NEIN SOHN KEIEUN KISINLIKOU

1 Se ntingkiwohng kumwail duwen mahsen en mour+ me ketier sang nin tapio, me se rongehr, me se kilangkiher masat, me se tehkehr ni keneinei oh peht kat doahkeier, 2 (ei, mouro sansaldahr, oh se kilangehr oh kadehdedahr+ oh lohkihongkumwailehr mour soutuk+ me mi rehn Sahmo oh me sansalohngkitehr), 3 se pil lohkihongkumwailehr dahme se kilangehr oh rongehr,+ pwe kumwail en pil miniminiong* kiht, me wehwehki en miniminiong Samatail oh sapwellime Ohl Sises Krais.+ 4 Oh se ntingihedi mepwukat pwe atail peren en unsekla.

5 Iet rohng me se rongehr sang reh oh kin pakapakairkihong kumwail: Koht iei marain,+ oh sohte kisin rotorot kis mi reh.* 6 Ma kitail kin nda, “Kitail kin miniminiong ih,” ahpw kitail kin weweid nan rotorot, kitail kin koasoi likamw oh sohte kin mour pahrekiong me mehlelo.+ 7 Ahpw, ma kitail kin weweid nan marain duwehte eh kin ketiket nan marain, kitail kin miniminpene, oh ntahn sapwellime Ohl Sises kin kamwakeleikitailsang dihp koaros.+

8 Ma kitail kin nda, “Sohte dipatail,” kitail kin pitipitih pein kitail+ oh me mehlelo sohte mi rehtail. 9 Koht me lelepek oh pwung, kahrehda ma kitail wehkada dipatail kan, e pahn ketin mahkikihong kitail dipatail kan oh kamwakeleikitailsang wiewia suwed koaros.+ 10 Ma kitail kin nda, “Kitail sohte kin wiahda dihp,” eri kitail kin wiahki ih sounlikamw, oh sapwellime mahsen sohte kin mi rehtail.

2 Nei kisin seri ko, I ntingkiwohng kumwail mepwukat pwe kumwail en dehr wiahda dihp. Ahpw ma emen wiahda dihp, sounsawaspatail mie rehn Sahmo, iei Sises Krais,+ ih me pwung.+ 2 Oh e ketin wiahla meirong ehu+ ong dipatail kan+ pwe kitail en pwurehng alehdi kupwuramwahu en Koht, ahpw kaidehn ong kitailte, ahpw pil ong sampah pwon.+ 3 Oh ma kitail kin kapwaiada sapwellime kehkehlik kan, e pahn sansal me kitail kin esehla ih. 4 Mehmen me kin nda, “I esehla ih,” ahpw sohte kin kapwaiada sapwellime kehkehlik kan, ih aramas likamw men, oh me mehlelo sohte kin mi rehn aramas menet. 5 Ahpw mehmen me kin kapwaiada sapwellime mahsen, eh limpoak ong Koht me mi nan eh mohngiong kin uhdahn unsekla.+ Pwehki met, kitail pahn ese me kitail kin miniminiong ih.+ 6 Mehmen me kin nda me e kin miniminiong ih, e anahne pousehlahte weweid duwehte ih me kin ketin weweid.+

7 Kompoakepahi ko, kaidehn kehkehlik kapw ehu me I ntingkiwohng kumwail, ahpw kehkehlik mering ehu me kumwail aleier sang nin tapio.+ Kehkehlik mering wet iei mahsen me kumwail rongehro. 8 Ahpw I ntingkiwohng kumwail kehkehlik kapw ehu, me e kin ketin idawehn oh me kumwail pil kin idawehn, pwehki rotorot sosohralahr oh marain mehlel dakadahr.+

9 Mehmen me kin nda me e mihmi nan marain ahpw kin kailongki+ rie kin mihmihte nan rotorot.+ 10 Mehmen me kin poakohng rie kin mihmi nan marain,+ oh sohte mehkot me e pahn dipekelekelki.* 11 Ahpw mehmen me kin kailongki rie kin mihmi nan rotorot oh kin weweid nan rotorot,+ oh e sehse wasa me e kin kohkolahng ie,+ pwehki rotorot eh karotongelahr mese kan.

