NEHMAIA

1 Iet koasoien Nehmaia*+ nein Akalaia: Eri ni sounpwong en Kislep,* ni kerieisek en sounpar,* I mi nan ihmw laud kehl kehlailo* nan Suhsan.*+ 2 Ni ahnsowo Ananai,+ emen riei pwutak, leledo iangahki ohl teikan sang Suda, oh I idekda rehrail duwen mehn Suhs akan me luhwehdi me pitsang sensel oh pwuralahng sahpwo,+ oh pil duwen Serusalem. 3 Irail eri sapengki: “Irail me luhwehdi nan wehio me pwurodo sang sensel mi nan apwal laud oh kanamenek.+ Kehl en Serusalem rengkidi,+ oh ewen kehl kan en kahnimwo mwasingkihla kisiniei.”+

4 Ni ahnsowohte me I rongada koasoi pwukat, I mwohndi oh tepida sengiseng oh mwahmwahiei erein rahn kei, oh I wie kaisihsol+ oh kapakap mwohn silangin Koht en nanleng. 5 I ahpw patohwan: “Maing Siohwa, Koht en nanleng, Koht lapalap me aramas en lemmwiki oh wauneki, me kin ketin kolokol sapwellime inou lap oh ketin kasalehda limpoak loalopwoat ong irail me kin poakohng komwi oh kapwaiada sapwellimomwi kehkehlik kan,+ 6 komw kupwurkalahngan oh ketin tetehk kanahieng oh ketin mahsanih ie oh ketin karonge kapakap en sapwellimomwi ladu me wie kapakap ong komwi rahnwet, nin rahn oh nipwong,+ me pid sapwellimomwi ladu kan, iei mehn Israel kan. I patohwan wehkada dihp kan me aramas en Israel kan wiadahr ong komwi. Se dipadahr, ngehi oh pil peneinei en ei pahpa.+ 7 Se uhdahn wia mwekid suwed ong komwi+ ni at sohte kapwaiada kehkehlik kan, koasoandi kan oh kosonned kan me komw ketikihong sapwellimomwi ladu Moses.+

8 “Komw kupwurkalahngan oh ketin tamataman mahsen me komw ketin kehkehlingkihong* sapwellimomwi ladu Moseso: ‘Ma kumwail wiahda mwekid salelepek, I pahn kamwarangkumwailpeseng nanpwungen aramas akan.+ 9 Ahpw ma kumwail pwurodo rehi oh kapwaiada ei kehkehlik kan oh peikiong mepwukat, mendahki amwail mwarahkpeseng ni imwin sampah, I pahn kihkumwailpene+ sang wasao oh waikumwaildo nan wasa me I pilada ong lingan en mwarei.’+ 10 Irail sapwellimomwi ladu kan oh sapwellimomwi aramas akan, me komw ketin kasaledekihala* sang ni sapwellimomwi manaman lapalap oh nin limomwi roson.+ 11 Maing Siohwa, komw kupwurkalahngan oh ketin karonge ni keneinei kapakap en sapwellimomwi ladu oh kapakap en sapwellimomwi ladu kan me inengieng lemmwiki mwaromwi, oh komw kupwurkalahngan oh ketin kahrehiong sapwellimomwi ladu en pweida rahnwet, oh nanmwarkio en poakeiehla.”+

Eri ngehi sounkohwahn wain men ong nanmwarki.+

2 Ni sounpwong en Nisan,* ni kerieisek en sounpar+ en Nanmwarki Ardaserksihs,+ mie wain mwohn nanmwarkio, oh nin duwen me I kin kalapw wia I pwekada waino oh kihong nanmwarkio.+ Ahpw saikinte pak ehu I mwomwen pahtou mwohn nanmwarkio. 2 Nanmwarkio ahpw idek rehi: “Dahme ke mwomwen pahtouki ni omw sohte soumwahu? I kak kilang me ke pwunodki mehkot.” Ngehi eri uhdahn masepwehkada.

3 Ngehi eri ndaiong nanmwarkio: “Nanmwarki en ketin mour werei! Ia duwen ei sohte pahn mwomwen pahtouki kahnimwo, wasa me semei mehn mahs ako seridi ie, eh mwomwla, oh ewen kehl kan en kahnimwo eh ohkihlahr kisiniei?”+ 4 Nanmwarkio eri ndaiong ie: “Dahme ke men wia?” Ni ahnsowohte I kapakapohng Koht en nanleng.+ 5 Ngehi eri ndaiong nanmwarkio: “Ma nanmwarki ketin kupwure oh ma sapwellimomwi ladu kenikenla rehmwi, a komw ketin kadariehla Suda, ni kahnimw me semei mehn mahs ako seridi ie, pwe I en onehda sapahl kahnimwo.”+ 6 Nanmwarkio ahpw ndaiong ie (eh likendo mwomwohd limwah): “Ia erein omw pahn seiloakla, oh iahd me ke pahn pwurodo?” Eri nanmwarkio pwungki kadariehla,+ ngehi eri padahkihong ih iahd me I pahn pwurodo.+

7 Ngehi eri ndaiong nanmwarkio: “Ma nanmwarki ketin kupwurki, a kisinlikou en kohieng ie ong kepina kan en sahpw me mi Palio Pillapo,*+ pwe ren mweidohng ie I en kotehla sapwarailo lao I lella Suda, 8 oh pil kisinlikou ong Asap sounsilepen en nanmwarki pelien wel, pwe en kihong ie tuhke kan ong ewen kehl kan en Kehl Kehlail+ en Tehnpaso* oh ong kelen kahnimwo+ oh ong ihmw me I pahn kohla ie.” Nanmwarkio eri kihong ie mepwukat,+ pwe limen ei Koht kin ketiket pohi.+

9 Ngehi eri kohdo rehn kepina kan en sahpw me mi Palio Pillapo oh kihong irail nein nanmwarkio kisinlikou kan. Nanmwarkio pil kadarala kaunen karis en sounpei kan oh soundak oahs kan ren iang ie kohla. 10 Ni Sanpalad+ mehn Ped-oron oh Dopaia,+ emen lapalap* en mehn Ammon+ ar rongada duwen met, ira uhdahn nsensuwedkihla me mieier me kohdo pwehn wiahda mehkot mwahu ong aramas en Israel.

11 Ngehi eri kohdo Serusalem, oh I mihmihki wasao erein rahn siluh. 12 I pwourda nipwongo, ngehi oh ekei ohl me iang ie, oh I sohte ndaiong emen dahme ei Koht ketikihdiong nan mohngiongi I en wiahiong Serusalem, oh sohte mahn emen me mi rehi ihte dakepeio. 13 Oh nipwongo I kohieila ni Ewen Kelen Wahu,+ daulih mwohn Utuhnpihl en Sineik Laud kohla ni Ewen Kelen Koasoakoasoak en Pehs,+ oh I dawih kelen Serusalem me rengkidi oh ewen kehl kan me ohkihla kisiniei.+ 14 Oh I daulih Ewen Kelen Utuhnpihl+ oh kohla ni Lepin Lehn Nanmwarki, oh sohte itar wasa ong mahn me I dakedakeo en keidla ie. 15 Ahpw nipwongo I kohkohdahlahte ni wahwo,+ oh I pousehlahte dawih kehlo, mwurin mwo I pwurodo oh pedolong ni Ewen Kelen Wahu, ngehi eri pwurala wasa me I mihmi ieo.

16 Keriaun kaun ako+ sehse ia wasa I kohla ie oh dahme I wiewia, pwe I saikinte ndaiong mehn Suhs kan, samworo kan, lapalap akan, keriaun kaun akan, oh tohndoadoahk teikan mehkot. 17 Eri, I ndaiong irail: “Kumwail kak kilang uwen apwal me kitail mi loale, duwen Serusalem eh mwomwla oh ewen kehl kan eh mwasingkihla kisiniei. Kumwail kohdo, kitail onehda sapahl kelen Serusalem, pwe kanamenek wet en dehr wiewiawi.” 18 Ngehi eri ndaiong irail duwen limen ei Koht eh kin ketiket pohi+ oh pil dahme nanmwarkio ndaiong ie.+ Irail eri nda: “Kitail uhda oh kauwada.” Irail eri kakehlakahda emenemen* ong doadoahk mwahwo.+

19 Eri ni Sanpalad mehn Ped-oron, Dopaia,+ emen lapalap* en mehn Ammon,+ oh Kesem mehn Arepia+ ar rongada met, re ahpw tepida kapailokei kiht+ oh kasalehda ar mwamwahlikin kiht oh nda: “Dahme kumwail wiewia? Kumwail uhwong nanmwarkio?”+ 20 Ahpw, I sapengki: “Koht en nanleng iei Ih me pahn ketin kahrehiong kiht sen pweida,+ oh kiht sapwellime ladu kan pahn uhda oh kauwada; ahpw kumwail sohte ahneki mehkot nan Serusalem, de sohte amwail pwuhng me pid kosonned oh poadopoad wasaht.”+

3 Eliasip+ samworo lapalapo oh rie samworo kan ahpw uhda pwe ren kauwada Ewen Kelen Sihpw.+ Re kasarawihala ewen kehlo+ oh wiahda wenihmw kan; re kasarawihala wasao lella ni Imwen Doulik en Mea,+ lella ni Imwen Doulik en Ananel.+ 2 Oh limwahrail aramas en Seriko kan+ onehda sapahl kehlo; oh limwahrail Sakur nein Imri onehda sapahl kehlo.

3 Kadaudok en Assena kan kauwada Ewen Kelen Mwahmw;+ re kidahng doakoloal kan+ oh wiahda wenihmw kan, kihong loahk kan, oh lepin tuhkehn kateng kan. 4 Oh limwahrail Meremod+ nein Uraisa nein Akkos onehda sapahl kehlo, oh limwahrail Mesullam+ nein Perekaia nein Mesesapel onehda sapahl kehlo, oh limwahrail Sadok nein Paana onehda sapahl kehlo. 5 Oh limwahrail mehn Tekoa kan+ onehda sapahl kehlo, ahpw neirail ohl lapalap akan sohte men aktikitikla pwehn iang wia doadoahk ong arail sounapwalih kan.*

6 Soiada nein Pasea oh Mesullam nein Pesodeia onehda sapahl Ewen Kelen Kahnimw Mahs;+ re kidahng doakoloal kan oh wiahda wenihmw kan, kihong loahk kan, oh lepin tuhkehn kateng kan. 7 Limwahrail Melataia mehn Kipeon+ oh Sadon mehn Meronod onehda sapahl kehlo, aramas akan en Kipeon oh Mispa+ me mi pahn manaman en kepinahn sahpw me mi Palio Pillapo.*+ 8 Limwahrail Ussiel nein Araiah, emen sounsuk kohl kan, me onehda sapahl kehlo, oh limwah Ananaiah, emen me kin wiahda leh pwohmwahu kan, me onehda sapahl kehlo; oh irail kairekihdi lepin takai patapat kan nan Serusalem lella Kehl Tehlap.+ 9 Oh limwahrail Repaia nein Urr, kaunen apali wehin Serusalem, me onehda sapahl kehlo. 10 Oh limwahrail Sedaia nein Arumap onehda sapahl kehlo mwohn imweo, oh limwah Addus nein Asapneia onehda sapahl kehlo.

