KOULEN KEDEPWIDEPW KAN
א [Aleph]*
1 Kahnimw me kin diren aramas mahso,+ met e mwomwohd kelekelehpw!
E duwehla liohdi men, ih me kin ndand* mahso nanpwungen wehi kan!+
Ih me wia lih nanmwarki men nan wehi kan, wialahr lidu men!+
ב [Beth]
2 E kin wie sengiseng kowahlap erein pwohng ehu pwon,+ oh pilen mese kin kerekeredi ni likinsepe kan.
Sohte emen eh mwohnlimpoak mihmi mwo pwehn kansenamwahwihala.+
Kompoakepah kan koaros pangalahr ih;+ re wialahr eh imwintihti.
ג [Gimel]
3 Suda kalipilipalahr+ oh e kin lokolongki kahpwal oh mouren lidu.+
E anahne kousoan nan wehi kan;+ e sohte diar wasahn kommoal.
Koaros me kin kaloke ih koanohdier ih nan eh kahpwal.
ד [Daleth]
4 Ahl akan me kolahng Saion wie mwahmwahiei, pwehki sohte me kin kohla ni kasarawio.+
Eh ewen kehl kan koaros tehnlahr;+ nah samworo kan kin sengsengloal.
Nah meipwon kan* kin pahtou, oh e weiweirek laud.
ה [He]
5 Met eh imwintihti kan wialahr eh soumas;* re sohte kin pwunodki mehkot.+
Pwe Siohwa ketikidohng ih pahtou pwehki dipe tohto kan.+
Imwintihtio salihedier nah seri kan.+
ו [Waw]
6 Lingan koaros sohrasangehr Saion.*+
Nah lapalap akan duwehte tie wol kan me sohte diar mohs,
Oh irail kin alialu ni ar luhluwetala mwohn sounkalokoloko.*
ז [Zayin]
7 Erein rahn akan me e mi nan apwal oh sohte imwe, Serusalem tamataman
Soahng kesempwal koaros me ah mahso.+
Ni ahnsou me eh aramas akan lohdi nan pehn imwintihtio oh sohte sawasepe,+
ח [Heth]
8 Serusalem wiadahr dihp laud.+
Ihme kahrehda e wialahr mehkot kasaut ehu.
Met koaros me kin wauneki ih mahso kin wiahki ih mehkot mwahl, pwe re kilangehr eh kilisou.+
E kin ingihngtik+ oh kin sohpeila ni namenek.
ט [Teth]
9 Eh samin mi nan eh likou kan.
E sohte medemedewe duwen eh ahnsou kohkohdo.+
Eh pwupwudi me kapwuriamwei mehlel; sohte me kin kansenamwahwih.
Maing Siohwa, komw ketin mahsanih ei apwal, pwe imwintihtio aklapalapala.+
י [Yod]
10 Imwintihtio kihsangehr eh dipwisou kesempwal kan koaros.+
Pwe e kilangehr wehi kan ar pedolong nan eh wasa sarawio,+
Irail me komw ketin kehkehlingki ren dehpa pedolong nan omwi mwomwohdiso.
כ [Kaph]
11 Eh aramas akan koaros wie sengsengloal; irail raparapahki pilawa.+
Re wiliankihda ar soahng kesempwal kan ong mehkot me re pahn kang, ihte pwe ren momourki.
Maing Siohwa, komw ketin mahsanih me I duwelahr lih* soh katepe men.
ל [Lamed]
12 Ia duwe, met sohte wia mehkot ong kumwail koaros me kin keid nan ahlo?
Kilang!
Mie medek me duwehte medek me lelohngieier?
Medek me Siohwa ketin wiahiong ie I en lokolongki ni rahnen sapwellime engieng kowahlap.+
מ [Mem]
13 Sang wasa ile e ketin kadarodo kisiniei nan tih kat,+ oh e ketin kalowehdi ehuehu tih kat.
E ketin kihpeseng uhk pwoat ni nehi kat; e ketin itonehng ie I en pweiekla.
E ketin wiahiong ie I en duwehla lih emen me kelekelehpw.