12 I ntingwohng kumwail kisin seri kan, pwe dipamwail kan lapwadahr pwehki mware.+ 13 I ntingwohng kumwail pahpa kan, pwehki amwail esehla ih me ketin mie sangete nin tapio. I ntingwohng kumwail me pwulopwul kan, pwehki amwail kalowedier me suwedo.+ I ntingwohng kumwail kisin seri kan, pwehki amwail esehla Sahmo.+ 14 I ntingwohng kumwail pahpa kan, pwehki amwail esehla ih me ketin mie sangete nin tapio. I ntingwohng kumwail me pwulopwul kan, pwehki amwail kehlail+ oh mahsen en Koht kin mihmi loalamwail+ oh kumwail kalowedier me suwedo.+

15 Kumwail dehr poakohng sampah de mehkan nin sampah.+ Ma emen kin poakohng sampah, poakepen Sahmo sohte kin mi loalen aramas menet;+ 16 pwehki soahng koaros nin sampah—ineng suwed*+ oh ineng en mesen aramas+ oh pohnmwahsohki dahme emen ahneki—sohte kin kohsang rehn Sahmo, ahpw kin kohsang nin sampah. 17 Patehng met, sampah oh eh ineng kan pahn sohrala,+ ahpw mehmen me kin wia kupwuren Koht pahn mour kohkohlahte.+

18 Kisin seri kan, kitail miher ni kaimwiseklahn awa. Kumwail rongehr me imwintihtien Krais pahn kohdo,+ oh ahnsou wet imwintihtien Krais tohto pwaradahr,+ oh ih kahrepe wet me kitail esehki me kitail miher ni kaimwiseklahn awa. 19 Re kohkohlahsang kitail, ahpw kaidehn irail iangatail;+ pwe ma iangatail irail, re pahn mihmihte rehtail. Ahpw re kohkohla pwe en sansalda me kaidehn irail koaros iangatail.+ 20 Oh kumwail keidier sang rehn Koht Sarawi,+ oh kumwail koaros ese me mehlelo. 21 I ntingwohng kumwail, kaidehn pwehki amwail sehse me mehlelo,+ ahpw pwehki amwail ese, oh pwehki sohte likamw ehu kin kohsang ni me mehlelo.+

22 Eri ihs me kin likamw? Kaidehn ih me kin kahmahmki me Sises iei Krais?+ Iei ih me imwintihtien Krais,+ me kin kahmahmki Sahmo oh Sapwellimeo. 23 Pwe aramas koaros me kin kahmahmki Sapwellimeo sohte kin miniminiong Sahmo.+ Ahpw mehmen me kin pohnese Sapwellimeo+ kin miniminiong Sahmo.+ 24 A kumwail, dahme kumwail rongehr sang nin tapio uhdahn pahn kin mihmi loalamwail.+ Ma dahme kumwail rongehr sang nin tapio kin mihmi loalamwail, kumwail pil pahn miniminiong Sapwellimeo oh pil Sahmo. 25 Patehng met, iet me pein ih ketin inoukihong kitailen—mour soutuk.+

26 I ntingkiwohng kumwail mepwukat duwen irail kan me kin songosong en pitih kumwail. 27 A kumwail, Koht ketin keiehkinkumwaildi sapwellime ngehn sarawi+ oh ngehn sarawio mihmi loalamwail, oh kumwail sohte anahne emen en padahkihong kumwail; ahpw sang ni eh ketin keieikumwaildi, e ketin padahkihong kumwail soahng koaros,+ oh iei met me mehlel oh sohte likamw. Kumwail en miniminiong ih+ duwehte me kumwail sukuhlkihsangehr met. 28 Eri, kisin seri ko, kumwail en kin miniminiong ih, pwe ni eh pahn ketin sansalda, kitail en ahneki saledek en koasoi+ oh dehr pweieksang ih pwehki atail namenek ni eh ketier.* 29 Ma kumwail ese me ih me pwung, kumwail pil ese me aramas koaros me kin wia me pwung ipwisang reh.+

3 Kilang uwen lauden limpoak me Sahmo ketin kasalehiong kitail,+ pwe kitail en adaneki sapwellimen Koht seri!+ Oh kitail uhdahn sapwellime. Ihme kahrehda sampah sohte kin eseikitail,+ pwehki e sehse ih.+ 2 Kompoakepahi ko, met kitail sapwellimen Koht seri,+ ahpw e saikinte sansalda dahme kitail pahn wiahla.+ Kitail ese me ni eh pahn ketin sansalda kitail pahn duwehla ih, pwehki kitail pahn kilang ih ni uhdahn mwomwe. 3 Oh mehmen me kin koapworopworki ih kin kamwakelehda pein ih,+ duwehte ih me mwakelekel.

