KERIAUN KISINLIKOU ONG TIMOTY

1 Sang Pohl, wahnpoaron en Krais Sises sang ni kupwuren Koht nin duwen inou en mour me mi rehn Krais Sises,+ 2 ong Timoty, nei seri kompoak:+

Samatail Koht oh Krais Sises atail Kaun en ketikihong uhk kadek sapan, kadek kalahngan oh popohl.

3 I kin kalahngankihong Koht, me I kin papah duwehte semei mehn mahs ako, oh sang ni nsenmwakelekel, I kin tamataman uhk nan ei kapakap ngidingid ni rahn oh nipwong. 4 Ni ei kin tamanda pilen mesomw kan, I kin uhdahn men tuhwong uhk, pwe I en direkihla peren. 5 Pwe I kin tamanda omw pwoson me sohte kin mwalaun,+ me tepin mi rehn omw nohno kahlap Lois oh omw nohno Iunis, ahpw I kamehlele me e pil mi rehmw.

6 Pwehki kahrepe wet, I kin katamankin uhk ken ngoangki doadoahngki* sapwellimen Koht kisakis me kohieng uhk ni ei pwil pehi kat pohmw.+ 7 Pwe ngehn sarawi* me Koht ketikihong kitail sohte kin kahrehiong kitail en masepwehk,+ ahpw e kin kihong kitail manaman,+ limpoak oh madamadau pwung. 8 Eri ke dehr namenengki kadehde duwen atail Kauno,+ de pil ngehi me sensel pwehki ih, ahpw iang lokolongki+ rongamwahwo sang ni omw kin koapworopworki manaman en Koht.+ 9 E ketin komourkitailla oh ketin malipehkin kitail malipilip sarawi ehu,+ kaidehn pwehki atail wiewia, ahpw pwehki kupwure oh sapwellime kadek sapan.+ Kadek sapan wet kohieng kitail sang rehn Krais Sises mwohn tepin kawa, 10 ahpw ahnsou wet e uhdahn sansalda sang ni kasansaldahn atail Sounkomour, Krais Sises,+ me ketin kasohrehla mehla+ oh kasalehiong kitail sang ni rongamwahwo+ duwen atail pahn ahneki mour+ oh paliwar me sohte kak mwerpeseng.+ 11 Pwehki rongamwahwo, I idihdida nin duwen sounkalohk, wahnpoaron oh sounpadahk.+

12 Ih kahrepen ei pil lokolongki mepwukat,+ ahpw I sohte namenengki.+ Pwe I ese Ih me I kin kamehlele, oh I kin koapworopworki me e kak ketin sinsile dahme I likihong ih lao lel ni rahno.+ 13 Eri, kolokolete koasoandi en mahsen mehlel* kan+ me ke rongasang ie ni pwoson oh limpoak me ke ahneki pwehki omw kin miniminiong Krais Sises. 14 Sinsilehki likilik kaselel wet ngehn sarawi* me kin mi loalatail.+

15 Ke eseier me irail koaros me mihmi nan wehin Eisia+ sohpeisangieier, iangahki Pikehlus oh Ermokenihs. 16 Kauno en ketikihong tohnimwen Onesiporus+ kadek kalahngan, pwe e kin kalapw kangoange ie oh e sohte kin namenengki ei senselki selmete. 17 Pwe ni eh mihmi Rom, e nannanti rapahkin ie oh diariehda. 18 Kauno Siohwa* en ketikihong ih kadek kalahngan ni rahno. Oh ke wehwehki mwahu soahng koaros me e wiahiong ie nan Episos.