I sosoumwahu rahn ehu pwon.
נ [Nun]
14 Dipei kan pirapirpene ni tepinwerei duwehte mehn wisik ehu; E ketin pirepene mepwukat.
Mepwukat pwekpwekdahng pohn tepinwerei, oh solahr ei kehl.
Siohwa ketikinielahng nan pehn irail me I sohte kak pelian.+
ס [Samekh]
15 Siohwa ketin kesehla nei ohl kehlail kan koaros.+
E ketin ekerpene pokon ehu pwehn uhwong ie pwe ren kamwutepene nei mwahnakapw kan.+
Siohwa ketin tiakpeseng nein Suda serepein meipwono nan wasahn tiak kreipo.+
ע [Ayin]
16 I wie sengisengki mepwukat;+ pilen mesei wie kereker.
Pwe aramas me kak kansenamwahwihiehla de kakehleiehda dohsang ie.
Solahr en nei pwutak kan koapworopwor, pwe imwintihtio kaloweiedier.
פ [Pe]
17 Saion kapalahr peh kan;+ sohte me kin kansenamwahwih.
Siohwa ketin ruwese en Seikop imwintihti kan koaros me mi limwah, ren mahweniong ih.+
Serusalem wialahr mehkot kasaut ehu ong irail.+
צ [Tsade]
18 Siohwa me ketin pwung,+ pwe I uhwongada sapwellime kehkehlik kan.*+
Kumwail aramas akan koaros, kumwail rong oh kilang ei medek.
Nei meipwon kan* oh nei mwahnakapw akan selidier.+
ק [Qoph]
19 I likwerih ei mwohnlimpoak kan, ahpw re pangiehla.+
Nei samworo kan oh nei ohl mah kan sohralahr nan kahnimwo,
Ni ar raparapahki mwenge pwe ren kak mour.+
ר [Resh]
20 Maing Siohwa, komw ketin mahsanih pwe I milahr nan apwal laud.
Loaleiet* kin wie lokolok.
Mohngiongiet kin pwunod, pwehki I uhdahn uhwongada.+
Kedlahs kemelahr nei seri kan liki;+ mehla pil mi nan ihmw.
ש [Shin]
21 Aramas akan rongehr ei sengsengloal; sohte me kin kansenamwahwih ie.
Ei imwintihti kan koaros rongehr ei apwal.
Re perenda, pwehki omw ketikidohng ie met.+
Ahpw komw pahn ketikihdo rahn me komw ketin lohkihdao,+ ni ahnsowo re pahn duweiehla.+
ת [Taw]
22 Arail suwed koaros en sansalda mwohmwi, oh komwi en ketin kaloke irail,+
Duwehte omwi ketin kaloke ie pwehki dipei kan koaros.
Pwe ei sengloal me tohto, oh mohngiongiet me soumwahu.
א [Aleph]
2 Siohwa ketin kipehkidier nein Saion serepein sapwellime engieng, duwehte depwek ehu!
E ketin kesehdier lingan en Israel nin sampah sang nanleng.+
E sohte ketin tamataman utupen aluweluwe kan+ ni rahnen sapwellime engieng.
ב [Beth]
2 Siohwa ketin kadallelahr wasahn kousoan en Seikop koaros ni soh mahk.
Nan sapwellime engieng e ketin karangkehdi wasa kelpene kehlail kan en Suda.*+
E ketin kesehdi wehio+ oh eh lapalap akan+ nanpwel oh kasohwauwihala.
ג [Gimel]
3 Nan sapwellime engieng e ketin kauwehla kehl* en Israel koaros.
E sohte ketin sewesei kitail ni ahnsou me imwintihti kan kohdo,+
Oh sapwellime engieng wie lullul ong Seikop rasehng kisiniei me kin kamwomwala soahng koaros limwah.+
ד [Daleth]
4 Duwehte imwintihti men, e ketin kadangpesengier sapwellime kesik ketieu oh lime palimaun onopadahr en peiong kitail;+
E kin ketin usehlahte kemehla irail koaros me kesempwal nan masatail kan.+
Oh e ketin wudekihdi sapwellime engieng rasehng kisiniei+ nan impwal en Saion.*+
ה [He]
5 Siohwa ketin duwelahr imwintihti men;+
E ketin kadallelahr Israel.
