kaudiahl kan me kohsang Koht, e ketikiniehla nan sapwen Israel oh ketikiniehdi pohn nahna ehu me uhdahn ile.+ Poweo mie wasa kis me duwehte kahnimw ehu ni palieir.

3 Ni eh ketikiniehla wasao, I ahpw kilangada ohl emen me mwomwe duwehte prons.+ E kolokol sahl plaks* ehu oh ahlek mehn sosohng ehu,*+ oh e kesikesihnen ni ewen kehlo. 4 Ohlo ahpw ndaiong ie: “Nein-aramas, kilang ni keneinei, rong kanahieng oh tehk kanahieng* mehkoaros me I kasalehiong uhk, pwe ih kahrepen omw wisikdo wasaht. Ndaiong aramas en Israel kan mehkoaros me ke kilang.”+

5 I kilangada dihd ehu me kapilpene likin tehnpas sarawio.* Nan pehn ohlo mie ahlek mehn sosohng ehu me reireiki kiupid weneu (ehuehu kiupid, sosohng en peh ehu kapatapatong).* Ih eri tepida sohngedi dihdo, oh e mosulki ahlek ehu oh ilehki ahlek ehu.

6 Ih eri kohdo ni ewen kehl me sallahng palimese+ oh doudahla pohn lohn kehndake ko. Ni eh sohngedi taht en ewen kehlo, e tehlapki ahlek ehu, oh taht en pali teio pil tehlapki ahlek ehu. 7 Ehuehu perehn sounsilasil kan reireiki ahlek ehu oh tehlapki ahlek ehu, oh kiupid limau nanpwungen perehn sounsilasil kan.+ Taht en ewen kehl me mi limwahn palangk en ewen kehl me sallahng loaleo reireiki ahlek ehu.

8 E sohngedi palangk en ewen kehl me sallahng loaleo, oh e reireiki ahlek ehu. 9 Ih eri sohngedi palangk en ewen kehlo, me reireiki kiupid waluh; oh e sohngedi uhr en keile ko, me reireiki kiupid riau; oh palangk en ewen kehlo mi pali me sallahng loaleo.

10 Mie perehn sounsilasil siluh ni pali koaros en ewen kelen palimese. Meh siluh ko wehteieu, oh uhr en ni keile ko wehteieu ni pali koaros.

11 Ih eri sohngedi tehlap en wasahn pedolong en ewen kehlo, me tehlapki kiupid 10; oh ewen kehlo reireiki kiupid 13.

12 Mwohn ehuehu perehn sounsilasil ko mie wasa me kelkihpene dihd karakarahk ehu ni pali koaros me reireiki kiupid ehu. Ehuehu perehn sounsilasil ko me mi pali koaros reireiki kiupid weneu.

13 Ih eri sohngedi ewen kehlo sang pohn ehu perehn sounsilasil ko* kolahng pohn pere palio, oh e tehlapki kiupid 25; wasahn pedolong en pere ko sohpeipene.+ 14 Ih eri sohngedi uhr en keile ko, me reireiki kiupid 60. E pil sohngedi uhr en keile ko ni ewen kehl teiko pidakihpene wasa me kelpeneo. 15 Sang mwohn wasahn pedolong en ewen kehlo kolahng mwohn palangk en wasahn pedolong me sallahng loaleo reireiki kiupid 50.

16 Mie wenihmwtok kan me preim ko wetikitik sang mehn masloale ko+ ni perehn sounsilasil kan oh ni uhr en keile ko ni pali koaros en masloalen ewen kehlo. Masloalen palangko pil mie wenihmwtok kan ni pali koaros, oh mie tuhke pahm* kan me perperda+ ni uhr en keile ko.

17 Ih eri kahreiehla nan wasa me kelpene maslikio, oh I kilangada perehn mwenge kei*+ oh tat takai me kapilpene wasa me kelpeneo. Pohn tat takaio mie perehn mwenge 30. 18 Tehlap en tat takai ni keilen ewen kehl ko uwehte reirei en ewen kehl ko—tat takai wet karakarahk sang wasa me kelpene masloaleo.

19 Ih eri sohngedi uwen dohpeseng* sang mwohn ewen kehl karakarahko lella ni keilen wasa me kelepene masloaleo. E reireiki kiupid 100 ni palimese oh paliepeng.

20 Wasa me kelpene maslikio mie ewen kehl ehu me sallahng paliepeng, oh e sohngedi uwen reirei oh tehlap. 21 Mie perehn sounsilasil siluh ni pali koaros. Uhr en keile ko oh palangko uwehte tepin ewen kehlo. E reireiki kiupid 50 oh tehlapki kiupid 25. 22 Wenihmwtok kan, palangko oh tuhke pahm kan me perperda,+ uwehte meteiko me mi ni ewen kelen palimese. Aramas akan kak kohla mwo ni ar doudahla pohn lohn kehndake isuh oh palangko mi mwoweo.

23 Mie ewen kehl ehu nan wasa me kelpene masloaleo me mi palilahsang ewen kelen paliepeng oh ehu ewen kehl me mi palilahsang ewen kelen palimese. E sohngedi uwen dohpeseng en nanpwungen ewen kehl pwukat, oh e reireiki kiupid 100.

