MELKAHKAHN MELKAHKA KAN
Me iei, En Solomon Melkahka
1 Melkahkahn melkahka kan,* me iei en Solomon melkahka.+
3 Pwohmwahu en omw leh kan kin kansenamwahu.+
Edomwen kin rasehng leh pwohmwahu me wudekidi.+
Ihme kahrehda peinakapw kan kin poakohng uhk.
4 Waiehda; kita tangdoaui.
Nanmwarkio ketikiniehla nan sapwellime perehn loale kan!
Kita pereperenpene.
Kita kapinga* omw mwekid en limpoak laudsang wain.
Ihme re* kin poakohngkin uhk.
5 Lihen Serusalem kan, I me toantoal ahpw kaselel,
Rasehng impwal en Kedar kan,+ rasehng en Solomon likoun impwal kan.+
6 Kumwail dehr kangkakil ie pwehki ei toantoal,
Pwehki ketipin me kahrehda ei toantoalla.
Riei pwutak kan lingeringerda pahi;
Re kihong ie I en apwalih mwetin kreip kan,
Ahpw I sohte kin apwalih pein ahi mwetin kreip.
7 Ndaiong ie, ei mwohnlimpoak,
Wasa me ke kin kamwenge noumw pelin sihpw kan,+
Wasa me ke kin kahreirailla nin souwas pwe ren wendi.
Dahme I en duwehkihte lih me koaduhpwaldi
Nanpwungen nein kompoakepahmw pelin sihpw kan?”
8 “Kowe lih me keieu kaselel, ma ke sehse,
Idawehnwei lipwen nehn pelin sihpw kan
Oh kamwenge noumw kuht pwulopwul kan limwahn impwal en silepen sihpw kan.”
9 “Kowe, ei mwohnlimpoak, I karasahiong uhk oahs lih* nanpwungen weren Parao kuruma kan.+
10 Likinsepomw me kaselel, ni eh kin kapwatkihda mehn kapwat akan,*
Tepinweromw me kaselel ni eh kin mwarehda mwaramwar.
11 Se pahn wiahiong uhk mehn kapwat kohl kan*
Me kapwatki silper.”
13 Ong ie, ei mwohnlimpoak kin duwehte ehd en mir pwohmwahu+
Me kin mihmi ni mwaremwareiet nipwong.
15 “Kilang! Ei mwohnlimpoak, ia uwen omw kaselel.
Kilang! Ke me kaselel. Pwoaren mesomw kan rasehng pwoaren mesen mwuroi.”+
16 “Kilang! Ei mwohnlimpoak, ia uwen omw kaselel* oh kaperen!+
Dihpw kan me wia ata peht.
17 Tuhke sidar me pahn wia lohlo en imwata,*
Tuhke suniper me pahn wia denso.
2 “Rasehng kiepw pwoat nanpwungen dihpw tekatek kan
Iei duwen ei mwohnlimpoak nanpwungen peinakapw kan.”
3 “Rasehng tuhke apel pwoat nanpwungen tuhkehn nanwel kan,
Iei duwen ei mwohnlimpoak nanpwungen mwahnakapw kan.
I kin uhdahn inengieng mwohd pahn mweteh,
Oh wah kin mem ong ie.
4 E waielahng nan eh imwen kamadipw,*
Oh eh pilaik me langalang pohi iei limpoak.
7 Lihen Serusalem kan, kumwail kahukihong ie,
Sang ni lingan oh kaselel en kasel+ oh tie lih en nan mohs:
Kumwail dehr song kamwakid ie I en limpoak lao I ahnekihda pepehm en limpoak mehlel.+
8 Ngilen ei mwohnlimpoak!
Kilang! E kohkohdo,
Dadaur nahna kan, lusulus kohdo pohn dohl akan.
9 Ei mwohnlimpoak rasehng kasel men, rasehng tie wol pwulopwul men.+
Io ih, e kesikesihnen mwurin at dihdo.
E kilikilengdo sang ni wenihmwtoko,
Kilikilengdo sang ni perehpen wenihmwtoko.
10 Ei mwohnlimpoak koasoiong ie, e nda:
‘Uhda, ei mwohnlimpoak,
Ahi me kaselel, kohdo iangiehda.
