NEIN PITER KEIEUN KISINLIKOU

1 Sang Piter, wahnpoaron+ en Sises Krais, ong irail kan me wia mehn keiru kei me mwarahkpeseng nan Pondus, Kalesia, Kapedosia,+ Eisia oh Pidinia. 2 Kumwail me pilipildahr nin duwen me Samatail Koht ketin koasoanedier,+ oh sarawihkihla ngehn sarawi,*+ pwe kumwail en kin peik oh usupkihdi ntahn Sises Krais:+

Kadek sapan oh popohl en lalaudla rehmwail.

3 Kaping en kohwong Koht, Semen atail Kaun Sises Krais, pwe nin duwen sapwellime kadek kalahngan laud, e ketin kahrehiong kitail en ipwsapahl+ ong koapworopwor ehu me momour+ pwehki iasadahn Sises Krais sang rehn me melahr akan.+ 4 Koht ketikihong kumwail sohso ehu me sohte kak mwerpeseng, sohte saminla de sohrala.+ Sohso wet nekinekla nanleng ong kumwail.+ 5 Koht ketin perehki kumwail sapwellime manaman pwehki amwail pwoson ong komour ehu me pahn sansalda ni imwin ahnsou. 6 Pwehki met kumwail kin uhdahn perenda, mehnda ma ahnsou kis, ma anahn, kumwail kin nsensuwedkihla soangsoangen kahpwal kan,+ 7 pwe amwail pwoson me lelohngehr songosong+ en kak kahrehiong kumwail en ale kaping oh lingan oh wahu ni ahnsou me Sises Krais ketin kasalehda pein ih.+ Amwail pwoson wet uhdahn kesempwalsang kohl me kak ohla mendahki e mwakelekelkihla kisiniei. 8 Mendahki kumwail sohte mwahn kilang Krais, ahpw kumwail kin poakohng ih. Mendahki kumwail sohte kin kilang ih ahnsou wet, ahpw kumwail kin kasalehda amwail pwoson ih oh perenkihda kowahlap peren lingan ehu me sohte lokaia kak kawehwehda uwen eh kaperen, 9 pwehki amwail pahn ale ketingpen amwail pwoson, me iei komourpamwail.+

10 Me pid komour wet, soukohp ako me kohpadahr duwen kadek sapan me kohieng kumwail wiahier kalelapakpe ni pwerisek oh rompe ni keneinei.+ 11 Re kin pousehlahte tetehk mwahu dahme pahn wiawi oh iahd me soahng kan me ngehn sarawi* me mi loalarail kin kasalehda duwen Krais,+ pwehki e kadehdedahr mwowe duwen lokolok kan me pahn lelohng Krais+ oh duwen lingan me e pahn ketiki mwuhr. 12 Koht ketin kasalehiong irail me irail sohte kin papah pein irail, ahpw re kin papah kumwail. Re ntingihedi dahme lohkohngkumwailehr, oh kumwail rongasang rehn irail kan me kin lohkihong kumwail rongamwahu sang ni ngehn sarawi* me pekederdo sang nanleng.+ Soahng pwukat me tohnleng kan kin uhdahn men wehwehkihla.

13 Eri, kumwail katengehdi amwail lamalam akan ong doadoahk;+ kolokolete amwail koahiek en madamadau ni unsek;+ koapworopworkihte kadek sapan me pahn kohwong kumwail ni kasansaldahn Sises Krais. 14 Nin duwen seri peik kei, kumwail dehr mweidohng ineng kan me kumwail ahneki mahso ni amwail sehse Koht en kaunkumwailda, 15 ahpw kumwail sarawihla ni amwail wiewia kan koaros duwehte Koht Sarawio me ketin malipei kumwail,+ 16 pwe e ntingdier: “Kumwail pahn sarawihla, pwehki ngehi me sarawi.”+

