ME PID PAIPEL WET

Soahng kan me Koht ketin kupwurki padahkihong kitail aramas, ntingdi nan Paipel. Pwehki Paipel pwilisang rehn Koht, kitail anahne onopki pwehn esehla ih. (Sohn 17:3; 2 Timoty 3:16) Nan Paipel, Siohwa Koht ketin kasalehda kupwure ong aramas oh sampah me iei ar wasahn kousoan.—Senesis 3:15; Kaudiahl 21:3, 4.

Sohte ehu pwuhk me duwehte Paipel me kin wekidala mouren aramas. Paipel kin kamwakid kitail en alasang Siohwa ni atail kin kasalehda limpoak, kadek kalahngan oh poakehla meteikan. Paipel kin kihong aramas koapworopwor oh kin sewese irail en dadaur pahn kahpwal laud kan. Oh Paipel kin kasalehda “mehkan” en sampah wet me sohte kin pahrekiong kupwur unsek en Koht.—Melkahka 119:105; Ipru 4:12; 1 Sohn 2:15-17.

Nin tapio Paipel ntingdi ni lokaiahn Ipru, Aramaik, oh Krihs. Paipel pwon de ekei wasa kan nan Paipel kawehwehdi ni lokaia daulih 3,000. Nan poadopoad, sohte ehu pwuhk me kawehwehdi ni lokaia tohto oh kohpeseng wasa tohto duwehte Paipel. Ni mehlel, ih met me kitail kak kasik sang Paipel. Pwe Paipel kohpada ni eh mahsanih: “Rongamwahu en Wehio [rohng kesempwal me mi nan Paipel] pahn lohkseli wasa koaros me aramas kin mi ie nin sampah pwe en mie kadehde ong tohnwehi koaros, a mwuri, imwio ahpw pahn leledo.”—Madiu 24:14.

Pwehki se pohnese kesempwalpen rohng en Paipel, se wiahda kawehwe wet ni at uhdahn wauneki audepen Paipel. E wia pwukoa laud ehu en kasalehda audepen Paipel ni pwung. Se nantihong wiahda kawehwe me pahn idawehn tepin nting kan en mahso, oh pil kawehwe me mengei en wehwehki oh wadek. Oaritik kan, “Ire Kesempwal kan ong Kawehwe Paipel,” “Mwomwen Kawehwehn Paipel Wet,” oh “Ia Duwen Paipel Eh Wiawihda ong Kitail” kin koasoia ekei ire kesempwal kan me se doadoahngki nan at kawehwe, oh kin kasalehda soahng kei duwen kawehwe wet.

Aramas akan me kin poakohng Siohwa Koht oh kin kaudokiong ih, kin men naineki kawehwehn Mahsen en Koht me pwung oh mengei en wehwehki. (1 Timoty 2:4) Ihme kahrehda se wiahda kawehwe wet ni Lokaiahn Pohnpei, oh se men wiahda Kawehwehn Sampah Kapw ni uwen tohtohn lokaia me kak. Se koapworopworki oh kapakapki me kawehwehn Paipel wet pahn seweseiuk ni omw pahn nantihong “rapahki Koht” oh diarada ih.—Wiewia 17:27.