Sohp
42 Sohp eri sapengki Siohwa patohwan:
2 “Met I patohwan eseier me komw kak ketin wia mehkoaros
Oh ni omw kin ketin kupwurehda en wia mehkot, komw uhdahn pahn ketin wiahda.+
3 Komw ketin mahsanih, ‘Ihs memenet me kin kasapwungehla ei kaweid ni eh sohte ahneki loalokong?’+
Mehlel, I pato, ahpw I sohte wehwehki
Duwen soahng kan me uhdahn kapwuriamwei me I sohte ese.+
4 Komw ketin mahsanih, ‘Menlau rong, oh I pahn mahsen.
I pahn peidek rehmw oh ke pahn sapeng ie.’+
5 Salengei kat rongehr duwen komwi,
Ahpw met I patohwan kilangkinkomwiher mesei kat.
7 Mwurin Siohwa eh ketin mahsanihong Sohp mahsen pwukat, Siohwa ahpw ketin mahsanihong Elipas mehn Demano:
“I engieng pahmw oh kompoakepahmw riemeno,+ pwe kumwail sohte koasoiahda me mehlel duwen ngehi+ duwehte me ei ladu Sohp wia. 8 Eri met, ale kouwol isimen oh sihpw wol isimen oh kohla rehn ei laduwo Sohp, oh wiahda meirong isihs ehu ong pein kumwail. Oh ei ladu Sohp pahn kapakapkin kumwail.+ I uhdahn pahn karonge eh pekipek* en dehr kalokehkin kumwail amwail koasoia soahng pweipwei kan, pwe kumwail sohte koasoiahda me mehlel duwen ngehi duwehte me ei ladu Sohp wia.”
9 Eri Elipas mehn Demano, Pildad mehn Suhaho oh Sopahr mehn Naamao ahpw kohieila oh kapwaiada dahme Siohwa ketin mahsanih ren wia. Oh Siohwa ketin karonge en Sohp kapakapo.
10 Mwurin Sohp eh kapakapki kompoakepah ko,+ Siohwa ahpw ketikihsang en Sohp kahpwalo+ oh ketin kapwurehiong eh paiamwahu.* Siohwa ketikihong ih dipwisou kan pak riau tohtohsang dahme e ahneki mahso.+ 11 Rie pwutak oh serepein ko koaros oh kompoakepahn mahs ko koaros+ ahpw kohdo reh oh iang ih mwenge ni imweo. Re kaloalamwahwihala oh kansenamwahwihala sang kahpwal koaros me Siohwa ketin mweidohng en lelohng ih. Emenemen irail kisekisehki mwohni oh rihng kohl.
12 Siohwa eri ketin kapaiahda luhwen mouren Sohp laudsang nin tapio,+ oh Sohp ahpw nainekihda sihpw 14,000, kamel 6,000, kou 1,000 wad riemen oh dongki lih 1,000.+ 13 E pil nainekihda pwutak isimen oh serepein silimen.+ 14 E kihong eden serepein laudo Semihma, me keriemeno Kesia oh me kesilimeno Keren-appuk. 15 Sohte lih emen nan sahpwo pwon me kaselel duwehte nein Sohp serepein ko, oh arail pahpao kihong irail ar sohso iangahki riarail pwutak ko.
16 Mwurin met Sohp ahpw momourki sounpar 140, oh e koanohdi nah seri kan oh nein nah seri kan—dih pahieu. 17 Mwuhr Sohp ahpw mehla, mwurin eh momour werei oh nsenamwahu.*