11 Kilang! Ahnsoun kopou* imwiseklahr.
Keteu tokedier oh sohralahr.
12 Wahnrohs kan masalpesengier nansapwo,+
Met ahnsoun kamwakele tuhkehn kreip kan,+
Oh ngilen mwuroi kan peipeiseli nan sapwatao.+
13 Tepin rahk en pik kan tepidahr mat;+
Tuhkehn kreip kan masalpesengier oh ar pwohmwahu kipedier wasa.
Uhda ei mwohnlimpoak oh kohdo.
Ahi me kaselel, kohdo iangiehda.
14 Kowe ahi mwuroi me rukuruk nan pwoaren paip,+
Nan pwoaren paip ileileo,
Mweidohng ie I en kilang oh rong ngilomw,+
Pwe ngilomwen me kansenamwahu oh mwomwomwen me kaselel.’”+
15 “Kumwail koledi kidien wel kan* ong kiht,
Kisin kidien wel kan me kauwelahr mwetin kreip kan,
Pwe at mwetin kreip kan masmasal.”
16 Ei mwohnlimpoak iei ahi, oh ngehi me ah.+
E apwahpwalih sihpw+ nanpwungen kiepw kan.+
17 Mwohn engitik eh ipido* oh rotorot sohrala,
Ei mwohnlimpoak, mwadangodo,
Duwehte kasel+ de tie wol pwulopwul+ pohn nahna kan me mi nanpwungata.*
3 “Pohn ei pehto nipwong kan,
I rapahki ei mwohnlimpoako.+
I rapahki ih, ahpw I sohte diar.+
2 I pahn pwourda oh aluseli nan kahnimwo;
I pahn rapahki ei mwohnlimpoako
Nanial akan oh nan wasahn tuhpene kan.
I rapahki ih, ahpw I sohte diar.
3 Ekei silepen kahnimwo ahpw kasaingiehdi ni ar doudouseli;+
‘Kumwail sohte kilang ei mwohnlimpoako?’
4 I aluhlahsangirailte
Ngehi eri kilangada ei mwohnlimpoako.
I ahpw pwoalehdi, sohte kadarala
Lao I walahng ih nan imwen ineio,+
Nan en lih me liseiankiniehda pereo.
5 Lihen Serusalem kan, kumwail kahukihong ie,
Sang ni lingan oh kaselel en kasel oh tie lih en nan mohs:
Kumwail dehr song kamwakid ie I en limpoak lao I ahnekihda pepehm en limpoak mehlel.”+
6 “Dahkot met me kohkohdahsang nan sapwtehn likamwete uhr en ediniei,
Me pwohn mir, warpwohmwahu pwetepwet,*
Oh en sounnetinet paute pwohmwahu koaros?”+
7 “Kilang! Sapwellimen Solomon rohpapiso.*
Ohl kehlail wenehk kapilpene,
Ohl kehlail en Israel kan,+
8 Irail koaros tehtehki kedlahs pwoat,
Irail koaros kaiahnda ong mahwen,
Emenemen mie nah kedlahs ni pengepenge
Pwehn pere ih sang keper en nipwong.”
10 E ketin wiahkihda uhr kan silper,
Utupe kan kohl.
11 “Lihen Saion kan, kumwail kohieila,
Kumwail udiahl Nanmwarki Solomon
Eh kapwatki nihn en kapwopwoud* me ineo+ wiahiong ih
Ni rahnen sapwellime kapwopwoudo,
Ni rahn me kupwure pereperen.”
4 “Kilang! Ei mwohnlimpoak, ia uwen omw kaselel.
Kilang! Ke me kaselel.
Pwoaren mesomw kan me mi pahn omw koaduhpwelen rasehng pwoaren mesen mwuroi.
Pitenmoangomw kan kin rasehng pelin kuht ehu
Me kohkohdi pohn nahnahn Kilead kan.+
2 Ngihmw kan kin rasehng pelin sihpw
Me ahpwtehn seisei oh wideud,
Irail koaros neitik mpwer,
Oh sohte emen me wah salongala.
3 Kilin ewomw kan kin rasehng dereht weitahta,
Oh omw koasoi kan kin kansenamwahu.
