KISINLIKOU ONG MEHN KOLOSE

1 Sang Pohl, wahnpoaron en Krais Sises sang ni kupwuren Koht, oh riatail Timoty,+ 2 ong aramas sarawi kan oh riatail me lelepek kan me kin miniminiong Krais nan Kolose:

Samatail Koht en ketikihong kumwail kadek sapan oh popohl.

3 Ahnsou koaros se kin kalahngan ong Koht, Semen atail Kaun Sises Krais, ni at kin kapakapkin kumwail. 4 Se kin wia met pwehki se rong duwen amwail pwoson Krais Sises oh duwen amwail limpoak ong aramas sarawi kan koaros 5 pwehki koapworopwor me nekinek ong kumwail nanleng.+ Mahso, kumwail rongehr duwen koapworopwor wet sang ni rohng mehlel me iei rongamwahwo 6 me lelewohng kumwail. Rongamwahu wet pweida ni eh lohkpeseng nan sampah pwon.+ E pil pweida rehmwail sangete rahn me kumwail rong rongamwahwo oh esehla mehlelpen sapwellimen Koht kadek sapan. 7 Ihme kumwail sukuhlkier sang rehn Epapras,+ iengat ladu kompoak, sounpapah lelepek en Krais me wiliankitdi. 8 E pil koasoiaiong kiht duwen amwail limpoak me kekeirkihda sawaspen sapwellimen Koht ngehn sarawi.*

9 Ihme kahrehda se sohte uhdihsang kapakapkin kumwail+ sangete rahn me se rong rohng wet. Ahnsou koaros se kin peki me kumwail en direkihla loalokong pwung+ duwen kupwuren Koht iangahki erpit koaros oh wehwe mwahu+ me kohsang ngehn sarawi.* 10 Se kin kapakapki kumwail en weweid ni ahl me Siohwa* ketin kupwurki oh kumwail en uhdahn kaperenda ih ni amwail kin wia soangen doadoahk mwahu koaros oh kalaudehla amwail loalokong pwung duwen Koht.+ 11 Oh se kin kapakapki Koht en ketin doadoahngki sapwellime manaman laud+ pwehn ketin kakehleikumwailkihda kehl koaros me kumwail anahne pwe kumwail en uhdahn dadaurete ni kanengamah oh peren. 12 Kumwail pousehlahte kalahngankihong Sahmo, me ketin kahrehiong kumwail en kak iang ale sohso en aramas sarawi kan+ me mi nan marain.

13 E ketin kapitkitailsang pahn manaman en rotorot+ oh ketin kasaukitaillahng nan wehin sapwellime Ohl kompoak, 14 me ketin kasaledengkitailla sang ni pweinen pweipwei sapahl, me iei mahkpen dipatail kan.+ 15 Ih me kasalepen Koht me soh sansal,+ mesenihen kepikipik kan koaros.+ 16 Koht ketin doadoahngki ih pwehn kapikada soahng teikan koaros me mi nanleng oh nin sampah, mehkan me sansal oh mehkan me soh sansal,+ mehnda ma mwoahl kan, kaun akan de koperment kan de irail kan me ahneki manaman. Soahng teikan koaros kapikipikda pwehki ih+ oh ong ih. 17 E pil ketiketier mwohn soahng teikan koaros,+ oh Koht ketin doadoahngki ih pwehn kapikada soahng teikan koaros 18 oh ih me tapwin paliwar me iei mwomwohdiso.+ Ih me tapi oh mesenih me tepin iasada sang rehn me melahr akan,+ pwe en ketin wiahla me keieu ni mehkoaros. 19 Koht ketin kupwurperenki wiahiong mehkoaros en unsekla reh.+ 20 Oh pwehki ih, Koht ketin pwurehng kupwuramwahwih soahng koaros+ me mi nanleng oh sampah. E ketin wiahda popohl wet sang ni nta+ me Sises ketin kakerehdi ni tuhkehn kalokoloko.*

21 Mahso, kumwail pil dohsang Koht. Kumwail wia sapwellime imwintihti kei pwehki amwail kin medemedewehte soahng suwed kan. 22 Ahpw ahnsou wet Koht ketin pwurehng kupwuramwahwih kumwail sang ni pwoula me Sises ketin lelohng nin duwen aramas. Koht ketin wia met pwe kumwail en sarawi oh sohte sapwung kis oh pil sohte karaunpamwail mwohn silangi.+ 23 Mehlel, kumwail anahne pousehlahte ni pwoson,+ oh kumwail en kehlail+ oh tengeteng.+ Kumwail dehpa mweidohng mehkot en kihsang koapworopwor en rongamwahu wet me kumwail rongehr oh me lohkseli wasa koaros nin sampah.+ Ngehi Pohl wiahla sounpapah en rongamwahu wet.+

