Rongamwahu en Madiu

12 Ehu ahnsowo, Sises ketin weid nan mwetin krein kan ni rahnen Sapad. Sapwellime tohnpadahk ko men mwengedahr oh tepida dolung wahn krein ko oh kangkang.+ 2 Ni Parisi ko ar kilangada met, re ahpw patohwanohng: “Kilang! Sapwellimomwi tohnpadahk kan wia mehkot me kosonned sohte mweidada ni rahnen Sapad.”+ 3 E ahpw mahsanihong irail: “Kumwail sohte kin wadek dahme Depit wia ni ahnsou me ih oh ienge ohl oko men mwengehda?+ 4 E sou pedolong nan tehnpesen Koht oh irail tungoale lopwon en pilawahn meirong ko*+ me sohte mweimwei ong ih oh ienge ko en tungoale pwe samworo kante?+ 5 De kumwail sohte wadek nan Kosonnedo me ni rahnen Sapad, samworo kan nan tehnpas sarawio kin kauwehla Sapad ahpw sohte kin dipikihda?+ 6 Ahpw I ndaiong kumwail me mehkot me lapalapasang tehnpas sarawio mihmi wasaht.+ 7 Ahpw ma kumwail wehwehki met, ‘I anahne kadek kalahngan+ a kaidehn meirong,’+ eri kumwail sohte pahn kadeik irail kan me sohte dipada. 8 Pwe Nein-aramas iei Kaunen Sapad.”+

9 Mwurin eh ketiketla sang wasao, e ahpw ketilong nan arail sinakokeo, 10 a kilang! ohl emen me apali peh mwoatorala* mi wasao!+ Eri re idek, “Kosonned mweidada kamwahulahn me soumwahu kan ni rahnen Sapad?” Re peidek pwe ren kedipa Sises.+ 11 E mahsanihong irail: “Ma kumwail naineki sihpw men oh sihpwo pwupwudi nan pwoahr ehu ni rahnen Sapad, ihs rehmwail me sohte pahn ale oh pwekada sang loale?+ 12 Ni mehlel, aramas kesempwal sang sihpw! Eri kosonned mweidada wia mehkot me mwahu ni rahnen Sapad.” 13 Ih eri mahsanihong ohlo: “Kapahwei pehmwen.” E ahpw kapahla peho, oh peho eri mwahula duwehla pali teio. 14 Ahpw Parisi ko pedoila oh koasoakoasoane ar pahn kemehla ih. 15 Ni Sises eh mwahngihada met, e ketila sang wasao. Aramas tohto pil idawehnla,+ oh e ketin kamwahwihala koaros me soumwahu, 16 ahpw e ketin ruwese irail en dehpa kasalehda ihs ih,+ 17 pwe en ketin kapwaiada dahme soukohp Aiseia nda:

18 “Kilang! Ei ladu+ me I pilada, me I poakohng oh me I pwungki!+ I pahn kihong ei ngehn sarawi,*+ oh e pahn kasalehiong wehi kan dahkot pwung pahrek. 19 E sohte pahn akamai+ oh sohte pahn weriwer oh sohte me pahn rong ngile nan ahllap akan. 20 Sohte ahlek pu pwoat e pahn kauwehla, oh e sohte pahn kakunla wihk ehu me pahn kereniong kunla,+ lao e pahn wahdo pwung pahrek. 21 Ni mehlel, wehi kan pahn koapworopworki ede.”+

22 Eri re wahdo reh ohl maskun oh lohteng men pwehki ngehn suwed tiadahr powe, oh e ketin kamwahwihala. Kahrehda ohl lohtengo kakehr lokaia oh kilangada wasa. 23 Eri, pokono pwon ahpw pwuriamweikihla oh tepida ndinda: “Kaidehn Nein Depit ih?” 24 Ni Parisi ko ar rongada met, re nda: “Ohl menet sohte kin kausasang ngehn suwed kan ihte ma sang Peelsepwul,* kaunen ngehn suwed kan.”+ 25 Pwehki eh mwahngih arail lamalam, e ahpw mahsanihong irail: “Wehi koaros me kin tohrohrpeseng oh uhpene nanpwungarail kin ohla, oh kahnimw de tohnihmw koaros me kin tohrohrpeseng oh uhpene nanpwungarail sohte pahn mihmihte. 26 Pil duwehte, ma Sehdan kin kaus Sehdan, e kin uhwong pein ih; eri ia duwen eh wehi eh pahn kak mihmihte? 27 Oh ma I kin kauski ngehn suwed kan Peelsepwul, eri ihs me noumwail tohnpadahk kan kin kauskin irail? Ihme kahrehda irail pahn wia amwail sounkadeik. 28 Ahpw ma sapwellimen Koht ngehn sarawi* me I kin kauski ngehn suwed kan, eri Wehin Koht uhdahn poweikumwaildier.+ 29 De ia duwen emen eh kak kauwehla imwen ohl kehlail men oh kihsang eh kepwe kan ma e sohte pahn salihedi mahs ohl kehlailo? Pwe ihte met me e pahn kak pirapahki imweo. 30 Mehmen me sohte iang ei pali kin uhwong ie, oh mehmen me sohte kin iang ie rikpene kin kamwerepeseng.+