Likinsepomw* me mi pahn omw koaduhpwel,
Kin rasehng elep pwohmakraneid.
4 Tepinweromw+ kin rasehng imwen doulik en Depit,+
Me kokoukihda koasoakoasoak en takai
Wasa me mehn sansar kid kin langada ie,
Nein ohl kehlail kan mehn sansar pwonopwon koaros.+
5 Omw dihdi kan kin rasehng tie pwulopwul riemen,
Mpwer en kasel ehu,+
Me kin mwengemwenge nanpwungen kiepw kan.”
6 “Mwohn engitik eh ipido* oh rotorot sohrala,
I pahn kohla pohn nahnahn mir
8 Ei lih kamwohd, kita kohkohlahsang Lepanon,
Kita kohkohlahsang Lepanon.+
Kita kohdihla sang pohn kumwen nahna Amana,
Sang pohn kumwen nahna Senir oh Ermon,+
Sang nan pesen laion kan, sang pohn nahnahn lepard kan.
9 Ei mwohnlimpoak, ei lih kamwohd, ke kalowedier ei mohngiong,+
Ke kalowedier ei mohngiong ni omw ikintangih ie,
Oh apwoat sein en omw mwaramwaren.
10 Ei mwohnlimpoak, ei lih kamwohd, ia uwen kaselel en omw mwekid en limpoak kan!+
Omw mwekid en limpoak kan inenen mwahusang wain,+
Oh omw leh uhdahn pwohmwahu sang mehn kapwohtik koaros!+
11 Ei lih kamwohd, sukehn loangalap kin dingiding sang ni kilin ewomw kan.+
Sukehn loangalap oh milik kin mi pahn lowomwen,+
Oh pwohmwahu en omw likou kan kin duwehte pwohmwahu en Lepanon.
12 Ei mwohnlimpoak, ei lih kamwohd, kin rasehng mwetuwel ehu me loakdi,
Mwetuwel ehu me loakdi, utuhnpihl ehu me pweipweidi teng.
13 Ke* rasehng tuhke nan mwetuwel* ehu me diren pwohmakraneid ni rah kan,
Wah kan me keieu kaselel, iangahki tuhke enna* oh nard,*
14 Nard+ oh rohs sapron, ahlek pwohmwahu+ oh sinamon,+
Iangahki soangsoangen tuhkehn warpwohmwahu pwetepwet, mir oh aloi,*+
Iangahki soangen tuhke kan me keieu pwohmwahu.+
15 Ke wia utuhnpihl nan mwetuwel ehu, pwarer en pihl mwakelekel ehu,
Oh piletik kan me pwildohsang Lepanon.+
16 Pirida, kisinieng en paliepeng;
Pedolong, kisinieng en palieir.
Ipido nan ei mwetuwel.
Kadirehkihla pwohmwahu nan wehwe.”
“Ei mwohnlimpoak en pedolong nan eh mwetuwel
Oh tungoale wah kan me keieu kaselel.”
5 “Ei mwohnlimpoak, ei lih kamwohd,
I pedolongehr nan ei mwetuwel.+
I daredier ei mir oh ei mehn kapwohtik.+
I kangalahr kenei pesen loangalapo oh sukehn loangalapo;
I nimalahr nimei waino oh miliko.”+
“Kumwa me limpoakpene, kumwa mwenge!
Nim oh sakaukihla mwekid en limpoak kan!”+
2 “I memeir, ahpw mohngiongi wie pepehd.+
I rong ngilen ei mwohnlimpoak eh letelet oh nda:
‘Ei mwohnlimpoak, ei lih kamwohd, ritingada!
Ahi mwuroi, ahi meipwon kaselel!
Pwe moangeiet wisekesengkilahr pwoaik,
Pitenmoangei kat wisekesengkilahr pwoaik en nipwong.’+
3 I kihsangehr ei likou reireio.
I anahne pwurehng likouda?
I widendahr nehi kat.
I anahne pwurehng kasaminehla?
4 Ei mwohnlimpoako ahpw kihsang peho ni pwoaren wenihmwo,
Oh ei pepehm ong ih ahpw mwekidida.
