Rongamwahu en Sohn

12 Rahn weneu mwohn Pahsohpao, Sises ahpw ketin lellahng Pedani, wasa me Lasarus+ kin kousoan ie, ohl me Sises ketin kaiasada sang rehn me melahr akan. 2 Irail eri kaunopadahng ih konot en soutik wasao, oh Marda kin papah irail+ oh Lasarus iei emen irail ko me iang ih konokonot.* 3 Mery ahpw ale paun ehu* en leh pwohmwahu me wiawihkihda pwilin tuhke nard* tohr, me inenen pweilaud, e ahpw wudekihdiong leho pohn aluweluwen Sises ko oh limwiheki pitenmoange. Pwohn leho ahpw kipehdi nan ihmwo.+ 4 Ahpw Sudas Iskariot,+ emen sapwellime tohnpadahk ko me pahn pangala ih ahpw nda: 5 “Dahme kahrehda leh pwohmwahu wet sohte netila ni denari* 300 oh kohieng me semwehmwe kan?” 6 E nda met, kaidehn pwehki eh kin nsenohki me semwehmwe kan, ahpw pwehki ih lipirap men oh kin kolokol koakon en mwohnio oh pil kin pirapahsang mwohni me kin kohieng loale. 7 Sises ahpw mahsanih: “Kumwail dehr kedirepwe lihet, pwe e pahn kaunopada ong rahn me I pahn seridi.+ 8 Pwe me semwehmwe kan kin mihmi rehmwail ahnsou koaros,+ a I sohte pahn mi rehmwail ahnsou koaros.”+

9 Eri, lapalahn pokon en mehn Suhs ehu ahpw esehda me e ketiket wasao, re ahpw patohdo kaidehnte pwehki Sises, ahpw pwe ren pil kilang Lasarus me e ketin kaiasada sang rehn me melahr akan.+ 10 Kaunen samworo ko eri koasoakoasoane ren pil kemehla Lasarus, 11 pwehki ih me kahrehda mehn Suhs tohto kohla wasao oh pwosonla Sises.+

12 Mandahn rahno, lapalahn pokon me kodohng kasarawio rongada me Sises ketiket kodohng Serusalem. 13 Irail eri ale tehntuhke pahm kei* oh kohieilahng tuhwong oh re tepida weriwer ndinda: “Komw kupwurkalahngan oh ketin doarehla ih! Meid pai me ketido ni mwaren Siohwa,*+ Nanmwarkien Israel!”+ 14 Ni Sises eh ketin diarada dongki pwul men, e ketidiong powe+ nin duwen eh ntingdier: 15 “Nein Saion serepein, dehr masak. Kilang! Omw nanmwarki ketiket kohdo oh e mi pohn dongki pwul men.”+ 16 Nin tapio, sapwellime tohnpadahk ko sohte kin wehwehki mepwukat, ahpw ni Sises eh ketin linganlahr,+ re ahpw tamanda me mepwukat ntingdier duwen ih oh re wiahiongehr ih mepwukat.+

17 Aramas ako me mi reh ni eh malipe Lasarus sang nan sousowo*+ oh ketin kaiasada ih sang rehn me melahr akan ahpw kin kadehdehiong meteikan dahme wiawi.+ 18 Ih pil kahrepen pokono ar patohlahng tuhwong, pwehki ar rongada me e ketin wiadahr manaman* wet. 19 Parisi ko eri ndapene nanpwungarail: “Kumwail kilang, kitail sohte mwahn pweida. Kilang! Tohnsampah pwon idawehnlahr ih.”+

20 Mie mehn Krihs kei nanpwungen irail ko me kodohng kaudok ni kasarawio. 21 Eri irail pwukat kohla rehn Pilip,+ me kohsang Pedsaida nan Kalili oh re tepida pekipeki reh, nda: “Maing, se men kilang Sises.” 22 Pilip eri kohla oh ndaiong Andru. Andru oh Pilip ahpw kohla oh patohwanohng Sises.