4 Mehmen me kin wia dihp pil kin kauwehla kosonned, oh dihp iei kauwehla kosonned. 5 Kumwail pil ese me e ketin pwarodo* pwe en ketikihsang dipatail kan+ oh sohte dihp reh. 6 Mehmen me kin miniminiong ih sohte kin wia dihp;+ me kin wia dihp sohte kin kilang ih de pil sohte kin ese ih. 7 Kisin seri ko, dehr mweidohng emen en pitih kumwail; emen me kin wia me pwung iei ih me pwung, duwehte Sises me pwung. 8 Emen me kin wia dihp kin kohsang rehn Tepil, pwehki Tepilo kin wia dihp sangete nin tapio.*+ Ih kahrepe wet me sapwellimen Kohto ketin sansalkihda, pwe en ketin kauwehla doadoahk en Tepil.+

9 Mehmen me ipwisang rehn Koht sohte kin wia dihp,+ pwe Sapwellime war* kin mihmi loalen soangen aramas menet oh e sohte kak wiewia dihp, pwehki e ipwisang rehn Koht.+ 10 Sapwellimen Koht seri kan oh nein Tepil seri kan kin sansalkihda ire mehlel wet: Mehmen me sohte kin wia me pwung de pil sohte kin poakohng rie, sohte kin kohsang rehn Koht.+ 11 Pwe iet rohng me kumwail rongehr sang nin tapio, kitail uhdahn pahn limpoakpene;+ 12 kitail dehr duwehte Kain, me kohsang rehn me suwedo oh kemehla rie pwutako.+ Oh ia kahrepen eh kemehla ih? Pwehki pein eh wiewia kan me suwed,+ ahpw wiewiahn rieo me pwung.+

13 Riei ko, kumwail dehr pwuriamweiki sampah eh kin kailongkin kumwail.+ 14 Kitail ese me kitail kohsangehr mehla oh kodohng mour,+ pwehki kitail kin poakohng riatail kan.+ Mehmen me sohte kin poakohng rie kin mihmihte nan mehla.+ 15 Mehmen me kin kailongki rie, ih sounkam aramas emen,+ oh kumwail ese me sohte sounkam aramas men pahn ale mour soutuk.+ 16 Kitail esehla limpoak pwehki ih me ketin tounmeteikihla eh mour* ong kitail,+ oh kitail anahne tounmeteikihla atail mour* ong riatail kan.+ 17 Ahpw mehmen me ahneki kepwehn sampah wet oh kilang me rieo anahne sawas ahpw sohte poakehla ih, ia duwen eh kak nda me e poakohng Koht?+ 18 Nei kisin seri ko, atail limpoak en dehr kin sangete dahme kitail kin nda,+ ahpw atail limpoak en kin mehlel+ oh sansalda sang ni wiewia.+

19 Pwehki met, kitail pahn ese me kitail kisehn me mehlelo, oh kitail pahn kamehlelehiong pein kitail* me Koht ketin poakohng kitail 20 mehnda ma atail mohngiong pahn kadeingkin kitail mehkot, pwehki Koht lapalapasang mohngiongitail oh ketin mwahngih mehkoaros.+ 21 Kompoakepahi ko, ma mohngiongitail sohte kin kadeingkitailda, eri kitail kak patohong Koht ni saledek;+ 22 oh pil kitail kin ale sang reh mehkoaros me kitail kin peki,+ pwehki kitail kin kapwaiada sapwellime kehkehlik kan oh kin wia dahme kin kaperenda ih. 23 Ni mehlel, iet sapwellime kehkehliken: kitail en pwoson mwaren sapwellime Ohl Sises Krais+ oh limpoakpene,+ duwehte kehkehlik me e ketikihongkitailehr. 24 Patehng met, emen me kin kapwaiada sapwellime kehkehlik kan kin miniminiong ih oh e kin ketin miniminiong aramas menet.+ Oh sang ni ngehn sarawi* me e ketikihong kitail, kitail kin ese me e kin ketin miniminiong kitail.+

