KERIAUN KISINLIKOU ONG MEHN DESELONIKA

1 Sang Pohl, Silpanus,* oh Timoty,+ ong mwomwohdisohn Deselonika me kin miniminiong Samatail Koht oh Kaun Sises Krais:

2 Samatail Koht oh Kaun Sises Krais en ketikihong kumwail kadek sapan oh popohl.

3 Riat ako, ahnsou koaros se kin anahne kalahngankihong Koht duwen kumwail. Met konehng pwe amwail pwoson kin kekeirda laud oh limpoak en emenemen kumwail koaros kin lalaudla nanpwungamwail.+ 4 Ihme kahrehda se kin suweikin kumwail+ nan mwomwohdisohn Koht kan pwehki amwail kin dadaur oh kin pwoson nan amwail kalokolok oh kahpwal koaros me kumwail kin lelohng.*+ 5 Met kadehdepen sapwellimen Koht kadeik pwung, me kahrehiong kumwail en warohng pedolong nan Wehin Koht, me kumwail kin lokolongki.+

6 Sapwellimen Koht kadeik wet me pwung, pwehki e pahn ketin dupukohng irail kan me kin kahpwalih kumwail.+ 7 Ahpw kumwail me kin lokolongki kahpwal pahn iang kiht saledekla ni ahnsou me Kaun Sises pahn ketin sansalda+ sang nanleng iangahki sapwellime tohnleng kehlail kan+ 8 nan mpwulen kisiniei, ni eh pahn ketin ikih irail kan me sohte ese Koht oh irail kan me sohte kin peikiong rongamwahu duwen atail Kaun Sises.+ 9 Irail pwukat pahn ale kalokepen mwomwla soutuk,+ oh re pahn kasohrala mwohn silangin Kauno oh sang sapwellime manaman lingan. 10 Ni ahnsou me Kauno pahn ketido pwe en linganla iangahki sapwellime aramas sarawi kan, irail koaros me kin pwoson ih pahn kapinga. Oh pwehki amwail kamehlele dahme se padahkihong kumwail, kumwail pil pahn iang irail.

11 Ihme kahrehda se kin kapakapkin kumwail ahnsou koaros, pwe atail Koht en ketin wiahkin kumwail aramas kei me warohng sapwellime malipilip,+ oh sang ni sapwellime manaman, e pahn ketin wiahda ni unsek soahng mwahu koaros me e ketin kupwurki oh wiahiong amwail doadoahk en pwoson en pweida. 12 Se kin wia met pwe mwaren atail Kaun Sises en linganla rehmwail oh kumwail en linganla ni amwail miniminiong ih. Lingan wet kin kohsang kadek sapan en atail Koht oh Kaun Sises Krais.

2 Ahpw riat ako, me pid duwen ketier* en atail Kaun Sises Krais+ oh atail pahn pokonpene reh,+ se peki rehmwail, 2 kumwail dehr mwadang pingida ma emen nda me rahnen Siohwa*+ leledohr. Kumwail dehr pwunodki, mehnda ma re nda me rohngo sang rehn Koht,+ de re wadekasang nan kisinlikou me dene se ntingihada.

3 Emen en dehr pitihkumwaildi, pwehki mwohn rahno eh pahn leledo, uhwong kaudok mehlel*+ pahn wiawi mahs oh aramas suwedo+ pahn sansalda. Iei ih me pahn kasohrala.+ 4 Ih sounuhwong men oh e kasapwilada pein ih pohnangin mehkoaros me adaneki koht de mehkoaros me aramas kin pwongih, pwe en mwohndiong nan tehnpas sarawi en Koht, oh kasalehda pein ih mwohn wehipokon me ih koht men. 5 Ia duwe, kumwail sohte tamataman me ni ei kin mihmi rehmwail, I kin ndaiong kumwail mepwukat?

6 Oh met kumwail eseier dahme kin irehdi aramas suwedo, pwe e pahn sansalda ni ahnsawi. 7 Ni mehlel, rir suwed wet kin doadoahk ahnsou wet,+ ahpw e pahn wie ekiek lao me kin irehdi aramas suwedo ahnsou wet pahn sohrala. 8 Eri ni mehlel, aramas suwedo pahn sansalda, oh Kaun Sises pahn ketin kauwehkihla ih angin* doauese+ oh kasohrehla ni sansaldahn+ sapwellime ketier.* 9 Ahpw aramas suwedo miehier sang ni manaman en Sehdan,+ oh e pahn wiahda manaman tohto oh kilel likamw kan oh soahng kapwuriamwei kan+ 10 oh widing suwed koaros pwehn pitihedi+ irail kan me pahn sohrala. Ih met me kalokeparail, pwehki arail sohte kin kamehlele oh poakohng me mehlelo me kak komourirailla. 11 Ihme kahrehda Koht ketin mweidohng manaman widing en pitihiraildi pwe ren kamehlele me likamw,+ 12 pwe irail koaros en pakadeikda pwehki re sohte kin kamehlele me mehlelo ahpw kin perenki me suwed.