17 Oh ma kumwail kin likweriong Sahmo me kin ketin wia kadeik ni soh poupali+ nin duwen ahn emenemen wiewia, kumwail en momour ni lemmwin Koht+ erein amwail keikeiru nin sampah wet. 18 Pwe kumwail ese me kaidehn soahng kan me kak mwerpeseng, duwehte silper de kohl, me kasaledengkumwailla*+ sang amwail elen mour soh katepe me kodoudou ong kumwail sang rehn samamwail mehn mahs ako.* 19 Ahpw kumwail saledengkihla nta kesempwal,+ duwehte ntahn sihmpwul men me sohte sapwung kis oh sohte mwahi kis iang,+ me iei ntahn Krais.+ 20 Mehlel, Koht ketin pilada ih mwohn tepin tohnsampah,*+ ahpw e sansalda ni imwin ahnsou pwehki kumwail.+ 21 Pwehki ih, kumwail kin pwoson Koht,+ me ketin kaiasada ih sang rehn me melahr akan+ oh ketikihong ih lingan,+ pwe kumwail en kin pwoson oh koapworopworki Koht.

22 Pwehki amwail kin peikiong me mehlelo, kumwail kamwakeledahr pein kumwail, kahrehda kumwail ahnekier limpoak en pirien me sohte mwalaun,+ eri kumwail en uhdahn poakpene mehlel sang nan mohngiongimwail.+ 23 Pwe kumwail ipwsapahl,+ kaidehn sang ni mehkot me kak mwerpeseng, ahpw sang ni war* me sohte kak mwerpeseng,+ sang ni mahsen en Koht me ketin ieias oh poatopoat.+ 24 Pwe “aramas koaros* rasehng dihpw, oh eh lingan koaros rasehng masal en wahnrohs en nansapw; dihpw kan kin mengila, oh wahnrohs kan kin pwupwudi, 25 ahpw mahsen en Siohwa* kin mihmi kohkohlahte.”+ Oh “mahsen” wet iei rongamwahu me kalohkdahr ong kumwail.+

2 Eri kumwail kihsang rehmwail soangen suwed+ oh widing koaros oh mwalaun oh peirin oh soangen lokaia kamedek koaros. 2 Duwehte seri pwelel kan,+ kumwail kakairada ineng ong milik mwakelekel me pwilisang mahseno, pwe kumwail en kekeirkihda milik wet oh ale komourpamwail,+ 3 ma kumwail songadahr* me Kauno me ketin kadek.

4 Ni amwail patohdo rehn Kauno, iei ih me takai mour me aramas akan soikalahr,+ ahpw Koht ketin piladahr oh kesempwalki,+ 5 pein kumwail wia takai mour kei, me wiahla tehnpas ehu me kokoukihda ngehn sarawi*+ oh wia pwihn en samworo sarawi ehu, pwe kumwail en kin wiahda meirong kan+ me kin kaperenda Koht sang ni kaweidpen ngehn sarawi* pwehki Sises Krais.+ 6 Pwe Nting Sarawio mahsanih: “Kilang! I pahn kihdiong nan Saion takai pilipildahr ehu, takain pwukakeimw kesempwal ehu, oh mehmen me kin kasalehda eh pwoson met sohte pahn nsensuwedla.”*+

7 Ihme kahrehda e kin kesempwal ong kumwail, pwehki kumwail kin pwoson ih; ahpw ong irail kan me sohte kin pwoson ih, “takai me sounkou ihmw kan kesepwekelahr,+ e wialahr takain pwukakeimw me keieu kesempwal”*+ 8 oh “takain kadipekelekel ehu oh paip ehu me re kin pwupwukihdi.”+ Irail kin dipekelekel pwehki ar sohte kin peikiong mahseno. Iei imwila wet me pahn lelohng irail. 9 Ahpw kumwail iei “pwihn en aramas pilipil ehu, pwihn en samworo oh nanmwarki, wehi sarawi ehu,+ pwihn en aramas ehu me Koht ketin sapwellimankilahr,+ pwe kumwail en lohkiseli wasa koaros irair kaselel kan”*+ en Koht me ketin malipei kumwail sang nan rotorot ong nan sapwellime marain kaselel.+ 10 Mahso kumwail kaidehn sapwellimen Koht, ahpw met kumwail wialahr sapwellime;+ mahso kadek kalahngan sohte kohieng kumwail, ahpw met kumwail aleier kadek kalahngan.+

