Keieun Kronikel

23 Ni Depit eh likeilapalahr oh kerenlahngehr imwin eh mour,* e ahpw kasapwilada nah pwutak Solomon en wiahla nanmwarkien Israel.+ 2 Ih eri kapokonepene lapalap en Israel kan koaros, samworo kan+ oh mehn Lipai kan.+ 3 Mehn Lipai kan koaros me mahki sounpar 30 kohda wadawadedier;+ uwen tohtohn me dierek iei meh 38,000. 4 Sang nanpwungarail meh 24,000 kin papah nin duwen sounapwalih doadoahk en tehnpesen Siohwa, oh meh 6,000 nin duwen kaun oh sounkopwung,+ 5 oh meh 4,000 nin duwen silepen ewen kehl,+ oh meh 4,000 kin kapingahki+ Siohwa mehn keseng kan, me Depit nda “I wiahda mepwukat pwehn kapinga Koht.”

6 Depit eri koasoaneiraildi* ni pwihn kan+ nin duwen kadaudok en nein Lipai pwutak kan: Kerson, Kohad oh Merari.+ 7 Nein Kerson pwutak kan iei Ladan oh Simei. 8 Kadaudok en Ladan kan iei Seheiel me kaun, Sedam oh Soel,+ meh silimen. 9 Nein Simei pwutak kan iei Selomod, Eisiel oh Aran, meh silimen. Iei irail pwukat me wia kaunen peneinei en Ladan. 10 Oh nein Simei pwutak kan iei Sahad, Sina, Sius oh Peraia. Irail meh pahmen pwukat iei nein Simei pwutak. 11 Sahad me kaun oh Saissah me keriemen. Ahpw Sius oh Peraia sohte naineki pwutak tohto, kahrehda ira wiahla wadawad en peneinei ehu me ahnekipene pwukoa ehu.

12 Nein Kohad pwutak kan iei Amram, Isar,+ Ipron oh Ussiel,+ meh pahmen. 13 Nein Amram pwutak kan iei Aaron+ oh Moses.+ Ahpw Aaron oh nah pwutak kan katohrohrla kohkohlahte+ pwe ren papah nan Wasa Sarawiheo, pwe ren kin wiahda meirong mwohn silangin Siohwa, pwe ren papah ih oh pwe ren pakairki kapai kan ni mware ahnsou koaros.+ 14 A duwen Moses ohlen Koht mehlelo, nah pwutak kan kileldi nanpwungen keinek en mehn Lipai kan. 15 Nein Moses pwutak kan iei Kersom+ oh Elieser.+ 16 Sepuel+ me kaunen kadaudok en Kersom kan. 17 Nanpwungen kadaudok en Elieser kan,* Rehapaia+ me kaun; sohte nein Elieser pwutak likin ih, ahpw nein Rehapaia pwutak kan me uhdahn tohto. 18 Selomid+ me kaunen kadaudok en Isar+ kan. 19 Nein Ipron pwutak kan iei Siraia me kaun, Amaraia me keriemen, Sahasiel me kesilimen oh Sekameam+ me kapahmen. 20 Nein Ussiel+ pwutak kan iei Maika me kaun oh Issaia me keriemen.

21 Nein Merari pwutak kan iei Mahli oh Musi.+ Nein Mahli pwutak kan iei Eliesar oh Kis. 22 Eliesar eri mehla, ahpw sohte nah pwutak, ihte serepein kei. Eri nein Kis pwutak ko me wia kisehrail,* ahpw pwoudikihda serepein ko. 23 Nein Musi pwutak kan iei Mahli, Eder oh Seremod, meh silimen.

24 Ih irail pwukat me kadaudok en Lipai kan nin duwen samarail mehn mahs ako oh kaunen peneinei kan. Mehn Lipai kan me mahki sounpar 20 kohda, wadawadedi oh kileldi ni adarail kan ong doadoahk en tehnpesen Siohwa. 25 Pwe Depit nda: “Siohwa, Koht en Israel ketikihongehr sapwellime aramas akan popohl,+ oh e pahn ketiket nan Serusalem kohkohlahte.+ 26 Pil mehn Lipai kan solahr pahn anahne weuwa impwal sarawio de dipwisawi kan koaros me kin kadoadoahk ong kaudok.”+ 27 Pwe duwehte kaimwiseklahn en Depit kehkehliko, mehn Lipai kan me mahki sounpar 20 kohda wadawadedier. 28 Arail pwukoa iei sewese nein Aaron+ pwutak kan ong doadoahk en tehnpesen Siohwa, apwalih wasa kelpeneo,+ perehn mwenge kan, kamwakele soahng sarawi kan koaros oh doadoahk koaros me anahn ong doadoahk en tehnpesen Koht mehlelo. 29 Re kin sewese kaunopada pilawa koasoakoasoak,*+ pilawa amas mwahu ong meirong en krein, pilawa menipinip me sohte doal ihs,+ pankeik, pilawa me doal leh+ oh doadoahk koaros me pid sohngedi uwen toutou oh laud en mehkot. 30 Re kin mi wasao nimenseng koaros+ pwe ren kalahnganki oh kapinga Siohwa oh re pil kin wia soahngohte nin soutik kan.+ 31 Re kin sawas ahnsou koaros me meirong isihs kan kin kohda ong Siohwa ni rahnen Sapad kan,+ maram pwul kan+ oh erein ahnsoun kasarawi kan,+ duwehte me kileldier nan kosonned, oh re kin kaukaule wia met mwohn silangin Siohwa. 32 Re pil kin wia arail doadoahk nan impwal en mihtingo oh nan wasa sarawio. Re pil kin sewese riarail kan, nein Aaron pwutak kan ong doadoahk en tehnpesen Siohwa.