5 I pwourda pwe I en ritingadahng ei mwohnlimpoak wenihmwo;
Mir dingiding sang ni pehi kat,
Oh pilen mir dingiding sang ni sendin pehi kat,
Kohdiong pohn mehn kepir wenihmwo.
6 Ngehi eri ritingada wenihmwo ong ei mwohnlimpoako,
Ahpw ei mwohnlimpoako solahr mie, e samwalahr.
I pwunodada ni eh kohkohla.
I rapahki ih ahpw I sohte diar.+
I likwerih ih ahpw e sohte sapeng ie.
7 Sounsilasil kan me doudouseli nan kahnimwo diariehda.
Re wokih ie, re kauweiehla.
Sounsilasil kan en kelen kahnimwo adihasang ei koaduhpwelo.
8 Lihen Serusalem kan, kumwail kahukihong ie:
Ma kumwail diar ei mwohnlimpoako,
Padahkihong me I luwetkilahr ei limpoak.”
9 “Ia duwen omw mwohnlimpoako eh mwahusang ohl teikan koaros,
Kowe me keieu kaselel nanpwungen lih akan?
Ia duwen omw mwohnlimpoako eh mwahusang ohl teikan koaros,
Me ke idingkihong kiht sen kahukihla met?”
10 “Ei mwohnlimpoako me kaselel oh mas pwukapwuk;
Ih me keieu wadawad nanpwungen meh nen.
11 Moangeo me kaselel duwehte kohl, kohl me keieu kaselel.
12 Pwoaren mese kan rasehng mwuroi kan limwahn piletik,
Me wie duhdu nan pilen milik,
Oh mwomwohd limwahn lepin leh.*
13 Likinsepe kan rasehng uluhl en tuhke pwohmwahu kan,+
Kisin dohl en dihpw pwohmwahu.
Kilin ewe kan rasehng kiepw, me dingidingki pilen mir.+
14 Sendin peh kan kohl, kikin peh kan krisolaid.
Paliwere aipori melengileng me kapwatki sapair.
15 Denge kan duwehte uhren marpel me mi pohn poahsoan kohl me keieu kaselel.
Mwomwe kaselel rasehng Lepanon, eh reirei rasehng tuhke sidar.+
Ih me ei mwohnlimpoak, lih en Serusalem kan, ih me ei mwohnlimpoak.”
6 “Kowe, lih me keieu kaselel,
Ia wasa omw mwohnlimpoako kohla ie?
Mehnia ahl me omw mwohnlimpoako wetla ie?
Se pahn iang uhk rapahki ih.”
2 “Ei mwohnlimpoako kohdilahr nan eh mwetuwelo,
Mwetuwel en tuhke pwohmwahu kan,
Pwehn apwalih pelin sihpw kan wasao
Oh dar kiepw kan.+
3 Ei mwohnlimpoako me ahnekin ie,
Oh ei mwohnlimpoako iei ahi.+
E apwahpwalih sihpw nanpwungen kiepw kan.”+
4 “Ei mwohnlimpoak,+ ke kaselel duwehte Tirsa,*+
Lingan rasehng Serusalem,+
Kapwuriamwei rasehng karis en sounpei me pokonpene ni ar pilaik.+
Pitenmoangomw kan kin rasehng pelin kuht ehu
Me kohkohdi pohn wasa ukedi kan en Kilead.+
6 Ngihmw kan rasehng pelin sihpw
Me ahpwtehn wideud,
Irail koaros neitik mpwer,
Oh sohte emen me wah salongala.
7 Likinsepomw* me mi pahn omw koaduhpwel,
Kin rasehng elep pwohmakraneid.
8 Mie ahi lih nanmwarki 60
Oh pekehi 80
Oh peinakapw tohto me sohte kak wadawadedi.+
9 Ahpw mehtehmen me ahi mwuroi,+ ahi meipwon kaselel.
Serepein menet me keieu kesempwal rehn eh nohno.
E kin keniken* rehn lih me naitikihedio
Peinakapw kan kin kilang ih oh kin nda me e peren;
Lih nanmwarki kan oh pekehi kan kin kapinga ih.