2 Ihme kahrehda, kowe, nei seri,+ ken pousehlahte ale kehl sang ni kadek sapan me kin mi rehn Krais Sises; 2 oh likihong ohl lelepek kan soahng kan me ke rongasang ie me sounkadehde tohto kin utungada,+ oh re pahn uhd koahiekla pwe ren padahkihong meteikan. 3 Nin duwen sounpei mehlel+ en Krais Sises, iang lokolongki kahpwal kan.+ 4 Aramas emen me wiahla sounpei sohte kin kedirepwkihla wiahda mwohni,* pwehki e men kaperenda aramas me alehda ih en iangala sounpei. 5 Oh pil nan mwadong kan, me kin iang siai sohte pahn alehdi nihn ma e sohte kin idawehn koasoandi en mwadongo.+ 6 Soumwet men me kin doadoahk laud uhdahn pahn tepin ale wahnsapw kan. 7 Ahnsou koaros medemedewe dahme I kin koasoia; Kauno pahn ketin kahrehiong uhk ken wehwehki soahng koaros.

8 Tamataman me Sises Krais ketin iasadasangehr rehn me melahr akan+ oh ketin wia kadaudok en Depit,*+ nin duwen rongamwahu me I kin kalohki,+ 9 me I kin wie lokolongki oh selkihdi nin duwen loallap suwed men.+ Ahpw mahsen en Koht sohte kak selidi.+ 10 Ihme kahrehda I kin dadaurete ni mehkoaros pwehki irail me pilipildahr kan,+ pwe irail en pil ale komour sang ni arail miniminiong Krais Sises, iangahki lingan poatopoat. 11 Mahsen wet me likilik: Ni mehlel, ma kitail iang ih mehla, kitail pil pahn iang ih momour;+ 12 ma kitail kin dadaurete, kitail pil pahn iang ih kaunda nin duwen nanmwarki kei;+ ma kitail pahn kahmahmki, e pil pahn ketin kahmahmkinkitailla;+ 13 mehnda ma kitail sohte lelepek, e pahn ketin lelepekete, pwe e sohte kak ketin kahmahmkihla pein ih.

14 Katakatamankin irail mepwukat, kaweidkin* irail mwohn silangin Koht ren dehr kin akamaiki lepin lokaia kan, mehkot me soh mwahn katepe pwehki e kin kauwehla irail kan me kin rongorong. 15 Wia uwen omw kak pwe Koht en ketin kupwurkin uhk, nin duwen tohndoadoahk men me sohte kin namenengki mehkot, me kin padahngki oh kawehwehda mahsen en me mehlelo ni pwung.+ 16 Ahpw soikala koasoi soh audepe kan me kin kauwehla dahme sarawi,+ pwe koasoi pwukat pahn kalaudehla wiewia kan me kin kasohwauwih Koht 17 oh pahn doupeseng rasehng kens me kin kangkangala uduk. Aimenihus oh Pailihdus pil kin iang irail.+ 18 Ohl pwukat keselahr me mehlelo sang ni ara kin nda me iasada wiawiher,+ oh ira kin kauwehla ahn ekei pwoson. 19 Mendahki met, sapwellimen Koht poahsoan kehlail wie tengeteng oh kilelkidier kilel wet, “Siohwa* ketin mwahngih irail kan me e ketin sapwellimanki,”+ oh “Irail koaros me kin likweriong mwaren Siohwa*+ en kesehla soahng suwed kan.”

20 Eri nan ihmw laud ehu, mie dahl akan me wiawihkihda kohl oh silper, oh pil tuhke oh pwehl. Ekei dahl kin ong doadoahk waun, a ekei kin ong doadoahk mwahl. 21 Eri ma emen kin tohrohrasang dahl en doadoahk mwahl ko, e pahn wiahla dahl* ong doadoahk waun, sarawihla, katapan ong me nainekio, oh onopadahngehr doadoahk mwahu koaros. 22 Eri tangasang ineng en me pwulopwul kan, ahpw nantihong rapahki pwung, pwoson, limpoak, popohl, oh kin iang irail kan me kin likweriong Kauno ni mohngiong mwakelekel.

