Sain Akan Ni Keilen Elen Mour

MA KE kekeid kohwei pohn ahl ehu me ke sohte nohn ese, ke pahn nda me sain ni keilen ahl akan me kedirepw? Uhdahn soh! Ni mehlel ke pahn kilangwohng sain pwukat me re pahn sewese iuk en dehr salongasang ahlo me pahn kahluwahukalahng wasa me ke kohkohla ie.

Ahpw, iaduwen kekeid nan ahl en mour? Kitail kak kohla wasa me kitail kohkohla ie ma sohte sain ni keilen ahl akan? Emen soukohp en Koht en mahsie kasalehda duwen soakoahiek en tohnsampah nan irair wet. E mahsanih: “I ese, Maing Kauno, me elen aramas kaidehn pein ih me kin pilada; pil kaidehn aramas me pahn koasoanehdi elen ah mour.”​—Seremaia 10:23, The New English Bible.

Eri, iawasa kaweid me anahn kak diarek ie? Utupen soahngen kaweid likilik pwukat kin kohsang rehn Sounkapikadahn aramas, oh sain ni keilen ahl akan ni karasaras kin diarek nan Paipel. Siohwa, ki sapwellime Mahsen, mahsanih: “Ma kumwail pahn salongasang nan ahlo oh kolahng ni palimeing de maun, kumwail pahn rong kapitie sang mwurimwail me mahsanih, ‘Iet ahlo, kumwail idawehn.’”​—Aiseia 30:21.

Ehi, Mahsen en Koht kin ketikihda kaweid likilik kan nan irair kan koaros en atail mour. (Aiseia 48:17; 2 Timoty 3:​16, 17) Ahpw, e kansensuwed pwe, pali moron en tohnsampah kin kekeid pohn elen mour uhtohrsang kaweid en Koht. (Madiu 7:13) Mendahki met, sain pwukat poadidiehr teng oh koaros kak doadoahngki! Ke pahn peikiong sain pwukat ni omw alialu nan elen mour?