KEIEUN KISINLIKOU ONG TIMOTY

1 Sang Pohl, wahnpoaron en Krais Sises sang ni kehkehlik en Koht atail Sounkomour oh Krais Sises atail koapworopwor,+ 2 ong Timoty,*+ nei seri mehlel+ nan pwoson:

Samatail Koht oh Krais Sises atail Kaun en ketikihong uhk kadek sapan, kadek kalahngan oh popohl.

3 Duwehte ei kangoangehkin uhk ken mihmi nan Episos ni ei pahn mwesellahng Masedonia, eri I pahn pwurehng wia met, pwe ken kehkehlingkihong aramas kei ren dehr kin wia ehu soangen padahk tohrohr, 4 de pil tehk soai likamw kan+ oh irekidien eden mehn mahs ako. Mepwukat kin kauwehla mwahl ahnsou,+ pwe ihte me e kin wia iei kahrehiong aramas en nda soahng kan me re sohte kak kadehdehda, a kaidehn mehkot me sang rehn Koht me kin pid pwoson. 5 Ni mehlel, kahrepen kaweid wet iei pwe kitail en ahneki limpoak+ me kohsang mohngiong mwakelekel oh nsenmwakelekel oh pwoson+ me sohte mwalaun. 6 Ni ekei ar sohpeisang mepwukat, re kin uhd koasoakoasoiapene soahng soh katepe kan.+ 7 Re kin men wia sounpadahk+ en kosonned, ahpw re sohte kin wehwehki soahng kan me re kin koasoia de pil soahng kan me re kin ngihtehtehki.

8 Eri kitail ese me Kosonnedo kin mwahu ma emen kin doadoahngki ni ahl me pwung, 9 oh e kin pohnese me kosonnedo sohte kin wiawihda ong aramas pwung men, ahpw ong irail kan me kin kauwehla kosonned+ oh me sapeik kan, me sohte kin wauneki Koht oh me dipan akan, me soaloalopwoat* oh me kin mwamwahliki dahme sarawi, me kin kemehla pahpa oh nohno kan, sounkam aramas akan, 10 irail kan me kin wia tiahk samin me pid wia nsenen pwopwoud,* ohl akan me kin wendi rehn ohl akan,* sounpirap aramas, sounlikamw kan, irail kan me kin kauwehla inou kan, oh soahng teikan koaros me kin uhwong padahk mehlel*+ 11 nin duwen rongamwahu lingan en Koht peren, me I pwaisankier.+

12 I kalahngankihong Krais Sises atail Kaun, me ketikihong ie manaman, pwehki eh ketin medemedewe me I me lelepek sang ni eh ketikihong ie doadoahk sarawi ehu,+ 13 mendahki mahso I kin lahlahwe Koht, kaloke sapwellime aramas akan oh aklapalap.+ Ahpw e ketin kasalehiong ie kadek kalahngan pwehki ei sehse mehkot oh seupwoson. 14 Oh atail Kaun ketin kasalehiong ie kadek sapan me inenen mwuledek, oh I alehdi pwoson oh limpoak sang Krais Sises. 15 Mahsen pwoatet me likilik oh e konehng kitail en uhdahn kamehlele: Krais Sises ketido sampah pwe en ketin doarehla me dipan akan.+ Nanpwungen irail pwukat, ngehi me keieu dipan.+ 16 Ahpw e ketin kasalehiong ie kadek kalahngan pwe Krais Sises en ketin kasalehda sapwellime kanengamah laud ni eh ketin doadoahngkin ie nin duwen karasaras en me keieu dipan, oh ketin wiahkiniehla mehn kahlemeng ehu ong irail kan me pahn pwoson ih pwe ren ale mour soutuk.+

17 Eri, ong Nanmwarki poatopoat,+ me ketin ieias kohkohlahte,*+ me soh sansal,+ Koht mehtehmen,+ lingan oh wahu en kohwong ih kohkohlahte. Amen.

18 Nei seri Timoty, I likihong uhk kaweid wet me pahrekiong kokohp kan me koasoia duwen kowe. Mahsen pwukat pahn seweseiuk ken pousehlahte pei mwahu,+ 19 oh kolokol pwoson oh nsenmwakelekel,+ me ekei keselahr oh imwikihla arail pwoson eh sohrala rasehng kihrlahn sohp apwoat. 20 Aimenihus+ oh Aleksander iang kisehn irail pwukat, oh I pangohng ira rehn Sehdan+ pwe ira en ale peneu duwen ara en dehr lahlahwe Koht.