11 Kompoakepahi ko, I kangoangehkin kumwail nin duwen mehn liki kei oh mehn keiru kei,+ kumwail en kin liksang ineng suwed*+ me kin pelipelian kumwail.*+ 12 Kolokol amwail wiewia mwahu nanpwungen tohnsampah,+ pwe ni arail kin karaunehkin kumwail me dene kumwail aramas suwed kei, re pahn kilangki masarail amwail wiewia mwahu kan,+ kahrehda, re pahn kalinganahda Koht ni rahn me e pahn ketin kasawih aramas akan.

13 Pwehki Kauno, kumwail uhpahiong aramas koaros me ahneki manaman,*+ mehnda ma pil nanmwarki men+ pwehki eh lapalap sang kumwail 14 de kepina kan me pekederdo sang rehn nanmwarkio pwe ren kaloke aramas suwed kan oh kapinga irail kan me kin wia me mwahu.+ 15 Pwe iei kupwuren Koht kumwail en katokehdi* lokaia mwahl en aramas pweipwei kan sang ni amwail wiewia mwahu.+ 16 Kumwail en wia aramas saledek kei,+ oh kumwail dehpa doadoahngki amwail saledek pwehn wia mehn pwaindi* wiewia suwed,+ ahpw doadoahngki saledek wet nin duwen ladun Koht kei.+ 17 Kumwail wauneki soangen aramas koaros,+ poakohng riamwail kan koaros,+ lemmwiki Koht+ oh wauneki nanmwarki.+

18 Ladu kan en uhpahiong arail soumas akan ni wahu mehlel,+ kaidehnte ong me mwahu oh toupahrek ahpw pil ong irail kan me apwal en kaperenda. 19 Pwe Koht kin ketin kupwurperenki emen eh kin dadaur pahn kahpwal* oh lokolok ni eh sohte dipada pwehki eh nsenmwakelekel mwohn Koht.+ 20 Pwe ia katepen amwail kin dadaur ma kumwail kin dadaurete kamakam me konehng dipamwail kan?+ Ahpw ma kumwail dadaur pahn lokolok pwehki amwail wia me mwahu, Koht pahn ketin kupwurperenki met.+

21 Ni mehlel, kumwail aleier malipilip wet, pwehki Krais pil ketin lokolongkin kumwail,+ oh ketikihdiong kumwail mehn kahlemeng ehu pwe kumwail en idawehn mwahu dahme e kin ketin wia.*+ 22 E sohte ketin wiahda dihp,+ sohte pil widing ehu dierek sang nin doauese.+ 23 Ni aramas akan ar kin kauwe ih,+ e sohte ketin dupukohng irail.+ Ni ahnsou me e kin ketin lokolok,+ e sohte ketin kamasak irail kan me kin kaloke ih, ahpw e ketin mweidala pein ih rehn Sounkopwung me kin ketin kadeik+ ni pwung. 24 E ketiki dipatail kan+ nin kahlepeo pohn tuhkeo,+ pwe kitail en saledek sang dihp oh momourki mour pwung. Oh “pwehki sapwellime ohla kan kumwail mwahula.”+ 25 Pwe kumwail rasehng sihpw kan me salongalahr,+ ahpw met kumwail pwurodohr rehn silepen sihpwo+ oh sounepwelpen amwail mour.*