E ketin kadallelahr eh imwen doulik kan koaros;
E ketin kauwelahr eh wasa kelpene kehlail kan koaros.
Oh e ketin kalaudehla mwahiei oh sengiseng nan Suda.*
ו [Waw]
6 E kin ketin wiakauwe sapwellime impwal,+ rasehng imwios ehu nan mwetuwel.
E ketin katokehdi* sapwellime kasarawi.+
Siohwa ketin kahrehiong kasarawi oh sapad en manokonokla nan Saion,
Oh nan sapwellime engieng kowahlap e sohla ketin nsenohki nanmwarki oh samworo.+
ז [Zayin]
7 Siohwa ketin soikala sapwellime pei sarawio;
E ketin kesehla sapwellime wasa sarawio.+
E ketikihong kelen imwen doulik kehlail kan nan pehn imwintihtio.+
Re ngihl laudida nan tehnpesen Siohwa,+ duwehte rahnen kasarawi ehu.
ח [Heth]
8 Siohwa ketin koasoanedier en kamwomwala kelen Saion.*+
E ketin waikpesengier sahl en sosohngo.+
E sohte ketin kauhdi lime en kamwomwala.*
Oh e ketin kahrehiong koasoakoasoak oh kehl en mwahiei.
Mepwukat koaros luwetala.
ט [Teth]
9 Eh ewen kehl kan kihrlahr nin sampah.+
E ketin kamwomwala oh kauwehla eh lepin tuhkehn kateng kan.
Eh nanmwarkio oh eh lapalap akan mi nan wehi kan.+
Sohte kosonned;* pil eh soukohp kan sohte diar kaudiahl sang rehn Siohwa.+
י [Yod]
10 Ohl mah kan en Saion* mwomwohd nanpwelo sohte mweseisei.+
Re kesedahng pwelpar pohn moangarail kan oh likawih likoun nsensuwed.*+
Meipwon en Serusalem kan poarikidiong moangarail kan nanpwel.
כ [Kaph]
11 Pwoaren mesei kat lokasangehr kereker en pilen mesei kan.+
Loaleiet* kin wie lokolok.
Ei eh wudekdiongehr pohn pwehl, pwehki nei aramas akan* lohdier,+
Pwehki seri kan oh seri pwelel kan lipwongmasala nan wasahn tuhpene kan nan kisin kahnimwo.+
ל [Lamed]
12 Re kin idihdek rehn arail nohno kan, “Ia krein* oh wain en?”+
Ni ar kin lipwongmasala rasehng emen me ohla nan wasahn tuhpene kan nan kahnimwo,
Ni ar mour* eh kin sosohrala nan pehn ar nohno kan.
מ [Mem]
13 Serusalem,* dahme I kak kasalehiong uhk,
De dahme I kak karasahiong uhk?
Saion* me meipwon, dahme I kak kapahrekiong uhk pwehn kansenamwahwihiukala?
Pwe omw ohlahn me laud rasehng sehd.+ Ihs me kak kamwahwihiukala?+
נ [Nun]
14 Kaudiahl kan me omw soukohp kan kilangada duwen kowe me likamw oh sohte katepe,+
Oh re sohte kasalehda omw sapwung pwehn pereiukasang selidi,+
Ahpw re usehlahte koasoiaiong uhk kaudiahl likamw oh widing kan.+
ס [Samekh]
15 Irail koaros me keid nanialo kin lopwolopw ni ar kepitkin uhk.+
Re kin kuwai ni pwuriamwei+ oh tuwelekiong Serusalem,* nda:
“Ia duwe, ih kahnimwo met me re kin nda, ‘E uhdahn kaselel, oh e kin kaperenda tohnsampah pwon’?”+
פ [Pe]
16 Omw imwintihti kan koaros sarahiong uhk.
Re kin kuwai oh ngihrail kan kin tehtehrek oh nda: “Se kadallelahr.+
Ih rahno met me se awiawih!+ E leledohr, oh se kilangehr!”+
ע [Ayin]
17 Siohwa ketin wiadahr dahme e ketin kupwurehda;+ e ketin kapwaiadahr sapwellime mahseno,+
Dahme e ketin kehkehlingki mahso.+
E ketin karangkehdi ni soh mahk.+
E ketin mweidala imwintihtio en poweiukedi oh perenda; e ketin kalaudehla kehl* en omw imwintihti kan.
