MALAKAI

1 Kadeik ehu:

Mahsen en Siohwa ong Israel sang Malakai:*

2 Siohwa ketin mahsanih, “I kasalehiongkumwailehr limpoak.”+

Ahpw kumwail kin nda: “Ia mwomwen omwi ketin kasalehiong kiht limpoak?”

Siohwa ketin mahsanih, “Kaidehn Esau rien Seikop?+ Ahpw I kin poakohng Seikop, 3 oh Esau I kailongki;+ oh I wiahiong eh nahna kan en tehnla+ oh kihdi eh sohso ong kidien wel kan nan sapwtehno.”+

4 “Mendahki Edom eh nda, ‘Se mwutpenehr, ahpw se pahn pwurodo oh onehda sapahl wasa ohla kan,’ Siohwa kaunen karis en sounpei me ketin mahmahsen, ‘Re pahn kauwada, ahpw I pahn kamwerehdi, oh re pahn adaneki “sapwen suwed” oh “aramas me Siohwa ketin kadeikada kohkohlahte.”+ 5 Pwoaren masamwail kan pahn kilang met, oh kumwail pahn nda: “Siohwa en ketin linganla pohn sapwen Israel.”’”

6 “‘Pwutak men kin wauneki eh pahpa,+ oh ladu men kin wauneki eh soumas. Eri ma ngehi sahm men,+ a ia wahu me I warohng ale?+ Oh ma ngehi soumas* men, a ia lemmwin* me I warohng ale?’ Siohwa kaunen karis en sounpei ketin mahmahseniong kumwail samworo kan me kin mwamwahliki mwarei.+

“‘Ahpw kumwail kin nda: “Ia mwomwen at mwamwahliki mwaromwi?”’

7 “‘Ni amwail kin kihda mwenge* samin pohn ei pei sarawio.’

“‘Oh kumwail kin nda: “Ia mwomwen at kasamineikomwihla?”’

“‘Ni amwail kin nda: “Tehpel en Siohwa+ iei mehkot me warohng en mwamwahlla.” 8 Oh ni amwail kihda mahn maskun men ong meirong ehu, kumwail nda: “E sohte suwed.” Oh ni amwail kihda mahn mwoator men de me soumwahu men, kumwail nda: “E sohte suwed.”’”+

“Menlau, kumwail song kihda mepwukat ong amwail kepina. E pahn pwungkin kumwail de kasamwo kumwail ni kadek?” Siohwa kaunen karis en sounpei me ketin mahmahsen.

9 “Oh met, menlau, kumwail peki rehn Koht, pwe en ketin kasalehiong kitail kupwuramwahu. Ia duwe, soangen meirong pwukat me kumwail kihda, e pahn kupwurperenki emen kumwail?” Siohwa kaunen karis en sounpei me ketin mahmahsen.

10 “Oh ihs nanpwungamwail me men ritingedi wenihmw kan?*+ Pwe kumwail pil sohte kin isikada ei pei sarawio ma kumwail sohte kin ale pweipwei.+ I sohte kupwurperenkin kumwail, oh I sohte kupwurperenki kisakis en meirong ehu sang rehmwail,”+ Siohwa kaunen karis en sounpei me ketin mahmahsen.

11 “Pwe sang wasa me ketipin kin dakada ie lel wasa me e kin kihrla ie,* mwarei pahn wie lapalap nan wehi kan.+ Wasa koaros meirong kan pahn edinieida, oh meirong kan pahn wiawihda pwehn kawauwih mwarei, nin duwen kisakis mwahu ehu; pwehki mwarei pahn lapalap nan wehi kan,”+ Siohwa kaunen karis en sounpei me ketin mahmahsen.

12 “Ahpw kumwail kin kasaminehla met*+ ni amwail nda, ‘Sapwellimen Siohwa tehpel kin samin, oh meirong kan me mi powe, me iei mwenge kan pahn mwamwahlla.’+ 13 Kumwail pil nda, ‘Kilang! Ia uwen kapwang!’ oh kumwail kepitki met,” Siohwa kaunen karis en sounpei me ketin mahmahsen. “Oh kumwail wahdo mahn akan me pirapada, mwoator oh soumwahu. Ei, kumwail wahdo soahng pwukat nin duwen kisakis! Ia duwe, I pahn ale soangen meirong wet sang rehmwail?”+ Siohwa me ketin mahmahsen.