23 Sises ahpw ketin sapengki ira: “Awao lelehr me Nein-aramas pahn linganla.+ 24 I ndaiong kumwail ni mehlel, ma weren wihd ehu sohte pahn pwupwudiong nanpwel oh mehla, e wiahte weren wihd ehu; ahpw ma e mehla,+ eri e pahn wa tohto. 25 Mehmen me kin poakohng eh mour* pahn katihasang,* ahpw mehmen me men tounmeteikihla eh mour*+ nin sampah wet, pahn doarehla eh mour kohkohlahte.+ 26 Ma mehmen pahn papah ie, a en idawehn ie oh wasa me I pahn mi ie, ei sounpapaho pahn pil mi ie.+ Ma mehmen pahn papah ie, Sahmo pahn ketin kawauwihala. 27 Ahnsou wet, I uhdahn nsensuwed,+ dahme I pahn nda? Semei, komw ketin doareiehsang awa wet.+ Ahpw iei kahrepen ei kohdo, pwe I en lelohng awa wet. 28 Semei, komw ketin kalinganahda mwaromwi.” Eri, ngihl ehu+ ahpw kohdihdo sang nanleng, me mahsanih: “I kalinganahdahr mwarei oh I pahn pil pwurehng kalinganahda.”+

29 Pokon me kesikesihnen wasao rongada ngihlo, re ahpw tepida nda me ngilen nansapwe. A pil ekei nda: “Tohnleng men me koasoiong ih.” 30 Sises ketin sapengki: “Ngihl wet pwarada, kaidehn pwehki ngehi, ahpw pwehki kumwail. 31 Ahnsou wet sampah wet pahn pakadeikda; met kaunen sampah wet+ pahn lekdekla.+ 32 Ahpw ngehi, ma I pahn pwekipwekda sang sampah,*+ I pahn kakerenihodohng ie soangen aramas koaros.” 33 Ni mehlel, e mahmahsanih met pwe en kasalehda soangen mehla me e pahn pwoukihla.+ 34 Pokono ahpw patohwan sapengki: “Se rongasang Kosonnedo me Krais pahn ketin mihmi kohkohlahte.+ Eri ia duwen omwi kak mahsanih me Nein-aramas anahne pwekipwekda?*+ Ihs Nein-aramas menet?” 35 Sises eri mahsanihong irail: “Marain pahn mihmi rehmwail ahnsou kis. Kumwail weweid nan marain ni eh mihmihte rehmwail, pwe rotorot en dehr poweikumwaildi; mehmen me kin weweid nan rotorot sohte kin ese wasa me e kin kohkolahng ie.+ 36 Ni maraino eh mihmihte rehmwail, kasalehda amwail kin pwoson maraino pwe kumwail en wiahla serien maraino.”+

Ni Sises eh mahsanih mepwukat, e ahpw ketila oh rirla sang irail. 37 Mendahki e ketin wiadahr manaman tohto* mwohn masarail kan, irail sohte pwosonla ih, 38 pwe mahsen en soukohp Aiseia en pweida me koasoia: “Maing Siohwa,* ihs me pwosonla dahme re rongasang kiht?*+ A duwen limen Siohwa,* ong ihs me e sansalohng?”+ 39 Aiseia pil koasoia me kahrepen arail sohte kak kamehlele iei: 40 “E ketin karotongehla masarail kan oh ketin wiahiong mohngiongirail en keptakaila pwe irail en dehr kilangki masarail oh wehwehki sang mohngiongirail oh wekidekiong ie pwe I en kamwahwihirailla.”+ 41 Aiseia koasoia mepwukat pwehki eh kilangehr sapwellime lingan, oh e koasoia duwen ih.+ 42 Ahpw kaun tohto pil pwosonla ih,+ irail ahpw sohte kin pohnese ih pwehki Parisi ko, pwe irail de lekdeksang nan sinakoke;+ 43 pwehki re poakohng kaping me kohsang rehn aramas laudsang kaping me kohsang rehn Koht.+

44 Ahpw Sises kapitie laudida oh mahsanih: “Mehmen me pwoson ie, kaidehn ngehite me e pwoson ahpw pil ih me ketin poaroneiehdo;+ 45 oh mehmen me kilang ie, e pil kilang Ih me ketin poaroneiehdo.+ 46 I kodohngehr nin sampah nin duwen marain ehu+ pwe koaros me kin pwoson ie ren dehr mihmihte nan rotorot.+ 47 Ahpw ma mehmen rong ei mahsen ahpw sohte kapwaiada, I sohte pahn kadeikada ih; pwe I kodohr, kaidehn pwe I en kadeikada sampah, ahpw I en komourala sampah.+ 48 Mie me pahn kadeikada mehmen me sohte kin tehk ie oh sohte kin alehda ei mahsen. Mahsen me I mahsaniher iei me pahn kadeikada ih ni imwilahn rahn. 49 Pwe I sohte kin koasoi sang ni pein nsenei, ahpw Sahmo me ketin poaroneiehdo me pein ketikihong ie kehkehlik duwen dahme I pahn koasoia oh dahme I pahn padahngki.+ 50 Oh I ese me sapwellime kehkehlik kin wehwehki mour soutuk.+ Eri dahme I kin koasoia, I kin koasoiahda dahme Sahmo ketin mahsanihong ie.”+