SOEL
1 Siohwa ketin mahsanihong Soel* nein Petuel:
2 “Kumwail ohl mah kan, kumwail rong met,
Oh kumwail tohn sahpwo* pwon, rong kanahieng.
Ia duwe, mie mehkot duwehte met me wiawiher nan amwail ahnsou
De nan mwehin samamwail mehn mahs ako?+
3 Padahkihong noumwail seri kan duwen met,
Oh noumwail seri kan en padahkihong neirail seri kan duwen met,
Oh neirail seri kan en uhd padahkihong dihen mwuhr kan.
4 Dahme luhwehdi sang loukust mehwo, pelin loukust kangala;+
Oh dahme luhwehdi sang pelin loukust, loukust me saikinte eh pehnpihr kangala;
Oh dahme luhwehdi sang loukust me saikinte eh pehnpihr, loukust me kin kangala mehkoaros me mi mwowe kangalahr.+
5 Kumwail me kin kamamsakau,+ pirida oh mwahiei!
Kumwail koaros me kin nim wain, sengiseng,
Pwe wain mem kohsangehr ni awamwail kan.+
6 Pwe pelin loukust ngeder ehu me duwehte wehi ehu kodohr nan sapweio, kehlail oh sohte kak wadawadedi.+
Ngih duwehte ngihn laion men+ oh aupah duwehte aupahn laion men.
7 E kamwomwalahr ei tuhkehn kreipo oh wekidohng ei tuhke piko ni tuken tuhke pwoat,
E rerehsang douluhl kilirail kan oh keseirailla,
Kahrehda sohla kilin rahn tuhke pwukat.
8 Kumwail sengiseng duwehte meipwon men* me likawih likoun nsensuwed* eh kin sengisengki
Mehlahn eh ohl kamwohd.*
9 Pwe sohla meirong en krein*+ oh meirong en wain+ me kin wisikdo nan tehnpesen Siohwa;
Samworo kan, sounpapah en Siohwa kan, kin mwahmwahiei.
10 Mwahto tehnlahr, pwehlo kin mwahiei;+
Pwe kreino mwomwlahr, wain kapw madekengdahr, leho nekilahr.+
11 Soumwet kan pwunodada, soumwet en kreip kan mwahiei,
Pwehki wihd oh parli;
Pwe rahk en mwahto sohralahr.
12 Tuhkehn kreip mengilahr,
Tuhke pik mengilahr.
Tuhke pwohmakraneid, tuhke pahm* oh tuhke apel,
Tuhke koaros nan mwahto mengilahr;+
Pwe peren wekidekiong ni namenek nanpwungen aramas akan.
13 Kumwail samworo kan, likawihada likoun nsensuwed* oh mwahiei;*
Kumwail sounpapah kan en pei sarawio,+ sengiseng.
Kumwail sounpapah kan en ei Koht, pedolong oh likawih likoun nsensuwed pwohng ehu pwon;
Pwe sohte me kin wahdo meirong en krein+ oh meirong en wain+ nan tehnpesen amwail Koht.
14 Lohki* kaisihsol ehu; pakairki kapokon sarawi ehu.+
Kapokonepene ohl mah kan, iangahki tohn sahpwo pwon,
Ni tehnpesen Siohwa amwail Koht,+ oh likweriong Siohwa peki sawas.
15 Meid suwed pwehki rahno!
Pwe rahnen Siohwa kerendohr,+
Oh e pahn kohdo rasehng kamwomwala ehu sang me Keieu Manamano.
16 Mwenge kan sou wisiksangehr mwohn masatail kan,
Oh sohla peren nan tehnpesen atail Koht?
17 Werentuhke kan* mengilahr pahn neirail sapwel kan.
Imwen nahk kan mwomwlahr.
Imwen nahk krein kan kamwermwerdier, pwe kreino mengilahr.
18 Pil pelinmen kan kin ingihng!
Pelin kou kan pingidahr oh kohkohseli, pwe sohte arail mohs!
Oh pelin sihpw kan kin wie lokolok.
19 Maing Siohwa, I pahn likweriong komwi;+
Pwe kisiniei kamwomwalahr mohs kan en sapwtehno,
Oh mpwulen kisiniei ehu kamwomwalahr tuhke koaros nansapwo.
20 Pil mahn lawalo kan kin likweriong komwi,
Pwehki piletik kan madadahr
Oh kisiniei kamwomwalahr mohs kan en sapwtehno.”
2 “Peuk mehn pepeuk* ehu nan Saion!+
Werkihda wer en mahwen nan ei nahna sarawio.
2 E wia rahn rotorot oh mahliok,+
Rahnen depwekin oh rotorot mosul,+
Rasehng marain en nin sohrahn me kohkohpeseng pohn nahna kan.