3 Pil duwehte, kumwail lih pwopwoud kan, kumwail uhpahiong amwail pwoud kan,+ pwe ma ekei sohte kin peikiong mahseno, re pahn pwosonla sang ni amwail wiewia kan a kaidehn sang ni amwail lokaia,+ 2 pwehki ar kin kilang amwail tiahk mwakelekel+ oh amwail kin waunekin irail laud. 3 Kumwail dehr kin kapwatahda mas liki me duwehte ingihng en pitenmoang oh mehn kapwat kohl+ de likawih likou kaselel, 4 ahpw kumwail en kapwatkihda dahme mi loalamwail, me iei meleilei oh mpahi, mehn kapwat me sohte kak mwerpeseng,+ me kin uhdahn kesempwal mwohn silangin Koht. 5 Pwe ih duwen lih sarawi en mahs ako me kin koapworopworki Koht ar kin kapwatahda pein irail oh uhpahiong arail pwoud kan, 6 duwehte Sara eh kin peikiong Eipraam oh kin ekerki ih kaun.+ Oh kumwail wialahr nah seri, ma kumwail kin wiewiahte me mwahu oh sohte masepwehk.+

7 Kumwail ohl pwopwoud kan pil duwehte, kumwail mihmihte rehrail ni loalokong.* Kumwail waunekin irail+ pwehki lih akan me luwet duwehte dahl kopwukopw ehu oh irail pil pahn iang kumwail sohsohki+ mour pwehki kadek sapan en Koht, pwe en dehr mie mehkot me pahn kerempwa amwail kapakap kan.

8 Eri, kumwail koaros en ahneki madamadauteieu,+ iang iangamwail kan nan arail lokolok, ahneki limpoak en pirien, poakeirailla+ oh kin aktikitik.+ 9 Kumwail dehr dupungki me suwed ong me suwed+ de kauwe ong kauwe.+ Ahpw kumwail wia me mwahu,*+ pwe Koht ketin malipei kumwail ong ni ahl wet, pwe en ketin kapaikumwailda.

10 Pwe “mehmen me kin poakohng mour oh men kilang rahn kan me mwahu anahne silehsang lowe me suwed+ oh silehsang kilin ewe lokaia widing. 11 E anahne sohpeisang me suwed+ oh wia me mwahu;+ e anahne rapahki popohl oh nantihongete kolokol met.+ 12 Pwe Siohwa* kin ketin mahmahsanih me pwung kan, oh e* kin ketin karonge ar kapakap ngidingid,+ ahpw silangin Siohwa* kin uhwong irail kan me kin wia me suwed.”+

13 Ni mehlel, ihs me pahn kauweikumwailla ma kumwail pahn ngoangki wia me mwahu?+ 14 Ahpw ma kumwail pil lelohng lokolok pwehki me pwung, kumwail perenda.+ A kumwail dehr kin masak dahme re kin masak,* de pil salohkihda kowahlap.+ 15 Ahpw kumwail kasarawihala Krais nin duwen Kaun nan mohngiongimwail, oh onopada ahnsou koaros pwe kumwail en sapeng irail koaros me kin idek rehmwail kahrepen koapworopwor me kumwail ahneki, ahpw kumwail wia met ni mpahi+ oh wahu laud.+

16 Kolokol amwail nsenmwakelekel,+ pwe sohte lipilipil dahme aramas kauwehkin kumwail, irail pahn sarohdi+ ni ar kilang amwail wiewia mwahu nin duwen ladun Krais kei.+ 17 Pwe ma iei kupwuren Koht kumwail en lokolok pwehki amwail wiewia mwahu,+ e mwahusang amwail lokolok pwehki amwail wiewia suwed.+ 18 Pwe Krais pwoula pak ehute ong dihp kan,+ aramas pwung men ong aramas sapwung kan,+ pwe en ketin kahreikumwaillahng rehn Koht.+ E ketin kamakamala ni paliwar,*+ ahpw ketin iasada nin duwen ngehn emen.+ 19 Oh ni eh wia ngehn emen, e ketila oh kalohk ong ngehn akan me sensel,+ 20 me kin sapeik ni mwehin Noha ni ahnsou me Koht ketin awiawih ni kanengamah,*+ nindoken warihmwo eh wie kokou,+ me aramas malaulau kei mi loale, iei aramas* welimen me pitsang pihlo.+