צ [Tsade]
18 Kelen Saion,* mohngiong en aramas akan kin liklikweriong Siohwa.
Pilen mas kan en keredi rasehng pillap ehu nin rahn oh nipwong.
Ke dehr kommoal, ke dehr mweidohng mesomw kan en kommoal.
ק [Qoph]
19 Uhda! Likwer nipwong, ni tepidahn awahn silasil kan.
Wudekihiei audepen mohngiongomw rasehng pihl mwohn silangin Siohwa.
Kauwadalahng ih pehmw kan oh kapakapki mouren* noumw seri kan,
Me lipwongmasala ni keimwen ahl koaros pwehki lehk lapalap.+
ר [Resh]
20 Maing Siohwa, komw ketin mahsanih sapwellimomwi aramas akan me komw ketin kaloke.
Ia duwe, lih akan pahn tungutungoalehte seri pwelel kan me re neitikiehdi, neirail seri roson kan?+
De samworo kan oh soukohp kan pahn kamakamala nan sapwellimen Siohwa wasa sarawio?+
ש [Shin]
21 Mwahnakapw oh ohl mah kan melahr wonohn nanial akan.+
Nei meipwon kan* oh nei mwahnakapw kan mehkilahr kedlahs.+
Komwi ketin kemeiraillahr ni rahnen omwi engieng. Komwi ketin kemeiraillahr ni soh mahk.+
ת [Taw]
22 Duwehte omwi ketin lukehdo aramas akan ong rahnen kasarawi ehu,+ komwi ketin malipehdo masak sang wasa koaros.
Ni rahnen engieng en Siohwa, sohte emen me pitila de mourla;+
Ei imwintihtio kasohrehla irail me I neitikiehdi oh kakairada.+
א [Aleph]
3 Iei ngehi me kilang kahpwal pwehki sokon en sapwellime engieng.
2 E ketin kasareiehla oh wiahiong ie I en alu nan rotorot, kaidehn nan marain.+
3 Ni mehlel, lime kin pwurupwurehng uhwong ie rahn ehu pwon.+
ב [Beth]
4 E ketin kalipwelipwehda paliwereiet oh kiliet;
E ketin katimpeseng tih kat.
5 E ketin kapiliepene; e ketin kapilkiniepene pwoisin katik+ oh kahpwal.
6 E ketin idingohng ie I en mwohd nan wasa rotorot kan, duwehte aramas emen me mehla mahso.
ג [Gimel]
7 E ketin keleiehdi, pwe I en sohte kak pitila;
E ketin salihkiniehdi selmete prons toutou kan.+
8 Oh ni ei kin tihwohla likilikwer peksawas, e kin ketin soikala* ei kapakap.+
9 E ketin perehkihla elei kan takai perperda kan;
E ketin kapirekihala elei kan.+
ד [Daleth]
10 E kin ketin awiawih ie pwehn rukihedi rasehng pehr men, rasehng laion men me rukuruk.+
12 E ketin kadangpesengier sapwellime kesik ketieu, oh wiahkin ie mehn akpeinen ehu ong arep kan.
ה [He]
13 E ketin kasikiheki ei mwidihlik kan arep* en sapwellime kopwoun arep kan.
14 I wialahr mehn kepit ong aramas koaros, oh re kin kapailokehkin ie ar koul kan rahn ehu pwon.
15 E ketin audehkiniehda soahng katik kan oh usehlahte kanimpilehkin ie tuhke sadik.+
ו [Waw]