11 Malkaisa nein Arim+ oh Assup nein Pahad-mohap+ onehda sapahl ehu wasa tohrohr ni kehlo, iangahki Imwen Doulik en Uhmw kan.+ 12 Oh limwahrail Sallum nein Alloes, kaunen apali wehin Serusalem, onehda sapahl kehlo, nah serepein kan iangih doadoahk.

13 Anun oh tohn Sanoah kan+ onehda sapahl Ewen Kelen Wahu;+ re kauwada ewen kehlo oh wiahda wenihmw kan, oh kihong loahk kan, oh lepin tuhkehn kateng kan, oh re onehda sapahl kehlo ni kiupid 1,000* lella Ewen Kelen Koasoakoasoak en Pehs.+ 14 Malkaisa nein Rekap, kaunen wehin Ped-akkerem,+ onehda sapahl Ewen Kelen Koasoakoasoak en Pehs; e kauwada ewen kehlo oh wiahda wenihmw kan, kihong loahk kan, oh lepin tuhkehn kateng kan.

15 Sallun nein Kolohsa, kaunen wehin Mispa,+ onehda sapahl Ewen Kelen Utuhnpihl;+ e kauwada ewen kehlo oh oahsehdi, wiahda wenihmw kan, kihong loahk kan oh lepin tuhkehn kateng kan, oh pil onehda sapahl kelen Lepin Leh+ en Warawar me kolahng en Nanmwarki Mwetuwelo+ oh lella ni Kehndake+ me kohdihla sang ni Kahnimw en Depit.+

16 Limwah Nehmaia nein Aspuk, kaunen apali wehin Pedsur,+ onehda sapahl kehlo sang mwohn Wasahn Seridi kan en Depit+ lella ni lepin leh+ me kokouda oh lella ni Imwen me Kehlail kan.

17 Limwah mehn Lipai kan onehda sapahl kehlo: Rehum nein Pani; oh limwah Asapaia, kaunen apali wehin Keila,+ wiliandi eh wehio oh onehda sapahl kehlo. 18 Limwah riarail kan onehda sapahl kehlo: Pappai nein Enadad, kaunen apali wehin Keila.

19 Oh limwah Eser nein Sesua,+ kaunen Mispa, onohne sapahlih ehu wasa tohrohr ni kehlo mwohn kohdalahng Imwen Nahk Dipwisoun Mahwen ni Utupen Kehlo.+

20 Limwah Paruk nein Sappai+ doadoahk ni ngoang oh onehda sapahl ehu wasa tohrohr ni kehlo, sang ni Utupen Kehlo lella ni wasahn pedolong en imwen Eliasip+ samworo lapalapo.

21 Limwah Meremod+ nein Uraisa nein Akkos onehda sapahl ehu wasa tohrohr ni kehlo, sang ni wasahn pedolong en imwen Eliasip lella ni imwin imwen Eliasip.

22 Oh limwah samworo kan, aramas akan en sapwen Sordan,*+ onehda sapahl kehlo. 23 Limwahrail Pensamin oh Assup onehda sapahl kehlo mwohn imwara ko. Limwahra Asaraia nein Maaseaia nein Ananaia onehda sapahl kehlo limwahn imweo. 24 Limwah Pinnui nein Enadad onehda sapahl ehu wasa tohrohr ni kehlo, sang ni imwen Asaraia lella ni Utupen Kehlo+ oh lella ni keimwen kehlo.

25 Limwah Palal nein Iusai onehda sapahl kehlo mwohn Utupen Kehlo oh imwen doulik me patehngete Tehnpesen Nanmwarkio,+ me wia kisehn Wasa me Kelpene en Sounsilasil.+ Limwah Pedaia nein Paros+ onehda sapahl kehlo.

26 Oh ladu kan en tehnpas sarawio*+ me kin kousoan nan Opel+ onehda sapahl kehlo lella mwohn Ewen Kelen Pihl+ ni palimese oh imwen doulik me sikieisang kehlo.

27 Limwahrail mehn Tekoa kan+ onehda sapahl ehu wasa tohrohr ni kehlo, sang mwohn imwen doulik laudo me sikieisang kehlo lella ni kehl en Opel.

28 Samworo kan onehda sapahl kehlo pohnangin Ewen Kelen Oahs,+ emenemen onehda sapahl kehlo mwohn imwe.

29 Limwahrail Sadok+ nein Immer onehda sapahl kehlo mwohn imweo.

Oh limwah Semaia nein Sekanaia, sounsilepen Ewen Kelen Palimese,+ onehda sapahl kehlo.

30 Limwah Ananaiah nein Selemaia oh Anun kewenemen en nein Salap pwutak onehda sapahl ehu wasa tohrohr ni kehlo.

Limwah Mesullam+ nein Perekaia onehda sapahl kehlo mwohn imweo.*

31 Limwah Malkaisa, emen kisehn pwihnen sounsuk kohl, onehda sapahl kehlo lella ni imwen ladu kan en tehnpas sarawio*+ oh sounnetinet kan, mwohn Ewen Kelen Keseu oh lella pere laud me mi pohn keimwen kehlo.

32 Oh nanpwungen pere laud me mi pohn keimwen kehlo oh Ewen Kelen Sihpw,+ sounsuk kohl ko oh sounnetinet ko me onehda sapahl.

4 Eri ni ahnsowohte me Sanpalad+ rongada me se onohne sapahlih kehlo, e lingeringerda oh uhdahn nsensuwedkihla, oh e kin kepitki mehn Suhs ko. 2 Oh mwohn ienge kan oh karis en sounpei en Sameria kan, e nda: “Dahme mehn Suhs luwet kat wiewia? Re pahn pein wiahda met? Re pahn wiahda meirong kan? Re pahn kanekehla met ni rahn ehute? Re pahn kak doadoahngki takai kan me roangala oh mwutpene sang ni koasoakoasoak en kihd kan?”+

3 Dopaia+ mehn Ammono,+ me kesikesihnen limwah, ahpw nda: “Ma kidien wel* men pahn daur pohn dahme re kauwadahn, e pahn karangkehdi arail kehl takai kan.”

4 Maing at Koht, komw ketin karonge, pwe re mwamwahlikin kiht,+ oh komw ketin kapwurehiong arail kapailok kan pohn moangarail kan,+ oh ketikihong irail pahn ar imwintihti kan oh kahrehiong irail en selidi nan ehu sahpw tohrohr. 5 Oh komw dehr pohnsehsehla arail sapwung kan oh diparail kan oh dehr likidmeliehla mepwukat mwohmwi,+ pwe re kauwe sounkou kehl ko.

6 Kiht eri usehlahte kauwada kehlo, oh kehlo pwon ahpw lelpene oh se onehda sapahl kehlo leldalahng nan lukope, oh aramas ako pousehlahte doadoahk ni mohngiong unsek.

7 Eri ni ahnsowohte me Sanpalad, Dopaia,+ mehn Arepia,+ mehn Ammon kan, oh mehn Asdod kan+ ar rongada me onohnsapahl en kehl kan en Serusalem wie kokouda oh me pwoaren kehlo pinapinlahr, re ahpw lingeringerda kowahlap. 8 Re koasoakoasoane ren kohdo oh peiong Serusalem oh kamwoarongehda wasa. 9 Ahpw se kapakapohng at Koht oh kihdi sounsilepen kehlo ni rahn oh nipwong pwehn pere kiht sang irail.

10 Ahpw, aramas en Suda ko ndinda: “Tohndoadoahk kan* luwetalahr, oh e nohn tohto kihd me pahn lekdekla; se sohte pahn kak kauwada kehlo.”

11 Oh at imwintihti kan kin ndinda: “Mwohn ar pahn tehkada de kilang kitail, kitail pahn kohdo nanpwungarail oh kemeirailla oh kauhdi doadoahko.”

12 Ahnsou koaros mehn Suhs kan me kin kousoan limwahrail kin kohlongodo, re kin pwurupwurehng* ndaiong kiht: “Re pahn kodohng kitail sang wasa koaros.”

13 Ngehi eri kihdi ohl akan ni wasa patapat kan mwurin kehlo ni wasa mahsahs kan, oh koasoaneiraildi nin duwen peneinei kan oh kihong irail neirail kedlahs kan, neirail ketieu kan, oh neirail kesik ketieu kan. 14 Ni ei tehkada me re masepwehkada, I mwadangete uhda oh ndaiong lapalap akan+ oh keriaun kaun akan oh aramas teikan: “Kumwail dehr masak irail.+ Kumwail tamataman Siohwa me lapalap oh aramas en lemmwiki oh wauneki,+ oh kumwail peiki riamwail kan, noumwail pwutak kan oh serepein kan, amwail pwoud kan oh imwamwail kan.”

15 Eri mwurin at imwintihti kan ar rongada me se esedahr dahme re wiewiao oh me Koht mehlelo ketin kapingadahr ar koasoandio, kiht koaros ahpw pwurala doadoahk ni kehlo. 16 Sang rahno kohla, elep nei ohl ako kin doadoahk+ oh elep irail kin kol ketieu kan, mehn sansar kan, kesik ketieu kan, oh likawih likou mete kan.* Oh kaun ako+ kesikesihnen mwurin mehn Suhs kan oh sewesewese irail 17 me kaukauwada kehlo. Irail me weuwa wisik kan kin doadoahngki apali pehrail ong doadoahk, a apali pehrail re kolokol tehtehn mahwen.* 18 Oh emenemen sounkou kehl ko kin katengehdi nah kedlahs ni lukope ni eh wie doadoahk, oh sounpeuk mehn pepeuko*+ kesihnen limwahi.