2 Eri mwohn mehkoaros, I kangoangehki koaros en kapakapki soangen aramas koaros, kapakap ni ngidingid, kapakapki en meteikan anahn akan, oh kapingkalahngan ong Koht, 2 oh kapakapki nanmwarki kan oh me lapalap akan koaros,+ pwe kitail en momourki mour meleilei oh popohl ni atail kin poadidiong Koht ni unsek oh ni mehlel.+ 3 Met me mwahu oh konehng mwohn silangin Koht, atail Sounkomour,+ 4 me kin ketin kupwurki soangen aramas koaros en komourla+ oh esehla loalokong pwung en me mehlel. 5 Pwe Koht mehtehmen+ mie, oh pil mie emen sounkadokepene+ nanpwungen Koht oh aramas akan,+ iei ih aramaso, Krais Sises,+ 6 me ketin tounmeteikihla pein ih nin duwen pweinen pweipwei sapahl ehu* ong aramas koaros,+ oh aramas akan pahn kadehdehda duwen met ni ahnsawi. 7 Pwe I en kadehdehda ire mehlel wet,+ I idihdida nin duwen sounkalohk men oh wahnpoaron men,+ pwe I en kak padahkihong mehn liki kan+ duwen pwoson oh mehlel. I lokolokaia mehlel, I sohte likamw.

8 Eri, nan wasa koaros, I men ohl akan en pousehlahte kapakap oh kauwada pehrail kan ni loalopwoat,+ ni soh lingeringer+ de akamai.+ 9 Pil duwehte, lih akan en kapwatkihda likou me konehng, me kin kasalehda wahu oh madamadau pwung,* kaidehn ni sidail en ingihng en pitenmoang oh kohl de perl de likou me uhdahn pweilaud,+ 10 ahpw ni ahl me konehng lih akan me kin poadidiong Koht,+ me iei, ni wiewia mwahu kan.

11 Lih akan en kin nennenla oh uhpah ni unsek+ ni arail kin ale padahk. 12 I sohte mweidohng lih emen en padahk de ahneki manaman pohn ohl emen, ahpw en kin nennenla.+ 13 Pwe Adam me wiawihda mahs, a mwuri Ihp.+ 14 Oh pil Adam sohte lohdiong widing, ahpw liho me lohdi douluhl+ oh kauwehla kosonned en Koht. 15 Ahpw naineki seri+ pahn pere lih akan ma re kolokolete pwoson, limpoak, mour sarawi oh madamadau pwung.*+

3 Koasoi pwoatet me likilik: Ma ohl emen kin nantihong en wiahla sounapwalih men,+ e kin inengieng doadoahk mwahu ehu. 2 Eri, sounapwaliho uhdahn pahn sohte karaunpe, pwoudiki lihtehmen, ese kaunda eh wiewia kan, kin madamadau pwung,*+ kin soandi mwahu, kin perenki kasamwo aramas,+ koahiek en padahk,+ 3 sohte kin kamamsakau,+ sohte kin lemei, ahpw kin toupahrek,+ sohte kin akamai,+ sohte kin poakohng mwohni,+ 4 kin apwalih mwahu pein eh peneinei oh nah seri kan kin peik oh tiahk mwahu+ 5 (pwe ma ohl emen sohte ese duwen eh pahn apwalih pein eh peneinei, a ia duwen eh pahn apwalih mwomwohdisohn Koht?), 6 a kaidehn ohl emen me ahpwtehn pwosonla,+ pwe e dehr aklapalapala oh ale kadeikohte me Tepilo alehdier. 7 Patehng met, e uhdahn pahn mie eh mehn kadehde mwahu* sang irail kan me kaidehn kisehn mwomwohdiso,+ pwe aramas akan en dehr kauwe ih oh en dehr pwupwudiong nan lidip en Tepil.

8 Sounsawas kan pil uhdahn pahn kin mehlel, sohte kin lokaia likamw,* sohte kin nim wain laud oh sohte kin rapahki pein kamwahuparail ni noahrok,+ 9 oh kin kolokol rir sarawi en pwoson* ni nsenmwakelekel.+

10 Re pahn pil ale keseu mahs ma re kak wia pwais wet; irail ahpw pahn papah nin duwen sounsawas kei pwehki sohte karaunparail.+

11 Lih akan pil uhdahn pahn kin mehlel, sohte kin karaunlikamw,+ ese kaunda arail wiewia kan, oh lelepek ni mehkoaros.+

12 Sounsawas kan en pwoudiki lihtehmen, oh kin apwalih mwahu neirail seri kan oh pein arail peneinei. 13 Pwe ohl akan me kin doadoahk mwahu kin alehiong pein irail adamwahu oh saledek laud en koasoia arail pwoson Krais Sises.

