KISINLIKOU ONG TAITUS

1 Sang Pohl, ladun Koht oh wahnpoaron en Sises Krais. Ladu oh wahnpoaron me eh pwoson kin pahrekiong pwoson en sapwellimen Koht me pilipildahr kan oh loalokong pwung duwen me mehlel; me mehlelo kin pidada poadidiong Koht 2 oh kin poahsoankihda koapworopwor en mour soutuk+ me Koht, me sohte kak ketin likamw,+ ketin inoukidahr mahsie; 3 ahpw ni sapwellime ahnsou me e ketin kileledier, e ketin kasalehdahr sapwellime mahsen sang ni kalohk me e ketin likihong ie+ nin duwen kehkehlik en Koht, atail Sounkomour; 4 ong Taitus, nei seri mehlel nan pwoson me kita ahnekipene:

Samatail Koht oh Krais Sises atail Sounkomour en ketikihong uhk kadek sapan oh popohl.

5 I pwilkinuhkedi nan Krihd pwe ken kapwungala soahng kan me sapwung* oh idihada sounapwalih kan* nan ehuehu kahnimw, nin duwen me I kaweidkin uhk: 6 sounapwalih men pahn wia aramas me sohte karaunpe, pwoudiki lihtehmen oh naineki seri pwoson kan me sohte karaunepen ar tiahk suwed de sapeik.*+ 7 Pwe nin duwen sounpapah en Koht, sounapwalih men uhdahn pahn sohte karaunpe, sohte kin keptakai,+ sohte kin mwadang lingeringer,+ sohte kin kamamsakau, sohte kin lemei, sohte kin rapahki pein kamwahupe ni noahrok, 8 ahpw kin perenki kasamwo aramas,+ poakohng me mwahu, ahneki madamadau pwung,*+ weweidki dahme pwung, loalopwoat,+ kin kaunda pein ih,+ 9 oh kin kolokol teng mahsen likilik me pid eh koahiek en padahk,+ pwe en kak kangoangehki meteikan padahk mehlel*+ oh pil panawih+ irail kan me kin uhwong.

10 Pwe mie aramas tohto me kin sapeik, oh me kin koasoia soahng soh katepe kan, oh me kin pitipitih aramas akan, ahpw mehlel irail kan me kin uhki sirkumsais.+ 11 E inenen konehng ken katokehdi auwerail kan, pwehki soangen aramas pwukat kin usehlahte kauwehla pwoson en tohnpeneinei pwon sang ni ar kin padahngki soahng kan me sapwung, pwe ren ale kamwahuparail ni noahrok. 12 Emen rehrail, pein arail soukohp, nda: “Mehn Krihd kan kin likamw ahnsou koaros, re rasehng mahn lawalo keper oh kin pohnkahke oh kapehd en mwenge.”

13 Mehn kadehde wet mehlel. Ihme kahrehda, usehlahte panapanawih irail ni kehlail pwe irail en kehlail ni pwoson 14 sang ni arail sohte pahn kin rong soai likamw en mehn Suhs akan oh kehkehlik en aramas akan me sohpeisangehr me mehlelo. 15 Soahng koaros kin mwakelekel ong aramas mwakelekel kan;+ ahpw sohte mehkot kin mwakelekel ong irail kan me samin oh sohte pwoson, pwe arail madamadau oh kadeikpen loalarail kan me samin.+ 16 Re kin kasalehiong wehipokon me re ese Koht, ahpw re kahmahmkihla ih sang ni ar wiewia kan,+ pwehki re me kasaut oh kin sapeik oh sohte warohng en wia soangen doadoahk mwahu koaros.

2 Ahpw ken pousehlahte padahngki dahme kin pahrekiong padahk mehlel.*+ 2 Ohl mah kan en kin ese kaunda arail wiewia kan, en kin mehlel, ahneki madamadau pwung, kehlail ni pwoson, diren limpoak, oh dadaur pahn kahpwal kan. 3 Pil duwehte, lih mah kan en kin mour nin duwen aramas poadidi kei, ren dehr kin karaunlikamw, dehr kin wia lidun wain, ahpw ren kin wia sounpadahk en me mwahu, 4 pwe ren kin kaweidki* peinakapw kan ren poakohng arail pwoud kan, poakohng neirail seri kan, 5 ahneki madamadau pwung, mwakelekel, apwalih imwarail kan, tiahk mwahu oh uhpahiong arail pwoud,+ pwe emen de kauwe mahsen en Koht.

