Esekiel
31 Ni kaeisek ehun sounpar, ni kesiluhwen sounpwong, ni keieun rahn en sounpwongo, Siohwa ketin pwurehng mahsanihong ie: 2 “Nein-aramas, ndaiong Parao nanmwarkien Isip oh pokon me iang ih,+
‘Ihs me kak pahrekiong omw lapalap?
3 Mie mehn Asiria men, tuhke sidar pwoat nan Lepanon,
Me rah kan kaselel duwehte mwetehn wasa tuhkehn kan, me ileile;
Kadokeo mi nanpwungen depwek kan.
4 Pihl kan me kahrehiong en laudla, utuhnpihl loal kan kahrehiong eh reireila.
Piletik kan kapilpene wasa me e poad ie;
Warawar kan sang utuhnpihl loal kan me kin kalamwurih tuhke koaros en nansapwo.
5 Ihme kahrehda e keirda oh reireisang tuhke teikan koaros nansapwo.
Rah laud kan tohtohla, oh rah tikitik kan reireila
Pwehki eh diren pihl nan piletik kan.
6 Menpihr en pahnlahng koaros wiahda pasarail kan ni rah laud kan,
Mahn lawalo koaros en nansapw neitik pahn rah kan,
Oh wehi koaros me towe tohto kin koukousoan pahn mwetehn tuhkeo.
7 Tuhkeo uhdahn linganla oh rah kan reireila,
Pwe kalewe ko leldilahng nan pihl tohto.
8 Tuhke sidar teikan nan mwetuwel en Koht+ sohte kak pahrekiong met.
Sohte tuhke suniper pwoat me rah laud kan duwehte met,
Oh sohte tuhke plain* pwoat me rah kan duwehte met.
Sohte tuhke pwoat nan mwetuwel en Koht kak pahrekiong eh lingan.
9 I kalinganahla tuhkeo, ni teh kan eh losolosala.
Oh tuhke teikan koaros en Ihden, mwetuwel en Koht mehlelo, peiriniong tuhkeo.’
10 “Kahrehda iet me Kaun Wasa Lapalahpie Siohwa ketin mahsanih: ‘Pwehki tuhkeo* uhdahn reireila, kadokeo leldahla nanpwungen depwek kan, oh eh mohngiong pohnmwahsohkihda eh reirei, 11 I pahn kihla ih rehn kaun kehlail en wehi kan.+ E uhdahn pahn kaloke ih, oh I pahn soikala pwehki eh suwed kan. 12 Oh mehn liki kan, me keieu lemei en wehi kan, pahn pelehdi tuhkeo, oh re pahn kesehla pohn nahna kan, oh teh kan pahn pwupwudi ni wahu koaros, oh rah kan pahn tipw wonohn nan piletik koaros nan sahpwo.+ Aramas koaros nin sampah pahn kohkohsang pahn mweteh oh kesehla tuhkeo. 13 Menpihr en pahnlahng koaros pahn kousoan pohn tuhke pwupwudio, oh mahn lawalo koaros en nansapw pahn kousoan pohn rah kan.+ 14 Eri, sohte tuhke pwoat limwahn pihl kan pahn pwurehng reireila de kadokeo pahn leldahla nanpwungen depwek kan oh sohte tuhke pwoat me kalamwur mwahu pahn reireila oh leldahla ni depwek kan. Pwe irail koaros pahn mehla oh kohdihla pahn sampah, iangahki aramas akan me pahn kohdihla nan pwoahr.’*
15 “Iet me Kaun Wasa Lapalahpie Siohwa ketin mahsanih: ‘Ni rahn me tuhkeo pahn kohdihla nan Sousou,* I pahn kahrehda mwahiei ehu. Ihme kahrehda, I pahn pwaindi pihl loal kan oh koledi piletik kan pwe pihl tohto en dehr pwilipwilwei. I pahn karotorotihala Lepanon pwehki met, oh tuhke koaros en nansapw pahn mengila. 16 Sang ni ngilen tuhkeo eh pwupwudi, I pahn kahrehiong wehi kan ren rerrer ni ei wahdihla nan Sousou* iangahki irail koaros me pahn kohdihla nan pwoahr.* Oh tuhke koaros en Ihden,+ tuhke me keieu kaselel oh me keieu mwahu en Lepanon, tuhke koaros me kelemwur mwahu, pahn nsenamwahula pahn sampah. 17 Irail iang ih kohdihla nan Sousou,* rehn irail me kamakamkihla kedlahs,+ iangahki me kin utung ih kan* me kin mi pahn mweteh nan wehi kan.’+
18 “‘Mehnia rehn tuhkehn Ihden pwukat me duweiuk ni lingan oh lapalap?+ Ahpw ke uhdahn pahn wisikdihla pahn sampah iangahki tuhkehn Ihden kan. Ke pahn wendi nanpwungen me sohte sirkumsais kan, rehn irail me kamakamkihla kedlahs. Met pahn wiawihong Parao oh pokon koaros me iang ih,’ Kaun Wasa Lapalahpie Siohwa me ketin mahmahsen.”