17 Komwi kin ketikihsang ie popohl; I manokelahr dahme mwahu.
18 Eri I nda: “Ei lingan oh pil ei koapworopworki Siohwa sohralahr.”
ז [Zayin]
19 Komw ketin tamataman ei apwal oh sohte imwei,+ tuhke sadik oh pwoisin katik.+
20 Komw uhdahn pahn ketin tamataman oh maliedi pwehn sewese ie.+
21 I kin medemedewe met nan mohngiongi; ihme kahrehda I pahn awih komwi ni kanengamah.+
ח [Heth]
22 Pwehki sapwellimen Siohwa limpoak loalopwoat kitail sohte sohrala,+
Pwe sapwellime kadek kalahngan sohte kin tokedi.+
23 Sapwellime kadek kalahngan kin kapw nimenseng koaros;+ sapwellime lelepek me mwuledek.+
24 I nda, “Siohwa iei ei sohso,+ ihme kahrehda I pahn awih ih ni kanengamah.”+
ט [Teth]
25 Siohwa kin ketin kupwuramwahu ong me kin koapworopworki ih,+ ong emen* me kin usehlahte rapahki ih.+
26 E mwahu en nennenla awih*+ sapwellimen Siohwa komour.+
27 E mwahu ong aramas emen en wa mehn wisik ni eh pwulopwul.+
י [Yod]
28 En kelekelehpw mwomwohd oh nennenla ni Eh ketikihdiong wisiket powe.+
29 En poarikidiong mese nan pwelpar;+ pwe mweinele miehte koapworopwor.+
30 En kihla likinsepe rehn me kin pohr ih; en uhdahn mwamwahlla.
כ [Kaph]
31 Pwe Siohwa sohte pahn ketin soingkitailla kohkohlahte.+
32 Mendahki e ketin kahrehda pahtou, e pil pahn ketin kasalehda kadek kalahngan nin duwen sapwellime limpoak loalopwoat mwuledek.+
33 Pwe e sohte kin kupwurperenki ketikihong aramas akan apwal oh pahtou.+
ל [Lamed]
34 En tiakedi me sensel kan koaros nin sampah,+
35 En kihsang pwung pahrek en aramas emen mwohn silangin Wasa Lapalahpie,+
36 En widingehdi aramas emen nan eh repenpwung
—Siohwa sohte kin ketin kupwurki soahng pwukat.
מ [Mem]
37 Eri, ihs me kak koasoia mehkot oh wiahiong met en pweida ma Siohwa sohte ketin kehkehlingki?
38 Soahng suwed kan oh soahng mwahu kan sohte kin wiahkintehieu
Pwilisang nin doauesen Wasa Lapalahpie.
39 Dahme kahrehda aramas men* pahn kaulimki imwilahn dipe?+
נ [Nun]
40 Kitail en kasawih oh mwasamwasahn elen atail mour,+ oh kitail pwurala rehn Siohwa.+
41 Kitail en peki rehn Koht en nanleng ni mohngiong mehlel oh kitail kapahda pehtail kan, patohwan:+
42 “Se dipadahr oh uhwong komwi,+ oh komwi sohte kupwur mahkohng kiht.+
ס [Samekh]
43 Komwi ketin engiengda oh ireikitdihsang sen pwarowei;+
Komwi ketin pwakih oh kemeikitala ni soh mahk.+
44 Komwi kin ketin irehdi at pwarowei rehmwi sang ni depwek ehu, pwe at kapakap kan en dehr lelewei.+
45 Komwi ketin wiahkin kiht kihd oh mehn lekdekla nanpwungen aramas akan.”
פ [Pe]
46 At imwintihti kan koaros kin sarahiong kiht.+
47 Ahnsou koaros se kin masak oh lidipdi,+ oh se ohla oh tehnla.+
48 Pilen mesei kat pwilipwilwei rasehng piletik kan pwehki ohlahn nei aramas akan.*+
ע [Ayin]
49 Pilen mesei kat kin kereker, sohte uhdi,+
50 Lao Siohwa pahn ketin mahsendihdo sang nanleng oh mahsanihkitada.+
51 I pahtouki ei kilang dahme wiawihong serepein kan koaros en ei kahnimwo.+
צ [Tsade]