19 Ngehi eri ndaiong lapalap akan oh keriaun kaun akan oh aramas teikan: “Doadoahk wet me laud oh tehlap, oh kitail mi dohpeseng pohn kehlet. 20 Ni amwail rong ngilen mehn pepeuko, kumwail ahpw kohpene wasa me se mi ie. Atail Koht pahn ketin peikin kitail.”+

21 Eri se doulahte doadoahk ni elep en kiht ar wie kolokol ketieu kan, sangete ni wasa eh rarahnpeseng lao lel ahnsou me usu kan pwarada. 22 Ni ahnsowo I ndaiong aramas ako: “Kumwail mweidohng ohl akan, emenemen iangahki nah sounpapah, ren pweidi nan Serusalem, oh re pahn sinsile kitail nipwong oh doadoahk erein nin rahn.” 23 Eri ngehi, pil iengei kan, nei sounpapah kan,+ oh sounsilasil kan me idawehn ie sohte kihsang at likou kan, oh emenemen kiht kolokolete nait tehtehn mahwen ni palimaun en peht kan.

5 Ahpw, aramas akan oh arail pwoud kan uhdahn kaulime riarail mehn Suhs kan.+ 2 Ekei kin nda: “Se me tohto iangahki nait pwutak kan oh nait serepein kan. Se anahne ale krein* pwe sen tungoale oh momour.” 3 Meteikan kin nda: “Se kin kihla at mwaht kan oh at mwetin kreip kan oh imwat kan nin duwen kilelepen pweipwand pwe sen ale krein erein lehk lapalap.” 4 Pil meteikan kin nda: “Se pekihda mwohni ong at mwaht akan oh at mwetin kreip kan ong kisakis kan ong nanmwarkio.+ 5 Kiht oh riat akan kisehn uduk ehute oh nta ehu,* oh nait seri kan duwehte neirail seri kan; ahpw se anahne kihla nait pwutak kan oh serepein kan ren wiahla lidu, oh ekei nait serepein kan wialahr lidu.+ Ahpw sohte at manaman en kauhdi met, pwehki meteikan ahnekilahr at mwaht akan oh at mwetin kreip kan.”

6 I uhdahn lingeringerda ni ei rongada ar kaulim oh koasoi pwukat. 7 Ngehi eri medemedewe mepwukat nan ei mohngiong, oh I karaune lapalap ako oh keriaun kaun ako oh ndaiong irail: “Emenemen kumwail kin idingkihong pein rie en pwain wihn en mwohni.”+

Ngehi eri koasoanehdi kapokon laud ehu pwehki irail. 8 Oh I ndaiong irail: “Ni uwen atail kak koaros, kitail pwainda sapahl riatail mehn Suhs kan me netila rehn wehi kan; ahpw met kumwail pahn netikihla riamwail kan,+ oh se pahn pwurehng pwainirailda sapahl?” Irail eri nennenla, oh sohte mehkot re kak nda. 9 Ngehi eri nda: “Dahme kumwail wiewiahn sohte mwahu. Kumwail sou pahn lemmwiki Koht+ ni mehkoaros me kumwail wia,* pwe wehi kan, me iei atail imwintihti kan en dehr karauneikitail? 10 Ngehi, riei kan, oh nei sounpapah kan pil kin kamangaiong irail mwohni oh krein. Menlau, kitail uhdihsang kihda wihn en mwohni.+ 11 Menlau, rahnwette kumwail kapwurehiong irail arail mwaht akan,+ arail mwetin kreip kan, arail mwetin olip kan, oh imwarail kan, iangahki wihn en mwohni,* krein, wain kapw, oh leh me kumwail idingkihong irail en kihda nin duwen wihn en mwohni.”

12 Irail eri sapengki: “Se pahn kapwurelahng irail mepwukat oh sohte peki ren kapwurehdo mehkot. Se uhdahn pahn kapwaiada dahme komw mahsanihen.” Ngehi eri ekerodo samworo kan oh wiahiong aramas ako ren kahukihla ren kapwaiada inowo. 13 Oh pil, I siped ei likowo* oh nda: “Ih met duwen Koht mehlelo eh pahn ketin itikasang nan tehnpese oh sang sapwellime kepwe kan aramas koaros me sohte kapwaiada inou wet, oh ih met duwen aramaso eh pahn itihtsang oh sohte ahneki mehkot.” Mwomwohdiso pwon ahpw sapengki: “Amen!”* Irail eri kapinga Siohwa, oh aramas ako kapwaiada dahme irail inoukihdao.

14 Pil, sangete rahn me nanmwarkio idihiehda I en wiahla ar kepina+ nan sapwen Suda, sang ni kerieisek en sounpar+ lel ni kesilihsek riaun sounpar+ en Nanmwarki Ardaserksihs,+ erein sounpar 12, ngehi oh pil riei kan sohte kin tungoale mwenge me kin kohieng kepina.+ 15 Ahpw irail me wia kepina mwohi katoutouwihala aramas ako oh kin kihsang irail silper sekel* 40 ong pilawa oh wain ehuehu rahn. Neirail sounpapah kan pil kin kahpwalihala aramas ako. Ahpw I sohte kin wia met+ pwehki ei lemmwiki Koht.+

16 Oh pil, I iang doadoahk en kehl wet, oh sohte mwaht ehu me se alehdi;+ nei sounpapah kan koaros kohpene wasao ong doadoahko. 17 Mie mehn Suhs oh keriaun kaun 150 me iang tungoal ni ei tehpelo, iangahki irail me kohdo reht sang wehi kan. 18 Rahn koaros kouwol emen, sihpw kaselel wenemen, oh menpihr kan kin kaunopada ong ie,* oh pak ehu erein rahn eisek koaros se kin alehdi soangsoangen wain koaros. Mendahki mepwukat koaros I sohte kin idingkihong irail en kihda mwenge me pahn kohieng kepina, pwehki aramas ako kin toutoukilahr arail wisik toutou en doadoahk kan. 19 Maing ei Koht, komw ketin tamataman ie,* pwehki soahng pwukat koaros me I wiahiongehr aramas pwukat.+

6 Eri ni ahnsowohte me Sanpalad, Dopaia,+ Kesem mehn Arepia,+ oh atail imwintihti teikan rongehr me I kanekelahr onohnsapahl en kehlo+ oh sohte wasa kis me wehwe ie (mendahki lel ahnsowo I saikinte kidahng wenihmw kan ni ewen kehl kan),+ 2 Sanpalad oh Kesem ahpw mwadangete kadarodohng ie rohng wet: “Kohdo, oh kitail koasoanehdi ahnsou en tuhpene nan kisin kahnimw kan en Wasa Patapat en Wahun Ono.”+ Ahpw irail pilipilahn en kauweiehla. 3 Ngehi eri kadarala meninkeder kei rehrail, nda: “I wiewia doadoahk laud ehu, oh I sohte kak kohdihla. Dahme doadoahko en uhkihdi ni ei pahn pwilikihdi oh kohwei rehmwail?” 4 Re kadarodohng ie rohngohte pak pahieu, oh I kadaralahng irail soangen pasapengohte ehuehu ahnsou.

5 Sanpalad eri kadarodo emen nah sounpapah rehi ni kelimau en rohngo oh e wa kisinlikou ehu me sohte katengtengdi. 6 Iet audepe: “Mie rohng ehu me kohkohseli nan wehi kan, oh pil Kesem+ kin ndinda met, me komwi oh mehn Suhs kan kin pilipilahn en uhwong.+ Ihme komw kaukauwadahki kehlo; oh nin duwen rohng pwukat, komwi me pahn wiahla arail nanmwarki. 7 Oh pil, komw idihada soukohp kan ren lohkiseli duwen komwi nan Serusalem pwon, ‘Mie nanmwarki men nan Suda!’ Oh nanmwarki pahn karongehda mepwukat. Eri komw ketido, oh kitail koasoiapene ire wet.”

8 Ahpw, I kadaralahng ih pasapeng wet: “Soahng koaros me komw ndindahn sohte wiawi; komwi me wiahda koasoi pwukat sang ni pein omwi madamadau.”* 9 Irail koaros songosong en kamasak kiht, re kin nda: “Pehrail kan pahn luwetala nan doadoahko, oh doadoahko sohte pahn nekila.”+ Eri, I kapakapki, komw ketin kakehlahda pehi kat.+

10 Ngehi eri kohla ni imwen Semaia nein Delaia nein Mehtapel me kin mihmihte nan imweo. E nda: “Kita koasoanehdi ahnsou en tuhpene ni tehnpesen Koht mehlelo, nan tehnpas sarawio, oh kita ritingedi wenihmw kan en tehnpas sarawio, pwe re pahn kohdo kemeiukala. Re pahn kohdo kemeiukala nipwong.” 11 Ahpw I nda: “Ia duwe, soangen aramas ngehiet kak tang oh rukula? Soangen aramas ngehiet kak kohlongala nan tehnpas sarawio oh momour?+ I sohte pahn kohlongala!” 12 Ngehi eri wehwehkihda me Koht sohte ketin poaronehdo Semaia, ahpw Dopaia oh Sanpalad+ me pwain ih en koasoiaiong ie kokohp wet. 13 E ale pweipwei en kamasak ie oh kahrehiong ie I en dipada, pwe en mie mehkot me ren kauwehkihla ei adamwahu oh karaune ie.

14 Maing ei Koht, komw ketin tamataman Dopaia+ oh Sanpalad oh wiewia pwukat, oh pil Noadaia lih soukohpo oh soukohp teikan me kin songosong en kamasak ie.

15 Kehlo eri imwisekla ni 25 en Elul,* rahn 52.

16 Ni ahnsowohte me at imwintihti kan koaros rongada met oh wehi kan koaros me kapilkitpene kilangada met, re uhdahn namenekla,+ oh re esehda me sang ni sawas en at Koht me doadoahk wet imwisekihla. 17 Ahnsowo lapalap kan+ en Suda kin kadarala kisinlikou tohto rehn Dopaia, oh Dopaia kin sapeng irail. 18 Me tohto nan Suda kahukihla ren uhpalihki ih, pwehki en eh pwoudo pahpa Sekanaia nein Arah,+ oh nah pwutak Sehohanan pwoudikihda nein Mesullam serepein,+ Mesullam nein Perekaia. 19 Re pil kin kalapw ndaiong ie soahng mwahu kan duwen Dopaia oh mwuri ndaiong ih dahme I nda. Eri Dopaia kin kadarodo kisinlikou kan pwehn kamasak ie.+

7 Ni ahnsowohte me kehlo onohnsapahlda+ I wiahda wenihmw kan;+ mwuri silepen ewen kehl kan,+ sounkoul kan+ oh mehn Lipai kan+ eri idihdida. 2 Ngehi eri kihdi riei Ananai+ en apwalih Serusalem, iangahki Ananaiah kaunen Ihmw Laud Kehl Kehlailo,+ pwe ih ohl emen me keieu likilik oh kin lemmwiki Koht mehlelo+ laudsang me tohto teikan. 3 Ngehi eri ndaiong irail: “Ewen kelen Serusalem kan sohte pahn ritida lao lel nin souwas,* oh erein arail kesikesihnen sinsile, re pahn ritingedi wenihmw kan oh katengehdi mepwukat. Oh kumwail koasoanehdi tohn Serusalem kan nin duwen sounsilasil kei, emenemen ong wasahn silasil me e kileldi en sile oh emenemen mwohn imwe.” 4 Kahnimwo tehlap oh laud, oh malaulau aramas loale,+ oh ihmw kan saikinte onohnsapahlda.