21 Papidais, me pahrekiong met, pil kin komourkumwailla ahnsou wet (kaidehk sang ni kihsang samin en paliwar, ahpw sang ni peki nsenmwakelekel rehn Koht),+ pwehki iasadahn Sises Krais. 22 E kin ketiket ni palimaun en Koht,+ pwe e ketidalahr nanleng, oh tohnleng kan oh irail kan me ahneki manaman oh irail kan me ahneki kehl kin uhpahiong ih.+

4 Pwehki Krais eh ketin lokolok ni paliwar,*+ kumwail pil kakehlailihkumwailda ni elen madamadauohte;* pwehki aramas me kin lokolok ni paliwar uhdihsangehr wia dihp,+ 2 pwe erein luhwen eh mour nin sampah,* e solahr pahn kin momourki ineng en aramas,+ ahpw kupwuren Koht.+ 3 Pwe e itarehr ahnsou me kumwail doadoahngkilahr ong amwail wia dahme tohnsampah kin wiewia+ ni amwail kin wia me suwed ni ngidingid,* sohte kak kaunda ineng kehlail kan, sakau daulihala, wia kamadipw mwoarongorong kan, siai en kang sakau oh wia tiahk kasaut en pwongih dikedik kan.+ 4 Irail kin pwuriamweikihla amwail solahr kin iang irail wia wiewia suwed kan me re kin wia, ihme kahrehda re kin kauwehkin kumwail.+ 5 Ahpw aramas pwukat pahn pakadeingkihda arail wiewia kan rehn mehmeno me ketin onopadahr en kadeikada irail kan me momour oh pil irail kan me melahr.+ 6 Ni mehlel, ih kahrepen rongamwahwo eh pil kalohk ong me melahr akan,*+ pwe mehnda ma re pakadeingkihda mwomwarail sang ni madamadau en aramas, re kak mourki kaweid en ngehn sarawi* sang ni madamadau en Koht.

7 Ahpw imwin mehkoaros kerendohr. Kahrehda, kumwail en ahneki madamadau pwung+ oh onopadahng kapakap ahnsou koaros.*+ 8 Mwohn mehkoaros, kumwail en uhdahn limpoakpene,+ pwehki limpoak kin pwaindi dihp tohto.+ 9 Kumwail kasamwo emenemen ni amwail sohte kin kaulim.+ 10 Emenemen kumwail alehdier kisakis ehu, eri kumwail doadoahngki ni amwail papah emenemen nin duwen sounapwalih mwahu kan me kin sewese meteikan ren paiekihda sapwellimen Koht kadek sapan me kin sansalda ni soangsoangen ahl akan.+ 11 Ma emen kin koasoi, a en koasoi nin duwen eh kin koasoia mahsen en Koht; ma emen kin papah, a en wia met ni eh pahn kin koapworopworki kehl me Koht ketikihda;+ pwe Koht en ketin linganla ni mehkoaros+ pwehki Sises Krais. Lingan oh roson iei sapwellimen Koht kohkohlahte. Amen.

12 Kompoakepahi ko, kumwail dehr pwuriamweikihla kahpwal laud kan me rasehng kisiniei me kumwail kin lelohng,+ likamwete mehkot kapw me kin wiawihong kumwail. 13 Ahpw, kumwail en kin pereperen+ pwehki amwail iang pwaisanki en Krais eh lokolok,+ pwe kumwail en pereperen oh pil perenda kowahlap ni sapwellime lingan eh sansalda.+ 14 Ma aramas kin kauwei kumwail pwehki mwaren Krais, a kumwail perenda+ pwehki ngehn sarawi lingan, ei, sapwellimen Koht ngehn sarawi* kin mi rehmwail.

