Ke Tamataman?
Ke wadekala mwahu Kahn Iroir pwukat? Kilang ma ke kak sapengala peidek kan me kileldi pah:
Dahme kin kamwakid kitail en kalinganahla Siohwa?
Kitail kin wia met pwehki kitail kin wauneki Siohwa oh uhdahn poakohng ih. Kitail pil kin kalinganahla ih pwehki kitail men meteikan en esehla ih.—w25.01, pali 3.
Ma emen kansensuwedihkitailla, ia duwen atail kak mahkohng ih?
Kitail en dehr pohnsehsehla atail pepehm kan; ahpw ni atail kin nantihong sohla lingeringer, met kak sewesei kitail en sohte mweidohng lingeringer en kamedekeikitailla.—w25.02, pali 15-16.
Dahme kahrehda tohnpadahk Mark wia mehn kahlemeng mwahu ong brother pwulopwul kan?
Mark perenki ale pwukoahn papah meteikan. Mendahki mwein e nsensuwedla oh mworusala erein ahnsou ehu, Mark sohte kin uhdi. E kin karanihala Pohl oh Kristian koahiek kan.—w25.04, pali 27.
Ia wehwehn Sises eh mahsanih ni eh loulouki: “Ngehi me kahrehiong irail en ese mwaromwi”? (Sohn 17:26)
Sapwellime tohnpadahk kan eseier mwaren Koht. Ahpw Sises sewese nah tohnpadahk ko ren esehla mwahu Siohwa, iangahki dahme e ketin kupwurki ong sampah oh aramas akan, dahme e ketin wiadahr oh pahn wia, oh sapwellime irair kaselel kan.—w25.05, pali 20-21.
Ma kitail aktikitik, dahme kitail kin pohnese?
Kitail kin pohnese me kitail sohte ese ekei soahng kan. Karasepe, kitail sohte ese iahd me imwio pahn leledo de ia duwen Siohwa eh pahn ketin mwekid ni ahnsowo. Kitail pil sohte ese dahme pahn wiawi lakapw de ia uwen laud Siohwa ketin mwahngih kitail.—w25.06, pali 15-18.
Dahme kak sewesei kitail en paieki artikel ehu de kapahrek ong wehipokon?
Kitail kak idek rehtail: ‘Mehn kadehde dah me kadoadoahk pwehn sewese aramaso en kamehlele? Mie ehu karasaras mwahu me I kak doadoahngki ni ei ehukihong ih padahk mehlel wet? Ihs me pahn perenki oaralap wet oh iahd me I kak ehukihong ih?’—w25.07, pali 19.
Dahme kitail kak sukuhlkihsang sapwellimen Koht mahk sang ni dahme e ketin wiahiong Depit?
Depit wiahda dihp laud kan, ahpw ni eh uhdahn koluhkihla, Siohwa ketin mahkohng ih. (1 Nan. 9:4, 5) Ni Koht eh ketin mahkohng me dipan men, e sohte kin ketin tamataman dipe me e wiahda mahso oh sohte pahn pwurehng ketin kapwukoahki dipe ni ahnsou kohkohdo.—w25.08, pali 17.
Ma tohnsukuhlo apwalki wehwehki mehkot, dahme ke kak wia?
Ma e apwalkihte wehwehki mehkot ehu mwurin omw song en kawehwe mwahu duwen met sang Paipel, doulahte nan onopo oh koasoanehdi en pwuralahng ireo mwuhr.—w25.09, pali 24.
Paipel mahsanih me dihp iei “manaman widingan.” (Ipru 3:13) Ia duwen?
Dihp kak kasonge kitail en wia mehkot suwed. E pil kak pitihkitaildi pwe kitail en peikasalki ma Koht uhdahn ketin poakohng kitail.—w25.10, pali 16.
Soahng siluh dah me kak sewese atail kapakap kan en kakerenihkitailla rehn Siohwa?
(1) Kitail kak medewe sapwellimen Siohwa irair kaselel kan. (2) Kitail kak medewe kahpwal me kitail ahneki oh ndahla, me duwehte mahkohng emen. (3) Kitail en dehr pitipit en kapakap. Met pahn kihong kitail ahnsou en padahkihong Siohwa soahng tohto duwen atail pepehm.—w25.10, pali 19-20.
Ia duwen atail kak sewese me mah kan?
Kitail kak mwemweitla de call me mah kan. Mwein kitail pil kak iang irail ni rahnen arail pwurala rehn toahkte. De kitail kak iang irail nan soangsoangen doadoahk en kalohk kan.—w25.11, pali 6-7.
Ia duwen Kristian kan ar kak wiahiong arail kapwopwoud en kawauwih Siohwa?
Peikiong palien kosonned kan. Tehk mwahu me rahnen kapwopwoudo oh kamadipwo kin kasalehda wahn sapwellimen Koht manaman. En toupahrek ong mwomwen omw likou oh kapwat, oh tehk mwahu ken soikala tiahk kan me sohte kin pahrekiong Paipel. Koasoipene mwahu pil ong amwa peneinei ni amwail koasoakoasoane amwa kapwopwoudo.—w25.12, pali 21-24.