NEIN PITER KERIAUN KISINLIKOU

1 Sang Saimon Piter, sapwellimen Sises Krais ladu oh wahnpoaron, ong irail kan me ahnekier pwoson me uhdahn kesempwal duwehte aht* pwehki pwung en atail Koht oh Sises Krais, atail Sounkomour:

2 Kadek sapan oh popohl en lalaudla rehmwail sang ni loalokong pwung+ en Koht oh Sises, atail Kaun, 3 pwe manaman en Koht kin kihong kitail* soahng koaros me kin sewese kitail en mour poadidiong Koht pwehki loalokong pwung duwen Ih me ketin malipehkin kitail+ sapwellime lingan oh kupwuramwahu. 4 Pwehki sapwellime lingan oh kupwuramwahu, e ketikihong kitail* inou kan me uhdahn kesempwal oh kaselel,+ pwe sang ni mepwukat kumwail en iang ale sapwellimen Koht lingan,+ ni amwail pitsang suwed en sampah me ineng suwed kin kahrehda.

5 Pwehki kahrepe wet, kumwail nantihong wia uwen amwail kak+ pwe kumwail en kapatahiong amwail pwoson kamwahu,*+ oh ong amwail kamwahu loalokong,+ 6 ong amwail loalokong kaunda pein kumwail, ong amwail kaunda pein kumwail+ dadaur, ong amwail dadaur poadidiong Koht,+ 7 ong amwail poadidiong Koht limpoak en pirien, ong amwail limpoak en pirien limpoak ong aramas koaros.+ 8 Pwe ma kumwail direkihla mepwukat, kumwail sohte pahn dangahngahla de sohte wa+ ni amwail kin doadoahngki loalokong pwung duwen atail Kaun Sises Krais.

9 Pwe ma emen sohte ahneki mepwukat, e maskun oh sohte kin men kilang maraino,*+ oh e pil manokelahr me e mwakelekelsangehr eh dihp+ en mehn mahs ako. 10 Eri riei ko, kumwail wia uwen amwail kak koaros pwe amwail malipilip+ oh pilipil en pweiong kumwail, pwe ma kumwail pahn kin wiewiahte mepwukat, kumwail sohte mwahn pahn lohdi.+ 11 Ni mehlel, iei met duwen amwail pahn alehkihdi kapai laud en pedolong nan Wehi poatopoat+ en atail Kaun oh Sounkomour Sises Krais.+

12 Iei kahrepen ei koasoanehdi en kin katamankin kumwail mepwukat ahnsou koaros, mehnda ma kumwail ese mepwukat oh poadidier teng nan padahk mehlel me kumwail sukuhlkier. 13 Ahpw I kin lemeleme me mehkot pwung ehu ei kin katamankin kumwail mepwukat+ erein ei kin mihmi nan impwalet,*+ 14 pwe I ese me I pahn kereniong kohkohsang impwalet, duwen me atail Kaun Sises Krais pil ketin padahkihong ie ni sansal.+ 15 Ahnsou koaros I pahn wia uwen ei kak pwe mwurin ei pahn mweselda, kumwail en kak pein tamanda* mepwukat.

16 Soh, se sohte kin idawehn soai likamw me aramas wiahda ni at padahkihong kumwail duwen manaman oh ketier* en atail Kaun Sises Krais, ahpw se pein kilangki masat sapwellime lingan.+ 17 Pwe e ketin alehdi sang rehn Samatail Koht wahu oh lingan ni ahnsou me soangen mahsen pwukat* peidohng reh sang ni wasa lingalihngie, me mahsanih: “Iet nei Pwutak kompoak, me pein ngehi kin kupwurperenki.”+ 18 Ei, se rong mahsen pwukat eh peipeidihdo sang nanleng nindoken at mihmi reh pohn nahna sarawio.

19 Ihme kahrehda se uhdahn kamehlelehla me kokohp kan pahn pweida. E konehng kumwail en tetehk mwahu kokohp kan me duwehte lamp ehu+ me kin dakedaker wasa rotorot (wasa lao rahnpeseng oh usuhn rahn+ pwarada) me iei nan amwail mohngiong. 20 Pwe kumwail uhdahn ese met, me sohte kokohp ehu nan Nting Sarawio kin pwilsang ni madamadau en aramas. 21 Pwe sohte mwahn kokohp ehu kin pwilisang ni nsenen aramas,+ ahpw ngehn sarawi* me kin kaweid aramas akan pwe ren koasoia mahsen en Koht.+