15 Ahpw I sohte men emen kumwail en lokolok pwehki amwail wiahla sounkam aramas de lipirap de aramas suwed de emen me kin lidere mouren meteikan.+ 16 Ahpw ma emen kin lokolok pwehki eh wia Kristian men, a en dehr namenengki,+ ahpw en pousehlahte kalinganahda Koht sang ni eh pahn kin mour nin duwen Kristian men. 17 Pwe met iei ahnsou me kileldier ong kadeik en tepikihda tehnpesen Koht.+ Eri ma e tepida rehtail,+ ia pahn imwilahn irail kan me sohte kin peikiong rongamwahu en Koht?+ 18 “Oh ma e kin apwal ong aramas pwung men en komourala, a dahme pahn wiawihong aramas me sohte kin wauneki Koht oh me dipan men?”+ 19 Eri, irail kan me kin lokolok pwehki arail kin wia kupwuren Koht, ren kin mweidohngete Sounkapikada lelepeko pein irail nindoken arail wiewia me mwahu.+

5 Eri, pwehki I wia sounapwalih* men duwehte irail oh I wiahier sounkadehdehn lokolok kan en Krais oh pil pahn iang ale lingan me pahn sansalda,+ I wia pekipek* wet ong sounapwalih kan nanpwungamwail: 2 Kumwail apwalih sapwellimen Koht pelin sihpw+ me mi pahn epwelpamwail, kumwail papah nin duwen sounapwalih kan,* kaidehn pwehki idihd, ahpw pwehki kumwail kin nsenki papah mwohn silangin Koht;+ kaidehn pwehki amwail mwahuki rapahki pein kamwahupamwail,+ ahpw pwehki ngoang; 3 kumwail dehr kin kaunda irail kan me Koht ketin sapwellimanki,+ ahpw wiahla mehn kahlemeng ong pelin sihpwo.+ 4 Oh ni ahnsou me silepen sihpw lapalapo+ pahn pwarada, kumwail pahn ale nihn lingan me sohte kin sohrala.+

5 Pil duwehte kumwail mwahnakapw kan, kumwail uhpahiong ohl mah kan.*+ Ahpw kumwail koaros en kasalehda aktikitik* nanpwungamwail pwehki Koht kin ketin uhwong me aklapalap kan, ahpw e kin ketikihong me aktikitik kan kadek sapan.+

6 Eri, kumwail pein karakarahkala pahn nin limen Koht manaman, pwe en ketin kasapwilkumwailda ni ahnsou me konehng,+ 7 nindoken amwail patohwanohng ih amwail pwunod akan koaros,+ pwehki eh kin ketin nsenohkin kumwail.+ 8 Kumwail loalokongla oh mwasamwasahn!+ Amwail imwintihtio Tepil kin kohkohseli duwehte laion emen me kin weriwer, raparapahki en kadallehla emen.*+ 9 Ahpw kumwail pelianda ih+ ni pwoson kehlail, pwe kumwail ese me riamwail kan koaros nin sampah pil kin lelohng soangen lokolok me kumwail kin lelohng.+ 10 Ahpw mwurin amwail pahn lokolok ahnsou kis, Koht en kadek sapan koaros, me ketin malipeikumwaildohng nan sapwellime lingan poatopoat+ ni amwail miniminiong Krais, pein ih pahn ketin kanekehla amwail kaiahn. E pahn ketin katengeikumwaildi,+ e pahn ketin kakehlaikumwailda+ oh e pahn ketkinkumwaildiong pohn poahsoan teng. 11 Ih me ketin sapwellimanki manaman kohkohlahte. Amen.

12 I ntingwohng kumwail ni mwotomwot sang ni sawasepen Silpanus*+ me I kin wiahki riatail me lelepek men, pwe I en kangoange kumwail oh kihong kumwail mehn kadehde mehlel ehu, me sapwellimen Koht kadek sapan ong kumwail me mehlel. Kumwail tengediong met. 13 Lih* me mihmi nan Papilon, me pilipildahr duwehte kumwail, kadarewei eh rahnmwahu oh pil Mark,+ nei pwutak. 14 Kumwail rahnmwahukipene metik en pirien.*

Popohl en kin ieiang kumwail koaros me kin miniminiong Krais.