23 Pil kaleke akamai pweipwei oh sawehwe kan,+ pwe ke ese me re kin imwikihla pei. 24 Pwe ladun Kauno men sohte anahne pei, ahpw e anahne kadek* ong koaros,+ kakohng padahk, oh kin kasalehda kanengamah ni eh kin lelohng me suwed,+ 25 oh kin kaweid irail kan me kin pelian ni meleilei.+ Ele Koht pahn ketin mweidohng irail en koluhla* pwe ren kak esehla loalokong pwung duwen me mehlel,+ 26 oh re pahn pwuralahng arail madamadau pwung oh tangasang lidip en Tepil, ni ar esehda me e parokiraildier pwe ren kapwaiada nsene.+

3 Ahpw ke en ese me ni imwin rahn akan,+ e pahn mie ahnsou apwal oh keper. 2 Pwe aramas akan pahn kin roporop ong pein irail,* poakohng mwohni, aksuwei, pohnmwahso, lahlahwe, sohte pahn kin peikiong pahpa nohno kan, sohte pahn kin kasapahlkalahngan, soaloalopwoat, 3 sempoak, sohte men pwungki meteikan, karaunlikamw, sohte kak kaunda pein irail, lemei, sohte pahn kin poakohng me mwahu, 4 re pahn kin pangala meteikan, keptakai, aklapalap, re pahn kin nsenkihte wia nsenarail oh sohte kin poakohng Koht, 5 re pahn kin mwomwehda aramas me kin poadidiong Koht, ahpw arail mour sohte kin pahrekiong arail kaudok;+ kalekeiukasang soangen aramas pwukat. 6 Pahn mie ohl ekei sang nanpwungarail me pahn kin pedolong nan ihmw kan ni elen widing oh pitihedi lih luwet kan me toutoukilahr diparail kan, me kin mweidohng soangsoangen ineng kan en kaunirailda, 7 me kin ale padahk ahnsou koaros ahpw sohte kak esehla loalokong pwung duwen me mehlel.

8 Eri nin duwen Sanes oh Sampres ara uhwongada Moses, irail pwukat pil pahn pousehlahte uhwongada me mehlelo. Madamadau en soangen aramas pwukat sapwungalahr mehlel, oh Koht sohte ketin kupwurkin irail pwehki re sohte kin weweid ni pwoson. 9 Ahpw re sohte pahn pweida, pwehki arail pweipwei pahn sansalda mwohn aramas koaros, duwehte ohl riemenet.+ 10 Ahpw ke kin idawehn mwahu ei padahk kan, mwomwen ei mour,+ kahrepen ei mour, ei pwoson, ei kanengamah, ei limpoak, oh ei dadaur. 11 Ke ese soangen kamakam kan oh lokolok kan me I lelohng nan Andiok,+ Aikoniomw+ oh Listra.+ I kin dadaur pahn kalokolok pwukat, oh Kauno ketin doareiehsang soahng pwukat koaros.+ 12 Ni mehlel, irail koaros me men mour poadidiong Koht ni arail kin miniminiong Krais Sises pil pahn lelohng kalokolok.+ 13 Ahpw aramas suwed oh mwersuwed kan pahn doulahte sang ni me suwed ong ni me suwedsang. Re pahn pitipitih meteikan oh pein irail pahn pitida.+

14 Ahpw kowe, ke en pousehlahte idawehn soahng kan me ke sukuhlkier oh kamehlelehier,+ oh ke ese ihs me ke sukuhlkihsang soahng pwukat 15 oh sangete ni omw seri pwelel,+ ke eseier nting sarawi kan,+ me kak kahrehiong uhk en loalokongla, me pahn imwikihla omw komourla sang ni omw pwoson Krais Sises.+ 16 Nting Sarawi unsek ntingdier sang ni kaweid en Koht+ oh e mwahu ong padahk,+ ong peneu, ong kapwungala soahng kan, oh ong kaiahne kitail en wia dahme pwung,+ 17 pwe sapwellimen Koht aramas en uhdahn koahiekla oh onopadahr ni unsek ong doadoahk mwahu koaros.