31 “Pwe ih kahrepen ei ndaiong kumwail, soangen dihp oh lahlahwe koaros pahn kak lapwasang aramas akan, ahpw sohte mahk pahn kohieng me lahlahwe ngehn sarawi.*+ 32 Karasepe, mehmen me kauwe Nein-aramas, dipeo pahn lapwasang;+ ahpw mehmen me lahlahwe ngehn sarawi,* dipeo sohte pahn lapwasang, soh, kaidehn nan koasoandi en mwehi wet* de pil me kohkohdo.+

33 “Kumwail kin wiahiong tuhke pwoat en mwahu oh wah kan en mwahu de wiahiong tuhke pwoat en sakanakan oh wah kan en suwed. Tuhke kin sansalkihda wah kan.+ 34 Kumwail kadaudok en sineik pwoisin kan,+ ia duwen amwail kak nda soahng mwahu kan nan amwail suwed? Pwe ewen aramas kin kapwadewei audepen eh mohngiong.+ 35 Aramas mwahu kin kihda dahme mwahu sang soahng mwahu kan me e kin nekinekid, ahpw aramas suwed kin kihda dahme suwed sang soahng suwed kan me e kin nekinekid.+ 36 I ndaiong kumwail me ni Rahnen Kadeik, aramas akan pahn pwukoahki+ lokaia mwahl koaros me re kin koasoia; 37 pwe sang omw lokaia, ke pahn pwungkihla oh sang omw lokaia, ke pahn pakadeingkihda.”

38 Sounkawehwehn Kosonnedo kei oh Parisi kei ahpw sapeng patohwan: “Maing Sounpadahk, se men kilang ehu kilelen sang rehmwi.”+ 39 A e ketin sapeng irail mahsanih: “Dih ehu me kin suwed oh kamwahl* kin raparapahki kilel ehu, ahpw sohte kilel pahn kohieng, ihte kilel en soukohp Sona.+ 40 Pwe duwen Sona eh mihmihki nan kapehden mwahmw kalaimwuno rahn siluh oh pwohng silipwong,+ ih pil duwen Nein-aramas eh pahn mihmihki nan kapehden sampah rahn siluh oh pwohng silipwong.+ 41 Mehn Ninipe kan pahn iang dih wet iasada ni Rahnen Kadeik oh pahn kadeikada dih wet, pwe re koluhla ni ar rong dahme Sona kalohkihda.+ Ahpw kilang! emen me lapalapasang Sona mihmi met.+ 42 Lih nanmwarkien palieir pahn iang dih wet iasada ni Rahnen Kadeik oh pahn kadeikada dih wet, pwe e kohdohsang ni imwin sampah pwe en rong erpit en Solomon.+ Ahpw kilang! emen me lapalapasang Solomon mihmi met.+

43 “Ni ngehn saut men eh kin kohieisang rehn aramas emen, e kin kohkohseli nan sahpw madekeng, raparapahki wasahn kommoal, ahpw e sohte diar.+ 44 Ih eri nda, ‘I pahn pwuralahng ni imweio wasa me I kohkohsango,’ oh ni eh lella mwo, e diarada me ihmwo tehnlahr ahpw e kamwakeldahr oh kapwatadahr. 45 Ih eri kohla oh kahrehda ngehn isimen me suwedsang ih, oh mwurin ar pedolong loale, irail kousoanla mwo; oh ni imwio, aramaso suwedla sang mahs.+ Ih pil pahn duwen dih suwed wet.”

46 Ni eh mahmahseniong pokono, ineo oh rie pwutak ko+ wie kesikesihnen likio oh songosong ren koasoiong ih.+ 47 Eri, aramas emen ahpw patohwanohng ih: “Kilang! Inomwi oh riomwi ko patopato likio oh songosong ren koasoiong komwi.” 48 E ahpw ketin sapeng me lokaiahiongo, mahsanih: “Ihs me inei, oh ihs me riei kan?” 49 E ketin kapahla lime oh idilahng sapwellime tohnpadahk ko, mahsanih: “Kilang! Inei oh riei kan!+ 50 Pwe mehmen me kin wia kupwuren Semei me ketiket nanleng, iei ih me riei pwutak, riei serepein oh inei.”+