2 Ahpw soukohp likamw ekei pil pwarada nanpwungen mehn Israel kan, duwehte eh pahn miehla sounpadahk likamw akan nanpwungamwail.+ Irail pwukat pahn kawailong pali kan me pahn kauweikumwailla, oh re pil pahn kahmahmkihla ih* me pwainirailda,+ oh ihme re pahn kahrehkidohng pohrail kaupahr mwadang. 2 Patehng met, me tohto pahn idawehnla arail kin wia me suwed ni ngidingid,*+ oh pwehki irail, aramas akan pahn kin kauwe elen me mehlelo.+ 3 Oh pwehki ar mehwo, re pil pahn isanekihla pitihekin kumwail lokaia likamw kan. Ahpw arail kadeik me koasoandier mahsie+ sohte kin pwapwand, oh re uhdahn pahn kasohrala.+

4 Ni mehlel, Koht ketin kaloke tohnleng kan me dipada+ oh ketin keseiraillong nan Dardarus,*+ salihkinirailpene selmete* nan rotorot mosul pwe ren nekinek ong kadeik.+ 5 Oh e ketin kaloke sampah en kawao,+ ahpw e ketin kapitala Noha, sounkalohki me pwung,+ iangahki aramas isimen,+ ni ahnsou me e ketikihdo nohlik lapalap ehu pohn sampah ehu me diren aramas dipan.+ 6 Oh sang ni eh ketin karoangehkihla douluhl Sodom oh Komora kisiniei lao pehste me luwehdi, e ketin kadeikirahda+ oh kamwomwada dahme pahn wiawihong me dipan akan.+ 7 Oh e ketin doarehla aramas pwungo Lohd,+ me nsensuwedkihla kowahlap ahn aramas suwed kan ar kin wia me suwed ni ngidingid*— 8 pwe ehuehu rahn, aramas pwung menet kin uhdahn nsensuwedkihla eh kin kilang oh rong arail wiewia suwed kan erein eh kin koukousoan nanpwungarail. 9 Eri Siohwa* ketin mwahngih duwen eh pahn ketin kapitasang aramas akan me kin poadidiong Koht nan ar apwal,+ ahpw e pil ketin mwahngih duwen eh pahn ketin nekinekid aramas suwed kan ong kasohrala* ni rahnen kadeiko,+ 10 ahpw mehlel irail kan me kin raparapahki meteikan pwe ren kasamineirailla+ oh kin mwamwahliki irail kan me ahneki manaman pohrail.+

Re me loallap oh keptakai, oh re sohte kin masak kauwe irail kan me Koht ketin kawauwihala. 11 Ahpw mendahki tohnleng kan kehlailsang oh manamansang irail, re sohte kin kauwehkin irail lokaia kamedek, pwehki ar wauneki Siohwa.*+ 12 Ahpw aramas pwukat duwehte mahn akan me sohte kin madamadau, me kin mwekidki ar pepehm oh ipwidiong poaropoardi oh kamwomwmwomwla. Re kin kauwe soahng kan me re sohte wehwehki.+ Re pahn mwomwkihla pein arail elen mour suwed, 13 oh ale lokolok nin duwen pweinen arail elen mour suwed.

Re kin wiahki mehkot kaperen en kaitarala soahng kan me paliwararail kin inangih,+ mehnda ma pil nin rahn. Irail duwehte mwahi oh ohla kan pohmwail. Re kin perenki pitiheki meteikan padahk likamw kan ni ar iang kumwail kamakamadipw.+ 14 Pwoaren masarail kan me diren kamwahl+ oh re sohte kak uhdihsang wia dihp, oh re kin kasongosonge me luwet akan. Mohngiongirail kaiahndahng noahrok. Re wia seri riahla kei. 15 Re keselahr ahl inen oh salongalahr. Re idawehnlahr elen Palaam+ nein Peor, me noahrokehda pweinen wiewia sapwung,+ 16 e ahpw ale peneu pwehki eh kauwehla dahme pwung.+ Dongki men me sohte kak lokaia ahpw lokaia ni ngilen aramas oh kauhdihsang ahn soukohpo eh mwekid en pweipwei.+

17 Irail pwukat iei utuhnpihl madekeng kan oh pwoaiken pahnlahng kan me kin ipirengkiseli melimel, oh rotorot mosul wie nekinek ong irail.+ 18 Irail kin wiahda koasoi en pohnmwahso kei me sohte audepe. Ni arail kin doadoahngki ineng suwed*+ oh wia me suwed ni ngidingid,* re kin kasonge aramas akan me ahpwtehn mweidohsang irail kan me kin mihmi nan mour sapwung.+ 19 Ni ar kin inoukihong irail saledek, pein irail kin wia lidun dihp;+ pwe ma emen kin lohdi pahn emen, e wialahr eh lidu.*+ 20 Ni mehlel, ma mwurin arail pitlahsang samin en sampah+ pwehki loalokong pwung duwen Kaun oh Sounkomour Sises Krais, re ahpw pwurehng wia soahng pwukat oh lohdi pah, ni imwila, arail irair pahn suwedsang nin tapio.+ 21 Ar sohte esehla ni pwung ahl me pwung pahn mwahusang arail esehla, a mwuri re sohpeisang kehkehlik sarawi me re alehdi.+ 22 Dahme pweida rehrail kadehdehda duwen pwung en lepin padahk wet: “Kidi kin pwurehng kang eh mwus, oh pwihk me duhduhwer kin pwurehng tapwur nan pwelmatak.”+