52 Ni soh kahrepe ei imwintihti kan pwakihiehdi rasehng menpihr men.
53 Re song en katokehdi ei mour nan pwoahro; re kin nantihlahte katekate ie.
54 Pihl loalada pohn moangeiet, oh I nda: “I pahn melahr!”
ק [Qoph]
55 Maing Siohwa, I likweriong mwaromwi sang wasa loal nan pwoahro.+
56 Komw ketin karonge ngileiet; komw dehr ketin sohpeisang ei peksawas oh ei peki I en saledekla.
57 Komwi ketin karanih ie ni rahn me I likweriong komwi. Komwi ketin mahsanih: “Ke dehr masak.”
ר [Resh]
58 Maing Siohwa, komwi ketin utung ei repenpwung, komwi ketin kasaledekalahr* ei mour.+
59 Maing Siohwa, komwi ketin mahsaniher sapwung me wiawihong ie; komw kupwurkalahngan oh ketikihong ie pwung pahrek.+
60 Komwi ketin mahsaniher ar dupuk koaros, ar pilahn mwersuwed kan koaros ong ie.
ש [Sin] de [Shin]
61 Maing Siohwa, komwi ketin karongeier ar kepit kan, ar pilahn mwersuwed kan koaros ong ie,+
62 En me uhwong ie ar koasoi kan oh ar mwengininginkin ie rahn ehu pwon.
63 Komw ketin mahsanih irail; mehnda ma re mwomwohd de kesikesihnen, re kin kapailoke ie nan ar koul kan!
ת [Taw]
64 Maing Siohwa, komw pahn ketin dupungkihong irail nin duwen ar wiewia kan.
65 Komw pahn ketin kakeptakairailla, ni omwi ketin kerieirailla.
66 Maing Siohwa, sang ni sapwellimomwi engieng komw pahn ketin pwakih irail, oh kamwomwirailla sang nin sampah.
א [Aleph]
4 Kohl lingalingo solahr melengileng, kohl kaselelo!+
Takai sarawi kan+ mwarahkpeseng ni keimwen ahl koaros!+
ב [Beth]
2 A me pid duwen nein Saion seri kesempwal kan, me kesempwal duwehte kohl me mwakelekeldahr,
Re duwehla sah pwehl kan,
Me sounwia dahl men wiahda!
ג [Gimel]
3 Kidien wel kan pil kin kadihdi wahrail kan,
Ahpw nei aramas akan* lemeila,+ duwehte ostris kan nan sapwtehn.+
ד [Daleth]
4 Lowen seri pwelel kin pasdahng pahn ngatangate pwehki eh men nimpil.
Seri kan kin peki pilawa,+ ahpw sohte me kin kihong irail.+
ה [He]
5 Irail me kin tungoale mwenge kaselel kan mahso, duhpeklahr* oh kin wonohn nanial akan.+
Irail me tikida likawih likou pweilaud kan* mahso,+ kin wonohn nan koasoakoasoak en pehs kan.
ו [Waw]
6 Kalokepen* nei aramas akan* laudsang kalokepen dipen Sodom,+
Me kamwomwmwomwla ni ahnsou mwadang, oh sohte me sewese ih.+
ז [Zayin]
7 Nah Nasaraid kan+ mwakelekel sang sinoh, pwetepwet sang milik.
Re weitahta sang rahr kaselel kan; re duwehte sapair melengileng kan.
ח [Heth]
8 Mwomwarail kan toantoalsangehr pehs;*
Sohte me kin pohnese irail nanial akan.
Kilirail kan mwerekidier pohn tihrail kan;+ e duwehla tuhke ngalangal.
ט [Teth]
9 Irail me mehkihla kedlahs mwahusang irail me mehkihla lehk lapalap,+
Irail me luwetala, duwehte ar dongkihdi kedlahs pwehki soh itar en mwenge nan mwahto.