14 “Sounwiding men me naineki mahn wol roson mwahu men nan nah pelinmeno, ahpw kahukihla inou ehu oh meirongki mahn emen me mie sapwung kis* ong Siohwa pahn riahla. Pwe ngehi Nanmwarki lapalap men,+ oh wehi kan pahn lemmwiki oh wauneki mwarei,”+ Siohwa kaunen karis en sounpei me ketin mahmahsen.

2 “Eri samworo kan, kehkehlik wet ong kumwail.+ 2 Ma kumwail kahng rong oh sohte katengehdiong met nan amwail mohngiong en kalinganahla mwarei, I pahn kadarowohng kumwail keria,+ oh I pahn wekidohng amwail kapai kan ong ni keria kan.+ Ei, I wekidalahr kapai kan ong ni keria kan, pwehki amwail sohte katengehdiong met nan amwail mohngiong,” Siohwa kaunen karis en sounpei me ketin mahmahsen.

3 “Kilang! I pahn kauwehla* amwail werentuhke me kamwarakdi pwehki kumwail,+ oh I pahn kamwarakpeseng pwise pohn masamwail kan, pwisehn amwail kasarawi kan;* oh kumwail pahn wisiksang iangahki met. 4 Kumwail ahpw pahn ese me I kihongkumwailehr kehkehlik wet, pwe ei inou lap rehn Lipai en wie manamante,”+ Siohwa kaunen karis en sounpei me ketin mahmahsen.

5 “Ei inou lap reh iei inou lap en mour oh popohl, me I kihongehr ih, iangahki lemmwin.* E lemmwikin ie, ei, e wauneki mwarei. 6 Kosonned* en mehlel mi nan ewe,+ oh sohte mehkot suwed dierek ni kilin ewe kan. E iang ie kekeid ni popohl oh ni pwung,+ oh e sewese me tohto ren uhdihsang wia me suwed. 7 Pwe samworo men anahne ahneki loalokong ni kilin ewe, oh aramas akan anahne rapahki kosonned* sang nan ewe,+ pwehki ih me meninkeder en Siohwa kaunen karis en sounpei.

8 Siohwa kaunen karis en sounpei ketin mahsanih: “Ahpw kumwail sohpeisangehr ahlo. Kumwail kahrehiong me tohto ren dipekelekelki kosonnedo.*+ Kumwail kauwelahr inou lap en Lipai.+ 9 Eri I pahn wiahiong kumwail en mwamwahlla oh tikitikla mwohn aramas akan koaros, pwehki kumwail sohte kapwaiada elei kan ahpw kumwail kasalehda amwail lipilipilki kapwaiada kosonnedo.”+

10 “Kitail koaros sou samanki sahm tehmen?+ Kaidehn Koht tehmen me ketin kapikkitailda? Eri dahme kahrehda kitail kin widinge emenemen+ oh kasaminehla inou lap en samatail mehn mahs ako? 11 Suda kin widing, oh mehkot kasaut ehu wiawiher nan Israel oh Serusalem; pwe Suda kasaminelahr sarawi* en Siohwa,+ me E kin ketin poakohng, oh e pwoudikidahr nein koht en liki men serepein.+ 12 Siohwa pahn ketin kamwomwala mehmen me kin wia met sang nan impwal en Seikop kan, sohte lipilipil ihs,* mehnda ma e kin wiahda meirong en kisakis ehu ong Siohwa kaunen karis en sounpei.”+