4 Kompoakepahi ko, kumwail dehr kamehlele koasoi* koaros me mwomwen me e kohsang rehn Koht,+ ahpw kasawih koasoi* kan pwe kumwail en kilang ma re uhdahn kohsang rehn Koht,+ pwehki soukohp likamw tohto pwaradahr nin sampah.+

2 Iet duwen amwail pahn ese me koasoi ehu kohsang rehn Koht: Koasoi koaros me kin pohnese me Sises Krais ketido nin duwen aramas emen,* iei me kin kohsang rehn Koht.+ 3 Ahpw koasoi koaros me sohte kin pohnese Sises sohte kin kohsang rehn Koht.+ Oh pil, met iei koasoi en imwintihtien Krais me kumwail rongehr me pahn kohdo,+ oh ahnsou wet e miher nin sampah.+

4 Kisin seri ko, kumwail kohsang rehn Koht oh kumwail kalowedier soukohp likamw akan,+ pwehki ih me ketin miniminiong kumwail+ lapalapasang ih me kin miniminiong sampah.+ 5 Irail kohsang sampah;+ ihme kahrehda re kin koasoia soahng kan me kohsang sampah oh sampah kin rong irail.+ 6 Kitail kohsang rehn Koht. Mehmen me esehla Koht kin rong kitail;+ mehmen me sohte kohsang rehn Koht sohte kin rong kitail.+ Ih met me kitail pahn esehki wekpeseng en koasoi* me mehlel oh koasoi* me likamw.+

7 Kompoakepahi ko, kitail en pousehlahte limpoakpene,+ pwehki limpoak kin kohsang rehn Koht, oh mehmen me kin limpoak kin ipwisang rehn Koht oh kin ese Koht.+ 8 Mehmen me sohte kin limpoak kin sehse Koht, pwehki Koht iei limpoak.+ 9 Iet duwen limpoak en Koht eh sansalda ong kitail: Koht ketin poaronedohng sampah sapwellime Iehros+ pwe kitail en ale mour pwehki ih.+ 10 Iet wehwehn limpoak wet, kaidehn kitail me poakohng Koht, ahpw ih me ketin poakohng kitail oh ketin poaronehdo sapwellime Ohl nin duwen meirong ehu+ ong dipatail kan+ pwe kitail en pwurehng alehdi kupwuramwahu en Koht.

11 Kompoakepahi ko, ma iei met duwen Koht eh kin ketin poakohng kitail, eri kitail pil anahne poakohng emenemen.+ 12 Sohte aramas emen kilangehr Koht.+ Ma kitail kin pousehlahte limpoakpene, Koht kin ketin miniminiong kitail oh sapwellime limpoak kin unsekla loalatail.+ 13 Iet me kitail kin esehki me kitail kin miniminiong ih oh e kin ketin miniminiong kitail, pwehki e ketikihongkitailehr sapwellime ngehn sarawi.* 14 Patehng met, pein kiht kilangehr oh kin kadehdehda me Sahmo ketin poaronedohr sapwellime Ohl nin duwen sounkomourpen sampah.+ 15 Mehmen me kin pohnese me Sises iei sapwellimen Koht,+ Koht kin ketin miniminiong soangen aramas menet oh e kin miniminiong Koht.+ 16 Oh kitail esehda me Koht kin ketin poakohng kitail oh kitail kin kamehlele met.+

Koht iei limpoak,+ oh mehmen me kin kasalehda limpoak ahnsou koaros kin miniminiong Koht oh Koht kin ketin miniminiong ih.+ 17 Pwehki kahrepe wet, limpoak kin unsekla loalatail pwe kitail en ahneki saledek en koasoi*+ ni rahnen kadeik, pwehki nan sampah wet pein kitail duwehte Krais. 18 Sohte masak ni limpoak,+ ahpw limpoak me unsek kin kausasang* masak, pwehki masak me kin ireikitaildi. Ni mehlel, me kin masepwehk sohte kin unsekla ni limpoak.+ 19 Kitail kin limpoak, pwehki Koht eh tepin poakohng kitail.+