Mie pwihnen aramas tohto oh kehlail ehu;+
Saikinte pak ehu mie mehkot me duwehte met,
Oh sohte me pahn pil mie mwuhr
Erein sounpar kan nan dih kan koaros.
3 Mwowe kisiniei ehu kin kamwomwala,
Oh mwuri mpwul en kisiniei ehu kin kamwomwala.+
Sahpw me mi mwowe duwehte mwetuwel en Ihden,+
Ahpw sahpw me mi mwuri iei sapwtehn ehu,
Oh sohte mehkot kak pitila.
4 Mwomwe duwehte mwomwen oahs kan,
Oh re kin tang duwehte oahs en mahwen kan.+
5 Ngihlo rasehng ngilen kuruma kan ni ar kin lusulus pohn kadoken nahna kan,+
Rasehng ngilen posopos en kisiniei me kin isikala diperen dihpw kan.*
E rasehng pwihnen aramas kehlail ehu me koasoansoandi ni ireken mahwen.+
6 Pwehki irail, aramas akan pahn lokolok.
Masarail kan koaros pahn poh reireila.
7 Re kin pei duwehte sounpei kan,
Re kin daur dihd kan duwehte sounpei kan,
Emenemen kin inenlahte mwowe,
Oh re sohte kin wetsang ar ahl akan.
8 Re sohte kin siken emenemen;
Emenemen kin inenwohngete eh ahl.
Ma tehtehn mahwen kan* kin kahrehiong ekei ren pwupwudi,
Meteikan kin wonlahte mwowe.
9 Re kin tangowohng nan kahnimw, re kin tang pohn dihd.
Re kin daur ihmw kan, doulong nan wenihmwtok kan duwehte sounpirap men.
10 Sahpw kin rerada oh nanleng kin itikekda mwohrail.
Ketipin oh maram rotorotalahr,+
Oh usu kan sohla linge.
11 Siohwa pahn ketin kalaudehla kapitie mwohn sapwellime karis en sounpei,+ pwe sapwellime kariso me inenen tohto.+
Pwe ih me kapwaiada sapwellime mahsen me kehlail;
Pwe rahnen Siohwa me lapalap oh uhdahn kamasepwehk.+
Ihs me kakohng met?”+
12 Siohwa ketin mahsanih: “Ahpw pil ahnsou wet, kumwail pwurodo rehi ni mohngiongimwail unsek,+
Ni kaisihsol+ oh sengiseng oh mwahiei.
13 Tehrpeseng amwail mohngiong kan,+ a kaidehn amwail likou kan,+
Oh pwurodo rehn Siohwa amwail Koht,
Pwe e me kupwurkalahngan oh kadek kalahngan, sohte kin mwadang engiengda+ oh diren limpoak loalopwoat,+
Oh e pahn ketin wekidala kupwure* duwen eh pahn ketikihdo kahpwalo.
14 Ihs me ese ma e pahn ketin sohpeisang eh engieng oh wekidala kupwure*+
Oh ketikihong kumwail kapai ehu,
Meirong en krein ehu oh meirong en wain ehu ong Siohwa amwail Koht?
15 Peuk mehn pepeuk ehu nan Saion!
Lohki* kaisihsol ehu; pakairki kapokon sarawi ehu.+
16 Kapokonepene aramas akan; kasarawihala mwomwohdiso.+
Kihpene ohl mah kan; kapokonepene seri kan oh seri pwelel kan.+
Ohl kamwohd oh lih kamwohd en pedoisang nan ara pere.
17 Nanpwungen palangko oh pei sarawio+
Samworo kan, sounpapah en Siohwa kan en sengiseng oh nda:
‘Maing Siohwa, komw ketin poakehla sapwellimomwi aramas akan;
Komw dehr ketin wiahkihla omw sohso mehkot me aramas kin kouruhrki,
Ni omwi ketin mweidohng wehi kan ren kaunirailda.
Dahme aramas akan en ndahki, “Ia arail Kohto?”’+
18 Eri Siohwa pahn ketin ngoangki pere sapweo
Oh poakehla sapwellime aramas akan.+
19 Siohwa pahn ketin sapeng sapwellime aramas akan:
‘I pahn kadarewohng kumwail krein oh wain kapw oh leh,
Oh kumwail uhdahn pahn medla;+
I sohla pahn wiahkinkumwailla mehkot kanamenek ehu nan wehi kan.+
20 I pahn kasarelahng mehn paliepeng kan wasa doh sang kumwail;
I pahn kamwarakirailpeseng nan sahpw madekeng oh tehn ehu,
I pahn pwakihala neirail karis me kin mi mwowe ni sehden palimese*
Oh neirail karis me kin mi mwuri ni sehden palikapi.*
Paliwararail mehla kan pahn pwohsuwedla,
Oh pwohrail pahn kin kohkohda;+
Pwe E pahn ketin wia soahng laud kan.’