5 Ahpw ei Koht ketikihdiong nan ei mohngiong I en kapokonepene lapalap akan oh keriaun kaun akan oh aramas akan ren kileldi nin duwen arail peneinei.+ Ngehi eri diarada pwuhken kileldien peneinei kan me tepin pwurodohsang sensel, oh I diarada dahme ntingdi loale:

6 Oh iet aramas en wehio me kohdahdo sang sensel, irail me Nanmwarki Nepukadnesar+ en Papilon kalipehla+ oh mwuhr pwurodo Serusalem oh Suda, emenemen nan eh kahnimw,+ 7 irail me iangodo Serupapel,+ Sesua,+ Nehmaia, Asaraia,* Raamaia,* Nahmani, Mordekai, Pilsan, Mispered,* Pikpai, Nehum* oh Paanah.

Iet tohtohn ohlen Israel kan:+ 8 kadaudok en Paros kan, meh 2,172; 9 kadaudok en Sepataia kan, meh 372; 10 kadaudok en Arah kan,+ meh 652; 11 kadaudok en Pahad-mohap kan,+ kadaudok en Sesua oh Sohap kan,+ meh 2,818; 12 kadaudok en Elam kan,+ meh 1,254; 13 kadaudok en Sattu kan, meh 845; 14 kadaudok en Sakkai kan, meh 760; 15 kadaudok en Pinnui kan, meh 648; 16 kadaudok en Pepai kan, meh 628; 17 kadaudok en Askad kan, meh 2,322; 18 kadaudok en Adonikam kan, meh 667; 19 kadaudok en Pikpai kan, meh 2,067; 20 kadaudok en Adin kan, meh 655; 21 kadaudok en Ater kan, kadaudok en Esekaia, meh 98; 22 kadaudok en Asum kan, meh 328; 23 kadaudok en Pesai kan, meh 324; 24 kadaudok en Arip kan, meh 112; 25 kadaudok en Kipeon kan,+ meh 95; 26 tohn Pedleem kan oh Netopa kan, meh 188; 27 tohn Anadod kan,+ meh 128; 28 tohn Ped-asmaped kan, meh 42; 29 tohn Kiriad-searim,+ Kepihra oh Peerod,+ meh 743; 30 tohn Rama oh Kepa,+ meh 621; 31 tohn Mikmas kan,+ meh 122; 32 tohn Pedel+ oh Ai,+ meh 123; 33 tohn Nepo teio, meh 52; 34 kadaudok en Elam teio, meh 1,254; 35 kadaudok en Arim kan, meh 320; 36 tohn Seriko kan, meh 345; 37 tohn Lod, Adid oh Ono,+ meh 721; 38 tohn Sena kan, meh 3,930.

39 Samworo kan:+ kadaudok en Sedaia kan, peneinei en Sesua, meh 973; 40 kadaudok en Immer kan, meh 1,052; 41 kadaudok en Pasuhr kan,+ meh 1,247; 42 kadaudok en Arim kan,+ meh 1,017.

43 Mehn Lipai kan:+ kadaudok en Sesua kan, peneinei en Kadmiel kan,+ me kohsang kadaudok en Odepa kan, meh 74. 44 Sounkoul kan:+ kadaudok en Asap kan,+ meh 148. 45 Silepen ewen kehl kan:+ kadaudok en Sallum kan, kadaudok en Ater kan, kadaudok en Talmon kan, kadaudok en Akkup kan,+ kadaudok en Adida kan, kadaudok en Sopai kan, meh 138.

46 Ladu kan en tehnpas sarawio:*+ kadaudok en Siha kan, kadaudok en Asupa kan, kadaudok en Tappaod kan, 47 kadaudok en Keros kan, kadaudok en Sia kan, kadaudok en Padon kan, 48 kadaudok en Lepana kan, kadaudok en Akapa kan, kadaudok en Salmai kan, 49 kadaudok en Ahnan kan, kadaudok en Kiddel kan, kadaudok en Kahar kan, 50 kadaudok en Reaia kan, kadaudok en Resin kan, kadaudok en Nekoda kan, 51 kadaudok en Kassam kan, kadaudok en Ussa kan, kadaudok en Pasea kan, 52 kadaudok en Pesai kan, kadaudok en Meun kan, kadaudok en Nepisim kan, 53 kadaudok en Pakpuk kan, kadaudok en Akupa kan, kadaudok en Aruhr kan, 54 kadaudok en Paslid kan, kadaudok en Mehida kan, kadaudok en Arsa kan, 55 kadaudok en Parkos kan, kadaudok en Sisera kan, kadaudok en Tema kan, 56 kadaudok en Nesaia kan, kadaudok en Adipa kan.

57 Kadaudok en nein Solomon ladu kan:+ kadaudok en Sotai kan, kadaudok en Sopered kan, kadaudok en Perida kan,* 58 kadaudok en Saala kan, kadaudok en Darkon kan, kadaudok en Kiddel kan, 59 kadaudok en Sepataia kan, kadaudok en Attil kan, kadaudok en Pokered-assepaim kan, kadaudok en Amon* kan. 60 Koaros ladu kan en tehnpas sarawio*+ oh kadaudok en nein Solomon ladu kan patpene meh 392.

61 Oh aramas pwukat kohdahdo sang Tel-mela, Tel-arsa, Kerup, Addon oh Immer, ahpw irail sohte kak kadehdehda ma samarail mehn mahs ako kohsang rehn Israel de irail mehn Israel kei:+ 62 kadaudok en Delaia kan, kadaudok en Dopaia kan, kadaudok en Nekoda kan, meh 642. 63 Oh nanpwungen samworo kan: kadaudok en Apaiah kan, kadaudok en Akkos kan,+ kadaudok en Parsilai kan. Parsilai pwoudikihda lih emen sang nein Parsilai+ mehn Kilead serepein kan oh adanekihla eden semen eh pwoudo. 64 Aramas pwukat rapahki pwuhk kan me kadehdehda irekidien arail peneinei, ahpw mepwukat sohte dierekda, eri irail sohte kak ahneki pwukoahn samworo.*+ 65 Kepinao*+ ndaiong irail me re sohte kak tungoale soahng kan me keieu sarawi+ lao e pahn mie samworo men me kak doadoahngki Urim oh Dumim.+

66 Uwen tohtohn mwomwohdiso pwon meh 42,360,+ 67 oh likin neirail ohl oh lih lidu kan,+ irail meh 7,337; re pil naineki sounkoul ohl oh lih 245.+ 68 Neirail oahs kan meh 736, neirail dongki laud kan* meh 245, 69 neirail kamel kan meh 435, neirail dongki tikitik kan meh 6,720.

70 Ekei kaunen peneinei kan kihda sawas ong doadoahko.+ Kepinao* kihla nan wasahn nahk dipwisou kesempwal kan drakma* kohl 1,000, pwohl 50, oh likou reirei ong samworo 530.+ 71 Oh ekei kaunen peneinei kan kihla nan wasahn nahk dipwisou kesempwal kan ong doadoahko drakma kohl 20,000 oh mina* silper 2,200. 72 Oh luhwen aramas ako kihla drakma kohl 20,000, mina silper 2,000 oh likou reirei ong samworo 67.

73 Oh samworo kan, mehn Lipai kan, silepen ewen kehl kan, sounkoul kan,+ ekei aramas akan, oh ladu kan en tehnpas sarawio,* oh luhwen mehn Israel kan koaros* ahpw kousoanla nan arail kahnimw kan.+ Ni ahnsou me keisuhwen sounpwong leledo,+ mehn Israel kan kousoanla nan arail kahnimw kan.+

8 Aramas ako koaros eri pokonpene ni lamalam tehieu nan wasahn tuhpene mwohn Ewen Kelen Pihl,+ oh re ndaiong sounntingo Esra+ en wahdo pwuhken Kosonned en Moseso,+ me Siohwa ketin kehkehlingkihong Israel.+ 2 Samworo Esra eri wahdo Kosonnedo mwohn mwomwohdisohn+ ohl, lih oh koaros me kak rong oh wehwehki, ni keieun rahnen keisuhwen sounpwong.+ 3 Oh e wadek ni ngihl laud sang nan pwuhko+ mwohn wasahn tuhpeneo mwohn Ewen Kelen Pihl, sangete ni eh rarahnpeseng lel nin souwas, ong ohl akan, lih akan, oh koaros me kak wehwehki; oh aramas ako eri rong kanahieng+ pwuhken Kosonnedo. 4 Oh sounntingo Esra wie kesikesihnen pohn pasapas en tuhke ehu me wiawidahng ahnsowo; oh irail me kesihnen limwah ni palimauni iei Mattidaia, Sema, Anaia, Uraia, Ilkaia oh Maaseaia; oh ni palimeingi iei Pedaia, Misael, Malkaisa,+ Asum, Aspadana, Sekaraia oh Mesullam.

