NEIN SOHN KERIAUN KISINLIKOU

1 Sang ohl maho,* ong lih me pilipildahr oh nah seri kan, me I kin poakohng mehlel, ahpw kaidehn ngehite pwe pil irail koaros me esehla me mehlelo, 2 pwehki me mehlelo kin mihmi loalatail oh pahn mihmi rehtail kohkohlahte. 3 Kadek sapan, kadek kalahngan, oh popohl sang rehn Samatail Koht oh Sises Krais, Sapwellimen Sahmo pahn mi rehtail, iangahki mehlel oh limpoak.

4 I uhdahn perenkihda ei diarada me ekei noumw seri kan kin weweidki me mehlelo,+ nin duwen kehkehlik me kitail alehdi sang rehn Sahmo. 5 Eri lih, met I peki rehmw, kitail en poakohng emenemen. (Kaidehn kehkehlik kapw ehu me I ntingkiwohng uhk, ahpw kehkehlik me kitail aleier sang nin tapio.)+ 6 Oh iet wehwehn limpoak, kitail en pousehlahte weweid nin duwen sapwellime kehkehlik kan.+ Duwehte amwail rongehr sang nin tapio, sapwellime kehkehlik me iei kumwail en pousehlahte weweidki limpoak. 7 Pwe sounwiding tohto pwaradahr nin sampah,+ irail kan me sohte kin pohnese me Sises Krais ketido nin duwen aramas emen.*+ Ih irail me sounwiding oh imwintihtien Krais.+

8 Kumwail kanahieng pein kumwail pwe kumwail en dehr katihasang soahng kan me se koadoahkihadahr, ahpw kumwail en ale ketingpamwail ni unsek.+ 9 Mehmen me daulihala padahk en Krais oh sohte kin mi nan padahk wet, sohte kin miniminiong Koht.+ Mehmen me kin mi nan padahk wet, iei ih me kin miniminiong Sahmo oh pil Sapwellimeo.+ 10 Ma emen kohdo rehmwail oh sohte wahdo padahk wet, kumwail dehr kasamwolong ih nan imwamwail+ de pil rahnmwahwih. 11 Pwe mehmen me rahnmwahwih kin utung eh wiewia suwed kan.

12 Mie soahng tohto me I pahn ntingkiwohng kumwail, ahpw I sohte men ntingiheki doaropwe oh ingk, ahpw I koapworopworki me I pahn kohwei rehmwail oh koasoiaiong kumwail ni atail pahn tuhpene, pwe amwail peren en uhdahn laudla.

13 Nein riomw serepein seri kan, me pilipildahro, kadarewei ar rahnmwahu.