י [Yod]
10 Pehn lih akan me kin kadek mahso, pwoailihdahr pein neirail seri kan.+
Seri pwukat wialahr kanarail mwenge* erein ohlahn nei aramas akan.*+
כ [Kaph]
11 Siohwa ketin kasaledahr sapwellime engieng;
E ketin wudekihiei sapwellime engieng kowahlap.+
E ketin saunda kisiniei nan Saion me kamwasikahla poahsoane kan.+
ל [Lamed]
12 Nanmwarkien sampah kan oh tohnsampah koaros sohte kamehlele
Me imwintihti kan pahn pedolong ni ewen kelen Serusalem kan.+
מ [Mem]
13 Met wiawi pwehki dipen nah soukohp kan oh sapwung en nah samworo kan,+
Me kakerehdi ntahn aramas pwung kan wasao.+
נ [Nun]
14 Re kohkohseli nanial akan duwehte me maskun kan.+
Re saminkilahr nta,+
Kahrehda sohte me kak doahke ar likou kan.
ס [Samekh]
15 Aramas akan kin werkilahng irail: “Kumwail kohkohla! Kumwail me samin! Kumwail kohkohla! Kohkohla! Kumwail dehr doahkei kiht!”
Pwe solahr imwarail oh re kin kohkohseli.
Aramas akan ndinda nan wehi kan: “Re sohte kak mihmi rehtail wasaht.*+
פ [Pe]
Aramas akan sohte pahn wauneki samworo kan,+ re sohte pahn nsenohki ohl mah kan.”+
ע [Ayin]
17 Pil ahnsou wet masatail kan pwangahkidahr raparapahki mwahl sawas.+
Kitail kilengwei oh awiawih sawas sang wehi ehu me sohte kak doareikitailla.+
צ [Tsade]
18 Atail imwintihti kan mwasamwasahn kitail+ kahrehda kitail sohte kak aluseli nan atail wasahn tuhpene kan.
Imwin atail mour kerendohr; atail rahn akan imwiseklahr, pwe imwin atail mour leledohr.
ק [Qoph]
19 Irail me pwakih kitail marahrahsang ikel en pahnlahng kan.+
Re pwakihkitaildi pohn nahna kan; re rukihkitaildi nan sapwtehno.
ר [Resh]
20 Atail esingek en mour, sapwellimen Siohwa me keidio,+ lohdier nan arail pwoahr laudo,+
Iei ih me kitail kin nda: “Kitail pahn mour pahn mweteh nan wehi kan.”
ש [Sin]
21 Edom*+ me kin kousoan nan sapwen Us, perenda.
Ahpw kepo pil pahn kohieng uhk,+ oh ke pahn sakaula oh kasale omw kilisou.+
ת [Taw]
22 Saion,* kalokepen omw sapwung imwiseklahr.
E sohte pahn ketin pwurehng kalipeiukala.+
Ahpw Edom,* Koht pahn ketin kalokehkin uhk omw sapwung.