5 Esra pahkpeseng pwuhko mwohn mesen aramas ako koaros, pwehki e kesihnen ile sang aramas ako. Ni eh pahkpeseng pwuhko, aramas ako koaros ahpw kesihnenda. 6 Esra eri kapinga Siohwa, Koht mehlelo me Lapalap. Aramas ako koaros eri sapengki, “Amen!* Amen!”+ oh kauwada pehrail kan. Irail eri kelepwikihdi oh lukupoardiong Siohwa nanpwelo. 7 Oh Sesua, Pani, Serepaia,+ Seimin, Akkup, Sapedai, Odaia, Maaseaia, Kelita, Asaraia, Sosapad,+ Ahnan oh Pelaia, me wia mehn Lipai kei, kawekawehwehiong aramas ako Kosonnedo,+ ni aramas ako ar wie kesikesihnen. 8 Oh re pousehlahte wadewadek pwuhko ni ngihl laud, sang nan Kosonned en Koht mehlelo, oh re kawehwe mwahu oh wiahiong wehwehn dahme wadawado en sansal; irail eri sewese aramas ako ren wehwehki dahme re wadek ko.+

9 Oh Nehmaia, me wia kepina* ahnsowo, samworo oh sounnting Esra,+ oh mehn Lipai kan me padapadahkihong aramas ako ahpw ndaiong aramas ako koaros: “Rahnwet iei rahn ehu me sarawi ong Siohwa amwail Koht.+ Kumwail dehr mwahiei de sengiseng.” Pwe aramas ako koaros wie sengiseng pwehki ar rong mahsen kan en Kosonnedo. 10 E ndaiong irail: “Kumwail kohla tungoale soahng kaselel kan* oh nim soahng mem kan, oh kadarala ekei mwenge kan+ rehn irail me sohte kaunopada mehkot; pwe rahnwet iei rahn ehu me sarawi ong atail Kaun, oh kumwail dehr nsensuwed, pwe peren en Siohwa iei amwail wasahn ruk kehlail.”* 11 Oh mehn Lipai ko wie kamkameleileidi aramas ako koaros, nda: “Kumwail dehr mweseisei! pwe rahnwet iei rahn sarawi ehu, oh kumwail dehr nsensuwed.” 12 Aramas ako koaros eri kohkohla pwe ren mwenge oh nim oh kadarala ekei mwenge kan oh ren pereperen kowahlap,+ pwe re wehwehkidahr mahsen ko me lohkohng irail.+

13 Oh ni keriaun rahn, kaunen peneinei kan en aramas ako koaros, samworo kan, mehn Lipai kan ahpw kohpene pidakihpene sounnting Esra pwe ren kalaudehla ar wehwehki mahsen kan en Kosonnedo. 14 Irail eri diarada me e ntingdi nan Kosonnedo me Siohwa ketin kehkehlingkihong Moses me mehn Israel kan pahn kousoan nan impwal kan* erein kasarawio ni keisuhwen sounpwong,+ 15 oh me re pahn lohki oh pakairki+ nan arail kahnimw kan koaros oh nan Serusalem pwon, nda: “Kumwail kohieila ni wasa nahnahn kan oh wahdo rahntuhke losolos kan sang tuhkehn olip kan, tuhke pain kan, tuhke mirtel oh pahm* kan, oh rahntuhke losolos en tuhke teikan pwehn wiahda impwal kan, nin duwen me ntingdier.”

16 Aramas ako eri kohieila oh wahlongodo mepwukat pwehn wiahda imwarail impwal kan, emenemen mi pohn imwe ihmw, nan arail wasa me kelpene kan, nan wasa me kelpene ni tehnpesen Koht mehlelo,+ nan wasahn tuhpene ni Ewen Kelen Pihl,+ oh nan wasahn tuhpene ni Ewen Kelen Epraim.+ 17 Eri koaros nan mwomwohdiso me pwurodo sang sensel wiahda impwal kan oh mihmi nan impwal kan, pwe mehn Israel kan sohte wia kasarawi wet ni ahl wet sangete ni mwehin Sosua+ nein Nun leledo rahno, kahrehda re uhdahn peren laud.+ 18 Oh ehuehu rahn e kin mie wadawad sang ni pwuhken Kosonned en Koht mehlelo,+ sang ni keieun rahn lel ni kaimwiseklahn rahn. Oh re wia kasarawio erein rahn isuh, oh mie kapokon sarawi ehu ni kawaluhn rahn, nin duwen me koasoandier.+

9 Ni 24 en sounpwong wet mehn Israel ko ahpw pokonpene; re kaisihsol likawih likoun nsensuwed* oh pwelpar mi pohrail.+ 2 Irail pwilidak en mehn Israel kan ahpw katohreirailla sang rehn mehn liki kan koaros,+ oh re uhda oh wehkada diparail kan oh sapwung en ar pahpa ko.+ 3 Irail eri uhda nan arail wasao oh wadek ni ngihl laud sang nan pwuhken Kosonned+ en Siohwa arail Koht erein awa siluh ni rahn;* oh pil awa siluh re wehkada diparail oh poaridiong Siohwa arail Koht.

4 Sesua, Pani, Kadmiel, Sepanaiah, Punni, Serepaia,+ Pani oh Kenani ahpw uhda pohn en mehn Lipai ko pasapas ileo,+ oh re likweriong Siohwa arail Koht ni ngihl laud. 5 Oh mehn Lipai kan Sesua, Kadmiel, Pani, Asapneia, Serepaia, Odaia, Sepanaiah oh Pedahaia ahpw nda: “Uhda oh kapinga Siohwa amwail Koht kohkohlahte.+ Oh ren kapinga mwaromwi me lingan, me lapalapasang kapai oh kaping koaros.

6 “Komwi kelehpw me Siohwa;+ komwi me ketin wiahda nanleng, ei, nanleng me keieu ile oh eh karis en sounpei kan koaros, sampah oh mehkoaros me mi loale, sehd kan oh audepe kan koaros. Oh komwi me ketin mweidohng irail koaros en momour, oh karis en sounpei en nanleng kan kin poaridiong komwi. 7 Komwi me Siohwa, Koht mehlelo, me ketin pilada Eipram+ oh ketin kahluwahsang nan Ur+ en mehn Kaldia kan oh ketikihong ede Eipraam.+ 8 Komw ketin mahsanihada me eh mohngiong kin lelepek ong komwi,+ eri komw ketin wiahda inou lap ehu reh pwehn ketikihong ih sapwen mehn Kenan kan, mehn Id kan, mehn Amor kan, mehn Peris kan, mehn Sepus kan oh mehn Kirkas kan, pwehn ketikihong kadaudoke;+ oh komw ketin kolokolete omwi inou kan, pwehki omwi ketin pwung.

9 “Komwi eri ketin mahsanihada lokolok en samat mehn mahs ako nan Isip,+ oh komw ketin karongehda ar peksawas ni Sehd Weitahtao. 10 Komwi eri ketin wiahda kilel kan oh manaman kapwuriamwei kan pwehn kaloke Parao oh nah ladu kan koaros oh nah aramas akan koaros nan sapweo,+ pwe komw ketin mwahngih me re aklapalapiong*+ sapwellimomwi aramas akan. Komw ketin kahrehiong mwaromwi en ndandla leledo rahnwet.+ 11 Oh komw ketin pwalangpeseng sehdo mwohrail, pwe ren kotehla sehdo nan pwehl madekeng,+ oh komw ketin kakihrala nan kepin sehdo irail ko me pwakipwakih irail duwehte takai ehu me lekdekiong nansed ilokin.+ 12 Komw ketin kahluwahkin irail uhren depwek ehu ni rahn, oh nipwong ni uhren kisiniei ehu, pwehn kamarainih irail ni ahl me re pahn keid loale.+ 13 Oh komw ketidihdo sang pohn Nahna Sainai+ oh ketin mahseniong irail sang nanleng+ oh ketikihong irail kopwung pwung kan, kosonned mehlel kan,* koasoandi oh kehkehlik mwahu kan.+ 14 Komw ketin padahkihong irail omwi Sapad sarawi,+ oh komw ketikihong irail kehkehlik kan, koasoandi kan oh kosonned kan sang sapwellimomwi ladu Moses. 15 Komw ketikihong irail pilawa sang nanleng ni ar men mwenge,+ oh komw ketikihong irail pihl sang nan paipalap ni ar men nimpil,+ oh komw ketin mahsanihong irail ren pedolong oh sapwenikihla sahpw me komw ketin kahukihla* en ketikihong irail.

16 “Ahpw irail, samat mehn mahs ako, aklapalapda*+ oh keptakaila,*+ oh re sohte rong sapwellimomwi kehkehlik kan. 17 Re kahng rong,+ oh re sohte tamataman sapwellimomwi wiewia kapwuriamwei kan me komw ketin wiahda nanpwungarail, ahpw re keptakaila* oh idihada kaun emen pwe ren pwuralahng arail kalidu nan Isip.+ Ahpw komwi Koht emen me ketin onopadahngehr mahk,* kupwurkalahngan, oh kadek kalahngan, sohte kin mwadang engiengda oh diren limpoak loalopwoat,*+ oh komw sohte ketin likidmelieirailla.+ 18 Pil ni ar wiahda sansal en koupwul mete ehu oh nda, ‘Iet omw Kohto me kahluweiukasang nan Isip,’+ oh re kasalehda ar uhdahn mwamwahlikin komwi, 19 pil ni ahnsowo, sang ni sapwellimomwi kadek kalahngan lapalap, komw sohte ketin likidmelieirailla nan sapwtehno.+ Uhren depweko sohte kohsang pohrail ni rahn pwehn kahluwairail nan ahlo, de uhren kisinieio sohte kohsang rehrail nipwong pwehn kamarainih irail ni ahl me re pahn keid loale.+ 20 Oh komw ketikihong irail sapwellimomwi ngehn sarawi*+ pwehn ketikihong irail dehde mwahu, oh komw sohte ketin koledihsang irail manna,+ oh komw ketikihong irail pihl ni ar men nimpil.+ 21 Pwe erein sounpar 40 komw ketikihong irail mwenge nan sapwtehno.+ Re ahneki soahng koaros. Arail likou kan sohte meringla,+ oh nehrail kan sohte mwpwosda.

22 “Komw ketikihong irail wehi kan oh aramas akan, nehkohng irail sahpw kan,+ eri irail sapwenikihla sapwen Sihon,+ me iei, sapwen nanmwarkien Espon,+ iangahki sapwen Ok+ nanmwarkien Pasan. 23 Oh komw ketin wiahiong neirail seri kan en tohtohla duwehte usuhn pahnlahng.+ Komwi eri ketin kahluwairaildohng nan sahpw me komw ketin inoukihong samarail mehn mahs ako me re pahn pedolong oh sapwenikihla.+ 24 Eri neirail seri kan pedolong oh sapwenikihla sahpwo,+ oh komw ketin kalowehdi mehn Kenan kan mwohrail,+ me kin kousoan nan sahpwo, oh komw ketikihong irail nan pehrail, arail nanmwarki kan oh aramas akan en sahpwo, pwe ren wiahiong irail dahme re mwahuki. 25 Oh re kalowehdi kahnimw kehl kehlail kan+ oh sahpw pwelmwahu ehu,+ oh re imwanekihla ihmw kan me diren soahng mwahu kan koaros, pwoaren nahk pihl kan me weiweidahr, mwetin kreip kan, mwetin tuhke olip kan,+ oh tuhke tohto me kin wa. Eri re tungoale oh medla oh mworouroula, oh re uhdahn nsenamwahukihla sapwellimomwi kamwahu mwuledek.