24 Met I pereperenki ei kin lokolongkin kumwail,+ oh I kin lokolok duwehte Krais. Ahpw I anahnehte kaimwisekala lokoloko pwehki kahlepe,+ me iei mwomwohdiso.+ 25 I wiahla sounpapah en mwomwohdiso wet nin duwen pwukoa doadoahk+ me Koht ketikihong ie pwehki kumwail, pwe I en kalohki ni unsek mahsen en Koht, 26 me iei rir sarawio+ me wie ekiek sang ni koasoandi en mwehin mahs kan*+ oh dih en mahs kan. Ahpw met e sansalohngehr sapwellime aramas sarawi kan.+ 27 Koht ketin kupwurperenki aramas en wehi kan ren esehla kapai lingaling en rir sarawi wet,+ me iei Krais kin ketin miniminiong kumwail oh mie amwail koapworopwor en iang ahneki sapwellime lingan.+ 28 Iei ih me kitail kin lohki. Kitail kin kaweid oh padahkih aramas koaros uwen me kitail kak. Kitail kin doadoahngki erpit koaros me kitail alehdi, pwe kitail en sewese sapwellimen Krais tohnpadahk kan koaros ren koahiekla.+ 29 Ihme kahrehda I kin doadoahk laud oh nannanti ni ei doadoahngki sapwellime kehl me kin doadoahk kehlail loalei.+

2 Pwe I men kumwail en ese uwen doadoahk laud me I kin wia ong kumwail oh ong irail me mi Laodisia+ oh pil ong irail koaros me saikinte kilang ie.* 2 I kin wia met pwe ren nsenamwahu+ oh patpene ni limpoak+ oh ahneki kapai koaros me kohsang arail uhdahn wehwehki mwahu me mehlelo, pwe irail en ale loalokong pwung duwen rir sarawi en Koht, me iei Krais.+ 3 Pai kesempwal en erpit oh loalokong koaros kin ekiekla mwahu reh.+ 4 I nda met pwe emen de pitihekin kumwail lokaia widing kan. 5 Mendahki ei sohte mi wasahn ni paliwar, I kin mi rehmwail ni madamadau.* I kin perenki kilang amwail soandi mwahu+ oh tengeteng ni amwail pwoson Krais.+

6 Eri, nin duwen amwail aledahr Kaun Krais Sises, kumwail pousehlahte weweid ni amwail miniminiong ih. 7 Oh kumwail poadidi teng oh kokouda reh+ oh kehlail ni pwoson+ nin duwen me kumwail sukuhlkier, oh kumwail kapingkalahngan ong Koht ahnsou koaros.+

8 Kumwail kanahieng pwe emen de lidipihekin kumwail* erpit en sampah oh widing mwahl+ me kohsang tiahk en aramas, sang madamadau oh tiahk en sampah wet, ahpw kaidehn sang padahk en Krais; 9 pwehki sapwellimen Koht irair kan kin sansalda reh ni unsek.+ 10 Kumwail ahneki mehkoaros pwehki ih. E ketin wia tapwin koperment koaros oh manaman en kaunda koaros.+ 11 Ni amwail miniminiong ih, kumwail pil sirkumsaislahr, kaidehk ni sirkumsais me aramas kin wia, ahpw ni amwail kapwuhrasang paliwaramwail dipan kan.+ Ih duwen ladu en Krais kan ar kin sirkumsaisla.+ 12 Pwe kumwail iang ih seridi nan sapwellime papidais.+ Oh ni amwail miniminiong ih, kumwail pil iang ih iasada+ ni amwail pwoson sapwellimen Koht doadoahk manaman, me ketin kaiasada ih sang rehn me melahr akan.+

13 Mendahki kumwail melahr pwehki dipamwail kan oh pwehki amwail sohte sirkumsaisla, Koht ketin kamourkumwailda rehn Sises.+ Ni kadek, Koht ketin mahkikihong kitail dipatail kan koaros.+ 14 E ketin irisala dahme ntingdi nan doaropwe+ me audaudki koasoandi kan+ oh me kin uhwong kitail.+ E ketikihsang met ni eh ketin pasurdiong ni tuhkehn kalokoloko.*+ 15 E ketin kalowehdi koperment kan oh irail kan me ahneki manaman oh ketin kasalehda mwohn wehipokon me e ketin kaloweiraildier+ sang ni tuhkehn kalokoloko.* Met e ketin kahluwa irail nan kapar en powehdi.

