Rongamwahu en Luk
13 Ni ahnsowo, ekei irail me mihmi wasao ahpw patohwanohng ih duwen mehn Kalili ko me Pailet doaloahkihda ntahrail arail meirong kan. 2 E ahpw ketin sapeng irail, mahsanih: “Kumwail lemeleme me mehn Kalili ko dipan suwedsang mehn Kalili teikan koaros pwehki arail lokolongki soahng pwukat? 3 I ndaiong kumwail me soh, ahpw ma kumwail sohte pahn koluhla, kumwail koaros pahn mwomwla duwehte irail.+ 4 A duwen irail me 18 ko me imwen doulik en Siloham pwupwudi pohrail oh kemeirailla—kumwail lemeleme me irail dipan laudsang aramas teikan koaros me kousoan Serusalem? 5 I ndaiong kumwail me soh, ahpw ma kumwail sohte koluhla, kumwail koaros pahn mwomwla duwehte irail.”
6 Ih eri mahsanihong irail karasaras pwoatet: “Ohl emen ahneki tuhke pik pwoat me poad nan eh mwetin kreip, ih eri kolahng kilang ma mie wah ahpw e sohte diarada mehkot.+ 7 E ahpw ndaiong soumwet en kreipo, ‘Sounparehr siluh I kin kohkohdo kilang ma mie wahn tuhke pik wet, ahpw I sohte diarada mehkot. Pelehdihsang! Ia kahrepen ei mweidohng en kauwehla mwahl sahpwet?’ 8 E sapeng ndaiong, ‘Maing Soumas, mweidohng en mihmihte pil ehu sounpar lao I weirada warawar kapilpene oh kihong koiasi. 9 Ma e pahn wa ahnsou kohkohdo, eri e mwahu; ahpw ma soh, eri pelehdihsang.’”+
10 Ni rahnen Sapad ehu, e ketin padapadahk nan sinakoke ehu. 11 A kilang! mie lih emen wasao me ngehn suwed mi reh me kahrehiong en soumwahu erein sounpar 18; oh e inenen kospene oh sohte mwahn kak inenda. 12 Ni Sises eh mahsanihada ih, e ahpw mahsanihong: “Lih, ke maiauda sang omw soumwahwen.”+ 13 E ahpw ketikihdiong lime ko powe oh ni ahnsowohte e inenda oh tepida kalinganahda Koht. 14 Ahpw soumas en sinakokeo lingeringerda pwehki Sises ketin kamwahwihala soumwahu ni rahnen Sapad. Ih eri ndaiong pokono: “Mie rahn weneu me doadoahk pahn kin wiawi,+ eri ni rahn akohte me kumwail kak peki kumwail en mwahula sang amwail soumwahu kan, ahpw kaidehn ni rahnen Sapad.”+ 15 Kauno ahpw ketin sapeng mahsanihong: “Mwalaun amwailen,+ kumwail koaros sou kin lapwahda noumwail kou oh dongki sang nan dewerail oh kahreirailla ren nimpil ni rahnen Sapad?+ 16 A lih menet me nein Eipraam serepein oh me senselkiher rehn Sehdan sounpar 18, e sou konehng en lapwada sang sensel wet ni rahnen Sapad?” 17 Eri ni eh mahsanih mepwukat, koaros me uhwong ahpw tepida namenekla, ahpw pokono pwon tepida perenkihda soahng kapwuriamwei koaros me e ketin wiahda.+
18 Ih eri doula mahsanih: “Dahme Wehin Koht rasehng, oh dahme I kak karasahiong? 19 E rasehng kisin werentuhke tikitik kis* me ohl emen ale oh padokedi nan eh mwaht, oh e keirda oh wiahla tuhke pwoat, oh menpihr en pahnlahng kan ahpw wiahda pasarail ni rah kan.”+
20 Oh e pwurehng mahsanih: “Dahme I kak karasahiong Wehin Koht? 21 E rasehng ihs me lih emen ale oh doaloahkihda lapalahn pilawa ehu,* pilawao pwon ahpw mpwosada.”+
22 Ih eri ketin seiloak sang ehu kahnimw lel ehu kahnimw oh sang ehu kisin kahnimw lel ehu kisin kahnimw oh wie padapadahk ni eh ketiket kolahng Serusalem. 23 Ohl emen ahpw patohwanohng: “Maing Kaun, me malaulau keite me pahn komourla?” E ahpw mahsanihong irail: 24 “Kumwail nantihong laud pwe kumwail en pedolong nan wenihmw wetikitik,+ pwe I ndaiong kumwail, me tohto pahn song pedolong ahpw re sohte pahn kak. 25 Ni tohnihmwo eh pahn uhda oh loakehdi wenihmwo, kumwail pahn kesihnen liki wie letelet ni wenihmwo oh ndinda, ‘Maing Kaun, ritingadahng kiht.’+ E ahpw pahn sapengkin kumwail: ‘I sehse ihs kumwail.’ 26 Eri kumwail pahn tepida nda, ‘Se kin iang uhk mwenge oh nim, oh ke kin padahk nan at ahllap akan.’+ 27 E ahpw pahn ndaiong kumwail, ‘I sehse ihs kumwail. Kumwail kohkohweisang ie, kumwail koaros me kin wia me suwed!’ 28 Kumwail pahn sengiseng oh ngihmwail kan tehtehrek ni amwail pahn kilang Eipraam, Aisek, Seikop oh soukohp koaros nan Wehin Koht, ahpw pein kumwail pahn lekdekla liki.+ 29 Patehng met, aramas akan pahn kohdo sang palimese oh palikapi oh paliepeng oh palieir, oh re pahn mwohdehng* tehpel nan Wehin Koht. 30 Eri kilang! ekei me kin mwuri pahn mwowehla, a ekei me kin mwowe pahn mwurihla.”+
31 Ni awaohte Parisi kei patohdo reh oh patohwanohng: “Komw ketida oh ketiweisang wasaht, pwe Erod men kemeikomwihla.” 32 E ahpw mahsanihong irail: “Kohla oh ndaiong ohl widingen,* ‘Kilang! I pahn kausasang ngehn suwed oh kamwahwihala aramas akan rahnwet oh lakapw, a ni kesiluhwen rahn I pahn kaimwisekala ei doadoahk.’ 33 Ahpw sohte lipilipil dahme pahn wiawi, I pahn pousehlahte ei doadoahk rahnwet, lakapw oh pil pali, pwe e sohte konehng soukohp men en kamakamala likin Serusalem.+ 34 Serusalem, Serusalem, kowe me kemehla soukohp ako oh katehki takai irail ko me pekederwei+—pak depe me I men kihpene noumw seri kan, rasehng litok men me kin kompwoalepene nah kisin pwurok kan pahn peh! Kumwail ahpw kahng.+ 35 Kilang! Imwamwail pahn tehnla.+ I ndaiong kumwail, kumwail solahr pahn kilang ie lao kumwail pahn nda: ‘Meid pai me ketido ni mwaren Siohwa!’”*+