10 ‘Ihs memenet me marain* rasehng nin sohrahn,
Me kaselel rasehng maram mat,
Me mwakelekel rasehng lingen ketipin,
Me kapwuriamwei rasehng karis en sounpei me pokonpene ni ar pilaik?’”+
11 “I kohdilahng nan mwetuwel en tuhke kan me kin wa+
Pwe I en kilang pons kapw ni tuhke kan nan wahwo
Pwe I en kilang ma tuhke kreip kan wosada* desoh,
Ma tuhke pwohmakraneid kan masalehr de soh.
12 Mwohn ei esehda dahme wiawi,
Ei ineng* en kilang mepwukat ahpw kahreiehla
Ni werennansapw en ei aramas lapalap* akan.”
13 “Pwurodo, pwurodo, serepein en Sulam!
Pwurodo, pwurodo,
Pwe sen kilang uhk!”
“Ia kahrepen amwail kangkakil mehn Sulamet?”+
“E rasehng kahlek en pwihn riau!”*
7 “Kowe serepein kadek,
Ia uwen kaselel en nehmw kan nan omw sandel kan,
Pwonopwon en tepin dengemwen rasehng mehn kapwat akan,
Mengin pehn tohndoadoahk koahiek men.
2 Omw pwuhsen rasehng pwohl pwonopwon ehu.
Wain doal en dehr neksang loale.
Kapehdomwen rasehng koasoakoasoak en wihd,
Me kiepw kan kapilpene.
3 Omw dihdi kan rasehng tie pwulopwul riemen,
Mpwer en kasel ehu.+
4 Tepinweromw+ kin rasehng imwen doulik aipori ehu.+
Tumwomwen rasehng imwen doulik en Lepanon,
Me uh sallahng Damaskus.
5 Moangomwen me kaselel rasehng Nahna Karmel,+
Oh pitenmoangomwen*+ rasehng dereht ntahnmwel sang wunen sihpw.+
Lingan en omw pitenmoang reirei kalowehdi kupwuren nanmwarkio.
6 Ei mwohnlimpoak, ia uwen omw kaselel, oh ia uwen omw moakoamoak,
Ke siksang soahng kaperen kan koaros!
8 I nda, ‘I pahn daur tuhke pahm
Pwe I en koledi wah kan.’
Omw dihdi kan en rasehng dunen kreip kan,
Omw esingek en pwohmwahu duwehte pwohn apel kan,
9 Oh ewomwen* en rasehng wain me keieu iou.”
“Waino en pwilipwildihla nan kepinweren ei mwohnlimpoak,
Rasehng wain me kin pwilipwilwei pohn kilinewen me memeir kan.
10 Ei mwohnlimpoako me ahnekin ie,+
Oh e kin inangih ie.
12 Kita pahn sangkenei pirida oh kohla nan mwetin kreip kan
Pwe kita en kilang ma tuhke kreipo wosadahr,*
Ma e masalpesengier,+
Ma pwohmakraneid kan masalehr.+
I pahn kasalehiong uhk ei limpoak wasao.+
13 Pwohmwahu en mandreik kan+ pahn kipehdi wasa;
Wahntuhke me keieu mwahu koaros+ pahn mi ni ata wenihmw kan.
Ei mwohnlimpoak, I nekinekid ong uhk
Me kapw oh pil me mah kan.
8 “Ma ke wiahte riei pwutak,
Me dihdihda rehn ineio!
Eri ma I tuhwong uhk likio, I pahn metik uhk,+
Oh sohte me pahn kepitkin ie.
I pahn kihong uhk wain pwohmwahu pwe ken nim,
Oh pilen pwohmakraneid kapw.
3 Peh palimeing mihmi pahn moangei,
Oh peh palimaun pahn pwoalpwoale ie.+
4 Lihen Serusalem kan, kumwail kahukihong ie:
Kumwail dehr song kamwakid ie I en limpoak lao I ahnekihda pepehm en limpoak mehlel.”+
5 “Ihs memenet me kapakapara eh mwohnlimpoak,
Kohkohdo sang nan sapwtehno?”
“I pangenuhkada pahn tuhkehn apelo.
Wasao me omw nohnou medek en neitikda.
Wasao me e naitikihiukedi ni medek en neitik.
