“Wia lidu en Soumaso, Krais”
EREIN nan poadopoad, aramas rar kan kin mihla pahn katoutou en kaliduhla. Karaspe ehu, sounpar kid samwalahro, mehn Israel kan, kin ale lokolok laud pahn sounepwel kan en mehn Isip. Nin duwen me Paipel mahsanih, re kin “kihong pohn mehn Israel kan sounruwese lidu kan pwehn katoutouirailla pahn wisik toutou kan,” keiou ren wiahda pirik kan.—Eksodus 1:11, The Jerusalem Bible.
Nan sahpw tohto nan rahnpwukat, aramas sohte kin uhdahn wiahla lidu kei, ahpw me tohto kin doadoahk awa tohto pahn irair kan me—idihd—ekei pak lemei. Re kin mihla pahn wisik toutou kan en irairo me adaneki liduwih pai en wehi.
Ahpw, mie, ehu mwomwen kaliduh me sohte toutou. Wahnpoaron Pohl kangoangehki ienge me pwoson akan: “Pwe Krais, iei ih Kaun mehlel me kumwail kin papah.” (Kolose 3:24) Irail ko me pilada en wiahla liduhn Krais kin diar kommoal sang arail wisik toutou kan. Pein Sises mahsanih: “Kumwail kohdo rehi, kumwail koaros me pwangadahr oh toutoukilahr amwail mehn wisik kan, I ahpw pahn kommoaleikumwailla. Kumwail ale oh kapaikada ei mehn wisiket, oh kumwail padahngki sang ie, pwe I me opampap oh nan kapehd karakarahk; kumwail ahpw pahn diar kommoalpen ngehnomwail kan. Pwe mehn wisik me I pahn kihong kumwail me mengei, oh audepe kan me marahra.”—Madiu 11:28-30.
Alehda ahn Sises wisiko sohte kin kasaledek emen sang pwukoa en apwalih en emen peneinei ni paliwar. (1 Timoty 5:8) Ahpw, e kin kihda kamaiou sang lidip tohto en raparapahki en kepwehpwehla. Kristain kan endehr wiahkihla kansenamwahu en kepwe kan me keiou nan arail mour, ahpw ren nsenamwahuki anahn itar kan en mour.—1 Timoty 6:6-10; kaparekiong 1 Korint 7:31.
Kristain kan kin pil diar kommoal ni arail kapwaiada arail pwukoa en kalohngkiseli “rongamwahu” en Wehin Koht. (Madiu 24:14) Met kin wahdo peren mehlel oh nsenamwahu mehlel!
Kitail en kalahnganki pwe kitail kak wia “lidu en Soumaso, Krais.”
[Credit Line]
Pictorial Archive (Near Eastern History) Est.