3 Kompoakepahi ko, met iei nei keriaun kisinlikou me I ntingkiwohng kumwail duwehte nei keieun kisinlikowo, pwe I men pangenki amwail koahiek en madamadau ni ei katamankin kumwail soahng kei,+ 2 pwe kumwail en tamanda dahme soukohp sarawi ko koasoiaier* oh kehkehlik en Kauno oh Sounkomour me kumwail rongehr sang rehn amwail wahnpoaron ko. 3 Ahpw mwohn mehkoaros, kumwail en ese duwen met, me ni imwin rahn akan, sounkepit kan pahn kohkihdo arail kepit oh pahn wonlahte nan pein arail ineng kan+ 4 oh kin nda: “Ia inoupen eh ketieren?*+ Sohte mehkot me wekila sang ni rahn me samatail mehn mahs ako melahr,* mehkoaros kin duweduwehte sang ni tepin Koht eh ketin kapikada aramas.”+

5 Pwe irail kin pilada ren pohnsehsehla ire mehlel wet, me lahng miehier sangete mahsie oh sang ni mahsen en Koht, sampah poadada teng sang nan pihl oh nanpwungen pihl akan;+ 6 oh pwehki mepwukat, sampah en ahnsowo kasohrala ni nohlik eh wiawi.+ 7 Ahpw sang ni mahsenohte, lahng oh sampah en ahnsou wet kin wie nekinek ong kisiniei oh pil kin wie nekinek lao lel ni rahn en kadeik oh kasohralahn aramas akan me sohte kin wauneki Koht.+

8 Ahpw kompoakepahi ko, kumwail dehr manokehla mehkotet, me rahn ehu rehn Siohwa* kin duwehte sounpar kid oh sounpar kid kin duwehte rahn ehu.+ 9 Siohwa* sohte kin ketin pwapwand en kapwaiada sapwellime inou,+ duwen ekei ar kin lemeleme, ahpw e kin ketin kanengamahiong kumwail pwehki e sohte ketin kupwurki emen en kasohrala ahpw e ketin kupwurki aramas koaros en koluhla.+ 10 Ahpw rahnen Siohwa*+ pahn leledo duwehte lipirap emen.+ Ahnsowo, lahng pahn sohrala+ ni ngihl kamasepwehk, ahpw soahng kan me wiahda lahng oh sampah pahn peikipeseng karakar mwuledek, oh sampah oh doadoahk kan me kin wiawi wasao pahn sansalda.+

11 Pwehki mepwukat koaros pahn peipeseng nin duwen met, medemedewe soangen aramas dah me konehng kumwail en wia. Amwail wiewia kan en kin sarawi oh en kin kasalehda amwail poadidiong Koht, 12 nindoken amwail kin awiawih oh tamatamante* ketidohn* rahnen Siohwa,*+ me lahng pahn ohkihla+ mpwulen kisiniei oh soahng kan me wiahda lahng oh sampah pahn peikipeseng karakar mwuledek! 13 Ahpw mie lahng kapw oh sampah kapw me kitail kin awiawih nin duwen sapwellime inou,+ oh pwung pahn mi wasa pwukat.+

14 Eri kompoakepahi ko, pwehki kumwail kin awiawih mepwukat, kumwail wia uwen amwail kak pwe ni imwio, en sohte mwahi kis oh sohte sapwung kis rehmwail oh kumwail en kin popohl mwohn silangin Koht.+ 15 Patehng met, kumwail en wiahki kanengamah en atail Kaun komourpamwail, duwen riatail kompoak Pohl eh pil ntingkiwohng kumwail erpit me kohieng ih.+ 16 E kin koasoia duwen soahng pwukat duwehte me e kin wiahiong nah kisinlikou kan koaros. Ahpw ekei soahng pwukat kin apwal en wehwehki, oh me sawehwe* oh luwet kan kin kasapwungehla, duwehte me re pil kin wiahiong iren Nting Sarawi teikan. Met pahn imwikihla ar kasohrala.

17 Eri kumwail kompoakepahi ko, pwehki kumwail eseier loalokong wet, kumwail kaleke pwe aramas suwed pwukat en dehr kahrehiong kumwail en idawehnirailla pwehki padahk likamw kan oh pwupwuweisang poahsoan me kumwail katengetengdiongehr.+ 18 Ahpw kumwail wonlahte kekeirkihda kadek sapan en atail Kaun oh Sounkomour Sises Krais oh loalokongkihla ih. Lingan en kohwong ih met oh pil kohkohlahte. Amen.