26 “Ahpw, re sapeikla oh uhwong komwi+ oh sohpeisang sapwellimomwi Kosonnedo.* Re kemehla sapwellimomwi soukohp kan me panawih irail pwehn kapwureiraildo rehmwi, oh re uhdahn mwamwahlikin komwi.+ 27 Pwehki met komw ketikihong irail nan pehn arail imwintihti kan,+ me kin kaloke irail.+ Ahpw re kin likweriong komwi ni ar ahnsou apwal, oh komw kin ketin karonge irail sang nanleng; oh pwehki sapwellimomwi kadek kalahngan lapalap, komw kin ketikihong irail sounkomour kan pwehn kapitirailla sang nan pehn arail imwintihti kan.+

28 “Ahpw ni ahnsowohte me re kin saledekla, re kin pwurehng wia dahme suwed mwohn silangomwi,+ oh komw kin ketin likidmelieirailla nan pehn arail imwintihti kan, me kin kauniraillda.*+ Irail eri kin pwurodo oh likweriong komwi peksawas,+ oh komw kin ketin karonge irail sang nanleng oh kin ketin pwurupwurehng kapitirailla pwehki sapwellimomwi kadek kalahngan lapalap.+ 29 Mendahki komw kin ketin panawih irail pwe ren pwurehng peikiong sapwellimomwi Kosonnedo, re kin aklapalapda* oh kahng rong sapwellimomwi kehkehlik kan;+ re kin wiahda dihp ong sapwellimomwi koasoandi kan, me kin kihong mour ong irail me kapwaiada mepwukat.+ Ahpw irail sohpeisang komwi oh uhwongada,* oh re kahng rong. 30 Komw ketin kasalehiong irail kanengamah+ erein sounpar tohto oh kin pwurupwurehng panawih irail ni omwi ketikihong sapwellimomwi soukohp kan sapwellimomwi ngehn sarawi,* ahpw re kahng rong. Komwi eri ketikihong irail nan pehn aramas akan en sahpw ko.+ 31 Oh sang ni sapwellimomwi kadek kalahngan lapalap, komw sohte ketin kasohreirailla+ de likidmelieirailla, pwe komwi Koht kupwurkalahngan oh kadek kalahngan men.+

32 “Eri, Maing at Koht, Koht lapalahpie, roson, oh lemmwin, me ketin kolokolete sapwellime inou lapo oh ketin kasalehda limpoak loalopwoat,+ komw dehr ketin meliehla kahpwal koaros me lelohng kiht, at nanmwarki kan, at kaun akan,+ at samworo kan,+ at soukohp kan,+ samat mehn mahs ako, oh sapwellimomwi aramas koaros sang ni mwehin nanmwarki kan en Asiria+ leledo rahnwet. 33 Komw kin ketin pwung ni mehkoaros me lelohng kiht, pwe komwi me ketin lelepek; ahpw kiht me kin wia me suwed.+ 34 A duwen at nanmwarki kan, at kaun akan, at samworo kan, oh samat mehn mahs ako, re sohte kapwaiada sapwellimomwi Kosonnedo de pil peikiong sapwellimomwi kehkehlik kan de sapwellimomwi mehn kataman kan* me komw ketin panawihekin irail. 35 Pil ni ahnsou me re mi nan arail wehio oh nsenamwahuki soahng mwahu tohto me komw ketikihong irail oh re mi nan sahpw me laud oh pwelmwahu me komw ketikihong irail, re sohte papah komwi+ oh sohte sohpeisang arail wiewia suwed kan. 36 Eri iet kiht rahnwet, lidu kei+—ei, lidu kei nan sahpw me komw ketikihong samat mehn mahs ako ren tungoale wahnsahpw oh nsenamwahuki soahng mwahu kan loale. 37 Pwehki dipat akan, tohto wahn sahpwo kin kohieng nanmwarki kan me komw ketikihda poht.+ Re kin kaunkitada* oh nait pelinmen kan nin duwen dahme re mwahuki, oh se mi nan kahpwal laud.

38 “Eri pwehki mepwukat koaros, se wiewia inou kesempwal ehu+ ni nting, oh e sansal sang ni sidamp en at kaun akan, mehn Lipai kan, oh at samworo kan.”+

10 Irail kan me kasansalehda met ni arail kihdi arail sidamp ie+ iei:

9 Pil mehn Lipai kan: Sesua nein Asanaia, Pinnui nein Enadad, Kadmiel,+ 10 oh riarail kan Sepanaiah, Odaia, Kelita, Pelaia, Ahnan, 11 Mika, Rehop, Asapaia, 12 Sakur, Serepaia,+ Sepanaiah, 13 Odaia, Pani oh Peninu.

14 Kaunen aramas ako: Paros, Pahad-mohap,+ Elam, Sattu, Pani, 15 Punni, Askad, Pepai, 16 Adonaisa, Pikpai, Adin, 17 Ater, Esekaia, Assur, 18 Odaia, Asum, Pesai, 19 Arip, Anadod, Nepai, 20 Makpias, Mesullam, Esir, 21 Mesesapel, Sadok, Saddua, 22 Pelataia, Ahnan, Anaia, 23 Osea, Ananaiah, Assup, 24 Alloes, Pilah, Sopek, 25 Rehum, Asapna, Maaseaia, 26 Ahisa, Ahnan, Anan, 27 Malluk, Arim oh Paanah.

28 Luhwen aramas ako—samworo kan, mehn Lipai kan, silepen ewen kehl kan, sounkoul kan, ladu kan en tehnpas sarawio,* oh emenemen me katohrehsang pein ih rehn aramas akan en sahpwo pwehn idawehn Kosonned en Koht mehlelo,+ iangahki arail pwoud kan, neirail pwutak kan, oh neirail serepein kan, irail koaros me loalokong oh koahiek en wehwehki ire kan*— 29 iang riarail kan, iei neirail ohl lapalap akan, oh wiahiong irail keria ehu oh kahula ehu, ren keid nan Kosonned en Koht mehlelo, me kohieng irail sang rehn Moses, ladun Koht mehlelo, oh ren kapwaiada ni keneinei kehkehlik koaros en Siohwa atail Kaun, sapwellime kadeik kan, oh sapwellime koasoandi kan. 30 Kitail sohte pahn kihla neitail serepein kan ong aramas akan en sahpwo, oh kitail sohte pahn ale neirail serepein kan ong neitail pwutak kan.+

31 Ma aramas akan en sahpwo wahdo arail kepwehn net kan oh soangen krein koaros pwehn netikihla ni rahnen Sapad, kitail sohte pahn pwainsang irail mehkot ni Sapad+ de ni rahn sarawi ehu.+ Oh ni keisuhwen sounpar+ kitail sohte pahn koadoahke sahpwo oh kitail pahn kemehla pweipwand koaros.+

32 Oh pil, kitail pahn idingkihong pein kitail pwukoa ong emenemen en kihda silikis ehun sekel* ehu sounpar koaros ong doadoahk en tehnpesen* atail Koht,+ 33 ong pilawa koasoakoasoakdao,*+ meirong en krein me kin kaukaule wiawi,+ meirong isihs me kin kaukaule wiawi ni Sapad kan+ oh ni maram pwul,+ oh ong kamadipw kan me koasoandi,+ ong soahng sarawi kan, ong meirong en dihp kan+ pwehn wiahda tomw ong Israel, oh ong doadoahk koaros en tehnpesen atail Koht.

34 Oh pil, kitail pahn wia usuhs pwehn koasoanehdi iahd me peneinei en samworo kan, mehn Lipai kan, oh aramas akan pahn sawaskihda tuwi ong tehnpesen atail Koht, ni ahnsou kan me kileldi, ehuehu sounpar, pwehn isik pei sarawi en Siohwa atail Koht, nin duwen me ntingdi nan Kosonnedo.+ 35 Kitail pil pahn wahdo tepin wahnsahpw kan sang sapwatail kan oh tepin wahntuhke kan sang soangen tuhke koaros, ehuehu sounpar, ni tehnpesen Siohwa,+ 36 pil iangahki mesenihen neitail pwutak kan oh neitail pelinmen kan+—nin duwen me ntingdier nan Kosonnedo—oh mesenihen neitail pelin kou kan oh neitail pelin sihpw oh kuht kan. Kitail pahn wairaildo ni tehnpesen atail Koht, rehn samworo kan me kin papah ni tehnpesen atail Koht.+ 37 Pil, tepin wahn kanatail krein pisalap kan,+ atail kisakis kan, wahn soangen tuhke koaros,+ wain kapw, oh leh,+ kitail pahn wahdo rehn samworo kan ni wasahn nahk kan* en tehnpesen atail Koht,+ iangahki eisek kis ehu sang sapwatail kan ong mehn Lipai kan,+ pwe mehn Lipai kan me kin ale eisek kis ehu kan nan atail kahnimw kan koaros me doadoahk en mwetuwel kin wiawi ie.

38 Oh samworo men, iei kadaudok en Aaron men, pahn anahne mi rehn mehn Lipai kan ni ahnsou me mehn Lipai kan kin ale eisek kis ehu; oh mehn Lipai kan pahn wahla eisek kis ehu ni tehnpesen atail Koht,+ nan perehn* imwen nahk kan. 39 Pwe iei nan wasahn nahk kan* me mehn Israel kan oh mehn Lipai kan pahn wahdo kisakis+ en krein kan, wain kapw, oh leh,+ oh ih wasao me dipwisou kan en wasa sarawio kin mi ie, iangahki samworo kan me kin papah, silepen ewen kehl kan, oh sounkoul kan. Kitail sohte pahn pohnsehsehla tehnpesen atail Koht.+

11 Kaun akan en aramas ako koukousoan nan Serusalem;+ ahpw luhwen aramas ako wiahda usuhs+ ren wahdo ehu peneinei sang nan peneinei eisek pwe ren kousoan nan Serusalem, kahnimw sarawio, a peneinei duwau pahn mihmihte nan kahnimw teikan. 2 Oh pil, aramas ako kapaiahda ohl ako koaros me toukihda pein irail ren kousoan nan Serusalem.

