Rongamwahu en Sohn
4 Ni Kauno eh mwahngihada me Parisi ko rongada me e* sapwellimankihla tohnpadahk tohto oh ketin papidaisihirailla,+ tohtohsang me Sohn kin wia— 2 mendahki pein Sises sohte ketin wia papidais ahpw sapwellime tohnpadahk ko me kin wia— 3 e ahpw ketisang Sudia oh pwurehng ketila Kalili. 4 Ahpw e anahne ketin kotehla Sameria. 5 Ih eri ketin lellahng ni kahnimw en Sameria ehu me adaneki Saikar me karanih mwaht me Seikop kihong nah pwutak Sosep.+ 6 Iei wasa me pwarer en Seikop kin mi ie.+ Eri, Sises ngirekilahr eh ketin seiseiloak oh ketin mwomwohd ni pwarero.* Ahnsowo mpen awa keweneu.*
7 Lihen Sameria men ahpw kodohng idipil. Sises eri mahsanihong: “Kihdo mahs nimei ekis pihlen.” 8 (Pwe sapwellime tohnpadahk ko kolahngehr nan kahnimwo pwe ren pwainda mwenge.) 9 Lihen Sameriao eri patohwanohng: “Ia duwen omwi mehn Suhs men, a ngehi lihen Sameria men, komwi ahpw peki pihl rehi?” (Pwe mehn Suhs akan sohte kin koasoiong mehn Sameria kan.)+ 10 Sises ketin sapeng mahsanihong: “Ma ke kin ese sapwellimen Koht kisakis*+ oh ihs aramas me ndaiong uhk, ‘Kihdo mahs ekis nimei pihlen,’ ke pahn peki reh oh e pahn kihong uhk pilen komour.”+ 11 Liho ahpw patohwanohng: “Maing, komw sohte sapwellimanki pekid en idipil oh pwarer wet me loal. A ia wasa me komw pahn ketikihsang ie pilen komour wet? 12 Ia duwe, komw lapalapasang samat mehn mahso Seikop, me kihong kiht pwarer wet, me ih oh nah pwutak ko oh kou ko kin nimpil sang ie?” 13 Sises ketin sapeng mahsanihong: “Aramas koaros me kin nimpil sang ni pihl wet pahn pwurehng men nimpilda. 14 Mehmen me nimasang pihl me I pahn kihong sohte pahn pwurehng men nimpilda,+ ahpw pihl me I pahn kihong ih pahn wiahla utuhnpihl ehu loale me kin pwepwengkda pwe en kihong ih mour soutuk.”+ 15 Liho ahpw patohwanohng: “Maing, komw ketikihong ie pihl wet, pwe I en dehr pwurehng men nimpilda oh I en dehr pwurupwurehng kohdo idipil wasaht.”
16 E ahpw mahsanihong: “Kohla, ekerodo omw pwoudo oh kohdo wasaht.” 17 Liho sapeng patohwanohng: “Sohte ei pwoud.” Sises eri mahsanihong: “Me pwung omw nda, ‘Sohte ei pwoud.’ 18 Pwe ke pwoudikier ohl limmen, oh ohl me ke kin mihmi reh ahnsou wet kaidehn omw pwoud. Dahme ke ndahn me mehlel.” 19 Liho ahpw patohwanohng: “Maing, I kilang me komwi soukohp men.+ 20 Samat mehn mahs ako kin kaudok pohn nahna wet, ahpw kumwail kin nda me Serusalem iei wasa me aramas anahne kaudok ie.”+ 21 Sises ahpw mahsanihong: “Lih, kamehlele ie, ahnsou ehu pahn kohdo me kumwail solahr pahn kaudokiong Sahmo pohn nahna wet de pil nan Serusalem. 22 Kumwail kin kaudokiong dahme kumwail sohte ese;+ a kiht, se kin kaudokiong dahme se ese, pwe komour tepisang rehn mehn Suhs akan.+ 23 Ahpw ahnsou ehu pahn kohdo oh iei met ahnsowo me tohnkaudok mehlel kan pahn kaudokiong Sahmo pahn kaweidpen ngehn sarawi* oh mehlel, pwe ni mehlel, Sahmo kin ketin raparapahki soangen aramas pwukat en kaudokiong ih.+ 24 Koht iei Ngehn Emen,+ oh irail akan me kin kaudokiong ih anahne kaudok pahn kaweidpen ngehn sarawi* oh mehlel.”+ 25 Liho ahpw patohwanohng: “I ese me Mesaia me mwarenki Krais pahn ketido. Ni ahnsou me e pahn ketido, e pahn ketin padahkihong kiht mehkoaros ni sansal.” 26 Sises ahpw mahsanihong: “Iei ngehi ih, me koasoakoasoiong uhk.”+
27 Eri, ni ahnsowohte sapwellime tohnpadahk ko ahpw leledo oh irail pwuriamweikihla eh mahmahseniong lih emen. Ahpw sohte me patohwanohng: “Dahme komw kupwurki?” de “Dahme komw mahmahsenkihong lihen?” 28 Liho eri pwilikihdi eh sah en pihlo oh kohla nan kahnimwo oh ndaiong aramas ako: 29 “Kumwail kohdo oh kilang ohl emen me mahsanihong ie soahng koaros me I wiadahr. Ia duwe, kaidehn Krais met?” 30 Re ahpw kohieisang nan kahnimwo oh tepida kohkohdo reh.