E pahn ketin kasalehda dipomw kan.+
5 Maing Siohwa, komw ketin tamataman dahme wiawihong kiht.
Komw ketin mahsanih duwen at mwamwahlla.+
2 At sohso kohiengehr mehn keiru kan, imwat kan kohiengehr mehn liki kan.+
3 Se wialahr seri sepwoupwou kei me sohte ar pahpa; at nohno kan duwehla liohdi kei.+
4 Se anahne pwain pwehn nim pein nimat pihl,+ oh se pil anahne pwain pein at tuwi kan.
5 Irail me pwakipwakih kiht lelehr ni tepinwarat kan;
Se pwangadahr, ahpw se sohte kak kommoal.+
6 Se koapworopworkihla Isip+ oh Asiria,+ pwe sen ale pilawa me itarohng sen tungoale.
7 Samat mehn mahs ako me dipada solahr mie, ahpw se pahn pwukoahki arail sapwung kan.
8 Ladu kan kin kakaun kiht met; sohte me pahn kapitkitasang nan pehrail kan.
9 At mour* kin mihla nan keper ni at kin wahlongodo kanat pilawa,+ pwehki irail me kolokol kedlahs nan sapwtehno.
10 Duhpek kin kahrehda at soumwahu karakar, kahrehda kilit kan karakarada duwehte wasahn kisiniei mwehl ehu.+
11 Re kanamenekihala* lih pwopwoud kan nan Saion, meipwon kan nan kahnimw en Suda kan.+
12 Lapalap akan langada ni pehrail,+ oh ohl mah kan sohte wahuparail.+
13 Mwahnakapw kan kin weuwa takain ngidar pilawa kan, oh pwutak kan kin dipekelekelki ar weuwa wisik toutou en tuwi kan.
14 Ohl mah kan sohrasangehr ni ewen kelen kahnimwo;+ mwahnakapw kan sohte kin kesekeseng.+
15 Peren sohrasangehr nan at mohngiong kan; at kahlek wekiongehr ni pahtou.+
16 Nihno pwupwsangehr pohn moangat. Meid suwediong kiht, pwehki se dipadahr!
17 Pwehki met at mohngiong kan soumwahuda,+
Oh pwehki mepwukat masat kan ediedla,+
18 Pwehki Nahna Saion tehnlahr,+ kidien wel kan* kin kohkohseli powe.
19 Ahpw komwi, Maing Siohwa, komwi pahn ketidi nan mwoahl kohkohlahte.
Mwoalomwi pahn mihmi kohkohlahte.+
20 Dahme kahrehda komw ketin likidmelieikitala kohkohlahte oh keseikitala ahnsou reirei?+
21 Maing Siohwa, komw ketin kapwureikitodo rehmwi, oh se uhdahn pahn pwurowei rehmwi.+
Komw ketin kasapahldohng kiht rahn kaselel kan duwehte mahso.+
22 Ahpw, komwi ketin soingkitala douluhl.
Komwi uhdahn ketin engiengte paht.+
Irelaud 1-4 wia koulen kedepwidepw kan me ntingdi ni irekidien mesen nting en lokaiahn Ipru.
De “tohto towe.”
De “peinakapw kan.”
LI, “moange.”
LI, “nein Saion serepein.”
De “me kin pwakih irail.”
De “perenkihda.”
Lokaiahn karasaras ehu me dokedoke Serusalem.
LI, “doauese.”
De “peinakapw kan.”
LI, “mwasahl kan.”
LI, “nein Suda serepein.”
LI, “kod.” Kilang KLL.
LI, “nein Saion serepein.”
LI, “nein Suda serepein.”
De “kauwehla.”
LI, “nein Saion serepein.”
LI, “en kadallehla.”
De “kaweid.”
LI, “nein Saion serepein.”
E wiawihkihda mwein likou arekarek me kin wiahda ehd.
LI, “mwasahl kan.”
LI, “nei aramas nair serepein kan.” Lokaiahn karasaras ehu ni koasoi kaselel kan, ele kasalepen pepehm en poakehla.
Kilang KLL.
LI, neʹphesh. Kilang KLL.
LI, “Nein Serusalem serepein.”
LI, “Nein Saion serepein.”
LI, “nein Serusalem serepein.”
LI, “kod.” Kilang KLL.
LI, “nein Saion serepein.”
LI, neʹphesh. Kilang KLL.
De “peinakapw kan.”
De “irehdi.”
De kakete, “kahrehiong ie I en wonohnte.”
LI, “pwutak.”
LI, neʹphesh. Kilang KLL.
De “en awih ni kanengamah.”
LI, “aramas momour men.”
LI, “nei aramas nair serepein.”
LI, “pwainda sapahl.”
LI, “nei aramas nair serepein.”
LI, “tehnlahr.”
LI, “nan weitahta,” me iei, likawih likou weitahta pweilaud.
LI, “sapwung en.”
LI, “nei aramas nair serepein.”
LI, “toantoal.”
De “kanarail mwengehn mwahiei.”
LI, “nei aramas nair serepein.”
De “kousoan wasaht nin duwen mehn liki kei.”
LI, “Silangin Siohwa.”
LI, “Nein Edom serepein.”
LI, “Nein Saion serepein.”
LI, “nein Edom serepein.”
LI, neʹphesh. Kilang KLL.
De “angkehlailiong.”
Ni lokaiahn Ipru, e wehwehki “fox,” mahn me mwomwen kidi nan Israel oh sahpw kan me kapilpene.