13 “Oh mie pil ehu* mehkot me kumwail wia, me imwikihla pilen mas kan oh sengiseng oh sengloal eh pwaindi sapwellimen Siohwa pei sarawio, kahrehda e sohla ketin nsenohki amwail meirong en kisakis de kupwurperenki mehkot ehu sang rehmwail.+ 14 Oh kumwail kin nda, ‘Pwe ia kahrepe?’ Met pwehki Siohwa ketin wiahier sounkadehde men nanpwungen kowe oh omw pwoud sang ni omw pwulopwul, me ke kin widinge, mendahki ih iengomw oh omw pwoud sang ni inou lap.*+ 15 Ahpw mie emen me sohte wia met, pwe e ahnekihte ngehn sarawi* me luhwehdi. Oh dahme e raparapahki? Kadaudok en Koht. Eri kumwail pere amwail elen madamadau,* oh dehr widinge omw pwoud sang ni omw pwulopwul. 16 Pwe I kin kalahdeki* mweipeseng,”+ Siohwa, Koht en Israel me ketin mahmahsen, “oh me kin pwainkihdi eh likou tiahk lemei,”* Siohwa kaunen karis en sounpei me ketin mahmahsen. “Oh kumwail pere amwail elen madamadau,* oh kumwail dehr widing.+

17 “Kumwail kahrehiong Siohwa eh ketin ngirala sang ni amwail lokaia kan.+ Ahpw kumwail kin nda, ‘Ia mwomwen at kahrehda eh ketin ngirala?’ Ni amwail kin nda, ‘Koaros me kin wia me suwed kin mwahu mwohn silangin* Siohwa, oh e kin ketin kupwurperenki ih,’+ de ni amwail kin nda, ‘Ia Koht en pwung pahreken?’”

3 Siohwa kaunen karis en sounpei ketin mahsanih: “Kilang! I pahn kadarewei nei meninkeder men, oh e pahn kaunopada ahl ehu mwohi.+ Oh Kaun mehlelo me kumwail raparapahki pahn mwadangete kohdo ni eh tehnpas sarawio;+ meninkeder en inou lapo me kumwail kin perenki pahn kohdo. Kilang! E uhdahn pahn kohdo.”

2 “Ahpw ihs me pahn kakohng rahn me e pahn ketido, oh ihs me pahn kak kesikesihnen ni eh pahn ketin pwarodo? Pwe e pahn ketin rasehng kisiniei me kin kamwakele mete oh rasehng en sounlopwolopw men sohpw.+ 3 Oh e pahn ketidi nin duwen emen me kin inim oh kamwakele silper+ oh pahn kamwakele nein Lipai pwutak kan; oh e pahn ketin kamwakeleirailda rasehng kohl oh silper, oh re uhdahn pahn wiahla aramas kei me kin patohwanohng Siohwa kisakis en meirong ehu ni pwung. 4 Oh meirong en kisakis en Suda oh Serusalem pahn kaperenda* Siohwa, duwehte rahn akan mahso oh sounpar en mahs ako.+

5 Siohwa kaunen karis en sounpei ketin mahsanih: “I pahn kohdo limwahmwail pwehn kadeik, oh I pahn mwadang kadeikada sounakmanaman kan,+ me kin kamwahl kan, me kin wiahda kahula likamw kan,+ me kin widinge tohndoadoahk alahlda,+ liohdi oh me sepwoupwou,+ oh irail me kin kahng sewese* mehn liki.+ Irail pwukat sohte kin lemmwikin ie.”

6 “Pwe ngehi me Siohwa; I sohte kin wekila.*+ Oh kumwail me nein Seikop seri kan; ihme kahrehda kumwail saikinte kamwomwmwomwla. 7 Sang ni mwehin samamwail mehn mahs ako kumwail sohpeisangehr ei koasoandi kan oh sohte kin kapwaiada mepwukat.+ Kumwail pwurodo rehi, oh I pahn pwurowei rehmwail,”+ Siohwa kaunen karis en sounpei me ketin mahmahsen.

Ahpw kumwail kin nda: “Ia mwomwen at pahn pwurowei?”

8 “Ia duwe, aramas emen kak pirapa Koht? Ahpw kumwail kin pirapa ie.”

Oh kumwail kin nda: “Ia mwomwen at kin pirapaikomwi?”

“Ni amwail sohte wahdo eisek kis ehun soahng kan oh kisakis kan. 9 Kumwail uhdahn riahla,* pwe kumwail kin pirapa ie—ei, wehiet pwon kin wia met. 10 Wahdo eisek kis ehun soahng kan koaros nan imwen nahko,+ pwe en mie mwenge nan tehnpesei;+ oh menlau, kumwail song ie nin duwen met, pwe kumwail en kilang ma I sou pahn ritingadahng kumwail ewen kehl en pihl en nanleng+ oh wudekihdiong* pohmwail kapai ehu lao koaros mie,”+ Siohwa kaunen karis en sounpei me ketin mahmahsen.