13 Riat ako me Siohwa* kin ketin poakohng, ahnsou koaros se kin anahne kalahngankihong Koht duwen kumwail, pwehki sang nin tapio Koht ketin pilkumwailda+ en komourla sang ni eh ketin kasarawihkinkumwailla+ sapwellime ngehn sarawi* oh sang ni amwail kin pwoson me mehlelo. 14 E ketin malipeikumwaildohng met sang ni rongamwahu me se kin kalohki, pwe kumwail en ale lingan en atail Kaun Sises Krais.+ 15 Eri riat ako, kumwail kesihnenda teng+ oh kolokolete tiahk me kumwail sukuhlkier,+ mehnda ma sang dahme kumwail rong de kisinlikou sang reht. 16 Patehng met, atail Kaun Sises Krais, oh Samatail Koht me ketin poakohng kitail+ oh ketikihong kitail nsenamwahu poatopoat oh koapworopwor mwahu+ sang ni sapwellime kadek sapan, 17 en ketin kansenamwahwihala mohngiongimwail oh katengeikumwaildi* pwe kumwail en koasoia oh wia dahme mwahu ahnsou koaros.

3 Eri riat ako, kumwail pousehlahte kapakapkin kiht,+ pwe mahsen en Siohwa* en kin mwadang lohkseli+ oh linganla, nin duwen me kin wiawi rehmwail, 2 oh pwe sen pitsang aramas keper oh suwed kan,+ pwe kaidehn aramas koaros kin ahneki pwoson.+ 3 Ahpw Kauno me ketin lelepek, oh e pahn ketin kakehlaka oh pereikumwailsang me suwedo. 4 Patehng met, nin duwen tohnpadahk en Kauno kei, se kin koapworopworkin kumwail me kumwail kin kapwaiada oh pil pahn pousehlahte kapwaiada at kaweid kan. 5 Kauno en ketin pousehlahte kaukaweid amwail mohngiong ni ahl me pwung, pwe kumwail en poakohng Koht+ oh dadaurete+ pwehki Krais.

6 Eri riat ako, ni mwaren atail Kaun Sises Krais, se kin kaweidkin kumwail, kumwail en kalekeikumwailsang riatail men me sohte kin weweid ni pwung+ oh sohte kin idawehn tiahk* me kumwail* alehsang reht.+ 7 Pwe pein kumwail eseier duwen amwail pahn alasang kiht,+ pwehki at wiewia kin konehng ni at kin mihmi rehmwail, 8 oh se sohte kin ale mwenge ni at sohte kin pwain.+ Ahpw, se kin doadoahk laud oh nannanti ni rahn oh nipwong pwe sen dehr kihong kumwail katoutou pweilaud.+ 9 Kaidehn pwehki sohte at pwuhng,+ ahpw se men wia mehn kahlemeng ong kumwail en alasang.+ 10 Ni mehlel, ni at kin mihmi rehmwail, se kin kehkehlingkihong kumwail met: “Ma mehmen sohte men doadoahk, a en dehr mwenge.”+ 11 Pwe se rong me ekei nanpwungamwail sohte kin weweid ni pwung,+ re sohte mwahn kin doadoahk, ahpw re kin kedirepwki mehkot me sohte arail ong.+ 12 Eri, ni mwaren Kaun Sises Krais, se kehkehlingkihong oh kaweidki soangen aramas pwukat ren wia pein arail doadoahk oh tungoale mwenge me re pein koadoahkihada.+

13 A kumwail, riat ko, kumwail dehr pwangahkihda wiewia mwahu. 14 Ahpw ma emen sohte kin peikiong dahme se koasoia nan kisinlikou kiset, kumwail kilelehdi aramas menet oh dehr patehng ih,+ pwe en namenekla. 15 Ahpw kumwail dehr wiahki ih imwintihti men, ahpw pousehlahte panawih ih+ nin duwen riatail men.

16 Eri Kaunen popohl en ketikihong kumwail popohl ahnsou koaros ni ahl koaros.+ Kauno en ketin ieiang kumwail koaros.

17 A ngehi Pohl, I kadarewei ei rahnmwahu sang ni pein mengin pehiet.+ Ih mwomwen ei kin nting nan kisinlikou koaros pwe kumwail en ese me ngehi me ntingihedi.

18 Kadek sapan en atail Kaun Sises Krais en kin ieiang kumwail koaros.