Esekiel

41 Ih eri kahreielahng nan Wasa Sarawio,* oh e sohngedi uhr en keile ko; re tehlapki kiupid* weneu apali oh kiupid weneu ni pali teio. 2 Wasahn pedolongo kiupid eisek tehlap, oh dihd en keilen wasahn pedolongo tehlapki kiupid limau apali oh kiupid limau ni pali teio. E sohngedi uwen reirei en Wasa Sarawio, me reireiki kiupid 40 oh tehlapki kiupid 20.

3 Ih eri kohlongala loaleo* oh sohngedi uhr en keilen wasahn pedolongo, oh e mosulki kiupid riau, oh wasahn pedolongo tehlapki kiupid weneu. Dihd en keilen wasahn pedolongo tehlapki* kiupid isuh. 4 Mwuri e sohngedi pere me sallahng Wasa Sarawio, oh e reireiki kiupid 20 oh tehlapki kiupid 20.+ Oh e ndaiong ie: “Ih Wasa Sarawiheo met.”+

5 Ih eri sohngedi dihd en tehnpas sarawio, oh e mosulki kiupid weneu. Kisin pere kan me mi ni keileo oh kapilpene tehnpas sarawio tehlapki kiupid pahieu.+ 6 Kisin pere ko poasoake siluh, ehu mi pohn ehu, kisin pere 30 pohn ehuehu poasoake. Mie pasapas kan kapilpene dihd en tehnpas sarawio me wia mehn utung kisin pere ko, kahrehda mehn utuht ko sohte kohlongala ni dihd en tehnpas sarawio.+ 7 Pali koaros en tehnpas sarawio mie kehndake ehu me pidipidek kohda me kin tehlapla ni eh kohkohdahla ni perehn powe ko.+ Ni emen eh kin kohdahla sang ni poasoake keieu, pere ko ni poasoake keriau kin tehlap sang pere ko ni poasoake keieuo oh pere ko ni poasoake kesiluh kin tehlap sang pere ko ni poasoake keriauo.

8 I kilangada me mie poahsoan ile ehu me kapilpene tehnpas sarawio pwon, oh poahsoanpen kisin pere kan ilehki ahlek ehu pwon, me iei kiupid weneu lel ni keimwo. 9 Tehlap en maslikin dihd en kisin pere ko kiupid limau. Mie wasa wehwe ehu* limwahn kisin pere ko me wia kisehn tehnpas sarawio.

10 Mie wasa ehu nanpwungen tehnpas sarawio oh perehn mwenge ko*+ me tehlapki kiupid 20 ni pali koaros. 11 Mie wasahn pedolong ehu nanpwungen kisin pere ko oh wasa wehweo ni paliepeng oh pil ehu wasahn pedolong ni palieir. Tehlap en wasa wehwe me kapilpene tehnpas sarawio iei kiupid limau.

12 Ihmw me mi ni palikapi me sallahng wasa wehweo tehlapki kiupid 70 oh reireiki kiupid 90; dihd me kapilpene ihmwo pwon mosulki kiupid limau.

13 E sohngedi tehnpas sarawio, oh e reireiki kiupid 100. Wasa wehweo, ihmwo* oh dihd en ihmwo pil reireiki kiupid 100. 14 Mwohn tehnpas sarawio me sallahng palimese oh wasa wehweo tehlapki kiupid 100.

15 E sohngedi uwen reirei en ihmw me sallahng wasa wehweo me mi mwurin tehnpas sarawio, iangahki wasahn alu ko ni pali koaros, oh e reireiki kiupid 100.

E pil sohngedi Wasa Sarawio, Wasa Sarawiheo+ oh palangk me sallahng wasa me kelpeneo, 16 oh pil taht en wenihmw ko, wenihmwtok kan me preim ko wetikitik sang mehn masloale ko,+ oh wasahn alu me mi wasa siluh ko. Limwahn taht en wenihmwo mie dinapw kan+ sang pohn tahto lel ni wenihmwtok ko; oh wenihmwtok ko perperla. 17 Pohnangin wasahn pedolongo oh masloalen oh maslikin tehnpas sarawio oh dihd me kapilpene tehnpas sarawio sosohngdi. 18 Mie kerup+ oh tuhke pahm* kan me perperda+ ni dihdo, ehuehu tuhke pahm mi nanpwungen kerup riemen oh emenemen kerup mie mese riau. 19 Mesen aramas me sohpeiong tuhke pahm apali, oh mesen laion* me sohpeiong tuhke pahm ni pali teio.+ Re perperda ni mwohmw wet nan tehnpas sarawio pwon. 20 Sang pohn tahto lel pohnangin wasahn pedolongo mie kerup oh tuhke pahm kan me perperda ni dihd en wasa sarawio.

21 Uhren wenihmw kan* en wasa sarawio keimw pahieu.+ Mwohn wasa sarawio* mie mehkot me duwehte 22 pei sarawi tuhke ehu+ me kiupid siluh ile oh kiupid riau reirei. Mie uhr kei ni keimwo, oh poahsoane* oh keile ko wiawihkihda tuhke. Ih eri ndaiong ie: “Ih tehpel wet me kin uh mwohn silangin Siohwa.”+

23 Mie wenihmw riau+ ni Wasa Sarawio oh Wasa Sarawiheo. 24 Wenihmw ko mie meh riau me kin ritpeseng, riau ong ehuehu wenihmw. 25 Mie kerup oh tuhke pahm kan me perperda ni wenihmw kan en wasa sarawio, duwehte me mi ni dihd ko.+ Pil mie wasa sikiei ehu me wiawihdahsang tuhke me mi pohnangin mwohn palangko, me mi maslikin ihmwo. 26 Pil mie wenihmwtok kei me preim ko wetikitik sang mehn masloale ko+ oh tuhke pahm kan me perperda ni pali koaros en palangko, oh pil ni kisin pere kan en tehnpas sarawio oh wasa sikiei ko powe.