3 Oh iet kaun akan en wehio me kousoan nan Serusalem. (Luhwen mehn Israel, samworo kan, mehn Lipai kan, ladu kan en tehnpas sarawio,*+ oh kadaudok en nein Solomon ladu kan,+ kin kousoan nan kahnimw teikan en Suda, emenemen mi nan wasa me e sapweniki nan eh kahnimw.+

4 Oh pil, ekei aramas en Suda oh Pensamin kin kousoan nan Serusalem.) Sang aramas en Suda kan iei Adaia nein Usaia nein Sekaraia nein Amaraia nein Sepataia nein Maalalel kadaudok en Peres,+ 5 oh Maaseaia nein Paruk nein Kolohsa nein Asaia nein Adaia nein Soiarip nein Sekaraia sang peneinei en mehn Sela kan. 6 Kadaudok en Peres kan koaros me kin kousoan nan Serusalem iei ohl koahiek meh 468.

7 Oh iet aramas en Pensamin kan: Sallu+ nein Mesullam nein Soed nein Pedaia nein Kolaia nein Maaseaia nein Idiel nein Sesaia, 8 oh likin Sallu, Kappai oh Sallai pil iang, meh 928; 9 oh Soel nein Sikri me wia arail sounapwalih, oh Suda nein Assenua me keriaun kaunen kahnimwo.

10 Sang samworo kan: Sedaia nein Soiarip, Sakin,+ 11 Seraia nein Ilkaia nein Mesullam nein Sadok nein Meraiod nein Ahidup,+ kaun emen ni tehnpesen* Koht mehlelo, 12 oh riarail kan me kin doadoahk nan tehnpaso, meh 822; oh Adaia nein Seroham nein Pelalaia nein Amsi nein Sekaraia nein Pasuhr+ nein Malkaisa, 13 oh rie kan, iei kaunen peneinei kan, meh 242; oh Amassai nein Asarel nein Asai nein Mesillemod nein Immer, 14 oh riarail ohl kehlail oh kommwad kan, meh 128; oh arail sounapwalih iei Sapdiel, emen kisehn peneinei ndand ehu.

15 Oh sang mehn Lipai kan: Semaia+ nein Assup nein Asrikam nein Asapaia nein Punni, 16 oh Sapedai+ oh Sosapad,+ kaunen mehn Lipai kan, ira me kin apwalih doadoahk me kin wiawi likin tehnpesen Koht mehlelo; 17 oh Madanaia,+ nein Maika nein Sapdi nein Asap,+ kaunen pwihnen sounkoul kan, me kin tiengki kaping kan erein kapakap,+ oh Pakpukaia, me wia sawasepe, oh Apda nein Samua nein Kalal nein Sedudun.+ 18 Mehn Lipai koaros me mi nan kahnimw sarawio iei meh 284.

19 Oh silepen ewen kehl kan iei Akkup, Talmon,+ oh riara kan, meh 172.

20 Luhwen mehn Israel, samworo kan, oh mehn Lipai kan kin mi nan kahnimw teikan koaros en Suda, emenemen mi nan pein sapwe me e sohsohki.* 21 Ladu kan en tehnpas sarawio*+ kin kousoan nan Opel,+ oh Siha oh Kispa me kin apwalih ladu kan en tehnpas sarawio.*

22 Sounapwalih en mehn Lipai kan nan Serusalem iei Ussi nein Pani nein Asapaia nein Madanaia+ nein Mika, sang kadaudok en Asap, sounkoul kan; ih me kin apwalih doadoahk en tehnpesen Koht mehlelo. 23 Mie kehkehlik ehu sang nanmwarki ong irail,+ oh mie koasoandi ehu me pid dahme sounkoul kan anahne ehuehu rahn. 24 Oh Pedahaia nein Mesesapel sang peneinei en Sera nein Suda, me wia en nanmwarki sounkaweid* ong irair koaros me pid aramas ako.

25 Me pid wasahn kousoan kan me mie mwaht kan, ekei aramas en Suda kan kin kousoan nan Kiriad-arpa+ oh kisin kahnimw kan me kapilpene, nan Dipon oh kisin kahnimw kan me kapilpene, nan Sekapseel+ oh wasahn kousoan kan me mi limwah, 26 nan Sesua, nan Molada,+ nan Pedpelet,+ 27 nan Asar-sual,+ nan Peersipa oh kisin kahnimw kan me kapilpene, 28 nan Siklak,+ nan Mekona oh kisin kahnimw kan me kapilpene, 29 nan Enrimmon,+ nan Sorah,+ oh nan Sarmud, 30 nan Sanoah,+ nan Adullam oh arail wasahn kousoan kan, nan Lakis+ oh eh mwaht kan, oh nan Aseka+ oh kisin kahnimw kan me kapilpene. Re kousoanla* sang Peersipa kohla lel Wahun Innom.+

31 Oh aramas en Pensamin kan kin kousoan nan Kepa,+ Mikmahs, Aisa, Pedel+ oh kisin kahnimw kan me kapilpene, 32 Anadod,+ Nop,+ Ananaia, 33 Eisor, Rama,+ Kittaim, 34 Adid, Sepoim, Nepallat, 35 Lod, oh Ono,+ wahu en tohndoadoahk saman kan. 36 Oh ekei pwihnen mehn Lipai kan sang sapwen Suda kileldiong ren kousoan nan sapwen Pensamin.

12 Iet samworo kan oh mehn Lipai kan me iangih Serupapel+ nein Sealtiel,+ oh Sesua+ kohdahla: Seraia, Seremaia, Esra, 2 Amaraia, Malluk, Addus, 3 Sekanaia, Rehum, Meremod, 4 Iddo, Kinnedoi, Apaisa, 5 Misamin, Maadaia, Pilka, 6 Semaia, Soiarip, Sedaia, 7 Sallu, Amok, Ilkaia oh Sedaia. Ih irail pwukat me kaunen samworo kan oh riarail kan ni mwehin Sesua.

8 Mehn Lipai kan iei Sesua, Pinnui, Kadmiel,+ Serepaia, Suda oh Madanaia,+ me kin apwalih koulen kapingkalahngan kan iangahki rie kan. 9 Oh Pakpukaia oh Unni riarail kan kesihnen pelian irail ong pwukoahn silasil kan.* 10 Sesua iei semen Soiakim, oh Soiakim iei semen Eliasip,+ oh Eliasip iei semen Soiada.+ 11 Oh Soiada iei semen Sonadan, oh Sonadan iei semen Saddua.

12 Ni mwehin Soiakim, iet samworo kan, kaunen peneinei kan: ong Seraia,+ Meraia; ong Seremaia, Ananaiah; 13 ong Esra,+ Mesullam; ong Amaraia, Sehohanan; 14 ong Malluki, Sonadan; ong Sepanaiah, Sosep; 15 ong Arim,+ Adna; ong Meraiod, Elkai; 16 ong Iddo, Sekaraia; ong Kinnedon, Mesullam; 17 ong Apaisa,+ Sikri; ong Miniamin, . . . ;* ong Moadaia, Piltai; 18 ong Pilka,+ Samua; ong Semaia, Sehonadan; 19 ong Soiarip, Mattenai; ong Sedaia,+ Ussi; 20 ong Sallai, Kallai; ong Amok, Eper; 21 ong Ilkaia, Asapaia; ong Sedaia, Nedanel.

22 Kaunen peneinei kan en mehn Lipai kan ni mwehin Eliasip, Soiada, Sohanan oh Saddua+ kileldi, duwehte samworo kan, lel ni kaundahn Darius mehn Persiao.

23 Mehn Lipai kan me wia kaunen peneinei kan kileldi nan pwuhken poadopoad, lel ni mwehin Sohanan nein Eliasip. 24 Kaunen mehn Lipai kan iei Asapaia, Serepaia oh Sesua+ nein Kadmiel,+ oh riarail kan, sounsilasil kan, kesihnen palilahsang irail ni pwihn kei pwehn wia kaping oh kapingkalahngan nin duwen koasoandien Depit+ ohlen Koht mehlelo. 25 Madanaia,+ Pakpukaia, Opadaia, Mesullam, Talmon oh Akkup,+ irail me silepen ewen kehl kan+ oh re kin sinsile wasahn nahk kan ni ewen kehl kan. 26 Irail pwukat papah ni mwehin Soiakim nein Sesua+ nein Sosadak oh ni mwehin kepina Nehmaia oh samworo oh sounnting Esra.+

27 Ni kasarawien kelen Serusalem, re rapahki mehn Lipai kan oh wairaildo nan Serusalem sang wasa koaros me re kin kousoan ie pwehn wia kasarawio ni peren, ni koulen kapingkalahngan,+ oh ni keseng en simpal kan,* keseng sahl kan, oh arp kan. 28 Oh sounkoul kaiahnda kan* kohpene sang sahpwo,* sang Serusalem pwon, sang wasahn kousoan kan en mehn Netopa kan,+ 29 sang Pedkilkal,+ oh sang mwaht kan en Kepa+ oh Asmaped,+ pwe sounkoul kan wiadahr ar wasahn kousoan kan kapilpene Serusalem pwon. 30 Oh samworo kan oh mehn Lipai kan kamwakeleirailda, oh re kamwakelehda aramas ako,+ ewen kehl kan,+ oh kehlo.+

31 Ngehi eri kahrehdo kaunen Suda kan pohn kadoken kehlo. Oh pil, I idihada pwihnen sounkoul laud riau me wia koulen kapingkalahngan oh pwihnen kapar riau ren idawehn irail, oh ehu pwihnen koul ko aluhla ni palimaun en kehlo kolahng ni Ewen Kelen Koasoakoasoak en Pehs.+ 32 Osaia oh apali en kaunen Suda kan ahpw alu mwurirail, 33 iangahki Asaraia, Esra, Mesullam, 34 Suda, Pensamin, Semaia oh Seremaia. 35 Me iang irail iei ekei samworo kan* me wa sowi:+ Sekaraia nein Sonadan nein Semaia nein Madanaia nein Maikaia nein Sakur nein Asap,+ 36 oh rie kan iei Semaia, Asarel, Milalai, Kilalai, Mahi, Nedanel, Suda oh Ananai, oh re wa nein Depit ohlen Koht mehlelo mehn keseng kan;+ oh sounnting Esra+ ahpw tiengla mwohrail. 37 Ni Ewen Kelen Utuhnpihlo+ re inendahla ni Kehndake+ en Kahnimw en Depit+ sang wasa me ukada ni kehlo pohnangin Tehnpesen Depit oh pohn Ewen Kelen Pihl+ ni palimese.