16 Eri, emen dehpa kadeingkin kumwail dahme kumwail en tungoale oh nim+ de amwail kin wia kasarawi ehu de kasarawien maram pwul+ de sapad.+ 17 Soahng pwukat iei mwetehn soahng kan me pahn kohdo,+ ahpw me mehlelo iei Krais.+ 18 Dehr mweidohng emen en kihsang amwail kisakiso,+ mehnda ma e mwomwehda aktikitik oh kin pwongih tohnleng kan.* Soangen aramaso kin uhki* soahng kan me e kilangehr. E kin suweiki soahng kan me sohte katepe, pwehki e kin idawehn elen madamadau en aramas. 19 E sohte kin tengediong Krais, atail tapwi.+ Krais me kin ketikihong dahme paliwaro pwon kin anahne. E kin ketin kahrehiong kisehn paliwaro pwon en kin patpene mwahu oh kekeirda nin duwen me Koht ketin kupwurki.+

20 Kumwail iangehr Krais pwoula oh saledeksangehr madamadau oh tiahk en sampah wet.+ Eri, dahme kahrehda kumwail kin momour likamwete kumwail kisehn sampah? Dahme kahrehda kumwail kin peikiong kosonned kan me duwehte:+ 21 “Kumwail dehr ale, kumwail dehr song, kumwail dehr sair”? 22 Mepwukat wiahte kehkehlik oh padahk en aramas+ duwen soahng kan me aramas kin tungoale oh nim oh mwuri, mepwukat kin sohrala. 23 Mendahki mepwukat kin mwomwen erpit, ahpw e sohte kin sewese aramas en pelianda ineng en paliwararail. Met kin wiawi pwehki aramas kin pein pilada duwen arail pahn kaudokiong Koht, re kin mwomwehda aktikitik oh kin kaloke paliwararail.+

3 Ahpw ma kumwail iangehr Krais iasada,+ kumwail pousehlahte rapahki soahng kan me mi powe, wasa me Krais ketidier ie ni palimaun en Koht.+ 2 Kumwail medemedewehte soahng kan me mi powe,+ kaidehn soahng kan me mi nin sampah.+ 3 Pwe kumwail melahr, oh amwail mour ekieklahr rehn Krais, me kin miniminiong Koht. 4 Ni ahnsou me Krais, me iei atail mour,+ pahn ketin sansalda, kumwail pil pahn iang ih sansalda ni lingan.+

5 Eri, kumwail kemehla ineng sapwung kan*+ me pidada tiahk samin me pid wia nsenen pwopwoud,* samin, ineng kehlail en wia nsenen pwopwoud,+ ineng suwed, oh noahrok me iei tiahk en pwongih dikedik. 6 Eri, pwehki soahng pwukat, engieng en Koht pahn leledo. 7 Ihme kumwail pil kin wia nan amwail mouren mahs.+ 8 Ahpw met kumwail anahne kihsang mepwukat koaros rehmwail: mwehl, lingeringer, wiewia suwed,+ lokaia kamedek+ oh lokaia suwed+ me kohsang nan awamwail. 9 Kumwail dehr likamw ong emenemen.+ Kumwail kapwuhrasang amwail mouren* mahs+ iangahki eh wiewia kan. 10 Kumwail pwuhriong nan mour kapw,+ me kin wie onohnsapahl ahnsou koaros ni amwail kin esehla mwahu duwen Koht. Mour kapw wet kin wiahiong kumwail en rasehngala Koht me ketin wiahda met.+ 11 Sohte wekpeseng nanpwungen mehn Krihs de mehn Suhs, me sirkumsais de me sohte sirkumsais, mehn liki, mehn Sidia,* lidu men de me saledek men. Ahpw Krais iei mehkoaros oh kin ketiket nan mehkoaros.+

12 Nin duwen sapwellimen Koht me pilipildahr kan,+ me sarawi oh kompoak, kumwail pwuhriong nan limpoak me kin mwekidki poakehla meteikan,+ kadek, aktikitik,*+ mpahi+ oh kanengamah.+ 13 Kumwail pousehlahte kanengamahiong emenemen oh mahkpene ni mehlel+ mehnda ma mie kahrepen en kaulime emen.+ Nin duwen Siohwa* eh kin ketin mahkohng kumwail ni mehlel, kumwail pil anahne wia duwehte.+ 14 Ahpw likin mepwukat koaros, kumwail pwuhriong nan limpoak+ pwe ih me kin kapatapene mehkoaros ni unsek.+

15 Oh popohl en Krais en pil kaunda amwail mohngiong,+ pwe kumwail malipilip ong nan popohl wet ni paliwarteieu. Oh kumwail en kin kasalehda kalahngan. 16 Mahsen en Krais, iangahki erpit koaros en kadirehla loalamwail. Kumwail pousehlahte padahkih oh kangoangehki* emenemen melkahka kan,+ kapingpen Koht oh koulki koul sarawi kan ni kalahngan, oh kouliong Siohwa* nan mohngiongimwail.+ 17 Sohte lipilipil dahme kumwail kin wia de nda, kumwail wia mehkoaros ni mwaren Kaun Sises, oh pwehki ih kumwail kalahngan ong Samatail Koht.+

