NEIN SUD KISINLIKOU

1 Sang Sud, ladun Sises Krais oh rien Seims,+ ong irail kan me Samatail Koht ketin malipeier+ oh ketin poakohng oh ketin nekinekid ong Sises Krais:+

2 Kadek kalahngan oh popohl oh limpoak en laudla rehmwail.

3 Kompoakepahi ko, mendahki ei kin ngoangki kowahlap en ntingkiwohng kumwail duwen komour me kitail koaros ahnekipene,+ I diarada me I anahne ntingwohng kumwail pwe I en kangoangei kumwail en pei kehlail pwehn pere pwoson+ me kohwongehr me sarawi kan pak ehute.* 4 Kahrepen ei ntingwohng kumwail iei pwehki aramas ekei wailong nanpwungamwail me kadeikparail koasoandier mahso nan Nting Sarawi kan; irail aramas dipan kei me wekidala kadek sapan en atail Koht ong ni kahrepen ar kin wia me suwed ni ngidingid*+ oh re kadehdehda ar salelepek ong Sises Krais,+ ih kelehpw me atail soumas oh Kaun.

5 Mendahki amwail uhdahn eseier mepwukat koaros, I men katamankihong kumwail me Siohwa* ketin kapitala aramas ako sang sapwen Isip,+ mwuri e ahpw ketin kasohrehla irail ko me sohte kasalehda pwoson.+ 6 Oh tohnleng ko me sohte kolokol dewerail ahpw kesehla uhdahn ar wasa,+ e ketin salihiraildi nan rotorot mosul kohkohlahte ong kadeik en rahn lapalapo.+ 7 Pil duwehte Sodom oh Komora oh kahnimw kan me mi limwahra me pil kin wia tiahk me inenen samin me pid wia nsenen pwopwoud* oh kin kaitarala ineng suwed en uduk;+ re wia mehn kataman ehu ong kitail ni ar aleier kadeik en kalokolok en kisiniei soutuk.*+

8 Mendahki met, aramas pwukat pil kin kalapw ouraman, wia tiahk samin, mwamwahliki irail kan me ahneki manaman pohrail oh kin kauwe irail kan me Koht ketin kawauwihala.+ 9 Ahpw ni ahnsou me Maikel,+ tohnleng me keieu lapalapo,+ ketin uhkihong Tepil paliweren Moses,+ e sohte mwahn ketin kadeik de kauwehki ih lokaia kamedek,+ ahpw e mahsanih: “Siohwa* en ketin angiangihiuk.”+ 10 Ahpw aramas pwukat kin kauwe soahng koaros me re sohte uhdahn wehwehki.+ Oh re kin kauwehkihla pein irail soahng koaros me re ese sang ni pein ar pepehm kan, duwehte mahn akan me sohte ar madamadau.+

11 Meid suwediong irail! Pwe re idawehn elen Kain+ oh mwadang idawehnla ahl suwed en Palaam+ pwe ren ale keting oh re mwomwla pwehki ar lokaiahn uhwong kan,+ duwehte Kora.+ 12 Irail pwukat rasehng takai kei pahn pihl me sohte sansal ni ar kin iang kumwail mwenge nan amwail kamadipw en limpoak kan,+ silepen sihpw kei me sohte kin namenengki kamwekamwenge pein irail.+ Re rasehng depwek me ipipirengkiseli kisinieng ahpw sohte kamwerehdi keteu;+ tuhke kan me sohte kin wa ni ahnsawi oh melahr douluhl* oh saretepda. 13 Re rasehng ilok kehlail en nansed me kin kihda pwudopwud en arail tiahk kanamenek kan;+ usu kan me kin moamoahlseli mwahl, me Koht ketikihdiong nan wasa me keieu rotorot wasa me re pahn mihmi ie kohkohlahte.+

14 Ei, Enok+ me keisuhwen dih sang Adam pil kohpada duwen irail ni eh koasoia: “Kilang! Siohwa* ketido iangahki sapwellime tohnleng sarawi ngedehrie*+ 15 pwe en ketin kaloke aramas koaros+ oh kadeik irail koaros me sohte kin wauneki Koht pwehki wiewia suwed kan koaros me re wiahda oh lokaia lemei koaros me dipan akan wiahiong.”+

16 Aramas pwukat kin lipahned,+ re kin kaulimki ar mour, kapwaiada pein ar ineng kan+ oh kin suweiki pein irail oh ahnsowohte kapinga meteikan ong pein kamwahuparail.+

17 Ahpw kumwail kompoakepahi ko, kumwail tamanda dahme sapwellimen atail Kaun Sises Krais wahnpoaron ko koasoiaiong* kumwail mahso, 18 duwen arail kin ndaiong kumwail: “Ni imwin ahnsou, pahn mie sounkepit kan me kin idawehn pein arail ineng suwed kan.”+ 19 Irail pwukat me kin kahrehda liaktohrohr,+ re duwehte mahn oh re sohte kin mweidohng Koht* en ketin kaweid irail. 20 Ahpw kumwail kompoakepahi ko, kumwail kakehlakahda amwail pwoson sarawi oh kapakap ni ahl me ngehn sarawi* kin kaweidkin kumwail,+ 21 pwe kumwail en dadaurete ni limpoak en Koht,+ ni amwail kin awiawih kadek kalahngan en atail Kaun Sises Krais, me kahluwalahng mour soutuk.+ 22 Pil pousehlahte kasalehda kadek kalahngan+ ong ekei me kin peikasal;+ 23 doareirailla+ ni amwail pahn serekiniraildo sang nan kisiniei. Pousehlahte kasalehiong meteikan kadek kalahngan, ahpw kumwail wia met ni masak, ni amwail kin kailongki ar likou me saminkilahr ar tiahk suwed.+

24 Koht kak ketin pere kumwail pwe kumwail de dipekelekel oh ketin wiahiong kumwail en kesihnenda ni mwakelekel+ oh peren laud mwohn sapwellime lingan.* 25 Lingan, lapalap, roson oh manaman en kaunda en kohwong Koht mehtehmeno atail Sounkomour pwehki Sises Krais atail Kaun, sang mwohn tepin kawa, ahnsou wet oh pil kohkohlahte. Amen.