Komw Kak Kasawihada Mehnia Me Pwung De Mehnia Me Sapwung?
“Ngehi me pwukoahki kemehla mpen aramas 25. . . . Ni pwong koaros oh ni rahn koaros I kin tamatamante met. I kin auraman suwedki met. . . . I kak kohla wasakis oh kilangada mesen aramas men me kin katamankihong ie aramas ko me I kemehla. Mepwukat sansalte nan ahi madamadau, likamwete e wiawi rahnwet, ahnsouwette. . . . I sohte kak mahkohng pein ngehi pwehki soahng ko me I wiahda.”—V.S. “I ale kaweid en kohla oh kemehla imwintihti ko. . . . I sohte mwohndi mahs oh medemedewe me imwintihti ko iei ohl akan, lih kan oh seri kan. . . . Ahi pepehm duduwehte sangete ahnsouwo lel ahnsouwet me I wiahda dahme I ale kaweid en wia, oh I kapwaiada ruwes ko me kohieng ie oh I sohte pehm me dahme I wiahda me sapwung.”—W.C.
NI March 16, 1968, ohl riemenet me koasoaipera pwarada powe iang ehu mahwen me mwuhr adanekihla mahwen suwed ehu. Ira, iangahki sounpei teikan, pedolong nan ehu kisin kousapw en Vietman oh kemehla aramas kan me kaidehn sounpei—iangahki lih kan, seri kan, oh ohl laud kan. Ahpw tehk wekpeseng en lamalam en ohl riemenet. Tepin sounpeio kin nsensuwedkihla dahme e wiahda. Kariemen en sounpeio medemedewe me dahme e wiahda me pwung. Dahme karehda lamalam en aramas riemenet kin wekpeseng ong dahme ira koaros kin wiahda?
Pasepengo kin poahsoanda pohn kadeikpen loalen emen—mehkot me Koht ketikihong nan loalatail me kin sewese kitail en ni mehlel kasawih pein kitail oh tenekih atail wiewia kan oh ineng kan. Kadeikpen loaletail iei pepehm en dahme pwung oh sapwung me mihmi loaletail.
Ni ahr kin wiahda koasoandi kan, ekei aramas kin doadoahngki lepin kahs en mahs wet, “Mweidohng kadeikpen loalomw en wia sounkaweidpomw.” Ahpw, e kansensuwed pwe, kadeikpen loale sohte kin ahnsou koaros pwung. Ehi, me tohto kin mweidala oh kin pil wiahda wiewia suwed kan, oh kadeikpen loalerail sohte kin koarompwa irail. (Sohn 16:2; Wiewia 8:1) Nin duwen me sounnting en Inglis Samuel Butler koasoia, kadeikpen loale “kin ahnsou keren sohla kapehmiki irail ko me sohte kin mwekidiki kadeikpen loalerail me arail wiewia me sapwung.”
Komw kak likih kadeikpen loalomw? Pasapengo kin poahsoanda pohn ia uwen mwahu en ah kaianda, nin duwen me artikel en mwuri pahn kasalehda.
Credit Line]
Kilel en mahwen powe: U.S. Signal Corps photo