Esekiel
30 Oh Siohwa ketin pwurehng mahsanihong ie: 2 “Nein-aramas, wia kokohp oh nda, ‘Iet me Kaun Wasa Lapalahpie Siohwa ketin mahsanih:
“Mwahiei, ‘Meid suwed, rahno kohkohdo!’
3 Pwe rahno kerendohr; ei, rahnen Siohwa kerendohr.+
E pahn wia rahn depwekin ehu,+ ahnsou ehu me kileldier ong wehi kan.+
4 Kedlahs pwoat pahn kodohng Isip, oh masak pahn kipehdi Idiopia ni ahnsou me aramas akan pahn kamakamala nan Isip;
Eh kepwe kan wisiksang oh poahsoane kan mweredi.+
5 Idiopia,+ Pud,+ Lud oh soangsoangen aramas koaros,*
Oh Kup, iangahki aramas akan en sapwen inou lap,*
Irail koaros pahn kamakamkihla kedlahs.”’
6 Iet me Siohwa ketin mahsanih:
‘Irail me kin utung Isip pil pahn pwupwudi,
Oh en Isip manaman pohnmwahso pahn tikitikla.’+
“‘Sang Mikdol+ lel Saiini+ re pahn mehkihla kedlahs nan sahpwo,’ Kaun Wasa Lapalahpie Siohwa me ketin mahmahsen. 7 ‘Re pahn wiahla sahpw ehu me keieu tehnla, oh eh kahnimw kan pahn wia kahnimw keieu tehnla kei.+ 8 Oh re pahn anahne ese me ngehi me Siohwa ni ei isikada Isip oh ni ienge kan koaros ar mwutpene. 9 Rahno, I pahn kadarewei meninkeder kan ren iangewei sohp kan pwehn wiahiong Idiopia me kin koapworopworki pein ih en masepwehkada; masak pahn kipeiraildi ni rahn me kohkohdo pohn Isip, pwe rahno uhdahn pahn leledo.’
10 “Iet me Kaun Wasa Lapalahpie Siohwa ketin mahsanih: ‘Sang ni pehn Nanmwarki Nepukadnesar* en Papilon, I pahn kamwomwala pokon en aramas akan nan Isip.+ 11 Ih oh nah pwihnen sounpei kan, me keieu lemei en wehi kan,+ pahn wisikdo pwe ren kamwomwala sahpwo. Irail pahn usada neirail kedlahs kan pwe ren peiong Isip oh audehkihda sahpwo me kamakamala kan.+ 12 I pahn wekidohng dahu en Nail kan+ ni sahpw madekeng oh netikihong sahpwo nan pehn me suwed kan. I pahn wiahiong sahpwo oh mehkoaros loale en mwomwla sang ni pehn mehn liki kan.+ Ngehi, Siohwa me mahmahsen.’
13 “Iet me Kaun Wasa Lapalahpie Siohwa ketin mahsanih: ‘I pil pahn kauwehla dikedik kasaut kan* oh kamwomwala koht soh katepe kan en Nohp.*+ E sohla pahn mie kaun emen sang sapwen Isip, oh I pahn kihdi masak nan sapwen Isip.+ 14 I pahn kamwomwala Padros+ oh isikada Soan oh kadeikada Noh.*+ 15 I pahn wudekihdi ei engieng pohn Sin, wasahn ruk kehlail en Isip, oh kamwomwala tohn Noh kan. 16 I pahn isikada Isip; oh Sin pahn masepwehkada oh kehl en Noh kan pahn rengkidi oh mahwen pahn wiawihong Nohp* ni rahn! 17 Mwahnakapw kan en On* oh Paipised pahn mehkihla kedlahs, oh tohn kahnimw kan pahn selidi. 18 Nan Dapanihs rahn pahn rotorotala ni ei pahn kauwehla tuhkehn wisik en Isip wasao.+ Eh* manaman pohnmwahso pahn imwisekla,+ depwek kan pahn kipehdi ih, oh tohn eh kisin kahnimw kan pahn selidi.+ 19 I pahn kadeikada Isip, oh re pahn anahne ese me ngehi me Siohwa.’”
20 Oh ni kaeisek ehun sounpar, ni keieun sounpwong, ni keisuhwen rahn en sounpwongo, Siohwa ketin mahsanihong ie: 21 “Nein-aramas, I kauwelahr pehn Parao nanmwarkien Isip; peho sohte pahn kidikidpene pwehn mwahula de kihong lipwene pwehn kehlailda oh kak kolada kedlahs.”
22 “Kahrehda iet me Kaun Wasa Lapalahpie Siohwa ketin mahsanih: ‘I kin uhwong Parao nanmwarkien Isip,+ oh I pahn kauwehla peh me kehlailo oh peh me ohlao,+ oh I pahn wiahiong kedlahs en pwupwudisang nan peho.+ 23 Eri I pahn kamwarakpeseng mehn Isip kan nan wehi kan oh kihirailpeseng nan sahpw kan.+ 24 I pahn kakehlahda pehn* nanmwarkien Papilon+ oh kihong nei kedlahso nan peho,+ oh I pahn kauwehla pehn Parao kan, oh e pahn ingihngtik laud rasehng aramas emen me pahn melahr mwowe.* 25 I pahn kakehlahda pehn nanmwarkien Papilon, ahpw pehn Parao pahn mwoatoredi; oh re pahn anahne ese me ngehi me Siohwa ni ei pahn kihdi nei kedlahso nan pehn nanmwarkien Papilon oh e pahn doadoahngkihong sapwen Isip.+ 26 Oh I pahn kamwarakpeseng mehn Isip kan nan wehi kan oh kihirailpeseng nan sahpw kan,+ oh re pahn anahne ese me ngehi me Siohwa.’”