6 Kihdiong ie pohn mohngiongomw nin duwen kilel ehu,
Nin duwen kilel ehu pohn pehmwen,
Pwe limpoak me kehlail duwehte mehla,+
Oh loalopwoat unsek kin ngihtehte duwehte Sousou.*
Mpwul en limpoak kin rasehng kisiniei lullul, mpwul en Iah.*+
Ma aramas emen pahn song en pwainkihda limpoak kepwehn imwe kan koaros,
E pahn mwamwahlla douluhl.”
8 “Mie riat serepein tikitik men,+
Oh eh dihdi kan wie tikitikte.
Dahme se pahn wiahiong riat serepeino
Ni rahn me re pahn kohdo pekpwopwoud?”
9 “Ma ih dihd ehu,
Se pahn kauwadahng wasahn doulik silper ehu,
Ahpw ma ih wenihmw ehu,
Se pahn didihkipene tuhke sidar.”
10 “Ngehi dihd ehu,
Oh ei dihdi kan rasehng wasahn doulik kan.
Eri nan mesen ei mwohnlimpoako I wiahla
Emen me kin diar popohl.
11 Solomon sapwellimanki mwetin kreip ehu+ nan Paal-amon.
E kohwahkihong soumwet kan mwetin kreipo.
Emenemen irail pahn wahdo mwohni silper kid pwe ren ale wah kan.
12 Ahpw mie ahi mwetin kreip oh ahi kelehpw.
Komwi Solomon, me sapwellimanki mwohni silper kid,*
Oh riepwiki ong irail akan me kin apwalih mwetin kreipo.”
Mweidohng ie I en rong ngilomw.”+
14 “Ei mwohnlimpoak, mwadangodo,
Oh marahra duwehte kasel men+
De tie wol pwulopwul men
Pohn nahnahn tuhke pwohmwahu kan.”
De “Melkahka me keieu kaselel.”
De “koasoia.”
Me iei, peinakapw kan.
De “nei oahs lih.”
De kakete, “nanpwungen ingihng en pitenmoangomw.”
De “elin kapwat kohl kan.”
De “nard.” Nard iei tuhke pwohmwahu ehu.
Tuhke pwoat me mie rohs pwohmwahu kan ie; aramas akan kin ale mehn kaduh poh pwehl-weitahta sang ni teh kan.
De “masamwahu.”
De “imwata ihmw kaselel.”
De “krokus.”
De “wasa patapat en oaroahr.”
LI, “imwen wain.”
De “ahnsoun keteu.”
Ni lokaiahn Ipru, e wehwehki “fox,” mahn me mwomwen kidi nan Israel oh sahpw kan me kapilpene.
LI, “rahno eh esingek.”
De “nahnahn Peder kan.”
Kilang KLL.
Sehr pwoat me pweipweidi pwehn wa aramas kesempwal.
Sehr pwoat me pweipweidi pwehn wa aramas kesempwal.
Met iei likou me wiawihdahsang wunen sihpw oh kaduh nan poh ntahnmwel.
De “elin kapwat; mwaramwar.”
De “Pengepengen moangomw.”
LI, “rahno eh esingek.”
Kilang KLL.
De kakete, “Kilimwen.”
De “paradais.”
Kilang Mm 1:14, ntp.
Nard iei tuhke pwohmwahu ehu.
Kilang Nem 24:6, ntp.
Tuhke me duwehte tuhkehn oahs.
De kakete, “rasehng dunen deid kan.”
Menpihr menet duwehte sioahk ahpw e lapalahsang.
De kakete, “keilen utuhnpihl.”
LI, “Pahn ngatangate.”
De “Kahnimw Kansenamwahu.”
De “Pengepengen moangomw.”
LI, “mwakelekel.”
LI, “kilengdi.”
De “poahnsda.”
LI, neʹphesh. Kilang KLL.
De “ngoang.”
De “kahlek en Mahanaim.”
LI, “moangomwen.”
Tuhke me duwehte tuhkehn oahs.
Soangen tuhke pahm wet kin kalapw dierek nan Palestin.
LI, “pahn ngatangatomw.”
Kilang Mm 1:14, ntp.
De “poahnsdahr.”
LI, sheʼohl′. Kilang KLL.
“Iah” iei kamwotepen mwaren Siohwa.
LI, “meh kid.”
De kakete, “Kompoakepahmw kan.”