4 I ruweseiuk mwohn silangin Koht oh Krais Sises, me pahn ketin kadeik+ me momour oh me melahr akan+ ni ahnsou me ih oh sapwellime Wehi+ pahn sansalda:+ 2 Ke en kalohki mahseno;+ ngoangki wia met ni ahnsou mwahu oh ahnsou apwal; panawih,+ lipwoare, kangoange irail, ni kanengamah oh koahiek en padahk koaros.+ 3 Pwe ahnsou ehu pahn leledo me irail sohte pahn kin rong padahk mehlel,*+ ahpw re pahn idawehnla pein nsenarail oh re pahn rapahki sounpadahk kan me kin padahngki dahme re kin men rong.+ 4 Re pahn sohpeiweisang ar kin rong me mehlelo oh re pahn uhd rong soai likamw akan. 5 Ahpw kowe, kolokolete omw koahiek en madamadau ni soahng koaros, dadaur pahn kahpwal,+ wia doadoahk en sounkalohki rongamwahu,* kapwaiada omw doadoahk ni unsek.+

6 Pwe I mweidalahr pein ngehi en wudekidi rasehng meirong en wain,+ oh ahnsoun ei mehla*+ uhdahn keren. 7 I peikiher pei wahu,+ I kanekelahr weirentango,+ I kin kolokolete pwoson. 8 Sang met kohla, nihn en pwung+ pahn wie nekinek ong ie, me Kauno, sounkopwung pwung+ pahn ketikihong ie nin duwen keting ehu ni rahno,+ ahpw kaidehn ong iehte, ahpw pil ong irail koaros me uhdahn men en ketin sansalda.

9 Wia uwen omw kak pwe ken mwadangodo rehi. 10 Pwe Demas+ keseiehla pwehki eh poakohng koasoandi en mwehi wet,* oh e samwalahr Deselonika, a Kresens kohla Kalesia, oh Taitus kohla Dalmesia. 11 Lukte me mihmi rehi. Mark en iang uhk kohdo, pwe e pahn sewese ie nan doadoahket. 12 Ahpw I kadaralahr Dikikus+ Episos. 13 Ni ahnsou me ke pahn kohdo, wahdo likou puhp me I pwilikihdi rehn Karpus nan Troas oh doaropwe limilim kan, ahpw mehlel me wiawihkihda kilin mahn.

14 Aleksander, sounsuk pronso, uhdahn kauweiehla. Siohwa* pahn ketin dupukohng ih nin duwen eh wiewia kan.+ 15 Pil kalekehkin uhk ih, pwehki e inenen uhwong dahme se kin koasoia.

16 Sohte me poupalihkin ie ni ahnsou me I tepin doare ieo, pwe irail koaros keseiehla—Koht en dehr ketin kapwukoanekin irail. 17 Ahpw Kauno ketiket limwahi oh ketikihong ie kehl, pwe sang rehi doadoahk en kalohk en uhdahn pweida oh wehi koaros en rong;+ oh I poadoandoarlahr sang ni ewen laion.+ 18 Kauno pahn ketin doareiehsang soahng suwed koaros oh pahn ketin nekinekid ie ong sapwellime Wehi nanleng.+ Lingan en kohwong ih kohkohlahte. Amen.

19 Kihong ei rahnmwahu ong Persila oh Akwila+ oh tohnimwen Onesiporus.+

20 Erastus+ mihmi nan Korint, ahpw I pwilikihdi Tropimus+ nan Mailihdus pwehki e soumwahu. 21 Wia uwen omw kak pwe ken leledo mwohn ahnsoun kopou.

Eupulus kadarewei eh rahnmwahu, oh pil Pudens oh Linus oh Klaudia oh riatail kan koaros.

22 Kauno en ketin ieiang lamalam mwahu* me ke kin kasalehda. Sapwellime kadek sapan en kin ieiang kumwail.