31 A ni ahnsowo, sapwellime tohnpadahk ko patohwan peki reh: “Rapai,+ komw konot.” 32 E ahpw mahsanihong irail: “Mie mwenge me I kin tungoale me kumwail sohte ese.” 33 Tohnpadahk ko eri ndapene nanpwungarail: “Ia duwe, mie me patohwandohng mehkot pwe en konote?” 34 Sises ahpw mahsanihong irail: “Kenei mwenge iei en kapwaiada kupwuren ih me ketin poaroneiehdo+ oh kanekehla sapwellime doadoahk.+ 35 Kumwail sou kin nda, sounpwong pahieu mwohn rahk eh pahn leledo? Kilang! I ndaiong kumwail: Sarada oh kilengwohng mwaht akan me mahier oh kakehr dondol.+ Ahnsou wet 36 me kin dolung kin ale pweine oh kin kihkihpene wah kan ong mour soutuk, pwe me kin kamwarak oh me kin dolung en pereperenpene.+ 37 Pwe koasoi mehlel pwoat met: Emen kin kamwarak a emen kin dolung. 38 I kadarkumwailwei en dolung dahme kumwail sohte koadoahkihada. Ekei me koadoahkihada, a kumwail kin iang paieki arail doadoahk.”
39 Mehn Sameria tohto sang nan kahnimwo pwosonla ih pwehki dahme liho kadehdedahr, me nda: “E mahsanihong ie soahng koaros me I wiadahr.”+ 40 Eri, ni mehn Sameria ko ar patohdo reh, re patohwan peki en ketiket rehrail, e ahpw ketiket wasao rahn riau. 41 Imwilahn met, me tohto pil kamehlelehla pwehki dahme e mahsanih, 42 oh irail ndaiong liho: “Se solahr kamehlelehte pwehki dahme ke koasoia; pwehki pein kiht rongehr oh se ese me ohl menet me uhdahn sounkomourpen sampah.”+
43 Mwurin rahn riauo, e ketida sang wasao oh ketila Kalili. 44 Pein Sises ketin kadehdedahr me soukohp men sohte kin waunla nan pein uhdakeo.+ 45 Eri, ni eh ketin lelehr Kalili, mehn Kalili ko kasamwo ih pwehki ar kilangehr mehkoaros me e ketin wiadahr nan Serusalem ni ahnsoun kasarawio,+ pwe irail pil iang kohla ni kasarawio.+
46 Ih eri pwurehng ketido Kena nan Kalili, wasa me e ketin wekidala pihl ong wain.+ Eri, mie sounpapah en nanmwarki men nan Kapernaum me nah pwutak soumwahuda. 47 Ni ohl menet eh rongada me Sises ketisang Sudia ketilahng Kalili, e ahpw patohdo reh oh peki en ketidihla oh kamwahwihala nah pwutako pwe e kereniongehr mehla. 48 Sises ahpw mahsanihong: “Ma kumwail sohte kilang kilel kan oh soahng kapwuriamwei kan, kumwail sohte mwahn pahn kamehlele.”+ 49 Sounpapah en nanmwarkio ahpw patohwanohng: “Maing Kaun, komw ketidihdo mwohn ei tungoal serio eh pahn mehla.” 50 Sises eri mahsanihong: “Kohwei; noumw pwutako momour.”+ Ohlo eri kamehlele mahsen me Sises mahsanihong, e ahpw kohkohla. 51 Nindoken eh kohkohdihla, eh ladu ko ahpw tuhwong ih pwe ren ndaiong me nah pwutako momour.* 52 E ahpw idek rehrail ahnsou dah me e mwahula. Re ahpw ndaiong: “Karakaro kohsang reh aio ni keisuhwen awa.”* 53 Sahmo ahpw tamanda me iei awa me Sises mahsanihong: “Noumw pwutako momour.”+ Eri, ih oh tohnimweo pwon ahpw pwosonla. 54 Met iei keriaun manaman*+ me Sises ketin wiahda ni ahnsou me e ketisang Sudia ketilahng Kalili.