14 I koapworopworki me I pahn kohwei rehmw ni ahnsou keren, ahpw I ntingkiwohng uhk mepwukat, 15 pwe ma I pwandala, ke pahn ese duwen omw pahn mour nan peneinei en Koht,+ me iei mwomwohdisohn Koht ieias, uhr oh poahsoanpen me mehlelo. 16 Ni mehlel, rir sarawi wet duwen poadidiong Koht kin uhdahn kesempwal: ‘E ketin sansaldahr ni mwomwen aramas,+ oh pwungla rehn Koht ni eh wiahla ngehn emen,+ pwarohng tohnleng kan,+ ronge lohkselier nanpwungen mehn liki kan,+ tohnsampah kin kamehlele ih,+ oh Koht ketin aledahr ih ni lingan.’

4 Ahpw mahsen kan me kohsang rehn Koht mahsanih ni sansal me ni ahnsou kohkohdo, ekei pahn kesehla arail pwoson ni ar pahn kin rong koasoi likamw akan me mwomwen me e kohsang rehn Koht+ oh padahk en ngehn suwed kan, 2 oh en aramas mwalaun kan likamw,+ me kadeikpen loalarail solahr kin kehn wasa rasehng kilin aramas me mwasingkihla mete karakar. 3 Re kin kalikedi pwopwoud+ oh kin kehkehlingkihong aramas akan en liksang ekei soangen mwenge kan,+ ahpw Koht ketin kapikada mwenge pwukat pwe me pwoson akan me kin ese me mehlelo ni pwung en kin tungoale+ ni arail kin kapingkalahnganki.+ 4 Pwe soahng koaros me Koht ketin kapikadahr me mwahu,+ oh sohte mehkot me aramas pahn soikala,+ ma re kin ale ni kapingkalahngan, 5 pwe e sarawihkilahr mahsen en Koht oh kapakap.

6 Ni omw pahn kihong riatail kan kaweid wet, ke pahn wiahla sounpapah mwahu men en Krais Sises, emen me kin ketihnainki mahsen en pwoson oh padahk mwahu me ke kin nantihong idawehn.+ 7 Ahpw soikala soai likamw akan me kin kasohwauwih Koht,+ duwehte me lih mah kan kin koasoia. Ni pali teio, kaiahnehda pein kowe pwe ken poadidiong Koht. 8 Kaiahn en paliwar* kin mie ekis katepe, ahpw poadidiong Koht kin katapan ni soahng koaros pwehki e kin kolokol inou en mour ahnsou wet oh mour ni ahnsou kohkohdo.+ 9 Koasoi pwoatet me likilik oh e konehng kitail en uhdahn kamehlele. 10 Ihme kahrehda kitail kin doadoahk laud oh nannanti,+ pwehki kitail kin koapworopworki Koht ieias, me iei Sounkomour+ en aramas koaros,+ ahpw ni mehlel irail kan me lelepek.

11 Eri pousehlahte kihkihong irail kehkehlik pwukat oh padapadahkih irail. 12 Ke dehr mweidohng emen en kilengdiong uhk pwehki omw pwulopwul. Ahpw ke en wiahla mehn kahlemeng ehu ong irail kan me lelepek ni lokaia, ni wiewia, ni limpoak, ni pwoson, oh ni mwakelekel.* 13 Pousehlahte nantihong omw pwukoahn wadawad mwohn meteikan,+ kangoange oh padahkih meteikan, lao I lelewei. 14 Ke dehr wiakauwe kisakis me mi rehmw me kohienguhkehr sang ni kokohp ehu ni ahnsou me pwihn en sounapwalih kan pwil pehrail pohmw.+ 15 Medemedewe mwahu* mepwukat; poadidiong wia mepwukat pwe aramas koaros en kilang ni sansal omw kekeirda. 16 Kanakanahieng pein kowe oh omw padahk kan.+ Nantihong kapwaiada mepwukat, pwe ni omw pahn wia met, ke pahn doarehla pein kowe oh pil irail kan me kin rong uhk.+

5 Ke dehr lipwoare ohl mah men.+ Ahpw kamantikih duwehte omw pahpa, mwahnakapw kan duwehte riomw pwutak, 2 lih mah kan duwehte omw nohno, oh peinakapw kan duwehte riomw serepein ni tiahk mwakelekel.