11 “Oh I pahn lipwoare me kin kadallehla* ong kumwail, oh e sohte pahn kauwehla wahnsapwamwail kan, de pil kahrehiong tuhkehn kreip en nan amwail mwahto en sohte wa,”+ Siohwa kaunen karis en sounpei me ketin mahmahsen.

12 “Wehi koaros pahn kin kahdanekin kumwail peren,+ pwe kumwail pahn wiahla sahpw en peren ehu,” Siohwa kaunen karis en sounpei me ketin mahmahsen.

13 “Amwail koasoi kan ong ie me kehlail,” Siohwa me ketin mahmahsen.

Oh kumwail kin nda: “Dahme se patohwan duwen komwi?”+

14 “Kumwail kin nda, ‘Sohte katepen papah Koht.+ Dahme kitail kin paiekihda ni atail kapwaiada pwukoa kan ong ih oh atail maspahtou weweid mwohn silangin Siohwa kaunen karis en sounpei? 15 Met kitail kin wiahki me aklapalap* aramas peren kei. Pil, irail me kin wia me suwed kin pweida.+ Re sohte kin namenengki kasonge Koht oh pitsang met.’”

16 Ni ahnsowo, irail akan me kin lemmwiki Siohwa ahpw koasoakoasoipene, emenemen koasoiong ienge, oh Siohwa ketin tetehk oh karokaronge. Oh pwuhk en kataman ehu ahpw ntingdi mwohn silangi+ duwen irail kan me kin lemmwiki Siohwa oh irail kan me kin medemedewe* mware.+

17 Siohwa kaunen karis en sounpei ketin mahsanih: “Oh rahn me I pahn mwekid, re pahn wiahla nei aramas tohrohr.*+ I pahn kasalehiong irail kadek kalahngan, duwehte ohl emen eh kin kasalehiong nah seri men me kin papah ih kadek kalahngan.+ 18 Oh kumwail pahn pwurehng kilang wekpeseng en nanpwungen aramas pwung men oh aramas suwed men,+ wekpeseng en nanpwungen me kin papah Koht oh me sohte kin papah ih.”

4 Siohwa kaunen karis en sounpei ketin mahsanih: “Pwe kilang! rahno kohkohdo, me wie lullul rasehng wasahn kisiniei mwehl ehu,+ ahnsou me aramas aklapalap* koaros oh koaros me kin wia me suwed pahn duwehla diperen dihpw kan.* Rahn me kohkohdo uhdahn pahn kadalleirailla, oh sohte kalewe pwoat oh pil rah pwoat pahn luhwehdi. 2 Ahpw ketipin en pwung pahn dakada pohn kumwail kan me kin wauneki* mwarei, lingen ketipino pahn kamwawihkumwailla; oh kumwail pahn lusuluski peren duwehte koupwul mworourou kan.”

3 “Oh kumwail pahn tiakedi me suwed pahn patehn nehmwail kan, pwe re pahn duwehla pwelpar pahn nehmwail kan ni rahn me I pahn mwekid,” Siohwa kaunen karis en sounpei me ketin mahmahsen.

4 “Tamataman Kosonned en ei ladu Moses, koasoandi oh kopwung kan me I kehkehlingki nan Orep ong mehn Israel koaros ren peikiong.+

5 “Kilang! I pahn kadarowohng kumwail soukohp Elaisa+ mwohn rahn lapalap oh kamasepwehk en Siohwa eh leledo.+ 6 Oh e pahn wiahiong mohngiong en pahpa kan en duwehla mohngiong en seri kan,+ oh mohngiong en seri kan en duwehla en pahpa kan,* pwe I en dehr kohdo oh kauwehla sampah ni ei pahn kamwomwala.”

(Kaimwiseklahn kawehwehn Nting Sarawi kan sang ni lokaiahn Ipru oh Aramaik, mwurin met iei kawehwehn Nting Sarawi kan en Kristian ni Lokaiahn Krihs)