24 Mwuri e kahreiehlahng palieir, oh I kilangada ewen kehl ehu ni palieir.+ E sohngedi uhr en keile ko oh palangko, oh mepwukat uwehte meteiko. 25 Mie wenihmwtok kan ni pali koaros oh ni palangko, duwehte wenihmwtok teiko. Ewen kehlo reireiki kiupid 50 oh tehlapki kiupid 25. 26 Mie lohn kehndake isuh kohdahla ni ewen kehlo,+ oh palangko mi mwoweo. Oh mie tuhke pahm kan me perperda ni uhren keile ko, ehu ni ehuehu pali.

27 Wasa me kelpene masloaleo mie ewen kehl ehu me sallahng palieir; e sohngedi nanpwungen ewen kehl ko kohla palieir oh uwen dohpeseng iei kiupid 100. 28 Mwuri e kahreiehla nan wasa me kelpene masloaleo sang ni ewen kelen palieir; ni eh sohngedi ewen kelen palieir, e uwehte meteiko. 29 Perehn sounsilasil ko, uhren keile ko oh palangko uwehte meteiko. Mie wenihmwtok kan ni pali koaros oh ni palangko. Ewen kehlo reireiki kiupid 50 oh tehlapki kiupid 25.+ 30 Mie palangk kei ni ewen kehl koaros me kohlongala wasa me kelpene masloaleo; re reireiki kiupid 25 oh tehlapki kiupid 5. 31 Palangko salieido wasa me kelpene maslikio, oh mie tuhke pahm kan me perperda ni uhr en keile ko,+ oh mie lohn kehndake waluh kohdahla ni ewen kehlo.+

32 Ni eh kahreiehla nan wasa me kelpene masloaleo sang palimese, e sohngedi ewen kehlo, oh e uwehte meteiko. 33 Perehn sounsilasil ko, uhr en keile ko oh palangko uwehte meteiko, oh mie wenihmwtok kan ni pali koaros oh ni palangko. Ewen kehlo reireiki kiupid 50 oh tehlapki kiupid 25. 34 Palangko salieido wasa me kelpene maslikio, oh mie tuhke pahm kan me perperda ni uhr en keile ko ni pali koaros, oh mie lohn kehndake waluh kohdahla ni ewen kehlo.

35 Ih eri kahreiehla ni ewen kelen paliepeng+ oh sohngedi; e uwehte meteiko. 36 Perehn sounsilasil ko, uhr en keile ko oh palangko uwehte meteiko. Mie wenihmwtok kan ni pali koaros. Ewen kehlo reireiki kiupid 50 oh tehlapki kiupid 25. 37 Uhr en keile ko salieido wasa me kelpene maslikio, oh mie tuhke pahm kan me perperda ni uhr en keile ko ni pali koaros, oh mie lohn kehndake waluh kohdahla ni ewen kehlo.

38 Oh limwahn uhr en keilen ewen kehl ko mie perehn mwenge ehu me mie wasahn pedolong, wasa me meirong isihs kan me pwonte isihsla kin wideud ie.+

39 Mie tehpel riau ni pali riau ko koaros nan palangk en ewen kehlo, mehn kemehla mahn akan ong meirong isihs kan me pwonte isihsla,+ meirong en dihp kan+ oh meirong en tomwki dihp kan.+ 40 Limwahn wasahn pedolong en ewen kelen paliepeng, mie tehpel riau likin wasahn pedolongo. Pil mie tehpel riau ni pali teio ni palangk en ewen kehlo. 41 Mie tehpel pahieu ni pali koaros en ewen kehlo—patpene koaros tehpel waluh—oh mahn en meirong kan kin kamakamala powe. 42 Tehpel pahieu ko ong meirong isihs me pwonte isihsla wiawihkihda takai perperda. Re reireiki kiupid ehu elep, tehlapki kiupid ehu elep oh ilehki kiupid ehu. Dipwisoun kemehla mahn en meirong isihs kan oh meirong teikan kin nekinek pohn tehpel ko. 43 Pasapas kan, me tehlapki sosohng en peh ehu, mi ni dihd en loale kan pwon; oh uduk en meirong en kisakis kan pahn kohdiong pohn tehpel ko.

44 Likin ewen kelen masloaleo mie perehn mwenge kei ong sounkoul kan;+ pere ko mi wasa me kelpene masloaleo limwahn ewen kelen paliepeng, me sallahng palieir. Pil ehu perehn mwenge mi limwahn ewen kelen palimese, me sallahng paliepeng.

45 E ndaiong ie: “Perehn mwenge wet me sallahng palieir ong samworo kan me kin pwukoahki doadoahk kan nan tehnpas sarawio.+ 46 Perehn mwenge me sallahng paliepeng ong samworo kan me kin pwukoahki doadoahk en pei sarawio.+ Irail kadaudok en Sadok,+ mehn Lipai kan me idihdida ren patohla mwohn silangin Siohwa pwe ren papah ih.”+

47 Ih eri sohngedi wasa me kelpene masloaleo. E reireiki kiupid 100 oh tehlapki kiupid 100, keimw pahieu. Pei sarawio mi mwohn tehnpas sarawio.

48 Ih eri kahreielongala nan palangk en tehnpas sarawio,+ oh e sohngedi uhr en keilen palangko, oh e reireiki kiupid limau apali oh kiupid limau pali teio. Ewen kehlo tehlapki kiupid siluh apali oh kiupid siluh pali teio.

49 Palangko reireiki kiupid 20 oh tehlapki kiupid 11.* Aramas akan pahn lella mwo ni ar doudahla pohn lohn kehndake kan. Mie uhr kan limwahn uhr en keile ko, ehu ni ehuehu pali.+