3 Wauneki oh apwalih liohdi kan me kelekelehpw.*+ 4 Ahpw ma liohdi men mie nah seri de nein nah seri kan, irail anahne kasalehda mahs arail poadidiong Koht nan pein arail peneinei,+ oh dupukohng arail pahpa nohno kan oh arail pahpa nohno kahlap kan duwehte ma re pweipwandiong irail,+ pwe ih met me konehng mwohn silangin Koht.+ 5 Eri liohdi men me kelekelehpw oh semwehmwe kin koapworopworki Koht+ oh kin pousehlahte kapakap oh kapakap ni ngidingid ni rahn oh nipwong.+ 6 Ahpw liohdi men me kin momour pwehn kaitarala eh ineng kan* melahr mehnda ma e momour. 7 Eri pousehlahte kihong irail kaweid pwukat,* pwe en dehr mie karaunparail. 8 Ni mehlel, ma emen sohte kin apwalih pein eh peneinei, ahpw mehlel irail kan me kousoan nan imwe, e kahmahmkilahr eh pwoson oh e suwedsang emen me sohte eh pwoson.+

9 Liohdi men pahn iang kileldi ma e dauliher sounpar 60 oh pwoudiki ohltehmen, 10 oh kin adamwahuki doadoahk mwahu kan,+ duwehte apwalihada seri kan,+ kin perenki kasamwo aramas,+ kin widen nehn aramas sarawi kan,+ kin sewese aramas akan nan ar apwal+ oh kin pwerisekiong doadoahk mwahu koaros.

11 Ahpw, ke dehr kilelehdi liohdi pwulopwul kan, pwe ni ahnsou me ineng en wia nsenen pwopwoud kin kerempwahla arail papah Krais, irail kin men pwopwoudida. 12 Oh re pahn ale kadeikparail pwehki re kesehla arail inoun mahso.* 13 Ni ahnsowohte, irail pil ahnla sohte kin wia mehkot, kohkohseli ni ihmw kan; ei, kaidehnte sohte kin wia mehkot, ahpw pil kin lipahned oh kin lidere mouren meteikan,+ koasoakoasoia soahng kan me sohte konehng irail en koasoia. 14 Ihme kahrehda, I men liohdi pwulopwul kan en pwopwoudida,+ naineki seri,+ apwalih arail peneinei, oh dehr kihong me kin uhwong kan ahnsou mwahu en kauwe kitail. 15 Ni mehlel, ekei liohdi kan wetsangehr nan ahl me pwung oh idawehnla Sehdan. 16 Ma lih pwoson men me kiseh kan wia liohdi kei, a en sewese irail pwe mwomwohdiso en dehr toutouki. Eri mwomwohdiso ahpw pahn kak sewese liohdi kan me kelekelehpw.*+

17 Sounapwalih kan* me kin apwalih mwahu mwomwohdiso+ kin warohng wahu laud,+ ahpw mehlel irail kan me kin doadoahk laud ni arail kin koasoia oh padahngki mahsen en Koht.+ 18 Pwe nting sarawio mahsanih, “Ke sohte pahn pirepene ewen kouwol men ni eh kin katohrepeseng kilin krein,”*+ oh pil, “Tohndoadoahk men kin warohng ale pweine.”+ 19 Dehr kamehlele kedip ehu me uhwong sounapwalih men,* ihte ma mie sounkadehde riemen de silimen.+ 20 Panawih+ irail kan me kin wia dihp+ mwohn koaros me kilang, pwe en wia mehn kataman ehu ong meteikan.* 21 I ruweseiuk mwohn silangin Koht oh Krais Sises oh tohnleng pilipildahr kan ken kapwaiada kaweid pwukat oh dehr kin wia pilipil sapahrek.+

22 Ke dehr kin karuwaru en pwil pehmw kan pohn ohl emen;*+ pil dehr iang pidada dipen meteikan; kolokol omw mwakelekel.

23 Ieremenehr nim pihl,* ahpw ale ekis wain pwe en sewese kapehdomwen oh pil pwehki omw kin kalapw soumwahu.

24 Dipen ekei aramas kin sansal ong aramas koaros, irail ahpw mwadangete ale kadeik, ahpw dipen ekei aramas kin sansalda mwuhr.+ 25 Pil duwehte, wiewia mwahu kan kin sansal ong aramas koaros+ oh me sohte kin sansalda ko sohte kak rirla.+

6 Ladu kan* en pousehlahte wauneki arail soumas akan ni mohngiong unsek,+ pwe emen de lahlahwe mwaren Koht oh sapwellime padahk kan.+ 2 Oh pil, ladu kan en dehr kin mwamwahliki arail soumas akan me pwosonlahr pwehki irail wia riatail. Ahpw, irail en wia uwen arail kak en papah, pwehki me pwoson akan oh riarail me kompoak kan me kin paiekihda arail doadoahk mwahu.

