Esekiel
9 Ih eri ketin kapitie laudida ni salengei kat, mahsanih: “Ekerpene irail kan me pahn kaloke kahnimwet, emenemen en wa nah tehtehn kamwomwala!”
2 I kilangada ohl wenemen me kohkohdo sang ni ewen kehl powe+ me sallahng paliepeng, emenemen wa nah tehtehn kamwomwala; oh mie ohl emen nanpwungarail me likawih likou linen, me wa nein sekteri deupen ingk ehu* ni lukopeo, oh re kohlongodo oh kesihnenda limwahn pei sarawi pronso.+
3 Eri lingan en Koht en Israel+ ahpw kohdahsang pohnangin kerup ko wasa me e mihmi ie, oh mwekidlahng ni taht en wenihmw en tehnpas sarawio.+ Koht ahpw ketin tepida malipe ohl me likawih likou lineno, me weuwa nein sekteri deupen ingk ehu ni lukopeo. 4 Siohwa eri ketin mahsanihong ih: “Kohwei nan kahnimwet, nan Serusalem, oh kihdiong kilel ehu pohn temwen irail me kin sengloal oh ingitingki+ soahng kasaut koaros me kin wiawi nan kahnimwet.”+
5 A ong meteiko e ketin mahsanih ni ei rongorong: “Kumwail idawehnwei ih nan kahnimwet oh kemehla aramas akan. Kumwail dehpa poakeirailla,* oh dehpa nsenohkin irail.+ 6 Kumwail pahn kemehla douluhl ohl mah kan, mwahnakapw kan, meipwon kan, kisin seri kan oh lih akan.+ Ahpw kumwail dehpa keila limwahn emen me mie nting ni temwe.+ Kumwail pahn tepida sang ni ei wasa sarawio.”+ Irail eri tepida rehn ohl mah ko me mi mwohn tehnpas sarawio.+ 7 Ih eri ketin mahsanihong irail: “Kumwail kasaminehla tehnpas sarawio oh audehkihda wasa me kelpeneo aramas kamakamala kan.+ Kumwail kohla!” Irail eri kohieila oh kemehla aramas akan nan kahnimwo.
8 Ni ar kemekemeirailla, ngehi kelehpw me luhwehdi, oh I poaridiong nanpwelo oh likwer patohwan: “Maing Kaun Wasa Lapalahpie Siohwa! Komw pahn ketin kamwomwala koaros me luhwehdi nan Israel ni omw ketin kapwilewei sapwellimomwi engieng pohn Serusalem?”+
9 Ih eri ketin mahsanihong ie: “Sapwung en aramas en Israel oh Suda kan uhdahn laud douluhl.+ Sahpwet direkilahr kakerehdi nta,+ oh kahnimw wet direkilahr mwersuwed.+ Pwe re nda, ‘Siohwa ketin keselahr sahpwet, oh Siohwa sohte ketin mahsanih mehkot.’+ 10 Ahpw I sohte pahn poakeirailla;* de pil nsenohkin irail.+ I pahn kihdiong pohn moangarail kan imwilahn arail wiewia kan.”
11 Ngehi eri kilangada ohl me likawih likou lineno me wa nein sekteri deupen ingk ni lukopeo eh pwurodo oh patohwan: “I kapwaiadahr duwehte me komw ketin kehkehlingkihong ie.”