Melkahka kan
71 Maing Siohwa, I diaradahr wasahn ruk rehmwi.
Komw dehr ketin mweidohng ie I en namenekla.+
2 Pwehki omwi pwung, komw ketin doareiehla oh kapitiehla.
Komw ketin karonge ie ni keneinei* oh doareiehla.+
3 Komw ketin wiahla ei paipalap kehlail
Wasa me I kak pedolong ie ahnsou koaros.
Komw ketin poaronehdo emen en doareiehla,
Pwe komwi me ei paipalap oh ei wasahn ruk kehlail.+
4 Maing ei Koht, komw ketin kapitiesang nan pehn aramas suwedo,+
Sang nan pehn sounkalokoloko me sohte kin pwung pahrek.
5 Maing Kaun Wasa Lapalahpie Siohwa, komwi me ei koapworopwor;
6 I likihkomwier sangete ni ei ipwidi;
Komwi me ketikiniesang nan kapehden inei.+
I kin kapinga komwi ahnsou koaros.
7 Aramas tohto kin pwuriamweikihla ar kilang dahme wiawihong ie,
Ahpw komwi me ei wasahn ruk kehlail.
8 Eweiet kin direkihla kapingpomwi;+
Rahn ehu pwon I kin koasoia duwen sapwellimomwi lingan.
9 Komw dehr ketin keseiehla ni ei mahla;+
Komw dehr ketin likidmelieiehla ni ei kehl eh kin luwetala.+
10 Ei imwintihti kan kin kedipa ie,
Oh irail akan me kin raparapahki en kihsang ei mour kin koasoakoasoane,+
11 Oh ndinda: “Koht ketin likidmelielahr ih.
Kitail pwakih oh koledi, pwe sohte me pahn kapitala.”+
12 Maing Koht, komw dehr ketin dohweisang ie.
Maing ei Koht, komw ketin mwadangodo sewese ie.+
13 Irail akan me kin pelian ie
En namenekla oh mwomwla.+
Irail akan me kin songosong en kihong ie kahpwal
En sarohdi oh namenekla.+
14 Ahpw ngehi, I pahn kin awiawih komwi;
I pahn kalaudehla kapingpomwi.
15 Rahn ehu pwon, eweiet pahn kin koasoia sapwellimomwi pwung,+
Oh sapwellimomwi wiewiahn komour kan,
16 Maing Kaun Wasa Lapalahpie Siohwa;
I pahn weweidwei oh koasoia sapwellimomwi wiewia manaman kan,
I pahn koasoia sapwellimomwi pwung, sapwellimomwihte.
17 Maing Koht, komw ketin padahkihieier sangete ni ei pwulopwul,+
Oh lel met, I kin pousehlahte lohki sapwellimomwi wiewia kapwuriamwei kan.+
18 Maing Koht, mehnda ma I mahla oh moangepwetala, komw dehr ketin likidmelieiehla.+
Komw ketin mweidohng ie I en koasoiaiong dih en mwuhr kan duwen sapwellimomwi manaman*
Oh koasoiaiong irail koaros me pahn ipwidi mwuhr duwen sapwellimomwi roson.+
19 Maing Koht, sapwellimomwi pwung me ileilehie;+
Komw ketin wiadahr soahng kapwuriamwei kan;
Maing Koht, ihs me duwei komwi?+
20 Mendahki omwi ketin wiahiong ie I en lelohng lokolok oh apwal tohto,+
Komw ketin pwurehng kakehleiehda;
21 Komwi en ketin kalaudehla wahupei
Oh kapiliepene oh kansenamwahwih ie.
22 I ahpw pahn kapingahkin komwi keseng sahl pwoat
Pwehki sapwellimomwi lelepek, Maing ei Koht.+
I pahn koulki kapingpomwi* ni ei kesengki arpo,
Maing Koht Sarawi en Israel.