18 Kumwail lih pwopwoud kan, kumwail uhpahiong amwail pwoud kan.+ Pwe ih met me konehng irail kan me kin idawehn Kauno. 19 Kumwail ohl pwopwoud kan, kumwail pousehlahte poakohng amwail pwoud kan+ oh dehr kin lingeringer pahrail.*+ 20 Kumwail seri kan, kumwail peikiong amwail pahpa nohno kan ni mehkoaros,+ pwe met kin kaperenda Kauno. 21 Kumwail pahpa kan, kumwail dehr kamwakara mwahl noumwail seri kan,+ pwe re dehr nan kapehd toutoula.* 22 Kumwail ladu kan, kumwail peikiong amwail soumas en sampah* kan ni mehkoaros,+ kaidehkte ahnsou me re kin kilikilang kumwail pwe kumwail en kaperenda aramas, ahpw kumwail peik sang ni mohngiong mehlel, pwehki amwail kin wauneki Siohwa.* 23 Sohte lipilipil dahme kumwail kin wia, kumwail wia sang ni mour* unsek, duwehte ma kumwail kin wiahiong Siohwa,*+ a kaidehn aramas, 24 pwe kumwail ese me kumwail pahn ale ketingpamwail* sang rehn Siohwa.*+ Kumwail papah amwail Soumaso, Krais. 25 Mehmen me kin wiahda sapwung uhdahn pahn ale pweinen sapwung me e wiahda,+ pwe Koht sohte kin ketin lipilipilki aramas.+

4 Kumwail soumas akan, amwail wiewia ong noumwail ladu kan en kin pwung oh pahrek, pwe kumwail ese me pil mie amwail Soumas me ketiket nanleng.+

2 Kumwail poadidiong kapakap+ ni amwail kin mwasamwasahn oh kapingkalahngan ong Koht.+ 3 Ni ahnsowohte, kumwail pil kapakapkin kiht+ pwe Koht en ketikihong kiht ahnsou mwahu en kalohk, pwe sen kak lohkiseli rir sarawio duwen Krais, pwe ihme I wie senselki.+ 4 Eri, kumwail kapakap pwe I en kak lohkiseli rohngo ni sansal nin duwen me I anahne wia.

5 Kumwail pousehlahte weweid ni erpit ong me seupwoson kan, oh doadoahngki mwahu amwail ahnsou.*+ 6 Ahnsou koaros amwail lokaia kan en kin kadek, doalki soahl,+ pwe kumwail en kin ese duwen amwail pahn sapeng emenemen aramas.+

7 Dikikus,+ riei kompoakepahi oh sounpapah lelepek oh iengei ladu en Kauno, pahn ndaiong kumwail rohng koaros duwen ngehi. 8 I kadarewei ih rehmwail pwe kumwail en ese ia irat oh pwe en kansenamwahwihkumwailla. 9 E kohwei iangahki Onesimus,+ riei kompoakepahi lelepek, me kohdo sang rehmwail; ira pahn ndaiong kumwail soahng koaros me kin wiawi wasaht.

10 Aristarkus,+ iengei me selidi, kadarewei eh rahnmwahu oh pil Mark+ me Parnapas pahn rianiki (kumwail alehdier kaweid en kasamwo ih+ ma e kohwei rehmwail), 11 oh Sises me adaneki Sustus, irail mehn Suhs pwoson kei.* Irail pwukatte me iengei tohndoadoahk ong Wehin Koht, oh irail kin uhdahn kansenamwahwih ie.* 12 Epapras,+ ladu en Krais Sises me kohdo sang rehmwail, kadarewei eh rahnmwahu. Ahnsou koaros e kin ngidingidki eh kapakapkin kumwail, pwe kumwail en kesihnenda ni unsek oh uhdahn kamehlele kupwuren Koht koaros. 13 I kak kadehdehda me e kin doadoahk laud ong kumwail oh irail kan nan Laodisia oh nan Ierapolis.

14 Luk,+ kompoakepatail toahkte, kadarewei eh rahnmwahu, oh pil Demas.+ 15 Kihong riatail kan nan Laodisia ei rahnmwahu oh pil ong Nimpa oh mwomwohdiso me kin tuhpene nan imweo.+ 16 Oh mwurin amwail wadek kisinlikou kiset, kumwail koasoanehdi pwe en pil wadawad+ nan mwomwohdisohn Laodisia oh kumwail pil wadek kisinlikou me I kadarala Laodisiao. 17 Pil ndaiong Arkipus:+ “Tehk mwahu doadoahk me ke alehdi nin duwen tohnpadahk en Kauno pwe ken kapwaiada.”

18 A ngehi Pohl, I kadarewei ei rahnmwahu sang ni mengin pehiet.+ Kumwail tamatamante me I wie sensel.+ Kadek sapan en kin ieiang kumwail.