20 Ma emen kin nda, “I poakohng Koht,” ahpw kin kailongki rie, ih aramas likamw men.+ Pwe ma e sohte kin poakohng rie+ me e kin kilang, ia duwen eh kak poakohng Koht me e sohte kin kilang?+ 21 Oh iet kehkehlik me kitail alehsang reh, mehmen me kin poakohng Koht pil anahne poakohng rie.+

5 Koaros me kin kamehlele me Sises iei Krais kin ipwisang rehn Koht,+ oh koaros me kin poakohng ih me ketikihda mour kin poakohng me ipwisang reho. 2 Kitail kin poakohng sapwellimen Koht seri kan+ ni atail kin poakohng Koht oh kapwaiada sapwellime kehkehlik kan. 3 Pwe iet duwen wehwehn poakohng Koht, me kitail en kapwaiada sapwellime kehkehlik kan;+ oh sapwellime kehkehlik kan me sohte apwal,+ 4 pwehki koaros me* ipwisang rehn Koht kin kalowehdi sampah.+ Oh kitail kin kalowehkihdi sampah atail pwoson.+

5 Ihs me kak kalowehdi sampah?+ Kaidehn me kin kamehlele me Sises iei sapwellimen Koht?+ 6 Sises Krais, iei ih me ketido sang ni pihl oh nta, kaidehn sang ni pihlte,+ ahpw sang ni pihl oh nta.+ Oh ngehn sarawi* kin kadehdehda duwen met,+ pwehki ngehn sarawi* iei me mehlel. 7 Pwe mie mehn kadehde siluh: 8 ngehn sarawi,*+ pihl+ oh nta;+ oh meh siluh pwukat kin pwungpene.

9 Kitail kin kamehlele kadehde sang rehn aramas, ahpw kadehde sang rehn Koht me lapasang. Pwehki pein Koht me ketin kadehdehda duwen sapwellime Ohlo. 10 Aramas me kin pwoson sapwellimen Koht Ohlo kin ahneki kadehde wet nan eh mohngiong. Aramas me sohte kin pwoson Koht kin wiahki ih sounlikamw men,+ pwehki e sohte kin kamehlele kadehdeo me Koht ketikihda duwen sapwellime Ohl. 11 Oh iet kadehdeo, Koht ketikihong kitail mour soutuk+ oh mour wet kin kohsang rehn sapwellime Ohl.+ 12 Mehmen me kin miniminiong Sapwellimeo ahneki mour wet; mehmen me sohte kin miniminiong sapwellimen Koht Ohlo sohte kin ahneki mour wet.+

13 I ntingkiwohng kumwail mepwukat pwe kumwail en ese me kumwail ahneki mour soutuk,+ kumwail me kin pwoson mwaren sapwellimen Koht Ohlo.+ 14 Kitail kin koapworopworki ih,*+ pwe sohte lipilipil dahme kitail kin peki nin duwen kupwure, e pahn ketin karonge kitail.+ 15 Oh ma kitail ese me e kin ketin karonge sohte lipilipil dahme kitail kin peki, kitail ese me kitail pahn ahneki dahme kitail peki, pwehki kitail pekiher mepwukat reh.+

16 Ma mehmen kilangada rie wiewia dihp me sohte kin imwikihla mehla, e pahn kapakapki ih, oh Koht pahn ketikihong ih mour,+ ei, ong irail kan me sohte wiahda dihp me kin imwikihla mehla. Mie dihp me kin imwikihla mehla.+ I sohte ndaiong emen en kapakapki soangen dihp wet. 17 Wiewia sapwung koaros iei dihp,+ ahpw mie dihp me sohte kin imwikihla mehla.

18 Kitail ese me mehmen me ipwisang rehn Koht sohte kin wia dihp, ahpw me ipwisang rehn Kohto* kin ketin sinsile ih, oh me suwedo sohte kak koledi ih.+ 19 Kitail ese me kitail kohsang rehn Koht, ahpw sampah pwon mi pahn manaman en me suwedo.+ 20 Ahpw kitail kin ese me sapwellimen Koht Ohlo ketidohr,+ oh e ketikihong kitail koahiek en dehdehki mwahu pwe kitail en loalokongkihla Koht mehlelo. Oh pwehki sapwellime Ohlo Sises Krais, kitail kin miniminiong ih.+ Ei, iei ih me Koht mehlel oh mour soutuk.+ 21 Kisin seri ko, kumwail kadohwaneweisang kumwail dikedik kan.+