Eri pousehlahte padahkihong irail oh kaweidkin irail mepwukat. 3 Ma mehmen kin wia ehu padahk tohrohr oh sohte kin pwungki padahk mehlel*+ me kohsang rehn atail Kaun Sises Krais de pil padahk me kin pahrekiong atail poadidiong Koht,+ 4 e kin aklapalapala oh sohte kin wehwehki mehkot.+ E kin nsenkihte akamai oh akupwungki lepin lokaia kan.+ Mepwukat kin kahrehda peirin, pei, karaunlikamw,* lemelemehk suwed, 5 oh pil aramas akan me arail madamadau sapwungalahr+ oh solahr wehwehki me mehlelo kin akamaiki mehkot tikitik ahnsou koaros, oh re kin medemedewe me poadidiong Koht iei elen alehdi mehkot.+ 6 Ni mehlel, emen kak alehdi mehkot laud ma e kin poadidiong Koht+ oh itarki dahme mie. 7 Pwe kitail sohte wadohng mehkot nin sampah, oh kitail pil sohte kak wahsang mehkot.+ 8 Eri ma mie kanatail mwenge oh atail likou,* kitail pahn kin itarki mepwukat.+

9 Ahpw irail kan me kin nannantihong kepwehpwehla kin pwupwudiong nan songosong, lidip+ oh ineng tohto me pweipwei oh keper oh met kin kahrehiong irail en mwomwla oh ohla.+ 10 Pwe limpoak ong mwohni iei ehu kahrepen soahng suwed koaros, oh ni ekei ar kin kakairada limpoak wet, re kin salongasang pwoson oh kalokehki pein irail medek tohto.+

11 Ahpw kowe, ladu en Koht, tangasang mepwukat. Nantihong wia dahme pwung oh poadidiong Koht oh kasalehda pwoson, limpoak, dadaur oh mpahi.+ 12 Peiki pei wahu en pwoson; koledi teng mour soutuk me ke malipilip ong oh ke wiadahr kadehde mwahu ong wehipokon mwohn aramas tohto.

13 Mwohn silangin Koht me kin ketin komokomourih mehkoaros, oh mwohn Krais Sises, me ketin wiahda kadehde mwahu mwohn Pontius Pailet,+ I ruwesehkin uhk 14 ken kapwaiada kehkehlik kan oh sohte sapwung kis rehmw oh sohte karaunpomw lao atail Kaun Sises Krais ketin sansalda.+ 15 Ih me Kaun Manaman me peren oh ih kelehpw me wia met, e pahn ketin kasalehda pein ih ni ahnsou me kileldier. Ih me Nanmwarkien irail kan me kin kakaun nin duwen nanmwarki oh Kaunen kaun akan,+ 16 oh ihete me sohte kak pwoula,+ oh me kin ketiket nan marain me sohte emen kak karanih,+ me sohte aramas kilangehr de kak kilang.+ Wahu oh kehl poatopoat en kohwong ih kohkohlahte. Amen.

17 Kaweidki* irail kan me kepwehpwe nan koasoandi en mwehi wet* ren dehr kin pohnmwahso,* oh ren dehr kin koapworopworki kepwe kan me pahn sohrala,+ ahpw ren koapworopworki Koht, me kin ketikihong kitail ni sapan soahng kan koaros me kitail kin perenki.+ 18 Padahkihong irail ren wia soahng mwahu tohto, ren kin sapan, perenki ehukihong meteikan dahme re ahneki,+ 19 oh nekidala mwahu ong pein irail poahsoan kehlail ong ahnsou kohkohdo+ duwehte dipwisou kesempwal, pwe ren kak koledi teng mour mehlelo.+

20 Timoty, kanakanahieng dahme kohieng uhk ni likilik+ oh sohpeisang koasoi soh audepe kan me kin kauwehla dahme sarawi, oh sohpeisang madamadau kan me kin uhpene me aramas kin kahdaneki ni sapwung “loalokong.”+ 21 Ni ekei ar kin kasalehda soangen loalokong wet, re kin kesehla pwoson.

Kadek sapan en kin ieiang kumwail.