Komw Kak Anehki “Mongiong en Laion”

PAIPEL ekei pak kin doadoahngki laion me iei kilelepen eimah oh likilik. Ohl akan me kommad oh eimah kin duwehte ma re ahneki “mongiong en laion,” oh me pwung kan kin rasehng “laion pwulopwul men me kommwad.” (2 Samuel 17:​10; Lepin Padahk 28:⁠1) Keiou ni ahnsou me pelian kin wiawihong, laion kin kasalehda me e warohng edeo me iei “mahn me keiou kehlail nanpwungen mahn koaros.”​—⁠Lepin Padahk 30:⁠30.

Siohwa Koht kin karasahong ah nananti en pere sapwelime aramas kan duwehte en laion kin soh masak. Aiseia 31:​4, 5 mahsanih: “Duwen silepen sihpw men eh kin weriwering laion men sang rehn mahn emen me e kemehlahr, oh laiono sohte kak masepwehkada tang; iei duwen eh sohte mehkot pahn kak kapweiekiehdi, Kaun-o (Siohwa), Wasa Lapalapie, ni ei pahn kin sinsile oh doandoare Nahna Saion . . . ih duwen ngehi, Kaun-o (Siohwa), Wasa Lapalapie, pahn kin sinsile oh doandoare Serusalem.” Ihme karehda Siohwa kamehlelekihong sapwelime ladu kan epwel me e pahn wiahong irail, keiou ma re lelohng apwal sang imwintihti kan.

Paipel kin karasahong en tohnsampah imwintihti me keiou lapalap, Satan me Tepel, duwehte laion weriwer men. Pwehn pere kitail sang en lohdi pah, Pwuhk Sarawi padahkiong kitail: “Kumwail onohnop oh mwasamwasahn.” (1 Piter 5:⁠8) Ehu ahl me kitail kak wia met iei en liksang pwangada ni pali ngehn. Me pid duwen ire wet Sises mahsanih: “Kumwail pein mwasamwasahn kumwail. Kumwail dehr kedirepwehkin kumwail mwenge laud oh sakau kehlail, oh pwunod kan en sampah wet.” (Luk 21:​34-36) Ehi, pepehd ni pali ngehn ni “imwin rahn” pwukat kak kihong kitail “mongiong en laion,” ehu me ‘tengeteng, oh kin likih Siohwa.’​—⁠2 Timoty 3:1; Melkahka 112:​7, 8.