21 Sahpw, ke dehr masak.
Nsenamwahu oh pereperen, pwe Siohwa pahn ketin wia soahng laud kan.
22 Kumwail mahn en nansapw akan, kumwail dehr masak.
Pwe mohs kan en sapwtehno pahn molomolla,+
Oh tuhke kan pahn wa;+
Tuhke pik oh tuhkehn kreip pahn kapwarehda wah tohto.+
23 Kumwail nein Saion kan, pereperen oh nsenamwahu pwehki dahme Siohwa amwail Koht pahn ketin wia;+
Pwe e pahn ketikihong kumwail tepin ahnsoun keteu* ni uwen me konehng,
Oh e pahn ketin kamwerehdi keteu pohmwail,
Tepin ahnsoun keteu oh ahnsoun keteu en mwuhr,* duwehte mahso.+
24 Wasahn kihsang kilin krein kan pahn direkihla krein,
Oh wasahn tiak kreip kan oh olip kan pahn direkihla wain kapw oh leh.+
25 I pahn kapwungohng kumwail mehkan me sohrala sang kumwail nan sounpar ako
Me pelin loukust, loukust me saikinte eh pehnpihr, loukust me kin kangala mehkoaros me mi mwowe oh loukust mehwo kangalahr,
Nei lapalahn karis en sounpei me I kadarewei nanpwungamwail.+
26 Kumwail uhdahn pahn mwenge lao kumwail medla,+
Oh kumwail pahn kapinga mwaren Siohwa amwail Koht,+
Me kin ketin wia soahng kapwuriamwei kan ong kumwail;
Nei aramas akan sohla pahn pwurehng namenekla.+
27 Oh kumwail pahn anahne ese me I kin ketiket nanpwungen Israel+
Oh me ngehi me Siohwa amwail Koht+—sohte pil emen tohrohr!
Nei aramas akan sohla pahn pwurehng namenekla.
28 Mwurin mwo I pahn kamwerehdi ei ngehn sarawi*+ pohn soangen aramas koaros,
Oh noumwail pwutak kan oh serepein kan pahn wia kokohp,
Ohl mah kan rehmwail pahn wia ouraman kan,
Oh noumwail mwahnakapw kan pahn kilang kaudiahl kan.+
30 Oh I pahn kasalehda soahng kapwuriamwei kan nanleng oh nin sampah,
Nta oh kisiniei oh uhr en ediniei kan.+
31 Ketipin pahn rotala oh maram pahn weitahtahla duwehte nta+
Mwohn rahn lapalap oh kamasepwehk en Siohwa eh leledo.+
32 Oh koaros me kin likweriong mwaren Siohwa pahn komourla;+
Pwe irail me pitila pahn mi pohn Nahnahn Saion oh Serusalem,+ duwehte me Siohwa ketin mahsanih,
Me pitila kan me Siohwa ketin malipe.”
3 “Pwe kilang! ni rahn ako oh ahnsowo,
Ni ahnsou me I pahn kapwurehdo mehn Suda oh Serusalem me selidi kan,+
2 I pahn pil kapokonepene tohnwehi kan koaros
I pahn kadeik irail wasao+
Ong nei aramas akan oh ei sohso Israel,
Pwe re kamwarakirailpeseng nan wehi kan,
Oh re nehkpeseng sapweio nanpwungarail.+
3 Re kin wia usuhs pwe ren kihpeseng nei aramas akan;+
Re kin netikihla kisin pwutak men pwehn pwainda lihen netiki paliwere men
Oh netikihla serepein men pwe ren nim wain.
4 Oh pil, dahme kumwail kak uhkihong ie,
Dair oh Saidon oh sahpw koaros nan Pilisdia?
Kumwail kin dupungkihong ie mehkot?
Ma kumwail kin dupukohng ie,
I uhdahn pahn mwadangete dupukohng kumwail* nin duwen amwail wiewia kan.+
5 Pwehki kumwail wahsangehr nei silper oh kohl,+
Oh kumwail walahng nei dipwisou keieu kesempwal kan nan amwail imwen kaudok kan;
6 Oh kumwail netikilahr aramas en Suda oh Serusalem kan rehn mehn Krihs kan,+
Pwehn kadohwanirailla sang sapwarail;
7 I pahn kamwakid irail en kohdo sang wasa me kumwail netikinirailla ie,+
Oh I pahn dupukohng kumwail* nin duwen amwail wiewia kan.