6 Pil duwehte, pousehlahte kangoangehki mwahnakapw kan ren ahneki madamadau pwung,+ 7 oh kasalehda pein kowe nin duwen mehn kahlemeng mwahu ehu ni soangen wiewia mwahu koaros. Padahngki dahme mehlel ni ngoang,+ 8 ni omw pahn doadoahngki lokaia mehlel* me soh kaupe,+ pwe irail kan me uhwong en namenekla oh sohte kak ndahkin kitail mehkot suwed.+ 9 Ladu kan en uhpahiong arail soumas kan ni mehkoaros,+ nantihong kaperenih irail, dehr kin kapwur lokaia, 10 oh dehr pirapa irail,+ ahpw ren kasalehda me irail aramas likilik kei pwe ren kalinganahda padahk en atail Sounkomour Koht,+ ni soahng koaros.

11 Pwe sapwellimen Koht kadek sapan sansaldahr oh kin wahdo komour ong soangen aramas koaros.+ 12 Kadek sapan wet kin padahkihong kitail en soikala wiewia kan me kin kasohwauwih Koht oh ineng en sampah,+ oh kitail en kin momourki madamadau pwung oh idawehn elen pwung oh kasalehda poadidiong Koht nan koasoandi en mwehi wet,*+ 13 nindoken atail kin awiawih koapworopwor+ kaperen oh kasansal lingaling en Koht lapalap oh atail Sounkomour, Sises Krais, 14 me ketin tounmeteikihla pein ih ong kitail+ pwe en ketin kasaledengkitailla*+ sang soangen wiewia suwed koaros oh kin ketin kamwakelehda pwihn en aramas ehu ong pein ih pwe ren wiahla sapwellime aramas tohrohr oh kin ngoangki wia doadoahk mwahu kan.+

15 Pousehlahte padahngki mepwukat oh kangoange oh panawih meteikan sang ni manaman+ me kohieng uhk. Dehr mweidohng emen en kin kilengdiong uhk.

3 Pousehlahte katamankin irail en kin uhpahiong oh peikiong koperment kan oh irail kan me ahneki manaman,+ ren onopadahng doadoahk mwahu koaros, 2 ren dehr kin kauwe emen, dehr akamai, ahpw ren kin toupahrek+ oh kasalehda mpahi ong aramas koaros ahnsou koaros.+ 3 Pwe mahso kitail pil kin salamalam, sapeik, salongasang ahl pwung, oh kitail kin wia lidun soangsoangen ineng kan oh raparapahkihte peren, kin wiewiahte me suwed oh peirin, kasaut, oh kailongki emenemen.

4 Ahpw ni ahnsou me Koht atail Sounkomour ketin kasalehiong aramas akan sapwellime kadek+ oh limpoak 5 (kaidehn pwehki doadoahk pwung me kitail wiadahr,+ ahpw pwehki pein sapwellime kadek kalahngan),+ e ketin kapitkitailla sang ni eh ketin kamwakelekitailda* oh kahluweikitaillahng mour+ oh kawiliakapwkitailda sang ngehn sarawi.*+ 6 E ketin sapankihong kitail ngehn sarawi* wet sang rehn Sises Krais atail Sounkomour,+ 7 pwe mwurin atail pwungla rehn Koht sang ni sapwellime kadek sapan,+ kitail pahn wiahla serien sohso+ me ahneki koapworopwor en mour soutuk.+

8 Lokaia pwukat me likilik, oh I men ken kin koasoakoasoiahte ire pwukat ni kehlail pwe irail kan me kin kamehlele Koht en kin nsenohkihte wiewia doadoahk mwahu kan. Mepwukat me mwahu oh katapan ong aramas akan.

9 Ahpw kalekeiukasang akamai pweipwei kan, irekidien eden mehn mahs ako oh akupwung kan oh pei kan duwen Kosonnedo, pwe soahng pwukat sohte kamwahupe oh sohte katepe.+ 10 A me pid aramas me kin kaparapeseng padahk likamw,+ soikala ih+ mwurin keieu oh keriapak en eh ale peneu,+ 11 pwe ke ese me soangen aramas menet wetsangehr ahlo oh kin wiewia dihp oh dipe kan kin kadeikada pein ih.

12 Ni ei pahn kadarowohng uhk Artemas de Dikikus,+ wia uwen omw kak pwe ken kohdo rehi nan Nikapolis, pwe ih wasao me I koasoanedier I en mihmi ie erein ahnsoun kopou. 13 Wia uwen omw kak pwe ken sewese Senas, me kin samanih Kosonnedo, oh Apolos, pwe en mie soahng koaros me ira anahne nan ara seiloak.+ 14 Ahpw riatail kan en pil esehla wiewia doadoahk mwahu kan pwe ren kin sawas ni ahnsou me mie anahn karuwaru,+ pwe ren kin direkihla wiewia mwahu kan.+

15 Irail koaros me kin mihmi rehi kadarowohng uhk arail rahnmwahu. Kihong ei rahnmwahu ong me pwoson akan me kin poakohng kitail.

Kadek sapan en kin ieiang kumwail koaros.