38 Pwihn teio me wia koulen kapingkalahngan alu ni pali teio,* oh I idawehn pwihno iangahki apali en aramas ako, kohla pohn kehlo daulih Imwen Doulik en Uhmw kan+ oh kolahng pohn Kehl Tehlap+ 39 oh daulih Ewen Kelen Epraim+ oh kolahng pohn Ewen Kelen Kahnimw Mahs+ oh kohla pohn Ewen Kelen Mwahmw,+ Imwen Doulik en Ananel,+ Imwen Doulik en Mea, oh kohla pohn Ewen Kelen Sihpw;+ oh re kohdo uhdi ni Ewen Kelen Silasil.

40 Pwihnen koulen kapingkalahngan riauo eri uhda mwohn tehnpesen Koht mehlelo; pil ngehi oh apali keriaun kaun akan me iang ie, 41 oh samworo kan Elaiakim, Maaseaia, Miniamin, Maikaia, Elioenai, Sekaraia oh Ananaiah wa sowi kan, 42 oh Maaseaia, Semaia, Eliesar, Ussi, Sehohanan, Malkaisa, Elam oh Eser. Oh sounkoul ko ahpw koul ni ngihl laud, pahn epwelpen Israhaia.

43 Rahno irail wiahda meirong tohto oh pereperen,+ pwe Koht mehlelo ketin kahrehiong irail en peren mwuledek. Lih akan oh seri kan pil perenda,+ kahrehda ngilen peren en Serusalem kak lella wasa doh.+

44 Rahno ohl akan idihdida en apwalih imwen nahk kan+ ong kisakis kan,+ tepin wahnsahpw kan,+ oh eisek kis ehu kan.+ Nan imwen nahk pwukat re pahn rikpene sang nan mwaht en kahnimw kan pwaisen samworo kan oh mehn Lipai kan+ me Kosonnedo koasoanehdi,+ pwe mie peren nan Suda pwehki samworo kan oh mehn Lipai kan ar wie papah. 45 Oh samworo kan oh mehn Lipai kan tepida apwalih pwukoa kan ong ar Koht oh pwukoahn kamwakel, duwehte sounkoul kan oh silepen ewen kehl kan, nin duwen koasoandi en Depit oh nah pwutak Solomon. 46 Pwe mahso ni mwehin Depit oh Asap, mie sounapwalih sounkoul kan oh koulen kaping oh koulen kapingkalahngan ong Koht.+ 47 Oh ni mwehin Serupapel+ oh ni mwehin Nehmaia, Israel pwon kihda pwaisen sounkoul kan+ oh silepen ewen kehl kan,+ nin duwen anahn en ehuehu rahn. Re pil katohrehla pwaisen mehn Lipai kan,+ oh mehn Lipai kan katohrehla pwaisen kadaudok en Aaron kan.

13 Rahno pwuhken Moseso wadawad ni aramas ako ar rongorong,+ oh e dierekda me e ntingdi loale me sohte mehn Ammon de mehn Mohap+ pahn pedolong nan mwomwohdisohn Koht mehlelo,+ 2 pwe re sohte kihong mehn Israel kan pilawa oh pihl, ahpw re pwain Palaam en uhwong irail pwehn kerieirailla.+ Ahpw, atail Koht ketin wekidohng keriao ong ni kapai ehu.+ 3 Ni ahnsowohte me re rongada Kosonnedo, re ahpw tepida katohrehsang Israel irail koaros me kadaudok en mehn liki kan.*+

4 Eri mwohn met, samworo me apwalih wasahn nahk kan* en tehnpesen* atail Kohto+ iei Eliasip,+ kisehn Dopaia.+ 5 Eliasip kin mweidohng Dopaia en doadoahngki wasahn nahk* laud ehu, wasa me mahso re kin kihdi meirong en krein, warpwohmwahu pwetepwet,* oh dipwisou kan oh eisek kis ehun krein, wain kapw, oh leh,+ me mehn Lipai kan,+ sounkoul kan, oh silepen ewen kehl kan kin ahneki pwuhng en ale, iangahki kisakis ong samworo kan.+

6 Oh erein ahnsowo pwon I sohte mi nan Serusalem, pwe I kohla rehn nanmwarkio ni kesilihsek riaun sounpar+ en Nanmwarki Ardaserksihs+ en Papilon; oh ahnsou kis mwuhr I peki mweimwei sang rehn nanmwarkio I en kohkohla. 7 Ngehi eri kohdo Serusalem oh tehkada soahng suwed me Eliasip+ wiadahr pwehki Dopaia,+ eh mweidohng ih en doadoahngki wasahn nahk ehu me mi nan wasa me kelpene ni tehnpesen Koht mehlelo. 8 I uhdahn nsensuwedkihla met, ngehi eri keseieisang en Dopaia dipwisoun nan ihmw koaros nan wasahn nahko.* 9 Mwurin mwo I wiahda ruwes kei, oh re kamwakelehda wasahn nahk ko;* oh I kapwurehla dipwisoun tehnpesen Koht mehlelo wasao,+ iangahki meirong en krein oh warpwohmwahu pwetepweto.+

10 I pil diarada me pwaisen mehn Lipai kan+ sohte kohieng irail,+ kahrehda mehn Lipai kan oh sounkoul kan me wia doadoahko kohkohlahr, emenemen kohla nan eh mwaht.+ 11 Eri I lipwoarehda keriaun kaun ako+ oh nda: “Dahme kahrehda tehnpesen Koht mehlelo sohte epwel mwahu?”+ Ngehi eri kapokoneirailpene oh pwurehng kilelehiong arail pwukoa kan. 12 Oh Suda pwon ahpw wahlongodo eisek kis ehun+ krein, wain kapw, oh leh nan wasahn nahk kan.+ 13 Ngehi eri kihdi samworo Selemaia, sounnting Sadok, oh Pedaia mehn Lipai men ren apwalih wasahn nahk kan, oh Ahnan nein Sakur nein Madanaia me wia ar sounsawas, pwe ohl pwukat me likilik. Irail me pwukoahki nehkohng pwaisen riarail kan.

14 Maing ei Koht, komw ketin tamatamankin ie+ duwen met oh komw dehr ketin meliehla ei wiewiahn limpoak loalopwoat kan me I wiadahr ong tehnpesen ei Koht oh doadoahk kan wasao.*+

15 Ni ahnsowo I kilangada aramas en Suda kan ar kin doadoahk* ni wasahn tiak kreip kan ni Sapad,+ weuwahdo koasoakoasoak en krein kei oh kikidahng pohn dongki kan, oh weuwahdo wain, kreip kan, pik kan, oh soangen wisik koaros nan Serusalem ni rahnen Sapad.+ Ngehi eri kehkehlingkihong irail en dehr netiki mwenge kan rahno.* 16 Oh mehn Dair kan me kin kousoan nan kahnimwo kin wahlongodo mwahmw oh soangen kepwehn net koaros, oh re kin netiki mepwukat rehn aramas en Suda kan nan Serusalem ni Sapad.+ 17 Ngehi eri lipwoarehda lapalap en Suda kan oh ndaiong irail: “Soahng suwed dah me kumwail wiewiahn, pil kasaminehla rahnen Sapad? 18 Kaidehn ih met me samamwail mehn mahs ako wia, kahrehda atail Kohto ketikihdo kahpwal pwukat koaros pohtail oh pil ong kahnimw wet? Met kumwail kalakalaudehla engieng kowahlap ong Israel ni amwail kasaminehla Sapado.”+

19 I ruwese ewen kelen Serusalem kan en ritidi mwohn eh rotorotala, me iei, mwohn Sapad eh tepida. I pil nda me re sohte pahn ritingada mepwukat lao lel mwurin Sapad, oh I kihdi ekei nei sounpapah kan ni ewen kehl kan pwe sohte wisik ehu pahn kohlongodo ni rahnen Sapad. 20 Eri sounnetinet kan me kin netiki soangen kepwehn net koaros kin pweidi likin Serusalem pak ehu de riau. 21 Ngehi eri kehkehlikiong irail oh ndaiong irail: “Dah kumwail pweipweikihdi mwohn kehlen? Ma kumwail pahn pwurehng wia met, I pahn peiong kumwail pwehn kauskumwailla.” Sang ahnsowo kohla re sohla kohdo ni Sapad.

22 Oh I ndaiong mehn Lipai kan me re anahne kaukaule kamwakelehda pein irail oh kohdo oh sile ewen kehl kan pwe rahnen Sapad en kin sarawi.+ Maing ei Koht, komw pil ketin tamatamankin ie met, oh ketin kupwure ie nin duwen sapwellimomwi limpoak loalopwoat mwuledek.+

23 Ni ahnsowo I pil kilangada mehn Suhs kan me pwoudikihda* lihen+ Asdod,+ Ammon oh Mohap kan.+ 24 Apali neirail seri kan kin lokaiahki lokaiahn Asdod oh apali kin lokaiahki lokaiahn aramas teikan, ahpw sohte emen irail ese lokaiahki lokaiahn mehn Suhs kan. 25 Ngehi eri lipwoareirailda oh kihdiong keria pohrail oh keme ekei ohl ako+ oh waikasang pitenmoangarail kan oh wiahiong irail en kahukihla ni mwaren Koht: “Kumwail sohte pahn kihong noumwail serepein kan rehn neirail pwutak kan, oh kumwail sohte pahn ale neirail serepein kan ong noumwail pwutak kan de ong pein kumwail.+ 26 Pwe kaidehn ih mepwukat me Nanmwarki Solomon en Israel dipikihda? Sohte nanmwarki men me duwe ih+ nan wehi tohto; oh eh Kohto ketin poakohng ih,+ kahrehda Koht ketin wiahiong ih en wiahla nanmwarki nan Israel pwon. Ahpw eh pwoud en liki kan me kahrehiong ih nan dihp.+ 27 Ia duwe, kaidehn met iei mehkot me kitail sohte kin rong, pwe kumwail en wiahda mwekid suwed laud wet ni amwail salelepekiong atail Koht oh pwoudikihda lihen liki kan?”+

28 Soiada+ nein samworo lapalap Eliasip,+ emen nah pwutak ko pwoudikihda nein Sanpalad+ serepein mehn Oron. Ngehi eri kausala ih.

29 Maing ei Koht, komw ketin tamataman oh kaloke irail, pwehki re kasaminehla koasoandien samworo oh inou lap en koasoandien samworo+ oh mehn Lipai kan.+

30 Oh I kamwakeleirailda sang samin en mehn liki koaros, oh I koasoanehdi pwukoa kan ong samworo kan oh mehn Lipai kan, emenemen ong pein eh pwukoa,+ 31 oh koasoanehdi tuwi+ me pahn wisikdo ni ahnsou me kileldi oh wisikdohn tepin wahnsahpw kan.

Maing ei Koht, komw ketin tamataman ie.*+