8 I pahn netikihla noumwail pwutak kan oh serepein kan nan pehn aramas en Suda kan,+
Oh re pahn netikinirailla rehn aramas en Sipa kan, rehn tohnwehi doh ehu;
Pwe pein Siohwa me ketin mahmahsanih met.
9 Kumwail lohki met nan wehi kan:+
‘Kumwail onopadahng* mahwen! Kumwail eker ohl kehlail kan ren mwekid!
Sounpei koaros en kohwei oh pei!+
10 Wekidohng noumwail mehn deipwel kan ni kedlahs kan oh noumwail siset en lop tuhke ni ketieu kan.
Me luwet en nda: “I kehlail.”
11 Kumwail wehi koaros me mi limwah, kohdo oh sawas, pokonpene!’”+
Maing Siohwa, komw ketikihdo sapwellimomwi me kehlail kan* wasao.
12 “Wehi kan en mwekidida oh kohdahdo ni Wahun* Seosopat;
Pwe I pahn ket wasao pwehn kadeik wehi koaros me kapilpene.+
13 Lupukeki naipokos pwoat, pwe wahnsahpwo mwahuwongehr dondol.
Kohdihdo oh tiakpene, pwe wasahn tiak kreipo diralahr.+
Wasa me wain kan kin kusla ie wuduwudekla, pwe arail suwed me tohto.
15 Ketipin oh maram pahn rotorotala,
Oh usu kan pahn sohla linge.
16 Oh Siohwa pahn ketin wer rasehng laion men sang nan Saion,
E pahn ketin kapitie laudida sang nan Serusalem.
Oh nanleng oh sampah pahn rerada;
Ahpw Siohwa pahn ketin wia wasahn ruk ehu ong sapwellime aramas akan,+
Ihmw laud kehl kehlail ehu ong aramas en Israel kan.
17 Oh kumwail pahn anahne ese me ngehi me Siohwa amwail Koht, me ketiket nan Saion, ei nahna sarawio.+
18 Rahno nahna kan pahn kakusada wain mem,+
Dohl akan pahn kapwilewei milik,
Oh pihl pahn pwilipwilwei ni piletik en Suda kan koaros.
Utuhnpihl pwoat pahn pwiliwei sang nan tehnpesen Siohwa,+
Oh e pahn kalamwurih Wahun Tuhke Akesia kan.
19 Ahpw Isip pahn tehnla,+
Oh Edom pahn wiahla sapwtehn ehu,+
Pwehki tiahk lemei me wiawihong aramas en Suda kan,+
Re kakerehdi ntahn aramas soh dipe nan sapwen Suda.+
20 Ahpw ahnsou koaros e pahn kin mie tohn nan Suda,
Oh nan Serusalem, sang ehu dih lel ehu dih.+
21 I pahn wiahkin irail aramas me sohte diparail,* mendahki ei sohte wiahkin irail met;+
Oh Siohwa pahn ketiket nan Saion.”+
Wehwehki “Siohwa iei Koht.”
De “sampah.”
De “peinakapw men.”
E wiawihkihda mwein likou arekarek me kin wiahda ehd.
De “eh pwoud.”
Kilang KLL.
Tuhke me duwehte tuhkehn oahs.
E wiawihkihda mwein likou arekarek me kin wiahda ehd.
De “pikir mwaremwaramwail kan.”
LI, “Kasarawihala.”
De kakete, “Pik madekeng kan.”
LI, “kod.” Kilang KLL.
De “sampah.”
Met kin wehwehki kirikirihn krein me luwehdi nan mwahto mwurin dondol.
Tehtehn mahwen kan me mengei en koski.
De “koluhkihla.”
De “koluhla.”
LI, “Kasarawihala.”
Me iei, Sehden Mehla.
Me iei, Sehd Mediderenien.
Tepin ahnsoun keteu tepida mpen nanwerengen October. Kilang Ortk B15.
Keteu en mwuhr tepida mpen nanwerengen April. Kilang Ortk B15.
De “ei manaman.” LI, ruʹach. Kilang KLL “pneuʹma; ruʹach.”
De “ei manaman.” LI, ruʹach. Kilang KLL “pneuʹma; ruʹach.”
De “Wasa Patapat Pah nan.”
Wehwehki “Siohwa Iei Sounkopwung.”
LI, “pohn moangamwail kan.”
LI, “pohn moangamwail kan.”
LI, “Kasarawihala.”
De “sapwellimomwi sounpei kan.”
De “Wasa Patapat Pah nan.”
De “wasa patapat pah nan.”
De “wasa patapat pah nan.”
De “mehn keiru kan.”
LI, “wiahki ntahrail sohte dihp.”